Read Western Dani Wakkagagerak 8 Bible Online

Wakkagagerak 8 - Western Dani bible

Wakkagagerak 8

¹At Nu inom, yi mendek ndi mendek inigen mbolok kwi anebunu lombok inom, inigen mbolok lek anebunu lombok inom, abok aret yiiro paga wonogogwaarak nogo at Ala nen kobak eerogo piyoolik aberak aret wonagagerak me, wiya nggwok ambi o nggween paga yime nappi wage mbareegi, niyo nogo poro agan wambeegerak.

²Porok yikit nduk eeke logonet, niyo eneeri nggween abu'me nen tubu-tubu lagi wage nagagerak nogo porok ari, niyo yenggenak mbogut paga nen kuwo-kuwo wambit wage nagagerak nogo na'nage, o mayu mbangge, eeke mbareegi,

³Ala nen o wiya nappi wagagerak nogo paga niyo yenggenit nagagerak nogo poro agan wangge kagak, ne seratus lima puluh ari nage mbareegi,

⁴aap Nu nogo ndarak kagak tahun enam ratus eereegerak nogo paga tut 7 penenak tanggal 17 paga yiiro wurik nogo tebe agan puut Ararat paga kwi'nari wambeegerak.

⁵Kwi'nari wambeegerak kagak, niyo nogo poroninuk wangge logonet, tut 10 penenak tanggal 1 ari wage paga puut-puut abok aret kenom arit nage kogogwaarak.

⁶Kogo nogogwaarik, nogo 40 yippunuk, at Nu nogo nen woonik ambe mbanak nogo paake nagagerik,

⁷towe ya'ngge-ya'ngge ambi wumbereegerak wiganinuk nege aret kagak, niyo nogo awo aret poro agan wangge nagagerak.

⁸Awo poro agan wangge kagak, at Nu nen, “Niyo abet aret poro agan wangge logonet, nggween kin agaarak kaamun ilik, lek a? Liippikit o,” yinuk, towe puume wumbereegerak.

⁹Wumbereegerak wiga agan nereegi-nereegi niyo nogo awo porok yaga'lek kenok, “Nano paga nagabubok?” mbareegi, iyok paga yungguninuk, “Unggwi wora,” nduk, wiga agan tungga paga ari wage mbareegi, at Nu nen eenggi wumbege nagagerik, pigogo mambereegerak.

¹⁰Mambege nagagerik, niyo nogo awo porok yaga'lek kenok, tokkage logonet, nogo 6 yinuk, ko'lu towe puume nogo pigogo yiiro paga nen ambinom wumbereegerak.

¹¹Wumbereegerak wiga agan nereegi-nereegi eyo tayitun engga ambi ambeme nggereninuk o kiyoma iyok paga unggwi wage mbareegi, at Nu nogo nen, “Yogondak perak, niyo abu porok yegerak kagi,” mbareegerak.

¹²Mbake nagagerik, tokkage logonet, nogo 6 yinuk, ko'lu at Nu nen towe puume nogo ambinom wumbege mbareegi, iyok paga yungguninuk, at owagam unggwi woroolik aret mbaganeegerak.

¹³Ti'nuk, at Nu nogo ndarak kagak tahun enam ratus satu eeke nagagerik, tut ambi penenak tanggal 1 age paga niyo nogo porok yereegerak kagagerak. Kage nagagerik, at Nu nogo tu paarogo ena wunnage nagagerik, nggween abu aret woloonnarit nage kagagerak.

¹⁴Ti'nuk, tut ambi penenak tanggal 27 paga nggween nogo abok aret woloonnagagerak.

¹⁵Woloonnarit nage mbareegi, at Ala nen Nu nogo yoge logonet,

¹⁶“Kat inom, kakwe inom, kapuri inakuwi inom, abok aret yiiro paga nen wundi nanip o.

¹⁷Kit wundi nogo logonet, yi mendek ndi mendek ineenik nugu menggaarak yirowe-ndirowe inom, yi mendek ndi mendek inigen mbolok lek inigen mbolok kwi inom, inaanogum paga nugu menggaarak inom, abok aret o nggween paga yime it mendek mban ndaganako logonet, ineebe ambik wigannarit nogo logowak nduk, kinom aret wundi nanip o.”

¹⁸Yoge mbareegi, at Nu akwe imbirak inom, at apuri it inakuwi inom, yiiro paga nen aret wundi nogogwaarak.

¹⁹Wundi nogo mbareegwa, yi mendek ndi mendek inigen mbolok lek inigen mbolok kwi inom, inaanogum paga nugu menggaarak inom, yirowe-ndirowe inom, yi mendek ndi mendek ineenik o nggween paga nugu menggaarak abok aret inanebunu lombok ndegen-ndegen aret wundit nogogwaarak.

²⁰Abu aret wundi nogo nogogwaarik, at Nu nogo nen at Aliku ALA alut eerikit nduk yugum ndoonogo pege nagagerik, yi mendek ndi mendek op nonggo logorak mendek tapi, ndomba, kambin, towe, anebunu lombok abok aret ambitak nggigik agago Aliku ALA ake warogo kani kuneegerak.

²¹Nogo warogo kani kuneegerak obari Aliku ALA ogobak me nage mbareegi, iniki ale'nggen age nagagerik, iniki nen mbake logonet, “It aakumi yi, wologwe-mbuulogwe paga nen maluk eeriyak koonggo logogun aret kwe, koonggwi iinok, an nen o nggween paga yime pulunogo piigirak kokwak, peebi togop ambi pulunogo piinok, maluk eeppiige logogin abu lek o. Ndi, yi mendek ndi mendek ogobakkigireegirak ineenik nugu menggaarak mendek yogondak inookirak kokwak peebi togop ambi inoorigin mondok lek o.

²²Yogondak o nggween yi, Lek aga'lek awo wonage kagak, Mbi puut age, lek age, O kibi age, mayu wage, O togwi age, aganggen age, O kiip age, o weege, Togop aret eeke logogin o,” yinuk, yereegerak.