Read Western Dani 2 Tamuwen 22 Bible Online

2 Tamuwen 22 - Western Dani bible

2 Tamuwen 22

¹At Tawun inom, Ndawut awim abok aret inom, nogo nen at Ndawut wariyak eekwi iigak, at Aliku ALA nen agap ndakak mban eereegerak me, Aliku ALA aruk konengge logowak nduk, Ndawut ndawi pereegerak yi o.

²“At Aliku ALA ti, an nayugum kwak, Nayugum pak wurogo pereegi kwak, An nagap ndaka, aret menggerak o.

³At nogoba Ala ti, Aakumi nen an nookwi iyo, Yugum lunik kwak abu'me pani unggwage, Nggeemu pogom mulunogo panit nege, Omaawi paga nagap ndarogo panege, Aap maluk mendek nen nookwi iyo, Nagap ndariyak nduk, eeke logonet, Yugum pak wurogo pereegi kwak eerogo panit nege, Pi'nakwi iyo, o ambime kumaarogo pani nage, An nili eerogo panit nege, Eeke menggerak o.

⁴Nawim nen nookwi iyo, Yeenggwa niru o, Yinuk, noone omaawi paga Aliku ALA yoge neenok, Nagap ndarogo panege menggerak me, At endage tiyanak aret logowak o.

⁵Niyo kilaarak-mogonik eeke logonet, Aakumi ndonggoninake menggi kwak, An togop aret ee'nake, Niyo wu'nuk nage logonet, Mu kale'ngga wonok nage menggi kwak An togop aret ee'nake,

⁶Kambunuk nogo menggam ageele paga an maarogo panege, Kanggwi ti, keele pugu kwak me, Nenggaanok nggerok yi wage,

⁷Eeppanit wage paga aaninggin noba wonage logonet, Aliku ALA noone nggwok paga yoge, Nogoba Ala yeenggwa niru o, yinuk, yoge, Eekirak paga, At awi wurik me logonet noone konengge, Le ari logonet, nggino yogirak nogo aruk konengge, Eekerak o.

⁸Aliku ALA anini mi'nage mbaki, O nggween yi nogo, nuk-nuk eeke logonet ndipuk eeke, O mbogut yi nogo, alom na'ndo-wa'ndo eeke, Eekerak o.

⁹At ogobak me nen ka'luk wungge, Ambeme nen kani omoonuk yenan-menan agan wungge, Eebe paga nen kani kunik kwindagala eeke, Eeke logonet,

¹⁰Mbogut oolo nggagambunuk wambi wage, Ndugwi yumaak enggela'me iyok wuppi wa'nuk wage,

¹¹Malayikat kwak kerub nen piyaninuk nage, Towe wiga agan nage menggi kwak, O wiya nen wigak togon at wonok nage,

¹²O apit ti, awooliya negen yengget-wangget eerogo pake, O woraakit nduk, ki wandu aago enggela'me wonage,

¹³Enaame eya ndelenak-welenak aago logonet, O kimbik pindanogo nappit nage,

¹⁴Aliku ALA mbogut paga nen oone ngguurubu kwak ari, At Tiyanak Lombok nen oone eerogo nappit nage,

¹⁵Awim mbaganit nawak nduk omaale namburogo nappege, Ineebe ma'naruwak nduk o kimbik nggwok kilanogo nappege, Eekerak o.

¹⁶Aliku ALA nen aakumi mberirage, Anini aagi ogobak me nen wundi wage, Eeke kenok, Yi nggwok laut abena aluk-puut kin eeppege, Ndi, o yi, alom yarak kin eeppege, Eekerak o.

¹⁷At tiyarogon logonet, eenggi pi'nabi wambi wage, Niyo alobok ambik nen ndonggonnaburak eeke me, Pilanogo nippani wage, Eekerak o.

¹⁸Nawim inomaawi ambik me, ineenggime nen ndinnake, It ineebi nombakwi nogo, An nen tebenogo piyoorak meek me, At nen tebenogo piinok nagap ndake,

¹⁹Aaninggin-paaninggin eerak wonage neegak, Nooruwok nduk eekwi me, Aliku ALA omaawi eerogo panege nagaarik,

²⁰O nggwok obeelom me, pani nage, Eekerak nogo ti, An at iniki kunik aret me, nagap ndakerak o.

²¹An obeelom mban eeke neenok, Aliku ALA nen ndak-ndak obeelom eeppanege, An maluk eeka'lek wonage neenok, Onggo maluk eeppanega'lek wonage, Eekerak o.

²²Nogoba Ala mbo punuk maluk eerit naga'lek Aliku ALA eerit nage mban mugurok nage,

²³Eeko logorak wone yereegerak nogo, mondok liippege, Wone lengganogo yo'niragagerak nogo, Nomonogo mbo pega'lek mondok porogo wonage, Eerit nage logonet,

²⁴An maluk eeka'lek neyaawak nduk eeke, An maluk eerit nookwak, narum wakkolage, Eeke minggirak me,

²⁵An obeelom eeke minggirak ndak-ndak Aliku ALA onggo eeppanege, An maluk eeka'lek neegerak ndak-ndak Onggo maluk eeppanega'lek wonage, Eekerak o.

²⁶Kaliku ALA wae. Wone yoragaatak nogo li'lak eekwi iinok, Kat nen yoraga'ndak nogo li'lak eerogo piige, Maluk eekotak, yorookwak, liirogon eekwi iinok, Maluk eekendak, yokkirukwak, liippunuk eeppiige,

²⁷It iniki kikak naka'lek wonogwe iinok, Kiniki kikak naka'lek keyaawak nduk eeppiige, It wi-wi aganakwi iinok perak, Kat nen melak togon wi-wi aganake,

²⁸It iniki tebeppakwi iinok, kat nen inagap ndake kwe, Iniki wogoppakwi iinok perak, Iniki tebeppatuwak nduk, kenegen wogoren nage, Eeke menggendak me,

²⁹Kaliku ALA wae. Nandi wuninik kwak kat aret wonage o. An o apit paga wonage neenok, Kaliku ALA nen eya eerogo panege,

³⁰Yeenggwa nege keegak, Aap awuri ambi aago ninom nagabiti lek namburi nage, Kat nogoba Ala nimbirak me, Pak wurik obaga mbo wungge, Eeriyak op aret o.

³¹Kat nogoba Ala perak, Eerit nage menggendak nogo ti, abu abe mban aret o. Kaliku ALA koone ti, Pilit lek abet mban ari menggendak o. Ineebe op logorak kabu'me wonogwe iinok, Keebe nggeemu kwak nobappiirogo menggendak o.

³²Kaliku ALA wonage keegak, Ala alik ambi ta wonage o? Yugum nu'lek menggi kwak, Kat ninogoba Ala aret wonage keegak, Alik ambi wonage mbakop? Lek aret me,

³³Kat Ala nen aret nomaawi eerogo panege, An obeelom mban eerit nage logokit nduk, Naru koonogo panege,

³⁴ Rusa iyok nggilik-nggelok pit nage menggi kwak, An niyok togop aret eeppanege, Puut kirin paga mi'ndak logokit nduk, Nomaawi eerogo panege,

³⁵Wim op nambuke logokit nduk yigin woorak mamunnege, Neegin linggira kwak, mbuti tembaga paga wurik kagak kwe, Neenggi yomok togon miirikit nduk, eeppanege,

³⁶Nagap ndarak logokit nduk, kanggeemu wo'nege, Nendage nggwok aruwak nduk, mippani wambi wage,

³⁷Nandelen koguk yukwak, naru nggwok yarogo panege, Eeke menggendak o.

³⁸Nawim muguren nage logonet, aambiranogo piinet nage, Ineebe pup eerogo piiga'lek kenok, Niyokan waga'lek inoorit nage,

³⁹Ineebe aan lebenogo piigirak ti, An niyok pugu me wambit nagaarak me, It ambi nen mi'naga'lek aret wonagaarak o.

⁴⁰Nawim ninom namburiyak nduk, kat komaawi eerogo panege, Ninom ogoorak nogo, nabu'me tebe yi woraawak nduk eeppiige,

⁴¹Ineebi nombakwi nogo, Inamborowak kin-kin mbaganuwak nduk eeppiige, Eekendak paga, Ineebe abu lek eerogo piigirak o.

⁴²Inoone nggwok paga, Ninagap ndari woraanip o, Yagaarak kwe, inagap ndari wogwe, Kaliku ALA o, yinuk, yokkegaarak kwe, Karuk konembunuk, onggo yorage, Eerulik o.

⁴³Wun negen yigit-yagat eerogo piige, Tu paga purok iniyok amok mbanogo pogo mengga kwak, Ineebe togop aret eerogo piinet nage, Eekirak o.

⁴⁴It an mendek nen nooriyak wogwe me, nagap ndake, Yi aakumi ndi aakumi inowe logorak unde eeppanege, Eeke keegak, Aakumi neenggo'lek mendek nabu'me ari wogwe,

⁴⁵It aap nggiru nogo, Inagabolo nirik-kirik agan neya wogwe, Awo yorage neegak, konembunuk aret eekwi,

⁴⁶Noone ari paga inomanggen ngginuk ari logonet, Inaganak wakak inawi pak wurik kagak kole wundi wogwe, Eeko menggaarak o.

⁴⁷Kaliku ALA mondok keenik menggendak o. Kat nayugum kwak me, kalut eeke, Kat yugum kwak nagap ndaka Ala aret me, Kendage mondok tiyappege, Eeke agarik o.

⁴⁸It an nookwi nogo, onggo inooke, It aakumi inanebunu lombok nabu'me piya wage, Nawim ineenggime nen wondet eerogo panege, Ineebi nombakwi nogo tebenogo piinok tiyappanege, It inogogun ambik ineenggime nen nagap ndake, Eekendak kat nogoba Ala aret o.

⁴⁹

⁵⁰ Togop me, Kaliku nogoba ALA wa. Yi aakumi ndi aakumi inenggela'me logonet kalut eeke, Ndawi kanep pege logonet kendage tiyappagage, Eeke logogin o.

⁵¹Nendagembogut mippaneegindak nogo Neegin tiyak yuwak nduk eeppanege, Amburu eerogo mippaneegindak nogo An Ndawut inom, napuri-nombowologwe inom, Ninabuwa nen eeppinanit wundi wage tit logomunggun o,” yinuk, ndawi paga Aliku ALA anep pereegerak nogo ti aret.