Read Western Dani Wakkagagerak 39 Bible Online

Wakkagagerak 39 - Western Dani bible

Wakkagagerak 39

¹At Yutup nogo it aap Itamayen mendek nen wonok o Metit nogo mbareegwa, aap Metit mendek ambi Pirawun inom yabu eekwi ambi at eebe arum waka inowe Potipat nogo nen eebe kunggolagagerak.

² Eebe kunggolage nagagerik, at ogoba nogo imbirak wonage me, at Aliku ALA nen Yutup nogo yeenggwaage kagak, yi yabu ndi yabu eeke nogo op mban eerit nage nagagerak.

³At Yutup nogo Aliku ALA imbirak wonage, ndi, Aliku ALA imbirak logonet, yi yabu ndi yabu eeke ti, op mban eerit nage, eeke nogo Potipat nen enegen kage nagagerik,

⁴iniki ale'nggen mbake logonet, at eebe ndegenit nege, ndi, at ame inom, amindik-amendek inom, abok aret arum wonage, eeke logowak nduk, mippereegerak.

⁵At ame inom, amindik-amendek inom, arum logowak nduk, mippereegerak kuli nen at Yutup wonage paga at Aliku ALA ale'nggen aap Metit mendek Potipat nogo ame pege logonet, amindik-amendek oome mendek inom, endekem mendek inom, abok aret obeelom eeppege nagagerak.

⁶Obeelom mban eeke kenok, at Potipat nen amindik-amendek abok aret waganogo, “Kat mban aret arum logot o,” yinuk, Yutup eenggi paga mban pege nagagerik, at we noorak mendek kenok mban koongge nagagerak. At Yutup nogo ti, eebe mondok amuni mbanak obaabut yanggonak lombok wonagagerak.

⁷Togop wonage me, ne ambi paga at ogoba Potipat akwe nogo nen iniki nengge nagagerik, at Yutup yoge logonet, “Nimbirak nogo yuwok o.”

⁸Yoge mbareegi, at Yutup nen, “Neebi o,” ari nagagerik, “An nogoba ame yi mendek ndi mendek kooniyak nogo ti, nogoba koonggeelik, an mban koongge logowak nduk, mippanege mbareegi, amindik-amendek abok aret an mban unde wonage me, neebi o.

⁹An o yi arum logowak nduk, tiyappaneegerak an kokwak ambi lek aret. An nogoba nen yi mendek ndi mendek ambi teppatulik, abok aret an unde eeppanege logonet kwe, kat keebe perak, an unde eeppanulik me, an nonggop togon Ala enggaanom paga maluk nggwok eeriyak yagan o?”

¹⁰Yoge kagak kwe, kwe nogo nen ko'lu-kii'me nabenak mban yogetak kwe, imbirak nogo yege, imbirak oome wonage, eeka'lek mbaganggak mban eeke nagagerak.

¹¹Ne ambi paga aakumi abu nap lek iigak, at Yutup yabu eerikit nduk oome unggwagagerak alik wonage me,

¹²at kwe nogo nen ambogoyum eenggi kok pigagangge logonet, “Nimbirak nogo yuwok nduk, mok ubi.” Yoge mbareegi, at Yutup nogo, kole nggarek togon endekem wungge kagak, ambogoyum nggoorak mban kwe nogo eenggime agagerak.

¹³At Yutup ambogoyum nggoorak mban kwe nogo eenggime kagak, nggarek ari mbareegi,

¹⁴at kwe nogo nen it aap at ame yabu eeko menggaarak ayeloman ando wiiragagerak wogo mbareegwa, yorage logonet, “Nit abok aret meek eerogo pinanikit nduk, aap Iberani mendek wonok wagaarak yi nen, Nimbirak lambunuwok o, yinuk, neya unggwage mbaki, Keek, amborowak paga kwippege neenok,

¹⁵mbagangge kagak, ayum nggoorak mban waganggirak yi kaanip o.”

¹⁶Yorage nagagerik, mbogoyum nggoorak nogo ogonggelo wage kenok, nikkaakit nduk, porogo wonage me,

¹⁷ogonggelo Potipat nogo ame wage mbareegi, eereegerak wone nogo mbininogo yoge logonet, “Aap Iberani mendek wonok wagandak kayeloman nogo nen an, Meek, nomba'nuk, maluk eerogo panikit nduk, neya unggwegerak kwe,

¹⁸noone nggwok, Keek, amborowak paga kwippege mbaki, ayum nggoorak mban nowagam taati punuk, wunggerak o.”

¹⁹“Kayeloman nen togop aret ee'nakerak o,” yinuk, Potipat akwe nogo nen mbininogo ogonggelo yoge mbareegi, anini ambik eeppege nagagerik,

²⁰Yutup keele maarogo aap inowe endagembogut nen it aap maluk eekwi iinok, mambiigo menggam time aret mambereegerak.

²¹Mambereegerak wonage kwe, at Aliku ALA nogo Yutup imbirak aret wonagagerak. Imbirak logonet, abuwa mbake, ndi, aakumi keele maarogo mambiigaatak inarum menggaarak inowe nogo nen iniki ale'nggen Yutup oba puwak nduk, eeppege, eereegerak me,

²²aap keele maarak inarum menggaarak inowe nogo nen it aap keele maarak wonogwe nogo abok inarum logonet, “Yogop eeriyak, ndogop eeriyak,” abok aret at nen mban kooninake logowak nduk, mippereegerak.

²³At Aliku ALA nogo Yutup imbirak wonage, ndi, imbirak logonet, eerit nage nogo abok aret op mban eerit nage, eeke mbareegi, it aap keele maarak inarum menggaarak inowe nogo nen yi eeriyak ndi eeriyak koonogo yoraga'lek at Yutup nen mban kooninake logowak nduk, oba pereegerak.