Read Western Dani 2 Tamuwen 21 Bible Online

2 Tamuwen 21 - Western Dani bible

2 Tamuwen 21

¹At Ndawut nogo Iterali inarum wonage eyom paga, mbi noogelo kagak, tahun kenagan aret age mbareegi, “Aliku ALA nen yo'niruwak o,” yinuk, at Ndawut nggino yoreegerak. Yoge mbareegi, at Aliku ALA nen at yoge logonet, “At Tawun apuri inom nen it aakumi Nggibeyon mendek inooke mbareegi, inamiya at Tawun apuri inom inoba agagerak paga, o yi maluk agaarak o,” yinuk, yoreegerak.

² Aakumi Nggibeyon mendek ti, it Iterali mendek lek aakumi Amori mendek yumbunik aret me, it Iterali nen, “Inooriyak lek o,” yinuk, kumbuk mbanogo piyareegwaarak kagak, at Tawun nen, “It Iterali inom, Yekura inom, inake nonggop eeri?” yinuk, aakumi Nggibeyon mendek inenggaawak lek eerogo piyaakit nduk, wakkenet nege logonet, inoorit nege nagagerak me, at Aliku ALA nen wone ti, aap endagembogut yoge mbareegi, aap endagembogut nen it Nggibeyon mendek nogo, inayonggo piyareegerak wogo mbareegwa,

³at Ndawut nen wone it Nggibeyon mendek yorage logonet, “At Aliku ALA eyate kwak apuri iniki kundugu nogo, kinale'nggen inoba piyaamunggup nduk, eeppinagareegwaarak onggo an nen eeppinagakit nduk, nano eeppinagarak mbakop?”

⁴Yorage mbareegi, it Nggibeyon mendek nen at yogo logonet, “Nit eeppinaneegwaarak ti paga at Tawun apuri inom nen mbuti perak inom, mbuti emas inom, wo'niraawak nduk, yora nogwe, ndi, aap Iterali mendek inookwi, eeriyak nogo ti, nit ninobaalombok lek o.” Yogo mbareegwa, at Ndawut nen, “Ti kenok, kit kiniki mbakwi ndak-ndak eeppinagakit nen yo'ninip o.”

⁵Yorage mbareegi, it nen aap endagembogut Ndawut nogo yogwi, “At Tawun iniki mbake logonet, It Iterali wonogwe me yime ambiriluk ambi logorak lek aret o, yinuk, nit kero mban nineebe lek eerogo pinanikit, mba'nuk, ninoorit nege nagagerak me,

⁶at Tawun apuri aap ineebe 7 waganogo wo'nirage keenok, at Aliku ALA nen aap leenogo mippereegerak Tawun awi alom paga o Nggibeya nogome inoorogo piinok, Aliku ALA enggaanom paga time tugumbiyaawok o.” Yogo mbareegwa, aap endagembogut nen, “Op aret yogotak me, wokkiraakit o,” yoragagerak.

⁷ Yorage nagagerik, Tawun aput Yonatan nogo Ndawut imbirak Aliku ALA endage paga, “Yogop eeko logowok o,” yinuk, kumbuk mbanogo pereegwaarak me, aap endagembogut nen Yonatan aput Mepibotet abuwa nen wogoroolik.

⁸ Ata, aap Aya apuluk kwe Iritapa nen Tawun obaane'me pereegerak aap mbere, Aromoni Mepibotet imbirak inom, at Tawun apuluk kwe Merap aagalogwe ineebe 5 at ogonggelo aap Mekola mendek endage Mbaritilayi aput Aririyen obaane'me piyareegerak nogo inom,

⁹waganogo it Nggibeyon mendek ineenggime piige mbareegi, it ineebe 7 nogo inooppiigo nogogwaarik, Aliku ALA enggaanom puut paga time aret tugunogo piyareegwaarak. Aap ineebe 7 ambugwi aret inoorogo piyareegwaarak nogo ti, waabuk negen jelai anggen iyaalok mbanit nogwe eyom nogo paga inoorogo piyareegwaarak.

¹⁰Anggen iyaalok mbanggwi paga nen nok, age yubuni nogwe paga mayu mbogut paga nen lubu-lubu wambit wage menggim kuli, aap Aya apuluk kwe Iritapa nogo nen karun waganogo puut aap inoorak me taati yugum tabak paga ndoombatinuk, o liingge paga towe wiga agan aap nogo ineebe paga ninggiri wogwe, ndi, oonikiya paga nggwiya eyonggaame nen aap inoorak me wogwe, eekwi iyo, kwe nogo nen inarum aret wonagagerak.

¹¹Ndi, aap Aya aput kwe Iritapa Tawun akwe ayeloman mendek wogo nen eeke nogo Ndawut yogo mbareegwa,

¹² aakumi Pilitin mendek nen aap Tawun aput Yonatan imbirak o Nggilobowa inooko nogogwaarik, iname kota Mbet-Tan oore'nggam taa'nogo tugumbiigo mbareegwa, it aakumi Yabeti-Nggileyat mendek woraanuk ineebe kumaageren iname nggween taambiya nogogwaarak wonogwe me, at Ndawut nen inowak nenenak nogo wa nage nagagerik, wonok wagagerak.

¹³Wonok woraanuk, aap Tawun aput Yonatan imbirak inowak nenenak inom, it aap ineebe 7 inoorogo piinok tugumbiyareegwaarak nogo inowak inom, kuwak eerogo punuk,

¹⁴aakumi Mbeniyamin mendek inanggween paga o Tela time Tawun ogoba Kiti taambereegwam nogome, at Tawun aput Yonatan imbirak inowak nenenak taambogo logonet, aap 7 inoorak nogo inowak nenenak inom aret taambereegwaarak. Ndi, aap endagembogut nen wone lengganogo yoragagerak nogo, it aakumi nen ndak-ndak eeko mbareegwa, o time obeelom aruwak nduk, tamban eekwi iinok, Ala aruk koneneegerak.

¹⁵Ti'nuk, peebi ne ambi paga it Iterali mendek nen Pilitin mendek inom wim nggagambunuk, at Ndawut awuri inom nogo nogogwaarik, Pilitin mendek inom nambuko logonet, at Ndawut nogo omaawi lek agagerak wonage me,

¹⁶aap ambi inanggup nggorek mendek wiganak endage Yitibi-Mbenop awooluwak irip mbuti tembaga paga ogobakkigirik aaninggin kenagan eeppunuk, ambi oolo negen inom, ndi, obaloowi ngget lombok mendek inom, wonok wage nagagerik, Ndawut warikit nduk, eereegerak kwe,

¹⁷ at kwe Teruya aagaluk Abitayi nogo nen Ndawut yeenggwaari wage nagagerik, pilak ari logonet, aap Pilitin mendek ti wareegerak. Wake mbareegi, ne ti eyom paga at Ndawut awuri nogo nen Ndawut yogo logonet, “Nit Iterali mendek ninandi noguk yukwak, kat nit ninom wim namburi wogo logorak mondok mage o, yinuk, kumbuk mbanogo yokkogo o,” yoreegwaarak.

¹⁸Ti'nuk, ne ambi paga o Nggop time it Pilitin mendek inom wim ambinom nambuko logonet, aap Kuta mendek endage Tibakayi nen aap endage Tap anggup nggorek nogo mendek me, wake,

¹⁹ti'nuk, ne ambi paga o Nggop time it aakumi Pilitin mendek inom wim ambinom nambuko logonet, aap Mbe'lekem mendek yum yege menggerak Yayit aput Elakanan nen aap awi Nggat mendek Nggoliyat awuluk endage Lakimi awooluwak nogo ti, o omaawi logowak nduk muundu nappogo menggaarak obate nogo kokwak, porogo wonage kagak aret warogo pege,

²⁰ti'nuk, ne ambi paga o Nggat time wim nambukwi iigak, aap ambi eebe nggwok anggup nggorek ti mendek wiganak ambi eenggabit peenok-peenok 6, iyogobit penok-penok 6, mban aret me, lambunik 24 aret wonage nogo nen

²¹it aakumi Iterali mendek miyuk-meya eeginake mbareegi, aap Ndawut ogobaluk Timeya aput Yonatan nen aap nogo warogo pege, eereegwaarak.

²²It aap o Nggat mendek inanggup yerek-nggorek wiganak ineebe 4 nogo ti, at Ndawut awuri inom nen aret inoorogo piyareegwaarak.