Read Western Dani Wakkagagerak 42 Bible Online

Wakkagagerak 42 - Western Dani bible

Wakkagagerak 42

¹At Yakup nogo nen, “O Metit perak, mbi nunggwi wonogwe o,” yogwe aruk konengge nagagerik, at apuri yorage logonet, “Kit nonggop nduk at ambi nen eerigin at ambi nen eerigin we yerak-terak aago ogotik?

² O Metit paga mbato wonage naruk konenggirak me, nit yime mbi abu nen kambukwak, nineenik logowok nduk, mbato onggo mbani nanip o.”

³Yorage mbareegi, it Yutup oweewi ineebe 10 o Metit mbi onggo kuni nogogwaarak kwe,

⁴at Yutup awuluk peebi mendek Mbeniyamin perak, at Yakup nen, “An naput yi, tu paga time kobak arukwak me, ya logowak o.” Ari nagagerik, at Mbeniyamin nogo inom nappuulik imbirak puk agagerak.

⁵O Kanan togon mbi noogelo ambik aret agagerak me, it aakumi nogome mendek mbi onggo kunugun o Metit nogwe me, at Iterali apuri nogo inom aret nogogwaarak.

⁶Ndi, o Metit nogome at Yutup nagawan indo wonage kagak, it aakumi time mendek abok aret nen mbato kunggolaagun nogwe iinok, at Yutup nen mbato wogoragak eeke wonage me, Yutup oreewi nogo mbi onggo mbanuwok nduk nogo nogogwaarik, at Yutup abu'me taati ina nggween paga wu'na'nuk, keyage wappereegwaarak.

⁷At Yutup nen oweewi aret wogwe yelok iyareegerak kwe, aakumi inambik negen a'nuk oone panggok togon kin wogiige logonet, “Kit ngga nen wogotak?” Yorage mbareegi, it nen, “Nit o Kanan nen mbato koba onggo mbanuwok nduk wogo o.”

⁸Yogo mbareegwa, at Yutup nen, “An noweewi nogo aret,” yelok iyareegerak kwe, it nogo nen perak, at eebe liippuulik kobak aret eereegwaarak.

⁹ Kobak eeko mbareegwa, at Yutup nen o maan it eeriyak abi kagagerak nogo abeke nagagerik, yorage logonet, “Kit aap nggaganagalo yi, niname yime, Tum waka'lek ambi wonogwe iyaamun ilik, lek a? yinuk, kinigen yombooni wogotak kiigi o.”

¹⁰Yorage mbareegi, it nen, “Lek o, ninogoba. Nit kat kayeloman mini yi, ninambi onggo kunggolaawok nduk mban aret wogoorak o.

¹¹Nit aap nggaganagalo mendek lek o. Ninogoba ambit nen aret nda'ninabeegerak me, nit pilit wone yokkugwi lek o. Abet aret mbato kunggolaawok nduk aret wogo o.”

¹²Yogo mbareegwa, at Yutup nen, “Lek! Nit niname yime, Tum waka'lek ambi wonogwe iyaamun ilik, lek a? yinuk, kinigen yombooni wogotak aret kiigi o.”

¹³Yorage mbareegi, it nogo nen, “Ninogoba o. Nit kayeloman yi ti, o Kanan time ninogoba ambit nen nineebe 12 aret nda'ninabeegerak me, at age yobok ndarak ti, ogoba imbirak kagak wogoorak. Ndi, ambiret perak, kobak agagerak o.”

¹⁴Yogo mbareegwa, at Yutup nen, “Togop yogotak kwe, lek! An yokkiragarak abet aret. Kit yi, nggaganagalo aret wogotak.

¹⁵Kit nggaganagalo wogotak kiyaamun a, lek a? yinuk, kinabut mbanikit nduk, aap o Metit mendek endagembogut Pirawun endage paga owak mbanogo wone ambi yokkira o. Kit kinawuluk peebi mendek nogo wa naga'lek kiigak, kit kiname namunggup lek o.

¹⁶Kit kinoone yogotak nogo abet aret yogotak a, pilit yogotak a, kinabut mbanikit nduk, kinawuluk yogotak nogo kit ambi nen wa nage kagak, kit apit aret keele maarak yime logomunggup o. An yagarak ti, eeka'lek kiinok, kit nggaganagalo nen pilit agan wogotak kinombarikit nduk, Pirawun owak o!”

¹⁷Yorage nagagerik, it aap nogo abok aret keele maarogo mambiyareegerak wonogwe iigak, ne kenagan aret agagerak.

¹⁸Nogome keele maarogo mambiyareegerak nogo mbere yippunuk, ko'lu paga at Yutup nen it nogo yorage logonet, “An togon Ala nagabiti mbake minggirak me, kineenik op logorak nduk, yogop ee'nip o.

¹⁹Kit abet aret yogotak kenok ti, aap ambi keele maarak yime wonage kagak, kit ando mbato onggo kunggotak wonok kiname kinakuwi-kinapuri mbi abu alik negen wonogwe me, wogora noorak op kwe,

²⁰kit kinoone yogotak, Abet aret yagaarak, kinomba'nuk, kineenik teppinagakit nduk, kinawuluk age yobok ndarak nogo wonok woraamunggup o.” Yorage mbareegi, it nogo nen, “Op aret,” yogo nogogwaarik,

²¹at ambi nen at ambi yogak eeko logonet, “Ninawuluk aaninggin-paaninggin eeppogo mbareegu, Noweewi o. Nabuwa mba'nuk teppaninip o, ari kagak, ninaruk konenulik eeppereegurak nogo paga aret onggo aaninggin warak mendek ninoba age yi kaanip o.”

²² Yogo mbareegwa, at Uruben nogo nen ari logonet, “Ninawuluk maluk eeppuurak mage o, yokkiragagirak nogo lek a? Yokkiragagirak kwe, noone taganeegutak nogo. Ndi, ninawuluk amiya wundeegerak nogo onggo yogondak nit ninoba age yi kaanip o,” yereegerak.

²³Yogwe nogo at Yutup aruk konengge logonet kwe, aruk konengga'lek mbaruwak nduk, at ambi nen Iterali wone paga, “Ti yogop yaga o,” yinuk, abut laganogo yogak eeke kenok, aap yi, ninoone aruk konengga'lek aret mbako nogogwaarak.

²⁴Ndi, it wone yogwe nogo at Yutup aruk konembunuk, eebe tayo yi nanuk, le yereegerak. Le yinuk, iya wage nagagerik, “Timeyon eenggi keele maa'nip o,” yinuk, awuri nogo yorage mbareegi, inigen iigak eenggi keele maarogo pereegwaarak.

²⁵Keele maarogo pogo mbareegwa, at Yutup nogo nen at ayeloman inalik mbawok yorage logonet, “Inagaruna mbato eno korok togon yonggorirogwe, inawu mbato onggo pegaarak nogo inom yonggoppiigwi, eeko logomonggotik, it tu paga nenet noorak kambu inom yonggologo wogorogwe, ee'nip o.” Yoragagerak nogo ndak-ndak abu yonggologo wogorogo mbareegwa,

²⁶at Yutup oweewi nogo nen mbato nogo keledai amborowak paga luurik-maarak eerogo punuk, iname nogogwaarak.

²⁷Nogo nogogwaarik, nogo yuwam oolo time ari nanuk, nogo yuwok nduk eeko logonet, at ambi nen mbato keledai wogoraakit nduk karun ambe piinogo pekkage nagagerik, awu mbato onggo pereegerak nogo mbato inom yonggolak anewam time wonage kagagerak.

²⁸Kage nagagerik, “Nawu mbato onggo pigirak nogo woolik muunogo negaruna yonggoppegerak wonage yi ka woraanip o.” Yorage mbareegi, at ambi nen at ambi yogak eeko logonet, “At Ala nen nit nonggop eeppinanege agaarik o?” yinuk, iniki abu ma'nage nagagerik, inagabiti nen inaganak wareegerak.

²⁹Inogoba Yakup o Kanan wonage me, nogo nogogwaarik, eerinabeegerak wone nogo abok aret mbininogo yogo logonet,

³⁰“At aap o Metit unde menggerak nogo ka nogo mbako, Kit o yime nonggop kaamun? nduk, yombooni wogotak kiigi o, yinuk, nggaganagalo negen eeppinaninuk, oone panggok togon yo'nirage mbaki,

³¹nit nen yogo logonet, Lek o, ninogoba. Nit nggaganagalo lek o. Pilit lek abet aret nit mbato kunggolaawok nduk aret wogo o.

³²Ninogoba ti, ambit nen nineebe 12 aret nda'ninabeegerak me, ambiret kobak agagerak. Ndi, ninawuluk age yobok ndarak ti, o Kanan ninogoba imbirak kagak wogoorak o.

³³Yogo mbako, at aap o Metit arum menggerak nogo nen nit yo'nirage logonet, Togop kenok, kit aap pilit wone yogolik abet liirogon yogo monggotak neenu arikit nduk, kit wogotak ambi an nimbirak ya'i neegak, kit ando mban mbato onggo mbanggotak ti, wonok kinakuwi-kinapuri mbi abu wonogwe me kiname nogo logomonggotik,

³⁴kinawuluk age yobok ndarak nogo wonok kinom wogwe kiinok, It aap yi, nggaganagalo lek abet aret yogo menggaarak iigi, kinombake logonet, kinore ambi kagak namunggotak nogo kinom namunggup nduk, wokkirage, ndi, o yime mbato ugun aret onggo kunggola wagak yumunggup nduk, teppinagage, eerigin, yo'niragaarak o,” yinuk, inogoba yoreegwaarak.

³⁵Yogo nogogwaarik, mbato inegaruna yonggolak nogo kilirogo pogo logonet, inawu mbato onggo pereegwaarak nogo inegaruna lombok abok aret yonggolak wonage nogo inogoba Yakup inom inigen kogo nogogwaarik, inagabiti ambik aret ogogwaarak.

³⁶Inagabiti ambik ogo nogogwaarik, Yakup nen yorage logonet, “An naput Yutup nogo eebe lek age, naput Timeyon nogo lek age, ndi, yogondak napuluk Mbeniyamin wonok noorak yogwe, eekwi ti paga an napuri tigitogon lek eerogo piyoorak eekwi me, aaninggin-paaninggin alik negen noba kwi'nagaarak wonage kagi o.”

³⁷Yorage mbareegi, at Uruben nen ari logonet, “Mbeniyamin ti, an nen wonok enaani ndegenit nage logominggirik, enaani aret wonok woraagin o. Wonok kiri waga'lek neenok perak, at obaane'me an napuri imbirak aret inoo'nok nduk, inogoba an nen aret punogo pigi o.”

³⁸Yoreegerak kwe, at Yakup nen, “Ti yagandak kwe, lek o. At owe nogo muk kambeegerak kagak awuluk ambit yi mban aret nimbirak wonage me, wonok noorak mondok lek o. Kinom nogo logonet, tu paga taati eebe ninggin age kagak, kinalik wogwe kiinok, aap anggok kenen lu aago yi, iniki wakko'nok kambunuk nogo menggam nawak o, yinuk, eeppanumunggup o,” yoragagerak.