Read Western Dani Wakkagagerak 6 Bible Online

Wakkagagerak 6 - Western Dani bible

Wakkagagerak 6

¹ O nggween paga yime aakumi ambik wigannogo logonet, it inapurilogwe komologwe inom ambik aret ndaganako nogogwaarak.

²Ndi, it Ala apuri nen it endekem mendek inapurilogwe komologwe amuni mbanak kigirikwe iinok, iniki nen uugwe mbako nagaatik, we ugun aret wogonako nogogwaarak.

³Ugun wogonabit nogwe iinok, at Aliku ALA nen, “It aakumi ti, kanggo menggaarak mendek me, iniki kooninakak yuwak nduk Aberiniki wogoragagirak nogo mondok-mondok inom logogin lek o. Ndi, ndarak iigak togon, ineenik logorak kuli tahun seratus dua puluh aret eerogo piyaagin o,” yinuk, yoragagerak.

⁴ O ti eyom paga it Ala apuri nen komologwe ugun wogonako nogogwaarak. Wogonako nogogwaarik, inaagalogwe ndaganakwi nogo ineebe yerek-nggorek ndaganako nogogwaarak me, o aa'nduk togon nggween paga time logonet, inendage mondok tiyanak aret wonogogwaarak.

⁵Yi aakumi ndi aakumi nggween paga maluk mban eerit nogwe, it inikime nen yi eeriyak ndi eeriyak koonggwi nogo ti, maluk mban aret koonggwi, eekwi nogo at Aliku ALA nen enegen iige nagagerik,

⁶iniki mbake logonet, “It aakumi an nen ogobakkigirogo o nggween paga piigirak yi, eekwi paga an niniki puru eerogo panugwi me, ao,” yinuk, iniki wakkolage nagagerik,

⁷“Aakumi inom, yi mendek ndi mendek inigen mbolok lek inigen mbolok kwi anebunu lombok inom, yi mendek ndi mendek inaanogum paga nugu menggaarak mendek inom, yirowe-ndirowe wiga agan nugu menggaarak inom, nggween paga yime logowak nduk, ogobakkigirogo piigirak kwe, it eekwi paga niniki puru eerogo panugwi me, it apit aret lek eerogo piyaagin o,” yinuk, yereegerak.

⁸“Mondok lek eerogo piyaagin,” yereegerak kwe, at Nu alik perak, Aliku ALA ale'nggen oba pege logonet, ili eerogo teppikit mbareegerak.

⁹Aap Nu eeke nagagerak wone yi aret. At Nu apuri ineebe kenagan nogo inendage Tem, Kam, Yapet, aret ndaganabeegerak. Ndi, it yi aakumi ndi aakumi o nggween paga wonogogwaarak nogo abok aret Ala enggaanom paga maluk mban eerit nogwe, yi awi ndi awi abok aret inanini nen ugun-ugun eerit nogwe, eekwi iigak kwe, at Nu alik perak, o ti eyom paga aakumi at inom wonogogwaarak nogo inenggela'me logonet, maluk eeke, aakumi inoone at oba pugwi, eeka'lek obeelom mban eerit nage logonet, Ala imbirak iniki kunik aret wonagagerak.

¹²Wonage kagak kwe, it aakumi nggween paga wonogwe nogo abok aret maluk eerit nugwi paga o nggween paga yime abok aret maluk etenggen wigak yereegerak at Ala nen kage nagagerik,

¹³aap Nu nogo yoge logonet, “It aakumi maluk eerit nugwi paga o nggween paga yi awi ndi awi abok aret inanini ambik agaarak me, ambinom ineenik logowak nduk teppiyaagin lek o. Aakumi tigitogon lek eerogo piige, ndi, o nggween yi mondok lek eerogo pege, eerikit o, yinuk, wone abuk nggaruk togon yokkigi o.”

¹⁴Yoge nagagerik, “Kat kapuri kinom logorak kinake perak, eyo moowi negen paga yiiro ambi ogobakkigikkolage logomunggun. Ogobakkigikkolage logonet, inikime time ko ogoorik-ogoorak eeppunuk, niyo unggwage kero, mut amburu negen aspal endekem-akem nabembunuk mbenanit nanu o.

¹⁵Yiiro eebe ogobakkigike logonet, yogop aret ee'nu o. Irip aru-ogwe nggorek ti, metet seratus tiga puluh tiga kuli paga wakkage, ambe agi-ogu paga ti, metet 22 paga wakkage, ndi, yiiro eebe nggween paga nen kirin me mippuurak ti, metet 13 kuli paga wakkage, eeppunuk, wuke logomenggendik,

¹⁶yiiro eebe oo'ngget maappunuk, weenom kobat nabenak agi oo'ngget maarak abu'me oolo ti paga metet ambit oolo kuli wakkagak eerogo pege, tilaabaga kenagan ta'mban-mban ogobakkigirogo pege, tungga oolo muundak mbangge, eeke logonu o.

¹⁷Ndi, abu aret eeke kenok perak, yi mendek ndi mendek o nggween paga yime ineenik nugu menggaarak mendek abok aret mondok pup eerogo piyoorak nduk, mayu nggwok lombok wuppi woraminggirak paga inooke neenok, ambi ineenik logogun lek o. Abok tigitogon aret niyo paga ndonggoninabit namenggaarak kambit nagun o.

¹⁸It abok aret ndonggoninabit nage logonet kwe, kat kakwe kimbirak inom, kapurilogwe it inakuwi inom, abok aret kinagap ndarikit nduk, yiiro kat wuremenggenom nogome aret unggwi namunggup o, yinuk, noone abuk nggaruk togon aret yokkiragi o.”

¹⁹Yoge nagagerik, “Kat kapurilogwe inom yiiro enoona nogome unggwage logonet, yi mendek ndi mendek ineenik nugu menggaarak inenggaanggum warak yirowe-ndirowe inom, inigen mbolok lek inigen mbolok kwi inanebunu alitik-alitak inom, yi mendek ndi mendek inaanogum paga nugu menggaarak inom, nunggulik-nonggoorak abok aret ngguunok-kooli awi wiganiyak mendek kagak inooke kero, mbere'ndak luurogo mbo mban wogonake logomenggendik, kat kinom aret unggwi nanu o.”

²¹Yoge nagagerik, “Kat kapuri kinom, yi mendek ndi mendek inom, nonggo logorak yi mendek ndi mendek nonggo menggaarak abok aret kuwak eeppunuk wonok unggwi nanu o.”

²² Yoge mbareegi, at Nu nen Ala yoreegerak nogo ndak-ndak abok aret eereegerak.