Read Western Dani Wakkagagerak 44 Bible Online

Wakkagagerak 44 - Western Dani bible

Wakkagagerak 44

¹Ti eeppogo nogogwaarik, at Yutup nogo nen at ayeloman ame arum menggerak nogo wone lengganogo yoge logonet, “It aap yi, inalitik-inalitak inegarun paga it aaninggin wonok noorak ndak-ndak mbato mondok nggwik eerogo yonggorirage, inawu nogo inegaruna mbato yonggolak anewam time yonggologo piige, eeke logomenggendik,

²an naniyoowak mbuti perak paga ogobakkigirik nogo wagangge logomenggendik, wulaga enabooluk mbato kuniyak nduk awu wonok wagaarak nogo inom egaruna mbato yonggolak anewam yonggologo pu o.” Yoge mbareegi, Yutup yoreegerak nogo ndak-ndak aret eereegerak.

³Ko'lu kuubondendok at Yutup oreewi inaanggumi inom iname nawak nduk, at Yutup nogo nen nappiyareegerak.

⁴Nappiyareegerak o nogome nen wundi nogo nogogwaarik, awo tayo yi naga'lek iigak, at Yutup nen at ayeloman nogo yoge logonet, “Wulaga wae! It aap nagaarak nogo muguren inambokan nak o. Ineebe iya nage logomenggendik, yorage logonet, Nit obeelom eeppinagagwi niigak, onggo negen nonggop nduk maluk eeppinanogotak?

⁵Niyoowak yogoot kumaakotak ti paga ninogoba nen niyo nengge, tili pagangge, eeke menggerak nogo lek a? Ti eekotak ti, abu maluk aret eekotak, yora nak o,” yinuk, nappereegerak.

⁶Nappereegerak tu paga awo nogwe me, iya nage nagagerik, at Yutup wone yereegerak nogo aret yoragagerak.

⁷Yorage mbareegi, it nogo nen at aap nogo yogo logonet, “Ninogoba o. Nit togop abu eerulik me, kat nonggop nduk wone togop yo'nira wagan? Nit kayeloman mini togop eeriyak abu meek o.”

⁸Yogo logonet, “Aa'nduk mbato kuninuk niname o Kanan nogo nogogurik, wu mbato onggo pereegurak nogo ninegarun anewam yonggolak mban mbareegi, Kumaakkolaawi, yuulik aret wonok kira wogoorak me, yogondak nonggop togon kat kogoba ame nen mbuti perak-emas kumaa'nuk wonok wogoorak kero ari agandik?

⁹Nit kayeloman mini wogoorak yi, ambi nen abet aret aniyoowak ti wonok wagaarak kage logomenggendik, aap ti mondok aret wake logonet, nit abok aret kat kayeloman logorak pinani nanok o,” yinuk, at ayeloman nogo yoreegwaarak.

¹⁰Yogo mbareegwa, at aap nogo nen, “Ti yogotak nogo op aret kwe, kit ando maluk eerulik kinomba'nuk, kiname ugun nogwe kiigak, niyoowak kumaa'nuk wonok wagaarak ti mban nayeloman logowak nduk wonok nagin o.”

¹¹Yorage mbareegi, it nogo abok mbet-mbet aret inegarun mbato yonggolak keledai amborowak paga wonok nogwe nogo nggoorogo wuppi wogo nogogwaarik, inegarun lombok ambe keele piinit nogogwaarak.

¹²Keele piinogo pogo mbareegwa, at aap Yutup ayeloman nogo nen at manggu ndarak nen nok-nok peebi enabooluk ndarak kuli aret inegarun ambi mbiganogo malik-malok eerogo pegak eerit nage logonet, enabooluk ndarak nogo egaruna wondekkage nagagerik, at nagawan indo aniyoowak nogo at Mbeniyamin egaruna anewam yonggolak wonage kwaakkage nagagerik, waganeegerak.

¹³Wagangge mbareegi, at oweewi nogo abok aret inayum yirik nibinik-ndelenak eerogo punuk, inamindik-inamendek abok aret keledai nogo paga luurik-maarak agago punuk, iniyok paga yungguninuk, o yaga'lelo wogogwam nogome nogogwaarak.

¹⁴At Yutup nogo ame time wonage me at Yekura oreewi inom Yutup owagam nogo nogogwaarik, inagabiti mbakak inanobak nggween paga kumbunuk, “Ai,” yinuk, keyage wappogo mbareegwa,

¹⁵at Yutup nen yorage logonet, “Wologwe! Kit eekotak yi, nonggop nduk togop eekotak? Aap nggwok an kokwak nen, yi mendek ndi mendek kumaakaatak kenok, tili pagangge logonet, ineenu ageelik nduk eekotak?”

¹⁶Yorage mbareegi, at Yekura nen ari logonet, “Ninogoba o. Nit nonggop yokkiruwi. At Ala nen aret nit kayeloman mini maluk eekkologogurak onggo aret eeppinanege me, nit nonggop togon, Nit lek o, yinuk, ninaana'le mbanggoloorak? Nit nen ambi yuurak mondok lek aret o. Nit togon, aap kat kaniyoowak egaruna yonggolak waganggerak nogo togon, abok aret kat ninogoba kayeloman aret agago tebenninaburak o.”

¹⁷Yoge mbareegi, at Yutup nen, “Kit yogotak ti, an togop abu mbarulik o. Ata, aap an naniyoowak egaruna yonggolak kwaakkegerak ti, alik mban nayeloman logowak nduk, teppege neegak, kit ando obeelom enaani aret kinogoba wonage me ka nanip o,” yinuk, yoragagerak.

¹⁸Nogo yorage mbareegi, at Yekura nogo nen Yutup owagam taati panggo yi nage nagagerik, yoge logonet, “Ai, nogoba! Kat keebe o Metit yime kendagembogut Pirawun kwak aret me, an kayeloman nen wone ambi yokkiriyak mbakirak me, yokkege neegak, mbe'nirugun o. Ata, Op aret, yo'niru o.”

¹⁹Yoge nagagerik, “Nogoba o. Kat nen aret nit kayeloman kin wo'niige logonet, Kit kinogoba inom, kinawot ambi inom, wonogwe ilik, lek a? yinuk, yo'nirage mbareegin,

²⁰nit nen yokkogo logonet, Nit ninogoba ti abu anggok agaarak kwe wonage o. Ndi, ninagalo ambi nen aagalogwe mbere ndaganabeegerak me, oweeluk ti kambeegerak kwe, ninawuluk perak, ogoba abu aakelo logonet, ndakkolagagerak me, iniki kunik lombok wonage, yokkereegurak nogo o.

²¹Yokkogo mbareegu, kat nen, At eebe nenegen kaakit nen wonok wa'nu o,

²²nit kayeloman yo'nirage mbareegin, nit nen ninogoba kat yokkogo logonet, Ogoba nen wulaga ti alik eeppegeelik me, alik eeppigin kenok, ogoba iniki wakko'nok kambigin o.

²³Yokkugwi niigak kwe, kat nen, Kinawuluk age yobok ndarak nogo kinom lek kagak, an nenggaawak paga ya'i woroorak mondok lek o, yinuk,

²⁴nabi-naberak mban yo'nirage mbareegin, nit niname nogo nogogurik, kat yo'niragagindak nogo kayeloman ninogoba abok aret mbininogo yoreegurak o.

²⁵Ti'nuk peebi ninogoba nogo nen, Kit nen mbato mbuuluk ambi mbet kuni nanip o,

²⁶yo'nirage mbareegi, nit nen at yogo logonet, Nit mbato onggo mbanugun o Metit noorak nogo ti, ninawuluk age yobok ndarak nogo ninom lek nit mban nogwe niinok, at o Metit unde menggerak enggaawak paga nagun lek me, ninom nogwe kenok ti, noorak op aret kwe, lek kenok perak, nit noorak meek o, ninogoba.

²⁷Yogo mbareegu, at kayeloman ninogoba nen yo'nirage logonet, An nakwe Araken nen wologwe ineebe mbere mban aret nobaane'me ndaganabeegerak nogo kineenu aret o.

²⁸At ambi nogo an nen nappereegirak nage mbareegi, nggeewo ta'ngge nen nibineegerak me, yogondak kuli nen an nenegen kaga'lek aret wonage agarik o.

²⁹Ndi, yogondak at awuluk yi, imbirak waganggo logomonggotik, kinom nogo logonet, tu paga taati eebe ninggin age kagak, kinalik wogwe kiinok, an aap nanggok kenen lu aago yi, niniki wakko'nok, kambunuk nogo menggam nagin aret, yo'niragaarak.

³⁰Togop aret yo'niragaarak me, ninogoba o. Wulaga ninom lek an noreewi ninom ninalik mban kayeloman ninogoba wonage me ka nogwe niinok, at iniki panggonak aput yi aret me,

³¹eebe ninom lek enegen kage logomenggerik, mondok kambigin o. Ndi, nit kayeloman ti eerumonggoorak paga ninogoba kenen lu aago ti, iniki wakko'nok kambunuk nogo menggam nappugun aret kogo o.”

³²Yoge nagagerik, at Yekura nen ambinom yoge logonet, “An kayeloman nen nogoba yoge, Wulaga yi, an nen aret ndegenit nimbirak naminggirak kwe, eebe wonok kiri woraagin lek kenok, at eebe kokwak awi yarak ti, an neebe aret me, kat maluk eeppagagirak onggo nobaalombok nen koonogo eeppagage neegak, neebe kambi noorak kuli aret aruwak, yo'nuk, wogoorak me, nogoba o.

³³An nawuluk obaane'me kat kayeloman logokit nduk, yime teppanege logonet, an nawuluk ti, oweewi inom nappiyanok nduk yokkigi o.

³⁴At wulaga yi, ninom lek ninalik mban ninogoba wonage me nonggop togon noorak? An nogoba aaninggin-paaninggin alik negen oba age nogo nenegen koorak neebi o,” yinuk, yoreegerak.