Read Western Dani Wakkagagerak 38 Bible Online

Wakkagagerak 38 - Western Dani bible

Wakkagagerak 38

¹Ne ambi paga at Yekura nogo oreewi nogome wonogwe iigak, teppiinok, aap endage Kira anebunu Arulam mendek imbirak logokit nduk, ka wagagerak.

²Imbirak nogome wonage logonet, aap Kanan mendek endage Tuwa apuluk kolaga tawe ambi enegen kenok, kolage nagagerik, imbirak nogo yege logonet,

³kwe nogo abila age mbareegi, aagaluk wulaga ndappunuk, endage Et tooneegerak.

⁴Ti'nuk peebi kwe nogo abila age nagagerik, aagaluk wulaga ndappunuk, endage Onan tooneegerak.

⁵Ti'nuk peebi, at Yekura o Ketip nagagerak kagak, aagaluk wulaga alik ambi ndake nagagerik, endage Tiyela tooneegerak.

⁶Ti'nuk, at Yekura nogo nen aput manggu wulaga Et nogo kwe Tamat kolaawak nduk wogoreegerak.

⁷Wogoreegerak kwe, Yekura aput manggu Et nogo ti, Ala enggaanom paga maluk ambik eerit nage mbareegi, Ala nen wareegerak.

⁸Kangge mbareegi, at Yekura nen at Et awuluk Onan nogo yoge logonet, “Kat koweeluk Et nogo obaane'me pugu lek aret kanggerak me, endage ki logowak nduk, koweeluk togwe pegerak kwe Tamat ti, kolage logomenggendik, kimbirak nogo yu o.”

⁹Yoge mbareegi, at awuluk iniki nen, “Kwe yi aagaluk ndarigin kenok, An naput, yaga'lek, Noweeluk aput aret, yogo logogun kagi,” mba'nuk, akwe nogo pigagangge kenok, oweeluk apuri wigak yukwak nduk, at oona mendek nogo we endekem kilirogo nappege nagagerak.

¹⁰Ndi, at Onan eereegerak nogo ti, Ala nen maluk aret kage nagagerik, wareegerak.

¹¹Wake mbareegi, at Yekura nen, “An napuri imbirak inookerak kokwak, naput peebi ndarak Tiyela yi, togop aret warukwak,” mbake nagagerik, ayinggelo Tamat nogo yoge logonet, “Kwe yi wae. An naput Tiyela tawe age tokkage logonet, we togwe aret kagalo-kogoba wonogwe me kinom a nak o.” Yoge mbareegi, at Tamat nogo agalo-ogoba wonogwe me iya nagagerak.

¹²Iya nagagerak wonage kagak, logonuk negen at Tiyuwa apuluk Yekura akwe nogo kambeegerak. Kangge mbareegi, tabun ndoombunuk, wonagagerik, peebi nen at Yekura oreeluk Arulam mendek endage Kira nogo imbirak o Timana aanggumi ndomba ineeruwak mbanit nogwe me nogogwaarak.

¹³Nogwe iigak, aakumi nen kwe Tamat nogo yogo logonet, “Lek o. Kat kayinggelo Yekura nogo aanggumi ndomba ineeruwak mbaniyak o Timana noorak nduk wage o.”

¹⁴Yogwe nogo at Tamat aruk konengge nagagerik, “Yekura aput Tiyela nogo abu aret tawe agaarak kwe, an wo'naka'lek me,” mbake nagagerik, mbogoyum kumi togwe yiko menggaarak nogo nggoorogo punuk, mbogoyum obeelom alik mendek yikkolage, etenggen yum nobakkolage, eeppunuk, o Timana nogo menggam o Enayim tu unggwogo menggam taa'nogo arum kwi'ndak aret wonagagerak.

¹⁵Kwi'ndak wonage me, at Yekura nogo nage logonet, at ayinggelo aret kwe, etenggen nobarak me, “Yi nayinggelo,” mbaka'lek kumi ya wuginakak nogo mendek mbake nagagerik, tu ambet paga kwi'ndak wonage me, panggo yi nanuk, yoge logonet, “Kwe yi wae. Nimbirak lambunuwok o.” Yoge mbareegi, at kwe nogo nen, “Nimbirak lambuniyak onggo nano wo'niriyak?”

¹⁷Yoge mbareegi, at Yekura nen, “An naanggumi kambin aagaluk ambi nappagi woraagin o.” Yoge mbareegi, at Tamat nen, “Ndi, nappani waga'lek keegak, an porogo logorak ambi wo'niriyak ilik?”

¹⁸Yoge mbareegi, at Yekura nen, “Kat porogo logorak an nano mendek wokkiriyak mbaken?” Yoge mbareegi, at kwe Tamat nen, “Keenggi amburu pegak cap inom, kamberaarenggen inom, kowaanggun keenggim ti inom, wo'niriyak o.” Yoge mbareegi, wogoge nagagerik, kwe nogo imbirak nogo yereegerak aret abila agagerak.

¹⁹At kwe Tamat nogo ame wage nagagerik, at etenggen paga yum nobarak wonagagerak nogo inom, at mbogoyum obeelom mendek yi'nuk nagagerak nogo inom, abok aret nggoorogo punuk, mbogoyum kumi togwe yiko menggaarak nogo obaane'me yippunuk, wonagagerak.

²⁰Ndi, at Yekura ageerok kwe porogo wonage nogo waganggak kambin aagaluk kwe wogoriyak yoreegerak nogo wogori nawak nduk, at ore Andulam mendek nogo nappereegerak.

²¹Nappereegerak nage nagagerik, it aap nogome mendek kin ya wok iigak nage logonet, “Wologo wae. Kwe ya wukak ambi o Enayim tu paga ya'i wonagaarak nogo ambi kogotak ilik?” yinuk, yoranet eereegerak kwe, it aap nogo nen, “Kumi ya wukak ti mendek o yime ambi wonogolik o.”

²²Yogo mbareegwa, at aap nogo iyok paga yungguninuk wage nagagerik, Yekura yoge logonet, “Wulaga wae. An nage nagarik, kwe nogo kwaake mbaki, it aakumi time mendek nen yo'nogo logonet, Kumi ya wuginakak ti mendek o yime ambi abu wonogolik o, yo'nogo mbaka, wagi o.”

²³Yoge mbareegi, at Yekura nen ari logonet, “Kambin aagaluk yi, at kwe ti onggo wogoriyak nduk nappigirak kwe, kimbirak lambunulik me, ninamenena paganemenggerak paga ninenggali age kero, namendek ti, op aret kolaayok o,” yoreegerak.

²⁴Ti'nuk, tut kenagan penembunuk, it aakumi nen at Yekura yogo logonet, “Kat kayinggelo kwe Tamat nogo ya wukak age nagaarik, muk abila agaarak wonage o.” Yogo mbareegwa, at Yekura nen, “Eebe eenik ngge-ngge kani kumbuwok nduk, wa nanip o.”

²⁵Yoragagerak eebe wonok woraawak nduk, eeko mbareegwa, at kwe nogo nen it aap nogo yorage logonet, “Amindik-amendek an porogo wonage yi nen aret nabila eekerak me,” ari nagagerik, eenggi amburu pegak cap inom, mberaarenggen inom, waanggun inom, titigirage logonet, “Yi ta amendek kaamun? yinuk, Malenuwak nduk, wogori nanip o.”

²⁶Yoragagerak wogori nogo mbareegwa, Yekura nogo nen, “Ti an namendek nogo aret kagi,” mbake nagagerik, “Kwe yi nen maluk eekerak lek o. Napuluk Tiyela wogogibok nela nen wonagarak me, maluk eeki o.” Ari nagagerik, kwe nogo imbirak ambinom lambungga'lek aret wonagagerak.

²⁷Ti'nuk, peebi at kwe Tamat aagaluk abu nda'nariyak eyom age mbareegi, “Kwe yi aagalogwe kulu'mbere aret ndarigin,” yelok kogogwaarak.

²⁸Ndi, at Tamat nogo elege ndarikit nduk, enegen paganak yagan wake kagak, elege ambi eenggi peenok mban aa'nduk wangge mbareegi, kwe ambi elege ndaganaka nen ligi awut laambu paga eenggi mbarembege nagagerik, ari logonet, “Yi aa'nduk aret nda'naga o.”

²⁹Ari mbareegi, eenggi nogo yabok togon ee'nuk lagangge kagak, oreeluk nogo aa'nduk nda'nage mbareegi, at kwe elege ndaganaka nogo nen, “Kat komaawi paga pelenogo pegak wundi wagandak me,” yinuk, endage Peret aret tooneegerak.

³⁰Ti'nuk, ore eenggi ligi mbarenak nogo nda'nage mbareegi, endage Terak aret tooneegerak.