Read Western Dani 2 Tamuwen 1 Bible Online

2 Tamuwen 1 - Western Dani bible

2 Tamuwen 1

¹2 TAMUWEN WONE Aap Tawun nogo wareegwaarak kambeegerak kagak, at Ndawut nogo awuri inom aakumi Amalek mendek tebenogo piinok, iniyokan wogo nogogwaarik, ne mbere paga o Tikalak time wonogwe me,

²ko'lu nen aap ambi at Tawun awuri inom inawooliya wuppunuk wonogwe me nen ayum nibinggolage, nggween waganogo anobak paga labunggolage, eeppatinuk, Ndawut owagam ari nage nagagerik, enete nggween paga wanduk ari logonet, ayuk wureegerak.

³Ayuk wuke mbareegi, at Ndawut nen yoge logonet, “Kat ngga nen wagan o?” Yoge mbareegi, aap nogo nen ari logonet, “An aakumi Iterali mendek wim nambukwi me nen peberagangge eerak wagi o.”

⁴Yoge mbareegi, at Ndawut nen aap nogo yoge, “Wone agaarak nogo abok mbininogo yo'niru o.” Yoge mbareegi, aap nogo nen Ndawut yoge, “Wim nambuko logonet, it aakumi Iterali mendek apit aret inookwi, Tawun aput Yonatan imbirak inookwi, eekaarak kanggwi iigak, it eegu kole mbaganit nagaarak o.”

⁵Yoge mbareegi, at Ndawut nen aap tawe wone wonok nagagerak nogo yoge logonet, “Tawun Yonatan imbirak kanggaarak wone ti, ngga nen konenggerak o?”

⁶ Yoge mbareegi, aap tawe nogo nen Ndawut yoge logonet, “Wim eekwi ti eyom paga an puut endage Nggilobowa we ugun wagarak taati neegak, at Tawun nogo awooluwak paga anep kumbunuk wonage me, at awim nogo kuda paga inom, nggweendo wim eeka ogobakkigirik paga inom, kwi'na'nuk mugurok at owagam panggo yi wogwe enegen iige nagaarik,

⁷ena ambokan logurogon na'nari woraanuk, an aret neenok, Omok o, yo'nege mbaki, owagam nage nagarik, Nonggop o, nogoba?

⁸Yoge mbaki, at nen an yo'nege logonet, Kat ta o? Yo'nege mbaki, An aap Amalek mendek aret o, yogirak.

⁹Yoge mbaki, at Tawun nen an yo'nege logonet, An muk nookaarak kambuurak ee'nake me, nggaruk togon aret kambikit nduk noori omok o, naput.

¹⁰Yo'nege mbaki, at owagam nage nagarik, eebe muk warak eenik ariyak meek aret kage nagarik, wakirak o, nogoba. Ndi, wake nagarik, nggare-nggare anobak me yirik inom, arenggen obaak me yirik inom, wonok kat nogoba kiri wagi o,” yoreegerak.

¹¹Wone ti yoge nogo, at Ndawut aruk konengge nagagerik, ayum yirik nogo nibinggolage mbareegi, it at awuri nogo, togop mban aret inayum nibinggologogwaarak.

¹²Nibinogo patinuk, Tawun aput Yonatan imbirak inom, at Aliku ALA apuri wim eeka inom, aakumi Iterali mendek inom, wooluwak paga inoorogo piyareegwaarak kenok, at Ndawut awuri inom mbi nengga'lek inambe mage negen logonet, leenggu maakwi iigak, oonegen kilu yi nagagerak.

¹³Kilu yi nage kagak, at Ndawut nen aap tawe wone wonok nagagerak nogo yoge, “Kat kawi alom nggeeme nen wagan o?” Yoge mbareegi, at aap tawe nogo nen Ndawut yoge, “An aap Amalek mendek aret kwe, it Iterali inenggela'me minggirak me, wagi o.”

¹⁴Yoge mbareegi, at Ndawut nen at yoge logonet, “At Aliku ALA nen aap leenogo pereegerak, amburu eeppugu kagak, wariyak kagabiti mbarulik nonggop nduk, kiniki teeluk a'nuk wakendak?

¹⁵At Aliku ALA nen leenogo pereegerak amburu eeppugu kagak, Wakirak, yagandak nogo paga kagap mbugunggolagandak me, kamiya wundigin ti, kobaalombok kat koba aret logowak o.” Yoge nagagerik, awot ambi wiireegerak wage mbareegi, yoge logonet, “Aap yi warogo pu o,” yoreegerak wake mbareegi, taati aret kambeegerak.

¹⁷ It Tawun Yonatan imbirak kambeegwaarak paga at Ndawut nen le ndawi endage, “Eegin Le Ari o,” yinuk, ndawi pege nagagerik, it aap Yekura mamuninabit nugu logowak nduk, yoragagerak mbuku Yatat paga liiru mbaneegerak wonage nogo yi o.

¹⁹“Kit nowe-nawot Iterali mendek yi wae. Kinapuri ineegin tiyanak nogo, Wim tinime puut-puut time inoorogo piigaarak wonogwe o. Kawuri wim wakaa'ngget kwe, ne ambit liingge nggonenak wanggaarak o.

²⁰Togop agaarak kwe, It komologwe Pilitin mendek iniki ale'nggen mbakwi, Inagabolo mbanak lek mendek inapuri komologwe iniki wogoppakwi, Eekwi iyo, Wone yi nogo, iname o Nggat wonogwe me yorogwe, Iname o Atekelon wonogwe me yoranet nogwe, Eerugup o.

²¹Kit puut-puut Nggilobowa yi wae. Kit paga time aap kalu-kalu inanggeemu paga Aakumi inoorak inamiya lengge aago wonage, It aap wakaa'ngget nogo, Inamok Tawun anggeemu paga lenggek ari me, Yi'mbaani kunukwak amburu waka'lek wonage. Yonatan omaale wonok waga'lek namburogo nappege, Tawun awooluwak paga we wonok waga'lek amiya labunik mban wonok wage, Eeko menggaarak kwe, Kit puut-puut Nggilobowa paga inoorogo piigaarak me, Miinanggen inom, mayu inom, kineebe paga wambi wage, Ndi, kinanggween paga yi mendek ndi mendek yaremenggaarak kwe, Anggen abe yege, Eeke logogin mondok lek o.

²³Tawun Yonatan imbirak ineenik logonet, Aakumi inom iniki kunik wonogwe, Inom inale'nggen paga nugwi, Eereegwaarak me, Kanggo logonet kunduk, imbirak lambunik aret kanggaarak o. Tu nogo logonet, Towe nggindooni nege kwak lek it inogowa ambik nogwe, Ndi, inomaawi perak, Singa omaawi kwak lek it inomaawi ambik wonogwe, Eeko nagaarak o.

²⁴Kit kumi Iterali mendek yi wae. At Tawun nen kinayum abe laambu yirippinagage, Mbuti emas paga kinayum obaanggi-obaangge eerogo punuk wokkirage, Eeke nagaarak me, Arigi nen leenggu maa'nip o.

²⁵Kinaagalogwe wakaa'ngget ne ambit liingge paga, Nggonenak wanggaarak me, iya! Kinabuut paga time Yonatan warogo pegaarak wonage o.

²⁶Kat noreeluk Yonatan wae. Kat noreeluk niniki abu kunik wonagandak o. Kumi iniki kunik mbakwi ti, mbuuluk negen kwe, Kat nimbirak nogo ti, Niniki kunik nggwok togon wonogoorak me, niniki wakkolagi o.

²⁷It aap wakaa'ngget nogo ti, Ne ambit liingge paga nggonenak wanggaarak me iya! Nit nineegin-ninomaale nogo, abok aret lek aga o,” yinuk, at Ndawut nen lendawi paga ndawi pereegerak ti aret o.