Read Western Dani Wakkagagerak 9 Bible Online

Wakkagagerak 9 - Western Dani bible

Wakkagagerak 9

¹ Ari nagagerik, Ala nen Nu apurilogwe inom ale'nggen inoba piige logonet, “Kit kineebe ambik wiganit nogo logonet, o nggween paga yime ndak warak logobagip nduk, kinapuri-kinombowologwe ndaganabit nogo logonip o.

²Yi mendek ndi mendek o nggween paga yime nugu menggaarak inigen mbolok lek inigen mbolok kwi inom, yirowe-ndirowe wiga agan nugu menggaarak inom, inaanogum paga nugu menggaarak inom, yi mendek ndi mendek niyo yenggenak laut inikime menggaarak inom, abok aret kit kinabu'me piinok logonet, kit kiinok, it inagabiti mba'nuk, kinogole nen mbaganggo logogun o.

³Ndi, yi mendek ndi mendek ineenik nugu menggaarak nogo ti, kit nonggo logorak op aret o. Ndi, an nen yi mendek ndi mendek engga mili wungge menggerak mendek nonggo logomunggup nduk, wokkiragagirak nogo ndak-ndak yi mendek ndi mendek abok aret nenet nogo logobagip nduk, yogondak wokkiragi o.

⁴ Wokkiragarak kwe, ineenik eeke menggerak alom ti, inamiya aret me, yi mendek ndi mendek amiya wungga'lek kagak warak kenok perak, noorak mage o.

⁵Ndi, kit aakumi kineenik monggotak alom ti, kinamiya aret me, aap ambi nen kit ambi kinooremenggaarak kangge kenok, an nen amee'nggo waagin aret o. Nggeewo-wam, towe-pagi, yi waalo ndi waalo nen aap ambi nibinemenggaarak kangge kenok ti, an nen amee'nggo wagangge logogin mban. Ndi, aap ambi nen ore ambi waremenggerak kangge kenok, at kunduk amee'nggo waagin aret o.

⁶ An Ala neebe pogom aakumi ogobakkigirogo piyareegirak me, aap ambi nen aap ambi wake kenok, onggo aap alik ambi nen at aret warogo puwak o,” yoreegerak.

⁷ “Ndi, kit perak, o nggween paga yime kinapuri-kinombowologwe wigannarit nogo logowak nduk, kinapuri ambik aret ndaganabit nogo logonip o,” yinuk, yoreegerak.

⁸Yoge nagagerik, Ala nen Nu apuri inom ambinom yorage logonet,

⁹“Yogondak kit inom, kit kinapurilogwe wigannaremenggaarak inom, yi mendek ndi mendek ineenik nggween paga nugu menggaarak yiiro paga nen kinom wundi wogotak yirowe-ndirowe inom, yi mendek ndi mendek inigen mbolok kwi inom, inigen mbolok lek inom, abok aret kinom eeko logorak an wone abuk nggaruk togon ambi yokkira o,” yinuk, yorage logonet,

¹¹“Yi mendek ndi mendek ineenik nugu menggaarak niyo nggwok paga lek eerogo piigirak yi kokwak, peebi ambinom niyo nen kinooke, ndi, o nggween yi ambinom niyo paga nen lek eerogo pege, eerigin mondok lek o, yinuk, noone abuk nggaruk togon yokkiragi o.”

¹²Yorage nagagerik, ambinom yorage logonet, “Kit inom, yi mendek ndi mendek ogobakkigireegirak ineenik nugu menggaarak kinom wonogwe nogo inom, noone abuk nggaruk togon yokkiragi yi, kit kinombowologwe nda'narit namenggaarak kinom abok aret aberak logobagip nduk,

¹³kineenu agak, luware mbogut paga karerogo nappigi o. Nappege neenok, aakumi nen yogo logonet, Ala nen nit aakumi o nggween paga wonogwe ninake nen wone abuk nggaruk togon mbangge logonet, luware karerogo pereegerak yi o, yinuk, yogo logogun o.

¹⁴Mayu wage nagaatik, mbangge kagak, mbogut paga luware karerogo nagake kenok,

¹⁵an ninom wone abuk nggaruk togon mbanggoorak yi nogo abeke logonet, kit inom, yi mendek ndi mendek anebunu lombok ogobakkigirogo piyareegirak ineenik nugu menggaarak inom, niyo nggwok paga ambinom tigitogon lek eerogo piyaagin lek o.

¹⁶Ndi, luware nogo mayu nggare-nggare wage enggela'me nagake nenegen kage logominggirik, yi mendek ndi mendek ogobakkigirogo piyareegirak ineenik nugu menggaarak anebunu lombok o nggween paga menggaarak ninom wone mondok abuk nggaruk togon mbanggoorak nogo aberigin o,” yinuk, yoragagerak.

¹⁷Yorage nagagerik, Ala nen aap Nu ambinom yoge logonet, “It o nggween paga menggaarak abok aret ninom wone abuk nggaruk togon mbanggoorak nogo ineenu ogo logowak nduk, luware ti aret pigi o,” yinuk, yoragagerak.

¹⁸At Nu apuri yiiro paga nen wundi wogogwaarak nogo ti, Tem inom, Kam inom, Yapet inom, aret wundi wogogwaarak. At Kam nogo nen aput Kanan aret ndareegerak.

¹⁹Ndi, aap Nu apuri nogo ti, ineebe kenagan ti aret o. Ndi, ineebe kenagan ti paga nen yi aakumi ndi aakumi o nggween paga yime wigannogogurak.

²⁰At Nu nogo ti, yabu eeka wonagagerak me, yabu eeke logonet, aa'nduk togon anggur awi yake nagagerak nogo at aret.

²¹Yake nagagerik, ti'nuk, anggur amburu mburunogo nengge logonet, iniki abu lek a'nuk kumili kungge nagagerik, ayum yirik lek awooliyana wonagagerak.

²²Ayum yirik lek we wonage me, at Kanan ogoba Kam nogo enegen kage nagagerik, yonggo at oreewi mbere nogo yora nagagerak.

²³Yora nagagerak wogo nogogwaarik, Yapet Tem imbirak nen inogoba ayum yirik lek agap mbelanak wonage mbareegi, inigen anggu'nggan nen inogoba kookwak nduk, yum tabak inambo'me mulumbunuk, ando-ando piganok inambot melak nogo nogogwaarik, nggoorogo inogoba nogo lenggembunuk, mbawok aret wundi wogogwaarak.

²⁴Lenggembunuk wundi wogogwaarak iigak, at Nu anggur amburu neenok iniki lek agagerak nogo iniki awi ya'nage mbareegi, at aput peebi mendek nen eereegerak eenu age nagagerik,

²⁵at Nu nen ari logonet, “At Kanan nogo ti, Oreewi inayeloman abu tebenak aret logowak nduk, Pulunogo pigi o.”

²⁶Ari nagagerik, ambi ari logonet, “At Tem ogoba ti, Ala aret me, Aliku ALA endage alut eeke agarik kwe, At Kanan perak, ogobaluk Tem ayeloman aret logowak o.

²⁷Ala nen aap Yapet o logowam tenak eerogo wogoge, At apuri inom, at Tem apuri inom, o ambit me Obeelom aret logowak nduk, eeppiige, Eeke logogin kwe, At Kanan perak, Ogobaluk Tem apuri inom inayeloman aret logowak o,” yinuk, yereegerak.

²⁸Ndi, aakumi niyo nggwok paga abu inooreegerak kagak, at Nu nogo tahun tiga ratus lima puluh ambinom aret eereegerak me,

²⁹at Nu nogo ndarak kagak lambuk togon tahun sembilan ratus lima puluh aret eeke nagagerik, kambeegerak.