Read Western Dani Wakkagagerak 35 Bible Online

Wakkagagerak 35 - Western Dani bible

Wakkagagerak 35

¹Ne ambi paga Ala nen Yakup yoge logonet, “Kat koweeluk Etawu ambo'me laganogo punuk kole nage me, tu paga oolo nimbirak lambunggo nogogum nogome nage logomenggendik time logonet, kogoba Ala an nake warogo kani kunggak yuurak yugum logonogo pege logonok nduk, o Mbeten time nak o.”

²Yoge mbareegi, at Yakup akuwi-apurilogwe inom, aakumi at inom wonogwe nogo inom, abok aret yorage logonet, “An aaninggin noba agagerak nage me yeenggwa nege, noorak nombareegim nogome nage neegak narum wonage, eereegerak nogoba Ala nogo ake warogo kani kunggak yuurak yugum logonogo puurak nduk, o Mbeten noorak me, Ala kagak kinagugiwak alik mendek porogo wonogwe nogo kinoba iingga nggoorogo muunogo nappunuk, kiniki kikak naka'lek obeelom logonet, mbogoyum ngget mendek mban yikkologo logonip o.”

⁴Yorage mbareegi, it nogo nen inagugiwak nogo inom, inaruk tiimba pugunik inom, abok aret kuwak eeppunuk muunogo Yakup wogori wogo mbareegwa, at Yakup nen wonok eyo teno alome o Tikem koorok time aret nggween taambereegerak.

⁵Nggween taambege nagagerik, akuwi-apurilogwe inom o Mbeten wogwe iigak, it aakumi inom wonogogwaarak enaagan-ambokan nogome nen muguren worookwak nduk, Ala nen mondok inagabiti agago piyareegerak.

⁶Piyareegerak wonogwe iigak, at Yakup akuwi-awuri inom o ilin ambi endage Lut nogo ti, Mbeten aret me, nogome aret ari wogogwaarak.

⁷Time ari woraanuk, Ala ake warogo kani kunggak yuurak nduk, yugum logonogo punuk Ala alut eereegerak. O nogo ti, aa'nduk Yakup oweeluk nen wake kero, kole wage me, Ala imbirak lambuneegerak kenok, endage, “Ala Imbirak Lambuneegim Mbeten o,” yinuk, tooneegerak nogo aret.

⁸Nogome wonogwe me, at Iribaka ndegengge nagagerak kwe endage Ndebora nogo kangge mbareegi, at eebe wonok o Mbeten abu'me eyo teno alome time aret nggween taambereegwaarak me, o nogo endage, “Teno Alome Le Yogo Menggam o,” yinuk, tooneegwaarak.

⁹At Yakup o Paran-Aram nen ame wage me, Ala imbirak lambunggo nogogwaarik, ale'nggen Yakup oba pereegerak.

¹⁰ Ale'nggen oba pege nagagerik, Yakup yoge logonet, “Aa'nduk nen kendage Yakup yokkogo nagaarak kwe, yogondak nen kat kendage ti, Iterali aret yokkogo logogun o,” yinuk, Ala nen Yakup endage Iterali aret toongge,

¹¹ ti'nuk, ne ambi paga Ala nen at yoge logonet, “Omaawi Lombok Menggerak Ala an aret me, kapuri-kombowologwe ambik wigak yuwak nduk, ndaganabit nage logomunggun o. Kat paga nen kanebunu nggwok aret wiganogo piyamenggendak paga nen yi aakumi ndi aakumi inanebunu alik mendek ambik aret wigannarugun o. Kat keebe ambit paga nen mban yi aap ndi aap inendagembogut aret arugun o.

¹²Ndi, o yi, it Abarakam Itak imbirak wogoragagirak nogo aret kat kombowologwe kinom unde logomunggup nduk, wokkigi o,” yinuk,

¹³yoge nagagerik, Yakup teppunuk, yoreegim taati nen lagi nage kagak,

¹⁴ at Ala nen wone yoge nagagim taa'nogo ami age kero, Yakup nen yugum logonogo mippege nagagerik, Ala alut eeke logonet, yugum nogo paga anggur amburu inom, tayitun amburu inom, kilirogo pege nagagerik,

¹⁵o endage, “Mbeten aret o,” yinuk, toonogo pege, eereegerak wone aberogo mbanak nogo ti aret o.

¹⁶At Yakup apurilogwe inom Ala alut eeko nogogwaarik, Mbeten nogome teppunuk wogo logonet, o Eparata awo unggwi waga'lek nda negen kagak, at kwe Araken aagaluk nda'nariyak enegen pagak yereegerak kwe, nda'nariyak meek agagerak.

¹⁷Nda'nariyak abu meek tit kwe, nda'nage kagak, kumi elege ndaganaka ambi nen Araken yoge logonet, “Kwe yi wae. Kaagaluk wulaga aret nda'nage me, kagabiti mbarugun o,” yoge kagak, nda'nage mbareegi,

¹⁸at Araken mondok kambuurak iniki worok yikit nduk eeke logonet, aagaluk endage, Mben-Oni tooneegerak kwe, at ogoba nen wulaga nogo endage, “Mbeniyamin o,” yinuk, tooneegerak.

¹⁹At Araken kangge mbareegi, at eebe waganogo o Eparata tu nogo menggam ambet paga time aret nggween taambereegwaarak. O Eparata ti, Mbe'lekem aret yogo menggaarak.

²⁰Abu aret nggween taambogo mbareegwa, at Yakup nen nggween taanak nogo paga yugum piiriwak eerogo mippereegerak me, kwe Araken taambereegwaarak paga piiriwak eerogo mippereegerak nogo yogondak wonage aret o.

²¹Ndi, ti eeppunuk, Iterali apuri inom o nogo mbo punuk, wogo nogogwaarik, o Migaran-Eret kagak aru nggwe taati ooliya wuppunuk, wonogogwaarak.

²² Wuppunuk wonogwe me, at Uruben nogo nen ogoba ayeloman mendek waganeegerak kwe Mbilaka nogo, imbirak nogo yereegwaarak. Imbirak nogo yereegerak nogo at Iterali aruk koneneegerak. At Yakup apuri ineebe lambuk togon ti, 12 aret ndaganabeegerak.

²³Kwe Leya aagalogwe inendage ti, Yakup aput manggu, Uruben. Ndi, ambo'me Timeyon, Lewi, Yekura, Itakat, Tebulon, aret ndaganabeegerak.

²⁴Ndi, kwe Araken nogo aagalogwe ti, Yutup Mbeniyamin imbirak ndaganabeegerak.

²⁵Ndi, at Araken ayeloman kwe Mbilaka nogo aagalogwe ti, Ndan Natali imbirak ndaganabeegerak.

²⁶Ndi, at Leya ayeloman kwe Tilapa nogo aagalogwe ti, Nggat Atet imbirak ndaganabeegerak. At Yakup o Paran-Aram wonage logonet, apuri ndaganabeegerak ti aret.

²⁷ At Yakup nogo ogoba Itak o Kiriyat-Araba koorok ame Mamere time at ombo Abarakam wonagagim nogome wonage me ka wagagerak. O Kiriyat-Araba nogo ti, Keboron aret o.

²⁸Ka wagagerak wonage kagak, at Itak nogo ndarak kagak, tahun seratus delapan puluh eeppunuk,

²⁹at eebe abu anggok li a'nuk, kangge nagagerik, ombomini aa'nduk kambunuk nogogwaarak nggwogoba wonogwe me iya nage kagak, agabolo nogo at apurilogwe Etawu Yakup imbirak nen nggween taambereegwaarak.