Read Western Dani Wakkagagerak 47 Bible Online

Wakkagagerak 47 - Western Dani bible

Wakkagagerak 47

¹Yorage nagagerik, at Yutup nen at oweewi ineebe 5 mban wogoren Pirawun wonage me nage nagagerik, yoge logonet, “Nogoba inom, nowe-nawot inom, inaanggumi kambin-ndomba inom, lembu-tapi inom, inamindik-inamendek abok aret o Kanan nen wonok wogo nagaarik, o Nggoten time wonogwe iigak, noreewi ando yi mban pekkeyaawak nduk, wogoren wagi o.”

³Yoge mbareegi, at Pirawun nen Yutup oweewi nogo yorage logonet, “Kit kineyabu nano eeko monggotak?” Yorage mbareegi, it nen, “Nit kayeloman mini yi, ninombomini nen wande'me aret kambin-ndomba unde monggoorak o.”

⁴Yogo nogogwaarik, ambinom yogo logonet, “O Kanan paga mbi noogelo ambik age logonet, nit kayeloman mini ninaanggumi iri'ngga noorak kunduk lek age mbaki, yime we laalu negen logorak nduk wogoorak me, o Nggoten time logorak op ilik? yinuk, yokkiri wogo o.”

⁵Yogo mbareegwa, at Pirawun nen Yutup yoge logonet, “Kat kagalo-kogoba kowe-kawot muk keya wagaarak wonogwe me,

⁶o Metit yime ti, An nanggween aret me, mba'nuk, kogoba inom, koreewi inom, logorak ti, nggween obeelom ambi kenok kat nen aret kwaarogo piyet o. Ndi, o Nggoten logorak mbakwi iinok, time logorak togon op aret o. Ndi, kambin-ndomba liirogon ndegeninako menggaarak ambi inenggela'me time wonogwe iyo, an naanggumi ndegeninako logowak nduk, leenogo mippiyet o,” yoreegerak.

⁷Ti'nuk peebi, at Yutup nen ogoba Yakup nogo wonok Pirawun eenu aruwak nduk, owagam wage nagagerik, at Yakup nen aap Pirawun ale'nggen oba pege mbareegi,

⁸at Pirawun nen Yakup yoge logonet, “Kat ndarak keegak, tahun mande eereegerak?”

⁹Yoge mbareegi, at Yakup nen, “An nombomini nugu logonet, ndarak iigak tahun abu iya negen eeko nogogwaarak kwe, an perak, aap nggiru pogom anggon-panggon kagak we yaluk-ndaluk nege minggirak me, ndarak neegak we tahun seratus tiga puluh aret agaarak o.”

¹⁰Yoge nagagerik, ambinom aret at Pirawun ale'nggen oba pege nagagerik, Pirawun wonage me nen wundi nagagerak.

¹¹Ndi, at Yutup nogo Pirawun yoreegerak nogo ndak-ndak ogoba inom, owe-awot inom, o Metit paga ye mbanggolaawak nduk, nggween abu obeelom lombok o Araametet nogome aret piyareegerak.

¹²Piige nagagerik, at ogoba inom, owe-awot inom, inakuwi-inapurilogwe inom, inambi nonggo logorak nduk, ineebe wonogwe ndak-ndak aret lingginogo wogorage nagagerak.

¹³Mbi noogelo mondok nggwok iya negen age logonet, yi awi ndi awi abok nunggwi mendek abu lek arit nagagerak me, it aakumi Metit mendek inom, Kanan mendek inom, mbi abu nen ineebe inomanggen lek abu ndeyak eerogo piinet wagagerak.

¹⁴Yi aakumi ndi aakumi Metit mendek inom, Kanan mendek inom, kulinik-kalinik mbato onggo kunggo logonet, wu manakaatak nogo at Yutup nen kuwak ee'nuk wonok at Pirawun ame o nggwok abe wurik pi nagaatak porogo wonage paga o Metit inom, o Kanan inom, inawu nogo lek aret agagerak.

¹⁵It aakumi Metit mendek inom, Kanan mendek inom, inawu abok tigitogon lek age mbareegi, it aakumi Metit mendek abok aret Yutup owagam kuwak ari wogo nogogwaarik, yogo logonet, “Ninawu abok aret wokkogo logonet, lek agaarak me, kat kenegen keegak kambukwak me, mbato ti aret wo'niret o.”

¹⁶Yogo mbareegwa, at Yutup nen yorage logonet, “Kit kinawu abok lek arit nagaarak kenok, mbato wokkiraakit nduk, wu pugwi kwak kinaanggumi aret wonok wa'nip o.”

¹⁷Yorage mbareegi, it aakumi nogo nen inaanggumi kambin-ndomba inom, kuda-keledai inom, tapi-lembu inom, wonok mbato onggo Yutup wogori wogwe iinok, tahun ti paga mbato wogorage nagagerak.

¹⁸Tahun ti eeppunuk, ambi ari wage mbareegi, it aakumi abok aret Yutup owagam kuwak eeko nogogwaarik, yogo logonet, “Ninogoba kenggaanom paga kin paganogo yokkiruwi o. Nit yogondak perak, ninawu nogo abu lek age, ninaanggumi abok aret kat unde eekkolage, eekendak me, we nineebe inom, ninanggween inom, ti mban kat wokkiriyak agaarak me,

¹⁹kat keebe wonage keegak, ninanggween mbuk age, nineebe kanggwi, eerukwak me, mbato wo'niroorak onggo nineebe inom, ninanggween inom, kunninabu o. Kunninake keenok, nineebe inom, ninanggween inom, Pirawun unde aremenggerak me, nit nineebe kangga'lek nineenik wonogwe, ndi, ninanggween mbuk aga'lek ki wonage, eeruwak nduk, yi mendek ndi mendek awi wo'niret o,” yogo nogogwaarak.

²⁰Ti eyom paga mbi noogelo abunuk nggwok lombok age mbareegi, it aakumi o Metit mendek abok aret inalitik-inalitak mbato onggo inanggween nogo Yutup wogogo mbareegwa, at Yutup nen Pirawun wogogak eeke paga nggween o Metit nogo abok aret Pirawun mban unde agagerak.

²¹Ti eereegerak paga at Yutup nen yi aakumi ndi aakumi o Metit menggaarak irip aru-ogwe, agi-ogu abok aret ayeloman agago piyareegerak.

²²It aap Metit mendek inanggween nogo abok aret aap Pirawun unde eekkolagagerak kwe, it aap kugi eeka perak, at Pirawun nen mbato wogoragak eeriyak kooneegerak paga op nunggwi me, inanggween paga mbato kunggwi, ndi, Yutup nen inanggween kolage, eeka'lek aret wonagagerak.

²³Abok aret ineebe inom, inanggween inom, onggo pege nagagerik, at Yutup nen it aakumi nogome yorage logonet, “An yogondak yi paga kit kineebe inom, kinanggween inom abok aret onggo mbanogo Pirawun wogogirak me, yi mendek ndi mendek awi yi, kineyabume yarit nabagip nduk, tumbukkiragi o.

²⁴Yi mendek ndi mendek awi yi, yappogo logomonggotik, abu kole age kenok, yum ambiret yonggologo Pirawun wogori wogwe, ndi, yum 4 yonggolak ti, ando awi pogo logonet, ando kit kinakuwi-kinapurilogwe inom, kiname kinom monggotak inom, abok aret nunggwi, eeko logonip o.”

²⁵Yorage mbareegi, it abok nen yogo logonet, “Nit kambuurak aret kwe, ninogoba kat ninabuwa nen ninagap nda'ninakendak me, at Pirawun ayeloman logorak ti, op mban aret o,” yoreegwaarak.

²⁶Ti yogo mbareegwa, at Yutup nen it aakumi o Metit mendek inanggween eeriyak wone koonogo pege logonet, “Mbato kole age kenok, yum 4 yonggolak kologo logonet, yum ambit ti, Pirawun ake pogo logonip o,” yinuk, wone lengganogo pereegerak nogo yogondak eekwi aret wonogwe o. Ndi, it kugi eeka inanggween perak, at Pirawun unde arulik o.

²⁷It Iterali mendek nogo o Metit nggween ambi taganak o Nggoten nogome ye mbanggologo nogogwaarik, inanggween kunggologwe, inaaganapuri ambik aret ndaganabit nogwe, eeko logonet, inanebunu nggwok aret wigannogogwaarak.

²⁸Ndi, at Iterali nogo o Metit nogome nagagerak kagak, tahun 17 eereegerak me, at ndarak kagak lambuk togon ti, tahun seratus empat puluh tujuh aret eereegerak.

²⁹ At Yakup nogo kambuurak eyom panggo yi wage mbareegi, at aput Yutup nogo wiireegerak wage mbareegi, yoge logonet, “Kat nabuwa nen keenggi an nogo'nep me pi'nake logonet, Nogoba kat kangge keenok, kabuwa nen an abet aret o Metit yime nggween taambagagin lek o.

³⁰Ata, o Metit yime nen wokkeren kombomini-kogobamini nggween taambiyareegwam time aret taambagi nagin, yo'niru o.” Yoge mbareegi, at Yutup nen, “Yagandak nogo ndak-ndak aret eerigin o.”

³¹Yoge mbareegi, at Yakup nen, “Abet aret yagandak kenok, kumbuk mbanu o.” Yoge mbareegi, at Yutup nogo nen, “Abet aret yagi o,” yinuk, kumbuk mbangge mbareegi, at Iterali nogo nen nogo yege menggim taati endobanggun yindumbunuk, Ala alut eereegerak.