Read Western Dani Wakkagagerak 43 Bible Online

Wakkagagerak 43 - Western Dani bible

Wakkagagerak 43

¹O time abok aret mbi noogelo mondok iya lombok agagerak.

²It Yakup apuri o Metit nen mbato kuninuk nogogwaarak nogo abu aret nonggo nogogwaarik, at Yakup nen at apuri yorage logonet, “Kit nen mbato mbuuluk ambi mbet kuni nanip o.”

³Yorage mbareegi, at Yekura nen, “Aap Metit mendek ti nen nit yo'nirage logonet, Kit wogo logonet kenok, kinawuluk ti, kinom lek kagak, an nenggaawak paga ya'i woroorak mondok lek o, yo'niragaarak me,

⁴kat nen nit ninawuluk yi, Kinom nanip o, yo'nirage keenok perak, nit op aret nogo logomonggoorik, mbato kuninuk wokkombanok woraagun o.

⁵Ndi, Kinom nanip, yo'nirage lek kenok perak, nit nagun mondok lek o. At aap ti nen, Kinawuluk kinom lek kagak, an nenggaawak paga ya'i woroorak lek, oone mondok omaawi yo'niragaarak me, meek o, nogoba.”

⁶Yoge mbareegi, at Iterali nen yorage mbareegi, “Kit nen, Ninawot ambi wonage kagak wogoorak, yogotak ti paga wonok nogwe kiinok, niniki wakkolaagin me, nonggop nduk, Wonage, yogotak o?”

⁷Yorage mbareegi, it nen yogo logonet, “At nen mban nit nineebe inom, ninaaganapuri inom, kin wonok mbin wonok yo'nirage logonet, Kinogoba eebe kambeegerak ilik, eenik wonage a? Kinawuluk ambi wonage ilik, lek a? yinuk, at iniki ngge mba'nuk yo'nirage nogo nit ugun nineenggo'lek logonet, at ari mugurok mban yogwe niigak, Kinawuluk wonok yime woraanip o, yo'niragaarak me tit ari agandik ya?”

⁸Yoge nagagerik, at Yekura nen ogoba Iterali ambinom yoge logonet, “Nit inom, kat inom, ninakwe-ninapuri inom, mbi abu nen kambukwak, nineenik logowok nduk, at wulaga ti, Kinom mbato kuni nanip, yo'nirage keenok, mbet-mbet aret nawok o.

⁹An nen aret wonok nimbirak naminggirak me, liirogon aret wonok kiri waga'lek neenok, at eebe kokwak awi yarak ti, an neebe aret me, kat maluk eeppagagirak onggo nobaalombok nen koonogo eeppagage neegak, neebe kambi noorak kuli aret aruwak o.

¹⁰Yogondak kat nonggop ari keyaamun tokkakwi niigak, ne mbere nanuk wogo menggam mendek wonogo ogoorik o.”

¹¹Yoge mbareegi, it inogoba Iterali nogo nen, “Togop kenok, kit nen aap o Metit unde wonage nogo iniki ale'nggen eerogo wogoriyak yi mendek ndi mendek obari obeelom mendek inom, kundali inom, nggiin amburu inom, yibinggami inom, teno anggen inom, woromo anggen inom, abok aret kuwak eeppunuk, kinegaruna yonggologo wogori nanip o.

¹²Ndi, wu kinegaruna yonggolak kwaakkogotak ti, iniki kobak a'nuk, yonggoppegaarak kagak eerukwak me, wu ti inom, alik ambi inom, waganggo logomonggotik,

¹³kinawuluk kinom aret nanuk, mbet-mbet aret woraanu o.

¹⁴At Omaawi Lombok Menggerak Ala nogo nen aap o Metit unde menggerak ti, iniki yanggonogo pemenggerak paga kit kinabuwa nen Timeyon Mbeniyamin imbirak nappiya woramenggerak kinom aret woraamunggup o. Ndi, an yi perak, napurilogwe lek arit nogwe paga niniki wakkolage logonet, kambuurak kenok ti, op mban aret o.”

¹⁵Yorage mbareegi, it Yutup oweewi nogo nen yi mendek ndi mendek aap o Metit unde menggerak nogo wogoriyak waganggwi, wu aa'nduk mbato onggo pugu inom, peebi onggo puurak inom, waganggwi, ee'nuk, inawuluk Mbeniyamin inom o Metit aap Yutup nogo owagam nogogwaarak.

¹⁶Nogo mbareegwa, at Yutup nogo nen awuluk Mbeniyamin oweewi inom wogwe iige nagagerik, ayeloman at ame arum menggerak nogo yoge logonet, “It wagaarak ti, yogondak liingge paga an ninom mbi noorak me, wogoren an name piya nage logomenggendik, kat nen kambin-ndomba ambi warogo lake, mbi lake, eeke a nak o.”

¹⁷Yoge mbareegi, ayeloman at ame arum menggerak nogo nen at Yutup yoreegerak ndak-ndak aret oweewi nogo wogoren Yutup ame piya nagagerak.

¹⁸Yutup ame wogoren piya nagagerak ti paga inagabiti ambik a'nuk, iniki mbako logonet, “Nit wu mbato onggo wogorogoorak kwe, pelaarogo ninegaruna yonggoppegaarak nogo paga aret wo'niren o yime pinani wagaarak me, nit yime ugun wonogwe niigak, pippinanogo logomenggaarik, ayeloman aret eerogo pinanogo logonet, ninaanggumi keledai it aret kolaagun kogo o,” mbareegwaarak.

¹⁹Togop mbako nogogwaarik, at Yutup ayeloman ame arum menggerak tungga'nggi paga wonage nogo owagam nogo nogogwaarik, yogo logonet,

²⁰“Ai, ninogoba. Nit aa'nduk mbato onggo kuni wogoorak nogo aret wogo o.

²¹Mbato kuninuk, tu paga oolo time nogo yogo logonet, karun ambe piinogo pekkanet nogo nogoorik, wu mbato onggo pogoorak nogo, ambi woolik abu ndak-ndak aret nit ninegaruna mbato yonggolak anewam mbaki, ta nen ninawu ninegaruna yonggokerak nineenggo'lek me, wu ti wokkiragak nit mbato onggo puurak wu alik ambi inom aret wonok wogo o.”

²³Yogo mbareegwa, at Yutup ayeloman nogo nen it yorage, “Kit kiniki piirik logonet, kinagabiti mbarugup o. Kinawu ti, an muk aret waganggirak kwe, kinogoba Ala inom, kit kinogoba ogoba Ala inom, nogo nen kinegaruna yonggoppinagit nagaarak kagi o,” yorage nagagerik, at Timeyon nogo wonok wogora wundi wagagerak.

²⁴Ti'nuk, aap Yutup ame arum menggerak nogo nen wogoren Yutup ame unggwi nage nagagerik, iniyok kooruwak nduk niyo toologo wogorage, inaanggumi keledai nogo inambi wogorage, eereegerak.

²⁵Eeke mbareegi, “O liingge at Yutup ninom mbi nagun,” inaruk koneneegwaarak me, wage kenok wogoruwok nduk yi mendek ndi mendek at wogoriyak wonok wogogwaarak nogo pipuk eerogo pereegwaarak.

²⁶Eerogo punuk wonogwe me, at Yutup wage mbareegi, yi mendek ndi mendek pipuk eerak nogo wonok at Yutup abu'me taa'nogo punuk, ina nggween paga tebe yinuk, keyage wappereegwaarak.

²⁷Keyage wappogo mbareegwa, at Yutup nen, “Kit kineebe nonggop wonogwe?” yinuk, kin wogiige logonet, “Kit kinogoba aap anggok wonage yo'nogotak nogo at eebe eenik wonage ilik?”

²⁸Yorage mbareegi, it nen Yutup yogo logonet, “Nit kayeloman mini ninogoba ti, at eebe obeelom eenik aret wonage o.” Yogo logonet, inendobanggun yindumbunuk, ayuk wureegwaarak.

²⁹Ayuk wuko mbareegwa, at Yutup nen inagalo ambit nen ndaganabeegerak awuluk Mbeniyamin nogo enegen kage nagagerik, yorage logonet, “Kit nen, Nit ninawuluk age yobok ndarak ambi wonage o, yo'nogotak nogo yi aret ilik?” Yorage nagagerik, awuluk Mbeniyamin nogo yoge logonet, “Naput o. Ala kabuwa nen obeelom eerogo pagage logogin o.”

³⁰Yoge nagagerik, at Yutup nogo awuluk lombok nogo aret mbareegi, abuwa nen iniki puru agan nage logonet, le yuurak aret eeke mbareegi, mi'na'nuk, at nogo yege menggim unggwage nagagerik, le yereegerak.

³¹Le ari nagagerik, le amburu nogo koorogo punuk, wundi wage nagagerik, le ambinom yuurak eeke kero, iniki ogogumbuk eeppunuk, “Mbi-mbiingga lakotak ndoonogo pi woraanip o.”

³²Yorage mbareegi, at Yutup ayeloman mini nogo nen Yutup alik kwippugwi, Yutup oreewi nogo inalik kwippiigwi, ndi, it aakumi Metit mendek nen aap Iberani mendek inom lambunik mbi nunggwi kenok, inogole mbako menggaarak me, it Metit mendek inalik kwippiigwi, eereegwaarak.

³³At Yutup oreewi nogo manggu nen nugwa enabooluk kuli nda'nogogwaarak ndak-ndak kwippiinet nage mbareegi, inigen pet-pet yogo logonet, “Wi,” mbakugak,

³⁴mbi larak at Yutup mbi nengge menggerak eyo ndoonak paga pi wogogwaarak nogo oreewi ne ambit mbo ndooniranet nogo logonet, at Mbeniyamin perak, ne 5 aret ndoonogo wogoreegwaarak me, it nogo abok aret Yutup inom lambunna'nuk mbi inom, amburu inom, ndinggik-ndonggok aret nunggugwaarak.