Read Western Dani Wakkagagerak 40 Bible Online

Wakkagagerak 40 - Western Dani bible

Wakkagagerak 40

¹Ti abok aret eeko mbareegwa, peebi aap mbere, ambi ti, anggur amburu tooka inowe, ndi, ambi oroti woraka inowe, imbirak nen aap inogoba endagembogut Metit mendek enggaanom paga maluk eeko mbareegwa,

²aap endagembogut Pirawun nogo awuri at ame yabu eeko menggaarak amburu tooka inowe nogo inom, oroti woraka inowe nogo inom, imbirak eereegwaarak paga anini ambik age nagagerik,

³keele maarogo wogoren aap keele maarak inarum menggaarak inowe ame at Yutup keele maarak wonage me nogome inom mambiya nagagerak.

⁴Mambiige mbareegi, it aap keele maarak inarum menggaarak inowe nogo nen Yutup yoge logonet, “Kat nen inarum logot o,” yinuk, punogo pege mbareegi, ndegeninake nagagerak.

⁵Punogo pereegerak inarum wonage kagak, aap endagembogut Metit mendek awuri mbere, ambi, amburu tooka inowe nogo inom, ambi, oroti woraka inowe nogo inom, imbirak keele maarak wonogwe nogo nen ne ambit oonikiya paga imbirak inabi kogogwaarak. Inabi kogogwaarak nogo ti, eebe inom, alom inom, alitak aret kogogwaarak.

⁶Kogo nogogwaarik, wonogwe me, ko'lu kuubondendok at Yutup nogo it imbirak iya wage nagagerik, imbirak iniki piirik ogogwaarak wonogwe iige nagagerik,

⁷it aap Pirawun awuri inogoba ame inom keele maarak wonogwe nogo kin wogiige logonet, “Noreewi o. Kit nonggop nduk kinetenggen puru aago ogotik o?”

⁸Yorage mbareegi, it nen at yogo logonet, “Nimbirak ninabi kogoorak kwe, Alom togop kogotak o, yinuk, aap wone mbininogo ari menggerak lek kenok ogoorik o.” Yogo mbareegwa, at Yutup nen yorage logonet, “At Ala nen wone eebe yorage menggerak lek mbakop? Kinabi kogotak ti, mbininogo yo'ninip o.”

⁹Yorage mbareegi, at anggur amburu tooka inowe nogo nen abi kagagerak ari logonet, “An nabi kagarak ti, eyo anggur ero ambi an nenggaawak paga taati wonage kagarak o.

¹⁰Eyo nogo eno'mbak kenagan paga wonage. Ndi, eno'mbak kenagan nogo paga agarip awo lagit wage kagak, anggen ayo wappunuk, anggen aret yege nagaarik, mbet-mbet na'mbu age kagarak o.

¹¹Anggen na'mbu agaarak nogo mbanogo aap endagembogut Pirawun nengge menggerak aniyoowak neenggime wonage nogo paga mburunogo wuppunuk, Pirawun eenggime pi nage kagarak o,” yoreegerak.

¹²Yoge mbareegi, at Yutup nen, “Kabi kagandak nogo ti, wone eebe yokkiri o.” Ari nagagerik, “Eyo eno'mbak kenagan kagandak nogo ti, eebe ne kenagan paga logorak nogo aret.

¹³Ndi, ne kenagan logomenggendik, aap endagembogut Pirawun nogo nen piinogo wumbagage logomenggerik, aa'nduk yabu eeke nagaginom kobaane'me nogome eeke logonok nduk, mippagage mbaremenggi, at Pirawun ake amburu toologo wogori nagak eeke nagagindak nogo ndak-ndak aniyoowa'na toologo eenggime pi nagak eeke logomunggun o.

¹⁴Eeke logonet, noba abe'nage kenok, it aap inanebunu Iberani mendek iname nen keele maarogo kumaa'neren yime pani wogogwaarak o Metit yime logonet, an maluk ambi eeka'lek neegak, keele maarogo o apit me yime mambani wagaarak wonage me, keele piinogo wumbanuwak nduk, kat endekem wungge logomenggendik, op aret logonet kenok, nabuwa mba'nuk, eekirak wone nogo mbininogo aap endagembogut Pirawun nogo yo'nu o,” yinuk, yoreegerak.

¹⁶Ndi, Yutup nen at ore anggur amburu tooka inowe abi kagagerak eebe mbininogo op aret yoge nogo at oroti woraka inowe nogo konengge nagagerik, Yutup yoge, “An togon nabi ambi kage logonet, muun yum kenagan yugu oroti yonggolak me, an nanobak paga piyaninuk nage kagarak o.

¹⁷Ndi, muun yum obaga nogome ti, oroti mendek etenggen alitak lombok worarak yonggolak Pirawun wogoriyak wonok nage me, yirowe-ndirowe wogo nagaarik, nenok ndi yogwe kagarak o,” yinuk, yoreegerak.

¹⁸Yoge mbareegi, at Yutup nen ari logonet, “Kat kabi kagandak nogo wone eebe yi aret o.” Ari nagagerik, “Muun yugu kenagan kagandak ti, eebe ne kenagan logorak nogo aret.

¹⁹Ne kenagan logonuk, aap endagembogut Pirawun nogo nen kenggaanok mbanogo keebe waganogo eyo paga mippagamenggaarak me, yirowe-ndirowe nen kenggaanggum nenok ndi yuurak nogo aret kagandak o,” yinuk, yoreegerak.

²⁰Wone nogo yo'nuk, ne kenagan wonogogwaarik, aap endagembogut Pirawun nogo nda'nagagim ndak-ndak ari wage mbareegi, awuri inom eyabu eeko menggaarak nogo mendek inake laago nggwok lake logonet, anggur amburu tooka inowe nogo inom, oroti woraka inowe nogo inom, imbirak at awuri abok inenggaanom paga mippiya wage nagagerik,

²¹at Yutup inabi kogogwaarak eebe mbininogo yoragagerak nogo ndak-ndak at anggur amburu tooka inowe nogo eyabu aa'nduk eeke nagagerak ndak-ndak niyoowak wonok Pirawun eenggime pi nagak eeke logowak nduk, mippege,

²²ndi, at oroti woraka inowe nogo perak, eebe waganogo eyo paga tugunogo pege, eereegerak.

²³Eeppiige mbareegi, aap amburu tooka inowe nogo nen Yutup nogo oba abera'lek ami eerogo punuk wonagagerak.