Read Western Dani Wakkagagerak 33 Bible Online

Wakkagagerak 33 - Western Dani bible

Wakkagagerak 33

¹At Yakup enegen pe'nage nagagerik, Etawu awuri ineebe empat ratus inom at ka nogwe iyareegerak. Nogwe iige nagagerik, apurilogwe nogo ando kwe Leya inom piige, ando Araken inom piige, ando kumi mbere ayeloman nogo inom piige, eeke nagagerik,

²it kumi mbere ayeloman nogo inaagalogwe inom inaa'nduk piige, ti'nuk, Leya aagalogwe inom it inambo'me piige, ndi, Araken aagaluk Yutup imbirak inambo'me peebi lombok piige, eereegerak.

³Eeppiige nagagerik, at Yakup nogo alik it inenaame aa'nduk ari nanuk, oweeluk Etawu owagam taati nen ne 7 paga ena nggween paga wu'nagak eeke logonet, keyage wareegerak.

⁴Nogo eeke kagak, at Etawu nogo nggare agan Yakup ka nage nagagerik, lamooppunuk, agandin eyak mbangge, eenggi enggaanok me komamin wappunuk, leenggu maakwi, eereegwaarak.

⁵Ti'nuk, at Etawu nogo enegen tiya ari logonet, it kumi inom, wologwe inom, wonogwe iige nagagerik, “Aakumi kinom wonogwe yi, taani o?” Yoge mbareegi, at Yakup nen ari logonet, “Lek o. Wologwe yi ti, Ala nabuwa nen wo'negerak kayeloman an napuri aret o.”

⁶Yoge mbareegi, kumi ayeloman aagalogwe inom wonogwe me taati panggo yi nogo nogogwaarik, nggween paga inendobanggun yindumbunuk, keyage wappugwi,

⁷ti'nuk, at Leya aagalogwe inom wogo nogogwaarik, nggween paga inendobanggun yindumbunuk, keyage wappugwi, ndi, peebi age yobok togon at Araken aagaluk Yutup imbirak wogo nogogwaarik, it kunduk nggween paga inendobanggun yindumbunuk, keyage wappugwi, eereegwaarak.

⁸Abu aret keyage wappogo mbareegwa, at Etawu nen Yakup yoge logonet, “Ndi, kambin-ndomba ambik lombok aago wogoren nogwe ninom aabuk agarak yi, kiniki ngge koombunuk eerogo nappiigendak?” Yoge mbareegi, at Yakup nen, “Kiniki ale'nggen nomba'nok nduk, nappiigirak o, noweeluk.”

⁹Yoge mbareegi, at Etawu nen, “Nawot o. Ti yagandak kwe, an koweeluk togon namendek ambik aret wonage me, yi kat kaanggumi aret me teppatu o.”

¹⁰Yoge mbareegi, at Yakup nen, “Togop ari mage ubi! Kat kiniki abe paga wo'nakendak nogo ti, Ala etenggen pekkogo nagaatik, inikime ale'nggen kogo mengga kwak, kat ketenggen togop aret keege nagarik, niniki ale'nggen ambik ee'nakerak me, kiniki ale'nggen nombake logonet, kake leenogo nappiigirak ti, kolaamunggun o, noweeluk.

¹¹An togon at Ala nabuwa mbake logonet, namindik-namendek ambik aret wo'negerak nogo ando mogonogo we kumbi wappagukwak wokkirikit nduk, wonok wagarak me, kolagak nak o,” yinuk, nimi-nomoorak mban ari mbareegi, at Etawu nogo nen, “Kolagak naakit o.”

¹²Ari nagagerik, “An naa'nduk tu nikkiyaakit nduk, aret wa'nip o.”

¹³Yoreegerak kwe, at Yakup nen ari logonet, “An ti, elege-aabologwe iniyok lik iniyok lek inom, kambin-ndomba inaagalogwe awo wurik inelak nunggwi inom, yilugu-palugu wogoren wage yi, pegiyet o, noweeluk. Tat yonggonggolaga'lek mbet-mbet aret wogoren nagun kenok, naanggumi abok aret kambit nookwak me,

¹⁴an kayeloman napurilogwe inom, naanggumi inom, it tu nogo mengga kwak eerok aret ndegeniren kambo'me yanabek kat o Erom wonage me, keya woraakit nduk, nowe, kat kaa'nduk aret nage logot o.”

¹⁵Yoge mbareegi, at Etawu nen ari logonet, “Togop kenok, an nawuri ando ndegenggabit nawak nduk, leenogo piinok na o.” Yoreegerak kwe, at Yakup nen, “Togop eeriyak ti mage o. We nabuwa mbakak kiniki ugun aret namunggun o, nowe,” yoreegerak.

¹⁶Yoge mbareegi, at Etawu nogo iyok paga yungguninuk, ame Teyit aret nagagerak.

¹⁷Nage kagak, at Yakup nogo perak, o endage Tukot wage nagagerik, nogome logonet, at logorak awi wuke, at aanggumi logorak inawi wuke, eeppunuk wonagagerak me, o nogo endage Tukot aret yogo nogogwaarak.

¹⁸Ti'nuk, at Yakup o Paran-Aram nen ineebe obeelom aret o Kanan yaga'lelo Tikem panggo yi wogo nogogwaarik, o Tikem nggwe aru taati nakkagak, endekem nggwe time ooliya wuppunuk wonogogwaarak.

¹⁹Nggween ooliya wureegim nogo ti, aap Tikem aput Kenot apurilogwe inanggween me, inoona onggo wu mbuti perak 100 paga kungge nagagerik,

²⁰nogome aret Ala ake warogo kani kunggak yuwak nduk, yugum logonogo pege nagagerik, o endage, “Iterali Inogoba Ala Alik Omaawi Menggerak o,” yinuk, tooneegerak.