Read Western Dani Wakkagagerak 50 Bible Online

Wakkagagerak 50 - Western Dani bible

Wakkagagerak 50

¹Yakup nogo kangge mbareegi, at Yutup nogo ogobak toguk ogoba eebe paga ngginnage nagagerik, agandin eyak mbangge, le ari, eereegerak.

²Eeke nagagerik, Yutup nen, “Nogoba Iterali eebe obari age kero, amburu obari abe mendek nogo oba mbenak-mbenak agago pinip o,” yinuk, aakumi kanggwi inobari age kero amburu obari abe mendek inoba mbenak-mbenak eeppiigwi iigak, nogo 40 yogo menggaarak me, at Iterali eebe togop eeppuwak nduk ayeloman mini ti mendek eekwi nogo yorage mbareegi, eeppugwi iigak, nogo 40 yugwi, ndi, it aakumi o Metit mendek tigitogon nen erabun ndoombunuk, wonogwe iigak, nogo 70 yugwi, eereegwaarak.

⁴Tabun ndoonak wonogogwaarik, Yutup ogoba nen yoreegerak wone nogo aap Pirawun yori nawak nduk, it aap endagembogut eyabu eeko menggaarak nogo yorage logonet,

⁵ “An nogoba nen, An abu kambuurak aret agaarak me, kangge neenok, neebe wo'neren o Kanan paga an nen ndo nendaareegim time mambani noorak abet mbarikit nduk, kumbuk mbanu o, yo'negerak nogo kumbuk mbanggirak me, wonok ndoome mambi nanuk woraakit nduk nabuwa nen, E, yo'niruwak nduk, yori nanip o.”

⁶Yoragagerak yori nogo mbareegwa, at Pirawun nogo nen, “Kat kumbuk mbanggendak nogo ndak-ndak aret kogoba wonok ndoome time mambi nak o.”

⁷Yoge mbareegi, Yutup ogoba eebe wonok ndoome mambi wage mbareegi, it aap Pirawun awuri inom wone koongga nogo inom, aap Metit mendek inoweewi inom,

⁸at Yutup akwe-apuri inom, at owe-awot inom, it inogoba inom menggaarak inom, abok mbelek togon wogo logonet, we elege mbuulogwe inom, inaanggumi kambin-ndomba inom, tapi-lembu inom, o Nggoten teppiinok, Yutup inom wogo logonet,

⁹ando kuda amborowak paga kwi'na'nuk wogwe, ando nggweendo paga wogwe, ee'nuk, aap aago nggik ari kagak aret wogogwaarak.

¹⁰Wogo nogogwaarik, niyo Yoraran koorok o endage Nggoren-Kaatat taati ari woraanuk, nogome ogoba erabun ndoombunuk, iniki abu maluk a'nuk, yinggu-leenggu yogwe iigak, nogo 7 yereegwaarak.

¹¹At Yutup oreewi o Nggoren-Kaatat leenggu maakwi wonogwe nogo it aakumi Kanan mendek inigen iigo nogogwaarik, yogo logonet, “It aakumi o Metit mendek kuwak eeppunuk, iniki puru ari logonet, leenggu maakwi yi, inabuwa o,” yinuk, niyo Yoraran koorok le yogwe me taa'nogo endage Aben-Mitirayim tooneegwaarak.

¹²Tabun ndoonak wonogogwaarik, at Yakup kambikit nduk, at apuri yoragagerak nogo ndak-ndak eeko logonet,

¹³ Yakup eebe wonok o Kanan wogo nogogwaarik, at Abarakam nen at mendek kanggwi iinok, ndoome mambiigo logorak nduk, o Mamere koorok time aap Ket mendek endage Eporon anggween eyabu yarak ndo endage Makepela inom onggo mbaneegim nogome mambereegwaarak.

¹⁴Abu aret mambogo nogogwaarik, at Yutup oreewi inom, it aakumi Metit mendek at ogoba ndoome mambigin wage me inom wogogwaarak nogo inom, abok aret iniyokan o Metit nogogwaarak.

¹⁵It inogoba Yakup nogo aret kangge mbareegi, at Yutup oweewi nogo nen yogo logonet, “Nit aa'nduk at Yutup maluk eeppereegurak nogo onggo yogondak nit maluk eeppinaniyak koongge kero,”

¹⁶yogo nogogwaarik, at Yutup yori nawak nduk wone agago nappogo logonet, “Ninogoba awo kangga'lek kagak, Kinawuluk Yutup maluk eeppereegutak me, kinom lambunggo logomonggotik, Nit aaninggin-paaninggin koba pagago logonet, maluk lombok eeppagareegurak me, paganogo mari eerogo pi namunggup o, yo'niragaarak me, nit nen kat maluk eeppagareegurak nogo maluk aret eereegurak me, yogondak wone lek eerogo lambunuwok yaga o,” yinuk, yonggo nappereegwaarak at Yutup aruk konengge nagagerik, le ambik yereegerak.

¹⁸Ti'nuk peebi at oweewi nogo iniki nen aret at Yutup abu'me tebe yi wogo nogogwaarik, yogo logonet, “Nit kat kayeloman aret logowok nduk, wogo o.”

¹⁹Yoreegwaarak kwe, at Yutup nen it yorage logonet, “Kit kinagabiti mbarugup o. An at Ala kwak a'nuk eeppinagage neyo nduk yogop?

²⁰Kit nen an maluk eeppaniyak kooneegutak kagak kwe, Ala nen perak, kit eeppaneegutak paga obeelom ambi eerikit mba'nuk, yi aakumi ndi aakumi inagap ndariyak kooneegerak paga an eeke wonage me, kinagabiti mbarugup o.

²¹Togop me, kit kineebe inom, kit kinapurilogwe inom, an nen aret liirogon unde wokkinake logogin me, kinagabiti ariyak abu mage o,” yinuk, at Yutup oone yanggorogon iniki eyak wappiyareegerak paga oweewi iniki piirik wonogwe nogo lek agagerak.

²²At Yutup owe-awot nogo inom o Metit aret wonogogwaarak. Ndi, at Yutup nogo ndarak kagak tahun seratus sepuluh eereegerak me,

²³kangga'lek awo eenik wonage logonet, Eparayim apurilogwe inom, ombowologwe inom, ombowologwe inapuri inom, nda'narit nogogwaarak nogo enegen iige, ndi, aap Manate aput Makin apurilogwe ndaganake mbareegi, An napuri negen aret o, yinuk, ogome lamoorogo wogonake, eereegerak.

²⁴Eeke nagagerik, at Yutup nen owe-awot nogo yorage logonet, “An abu kambuurak ee'nake me, kambiminggirak neegak kit perak, Ala nen, Nggween wokkiraagin o, yinuk, Abarakam, Itak, Yakup wone abuk nggaruk togon yoragagim nogome o yime nen liirogon aret unde logomunggup nduk wokkiren pinagi nagin o.”

²⁵ Yorage nagagerik, ambinom yorage logonet, “An kangge neenok, Ala nen liirogon aret wokkiren wundi nagin me, wokkiren nage ti eyom paga an nowak nenenak kit Iterali apuri yi, abet aret wonok noorak mbarikit nduk, kumbuk mbanogo yo'ninip o.” Yorage mbareegi, “Wonok nagun aret o,” yinuk, kumbuk mbaneegwaarak.

²⁶Ndi, at Yutup nogo ndarak kagak tahun seratus sepuluh eeke nagagerik, kangge mbareegi, at eebe paga amburu obeelom mendek mbenak-mbenak eerogo pogo nogogwaarik, eyo ogobakkigirik me yonggologo punuk, o Metit nogome pereegwaarak.