Read Western Dani Wakkagagerak 31 Bible Online

Wakkagagerak 31 - Western Dani bible

Wakkagagerak 31

¹It Laban apurilogwe nen yogo logonet, “Nit ninogoba amindik-amendek abok aret Yakup mban kolage nagaarik, ti paga nen aap eenggi warak aret eekkolage agaarik o,” yinuk, yogwe at Yakup aruk konengge,

²ndi, at Laban etenggen aa'nduk abe wonagagerak pogom lek alik agagerak kage,

³eeke mbareegi, at Aliku ALA nen Yakup yoge logonet, “Kat yogondak aret o yime teppunuk, kame kagalo-kogoba, kowe-kawot wonogwe me iya nak o. Nage keegak, an nen eraanggi teppagagin lek karum aret logogin o.”

⁴Yoge mbareegi, at Yakup nen akuwi Araken Leya imbirak o karume kambin-ndomba piirogo wonogwe me ka woraawak nduk, yonggo nappereegerak

⁵ka wogo mbareegwa, yorage logonet, “Kumi yi wae. Kit kinogoba etenggen aa'nduk nimbirak abe wonagagerak togop nogo wonage lek kagi kwe, an nogoba Itak ogoba Ala perak, an teppanega'lek narum aret wonage o.

⁶Narum kagak, kit kinogoba ake yabu nomaawi ambik nggwiirit-nggwaarit eeppiige nagagirak nogo kit kineenu aret o.

⁷Yabu togop eeke nagarak onggo, Ndogop wokkirigin o, yinuk, yo'negerak kwe, ne 10 paga wi-wi ee'nake logonet, onggo ndak-ndak wo'nirulik eekerak kwe, neebe perak, maluk eeppanukwak nduk, Ala nen at non mbamborogo wonagagerak o.

⁸At Laban nen ari logonet, kambin-ndomba eeruwak yabuk-ndabuk eerak nda'nage nogo ti, kat yabu eeke onggo aret wokkogo logogun o, ari kenok, kambin-ndomba iyagalo abok aret inaagalogwe ineeruwak yabuk-ndabuk eerak mban aret ndaganakwi, ndi, kambin-ndomba tikarik-tikarok eerak nda'nage ti, kat yabu eeke onggo wokkogo logogun o, ari kenok ti, kambin-ndomba iyagalo abok aret inaagalogwe ineeruwak tikarik-tikarok eerak mban ndaganakwi, eekwi iinok,

⁹ti paga at Ala nen kit kinogoba aanggumi nogo abok aret waganogo an mban aret wo'negerak o.

¹⁰Ndi, kambin-ndomba ineebe wali kuninabit nogwe eyom paga an ne ambi nabi paga kage logonet, kambin wali eeruwak tikarok inom, mili-yanggwi yabuk aago inom, mili-miya eerak inom, nogo mban leenak wali kuninabit nogwe iinok,

¹¹at Ala ayonggo malayikat nogo nen, Yakup wae, yo'nege mbaki, an nen, Wae, yoge mbaki,

¹²at malayikat nogo nen, Kambin ngguunok ineeruwak tikarok inom, mili-laambu yabuk aago inom, mili-miya eerak inom, kero mban leenak egokot agan nugwi wonogwe ti kenegen pegiyet o. At Laban nen kat eeppagit nage nogo nenegen kage nagarik, leenogo piigirak o.

¹³ Kat nen o Mbeten paga kabi kagagindak kobak age kero, yugum kanep mbanak nogo waganogo mippunuk, eyo tayitun amburu yugum nogo paga kilirogo pege logonet, nendage kunogo kumbuk mbangge eyom paga nimbirak lambuneegurak nogo, kogoba Ala an aret o.”

¹⁴Yorage mbareegi, it Leya Araken imbirak nen Yakup yogo logonet, “Yi mendek ndi mendek at ninogoba eyate nogo nit ninake wo'niroorak nduk ambi teppinanggerak mbakop?

¹⁵Nit aakumi endekem mendek inapuri kwak eerogo pinaninuk, nineebe ninonggo nggerengge, ando nit wo'niroorak mendek at mban aret nengge, eekerak nogo lek a?

¹⁶Ti eekerak paga ninogoba amendek nit ninaagalogwe ninom wo'niroorak mendek Ala nen waganogo kat mban wokkegerak me, at Ala nen yokkegerak nogo ndak-ndak aret eeruwok o,” yinuk, yoreegwaarak.

¹⁷Yogo mbareegwa, at Yakup ogoba Itak o Kanan wonage me ka woroorak pipuk eeke logonet, at Laban nogo ndomba ineeruwak mbani nagagerak kagak, apuluk kwe Araken nogo nen at ogoba Laban agugiwak ambi kumaarogo yonggokkolage, at Yakup nen akuwi-apurilogwe inom unta amborowak paga kwippiige, o Paran-Aram logonet kuwak eereegerak amindik-amendek inom, aanggumi inom, nogo kolage, eeppunuk, “An yogondak name na o,” yinuk, aap Aram mendek endage Laban nogo yoga'lek ambokan laganogo punuk, inamindik-inamendek nogo abok aret ko'nok, niyo Eparat nogo obate mbanogo pegak, puut nggelok-nggobok o Nggileyat nogome ari wogogwaarak.

²²At Yakup nogo wagagerak kagak, ne 3 wonogogwaarik, at Laban yogo logonet, “Lek o. At Yakup akwe-apuri inom nogo muk mbaganggaarak o.”

²³Yogo mbareegwa, at Laban awuri kuwak eeppiige nagagerik, Yakup ambo'me mugurok wogogwa-wogogwa, nogo 7 yegak at Yakup nogo puut nggelok-nggobok o Nggileyat taa'nogo wonage me ka woraawok nduk panggo yi wogogwaarak.

²⁴Panggo yi woraanuk, oonikiya nogo yugwi me, Ala nen aap Aram mendek Laban nogo abi paga yoge logonet, “Kat Yakup kimbirak lambumbunuk, agabiti mbaruwak nduk koone maluk ambiriluk ambi yoge keyo liippu o.”

²⁵Yoge mbareegi, at Yakup nogo o Nggileyat puut nggelok-nggobok me ooliya wuppunuk wonage me, at Laban ka wage nagagerik, awuri inom time aret nogo yuwok nduk ooliya wureegwaarak.

²⁶Wuppogo nogogwaarik, at Laban nen Yakup yoge logonet, “Kat nambokan lagangge logonet, an napurilogwe wim kugun negen wogoren wagandak yi, nonggop nduk eekendak?

²⁷Nonggop nduk nambokan lagangge logonet, an yo'nirulik kumaat-kumaat mbagani wogotak? Kat nen, An yogondak name nagalo-nogoba wonogwe me iya na o, yo'nenetak nen, mbuti luu'ngget inom, nggitat inom, oone eekugak, ndawi warogo ale'nggen paga nappagi woraawok lak, yo'nirulik eekendak o.

²⁸Napurilogwe-nombologwe inagandin neyak mbaninake logonet, keyage linggik-kambuk agago wappiyaakit lak, kat wi negen aret ee'nuk wagandak o.

²⁹An nomaawi ambik aret me, mondok maluk eerogo pagakit nduk aret wagarak kwe, kii'me oonikiya nogo yege me, kogoba Itak ogoba Ala nen nabi paga yo'nege logonet, Kat Yakup kimbirak lambumbunuk, agabiti mbariyak nduk koone maluk ambiriluk ambi yoge keyo liippu o, yo'negerak paga we teppagagi o.

³⁰Yogondak kat kame kagalo-kogoba iya noorak, Ao! mbake nagandik, wagandak ti, op aret kwe, an nagugiwak perak, nonggop nduk yogoot kumaa'nuk wagandak o?”

³¹Yoge mbareegi, at Yakup nen ari logonet, “Kat kapurilogwe yi, ndinogo tebeninake keyo, mba'nuk, nagabiti nen yokkirulik wagarak o, nami.

³²Ndi, kat kagugiwak ti perak, ta nen wonok wagaarak porogo wonage kenegen kage kenok, at eenik logorak lek mondok warogo puurak aret. Nit abok ninenggaanom paga kamendek ambi inom nabenogo wonok wagaarak kwaakkage kenok, ti togon koloorak op aret o.” At Yakup nen Laban agugiwak akwe Araken nen kumaa'nuk wagagerak nogo eenggo'lek me, yoreegerak.

³³Yoge mbareegi, at Laban nogo nen Yakup awooliyana unggunuk kwaake, kwe Leya awooliyana unggunuk kwaake, ti'nuk, it komologwe inayeloman mbere'ndak nogo inawooliyana unggunuk kwaake, eerit nage nagagerik, mondok lek aret mbareegi, peebi irip paga at Araken awooliyana kwaari unggwage mbareegi,

³⁴at kwe Araken nen ogoba agugiwak nogo unta amborowak paga punuk kwi'nagak nggoorak abu'na tebembunuk, ogombaga kwi'ndak wonage kagak, ogoba nen kwaarit-mberaarit eereegerak mendek abu lek kenok,

³⁵apuluk Araken kwi'ndak me kwaarikit nduk, eeke mbareegi, kwe Araken nogo nen ari logonet, “Nogoba o. An yogondak tut kage me, kenggaanom paga mi'nariyak meek kenok, wonage me, mbe'nirugun o,” yoge kagak, ogoba nogo nen kugiwak nogo kwaareegerak kwe, abu lek aret kagagerak.

³⁶Eeke mbareegi, at Yakup enete aagi wu eeppunuk, Laban mberege logonet, “Nami o. An nano eekirak? An maluk ngge eeppagagirak paga kat mu'neren-ma'neren nege agandik?

³⁷Ninamendek wonage me abok aret abut laganogo pekkagandak nogo kamendek ambi wonok wogoorak waganggendak a, lek a? Waganggendak kenok, kat kawuri inom, an nawuri inom, nen ninowak loonninabuwak nduk, kamendek waganggendak ti, ninowagam pi mok o.

³⁸An keya nage nagagirik, tahun 20 paga nimbirak logonet, kaanggumi ndegeninake neegak, kambin-ndomba inaagalogwe ndaganako logonet, tiirogo piigo logolik. Ndi, kaanggumi ngguunok ambi warogo nengge logolik mban.

³⁹Nggeewo ta'ngge nen kaanggo ambi nibinogo nengge logonet, eyagate pugu nogo waganogo wokkiri waga'lek obaane'me an nen aret pege, liingge nen oonikiya nen aakumi yogoot kumaakaatak me, Awi yaru o, yo'nege kenok, awi yake, eeke nagagirak o.

⁴⁰Liingge kenok mo andi ee'nake, oonikiya kenok togwi ee'nake, eeke kagak mban aret wu nogo yega'lek aret ndegeninake nagagirak.

⁴¹Togop aret eeke nimbirak logonet tahun 20 eereegirak. Ndi, kat kapurilogwe mbere'ndak yi, wo'nenok nduk, yabu eekkege neegak, tahun 14 aret eeke, ndi, kambin-ndomba wo'nenok nduk togon tahun 6 aret eeke, eeke nagagirak nogo o. Yabu eeke nagagirak onggo, Ndogop wokkirigin o, yagandak nogo, ne 10 paga aret ndak-ndak wo'nirulik wi-wi ee'nake nagandak nogo o.

⁴²An nogoba Itak ogoba Ala inom, Abarakam ogoba Ala inom, ndi, at Itak nen Ayuk Wuke Menggerak inom, nogo nen an narum logonetak lek nen, kat nen an neenggime ambi panega'lek we aret mugogo nappani woranetak kwe, an andi-pandi ee'nake kagak, kat keyabu nggwiirit-nggwaarit eerit nege nogo at Ala nen neyareegerak me, kat kii'me nogo yege me wone yokkegerak ti aret o,” yoreegerak.

⁴³Yoge mbareegi, at Laban nen Yakup yoge logonet, “It komologwe yi imbirak ti, an napurilogwe aret. Inaagalogwe togon an nombowologwe aret. Kambin-ndomba togon an namendek mban. Ndi, yi mendek ndi mendek kat kenegen kage yime togon an namendek mban aret me, it kumi napuri yi inom, inaagalogwe inom, yogondak an nonggop togon maluk eeppiyoorak?

⁴⁴Togop eeriyak lek me, Wone ndogop mbaneegurak nogo, yinuk, aberak logowok nduk, kat nimbirak wone ambi abuk nggaruk togon mbanogo puwok o.”

⁴⁵Yoge mbareegi, at Yakup nogo nen yugum ambi waganogo ineenu agak mippunuk,

⁴⁶akwe-apuri yorage logonet, “Kit apit aret kineenggi wonggok yugum wonok logoni woraanip o.” Yorage mbareegi, yugum nogo wonok at pereegim nogome logonogo pogo nogogwaarik, logoneegwam taa'nogo kwi'na'nuk mbi nunggugwaarak.

⁴⁷Mbi nogo nenok, at Laban nen yugum logoneegwaarak nogo endage Yegat-Takaruta toongge, ndi, at Yakup nen, “Nggalet o,” yinuk, toongge, eereegwaarak.

⁴⁸Eeko nogogwaarik, at Laban nen Yakup yoge logonet, “Nit nimbirak wone mbanggwi yi, kobak ee'ninake kero, yugum logonak yi ninigen pekkenok aberogo nineenu ogo logowak o,” yinuk, yugum logonak endage, “Nggalet o,” yogo nogogwaarak.

⁴⁹Ndi, at Laban nen wone alik ambi ari logonet, “Kat nimbirak lambunik lek kat kalik, ndi, an nalik, wonogwe niigak, aap wim wogwe iyo nggayo mengga kwak Ala nen enegen wo'ninake aret logogin o,” yinuk, yereegerak me, o ti endage ambi Mitapa aret yogo nogogwaarak.

⁵⁰Ti'nuk, Laban wone ando kunogo ari logonet, “Aap ambi nimbirak wonage lek me, yinuk, an napurilogwe yi, maluk eerogo piige, an napurilogwe iigak, kumi alik ambi wogonake, eeke keenok, an kunduk, kat kunduk, Ala enegen wo'ninake kagak aret eerumunggun o.”

⁵¹Yinuk, Yakup ambinom yoge logonet, “Yugum ambiret mippege logonet, ando logonogo pogoorak yi, nimbirak wone mbanggoorak nogo abeko logowok nduk pogo o.

⁵²Yugum logonak yi inom, ndi, wone nimbirak mbanggoorak ninami age kero, yugum ambiret mippogoorak yi inom, imbirak ninigen pekkenok, nineenu agak pogoorak yi, wonage kagak, obaga mbo kat nen an maluk eeppani wage, ndi, an nen kat maluk eeppagi nage, eerugun mondok lek o.

⁵³Wone yugu yi kagak alik ambi eekwi niinok, Abarakam ogoba Ala inom, Nakot ogoba Ala inom, imbirak inogoba ogoba Ala inom, nen nimbirak ninowak loongge logogin o,” yinuk, wone abuk nggaruk togon mbaneegwaarak. Mbanggo nogogwaarik, at Yakup nen, “Nogoba Itak Ayuk Wuke Menggerak nogo owak o,” yinuk, kumbuk mbangge nagagerik,

⁵⁴puut nogo paga ndomba ambi Ala ake warogo lappunuk, oreewi time wonogwe nogo abok aret wiiragagerak wogo mbareegwa, laago nogo it abok aret nunggugwaarak.

⁵⁵Ndi, ko'lu kuubondendok at Laban nogo nen ombowologwe inom, apurilogwe inom, inagandin eyak mbaninake logonet, ale'nggen inoba piige nagagerik, iyokan ame aret nagagerak.