Read Western Dani 2 Tamuwen 23 Bible Online

2 Tamuwen 23 - Western Dani bible

2 Tamuwen 23

¹At Ndawut wone irip paga yereegerak nogo yi o. “At Abu Tiyanak nen tiyappege, At Yakup ogoba Ala nen amburu eerogo mippege, Eereegerak an aap Itayi aput Ndawut yi, Iterali inenggela'me ndawi pit nage minggirak nogo nen ari logonet,

²Aliku ALA Aberiniki nen an yo'nege, At oone ninikime manabi wage, Iterali inogoba Ala nen oone ari, Iterali inogoba yugum kwak nogo nen an yo'nege, Eereegerak wone nogo yi o. Aap ambit-ambi awuri inarum logonet, Eekaatak li'lak inawone amburu mbangge, Ala ayuk wuke logonet, Wone liirogon lengganogo yorage, Eeke kenok,

⁴O kuubondendok ogum eeka'lek O wiikit nduk kilim nagake, O mayu mbangge nagaatik, Kibu-kibu eerogo pege logonet, Iri'ngga anggup larogo pit wage, Eeke menggi kwak, Aap ti, togop aret wonage menggerak o.

⁵Ala enggaanom paga naaganapuri ninom Togop aret wonogwe nogo lek a? An mondok-mondok eeke logokit nduk Nimbirak wone li'lak koonogo punuk, Mbeyok yukwak liirogon unde wonage, Yi wone ndi wone noba age me nagap ndake, An uugwe mbarit nage nogo wo'nege, Eerigin lek mbakop?

⁶Togop aret eerigin kwe, Iri'ngga alom kinik nogo, Ineenggi paga pelenogo nappuurak meek kenok, Mbuti tege paga ilik, eyo tege paga a, Pelenogo mbuti pega'nom taati aret Kani kunggo mengga kwak, Aakumi maluk mendek ti, Togop aret wonogwe o,” yinuk, wone irip paga yereegerak ti aret.

⁸At Ndawut awuri ineebe kenagan aap wim wakaa'ngget lombok inendage yi o. Aap Kakomoni mendek endage Itibaan it ineebe mbere nogo inowe logonet, awooluwak nutik aap delapan ratus inom wim nambuke logonet, ne ambit paga abok aret inooreegerak kambeegwaarak.

⁹Ti'nuk, it aap kenagan nogo ambi aap Akoki mendek Ndoro aput Eleyatat nogo ne ambi paga aap Ndawut inom nen it Pilitin mendek inom wim eeruwok nduk, kuwak eerak wonogwe nogo, miyuk-meya eerogo piigo mbareegwa, inanini nen inoorit wogwe iinok, Iterali inakom niruk mbaganggwi iigak kwe,

¹⁰at Eleyatat nogo alik nen pilak yinuk, aakumi Pilitin mendek inooke logonet, eenggi togum agagerak wooluwak nogo mbo puurak meek eenggime wonage kagak, ne ti eyom paga Aliku ALA nen eegin tiyappereegerak me, mondok iya lombok inooreegerak. Inooke mbareegi, aap Iterali wim eeka nogo, iniyokan aap inoorak inagugun koloorak mban aap Eleyatat nogo ka nogogwaarak.

¹¹Ti'nuk, it aap kenagan nogo ambi aap Karari mendek Age aput Tama nogo, it Pilitin mendek nogo kela yarak me time kuwak ari wogo mbareegwa, it aap wim eeka Iterali mendek mbaganit wogwe iinok,

¹²kela yarak me nogome it Pilitin mendek tebenggologwe iyo, at Tama nogo pilak yinuk, inooke kagak, at Aliku ALA nen eegin tiyappereegerak me, mondok iya lombok inooreegerak.

¹³Ndi, ne ambi paga aakumi Pilitin mendek aago o Erepayim Kobappaga inawooliya wuppunuk wonogwe iigak, anggen ka'let agagerak mbanggwi eyom paga, aap inoweewi 30 mendek ineebe kenagan abu wakaa'ngget nogo, at Ndawut ndoome Arulam wonage me ka nogogwaarak.

¹⁴Ka nogo mbareegwa, at Ndawut inom yugum pak wurogo pereegim wonogwe, ndi, it Pilitin mendek wim nambuka ando o Mbe'lekem wonogwe, eekwi iigak,

¹⁵at Ndawut nogo niyo abu nen ari logonet, “O Mbe'lekem tu unggwogo menggam niyo nggween kabunik nogo, aap ambi nen too'nuk wo'niri wage kenok, naakit lak, ao,” yinuk, ari nogo

¹⁶it aap wakaa'ngget 30 mendek ineebe kenagan nogo, konenggo nogogwaarik, it aap Pilitin mendek inawooliya wuppunuk wonogwe nogo iigak-iigak, o Mbe'lekem tu unggwogo menggam niyo nggween kabunik nogome niyo toologo waganggo nogogwaarik, wonok Ndawut wogori nogogwaarak kwe, at Ndawut nen ari logonet, “Nawuri nen, At ake ninamiya wundiyak op aret, mba'nuk, niyo yi, tooli nagaarak me, niyo toolak yi ti, inamiya kwak iya lombok me, an noorak lek o. Ata, Kaliku ALA kake o,” yinuk, at noolik nggween paga kilirogo pereegerak. It aap wim wakaa'ngget 30 mendek inoweewi ineebe kenagan nen eeko nogogwaarak nogo ti, togop aret eeko nogogwaarak.

¹⁸It aap wakaa'ngget ineebe kenagan ti, kwe Teruya aagaluk aap Yowap awuluk Abitayi nogo, it mbere ti, inowe aret me, ne ambi paga awooluwak nutik unggwage logonet, it aap ineebe tiga ratus inooreegerak kambeegwaarak ti paga it aap wakaa'ngget ineebe kenagan aa'nduk nogo, inendage nggwok agagerak ti kokwak, at togon togop aret endage nggwok agagerak.

¹⁹Ndi, it aap wakaa'ngget inoweewi kenagan nogo ti, inayuk wuko logonet kwe, at Abitayi perak, abunuk nggwok togon ayuk wuko nogogwaarak nogo lek a? Aap Abitayi nogo ti, aap wakaa'ngget ineebe kenagan nogo mendek lek kwe, inowe negen a'nuk, wone lengganinake nagagerak.

²⁰Ndi, aap Yoyara aput Mbenaya awi Kabeten ti, aap wim wakaa'ngget lombok mondok iya eerit nage nagagerak. Eerit nage logonet, aap Mowap mendek wim wakaa'ngget lombok ineebe mbere inoorogo piige, ne ambi ndugu-ndugu nggalo-nggalo wangge logonet, o apit eerogo pereegerak kagak, at mbuun ambena wangge nagagerik, singa warogo pege,

²¹aap ambi Metit mendek eebe kole anggup nggorek wooluwak eenggime wonage me, aap Mbenaya nogo eyo obate mbanak eenggime wonage logonet, aap Metit mendek awooluwak eenggime nogo, ndinogo awooluwak nogo paga aret warogo pege, eereegerak.

²²Ti eerit nagagerak nogo paga aap Yoyara aput Mbenaya nogo, it aap wim wakaa'ngget ineebe kenagan inendage nggwok agagerak nogo ndak-ndak, endage nggwok aret agagerak.

²³Ndi, it aap 30 nogo inayuk wuko logonet, at abunuk nggwok togon ayuk wuko nogogwaarak kwe, it aap ineebe kenagan nogo perak, aap wim wakaa'ngget lombok me, at inom ndak-ndak lek aret wonagagerak. At Mbenaya nogo Ndawut eebe arum menggaarak inowe logowak nduk, at Ndawut nen mippereegerak.

²⁴It aap ineebe, “30 Mendek o,” yinuk, yogo nogogwaarak nogo, ambi ti, Yowap awuluk Atayen aret. Ndi, it ando inendage ti, Aap Ndoro awi Mbe'lekem mendek aput Elakanan inom,

²⁵Aap Karot mendek Tama inom, Aap Karot mendek Elika inom,

²⁶Aap Paliti mendek Kelet inom, Aap Tekowa mendek Iketi aput Ira inom,

²⁷Aap Anatot mendek Abiyetet inom, Aap Kuta mendek Mebunayi inom,

²⁸Aap Akoki mendek Talomon inom, Aap awi Netopa mendek Makarayi inom,

²⁹Aap Netopa mendek Mbaana aput Kelep inom, Aap awi Nggibeya anebunu Mbeniyamin mendek Iribayi aput Itayi inom,

³⁰Aap Piraton mendek Mbenaya inom, Aap o Nggaat aluk-aluk mendek Kirayi inom,

³¹Aap Mbet-Araba mendek Abiyalobon inom, Aap Mbakurim mendek Atamawet inom,

³²Aap awi Taalobon mendek Eliyaba inom, Aap Yatiyen apuri inom,

³³Aap Karari mendek Tama aput Yonatan inom, Aap Karari mendek Tarat aput Akiyam inom,

³⁴Aap Maaka mendek Akatabayi aput Elipelet inom, Aap Nggilo mendek Akitoben aput Eliyam inom,

³⁵Aap Karemen mendek Ketarayi inom, Aap Arabi mendek Payerayi inom,

³⁶Aap awi Toba mendek Natan aput Igan inom, Aap Kagari aput inom,

³⁷Aap Amon mendek Telek inom, Aap Mbeerot mendek kwe Teruya aagaluk Yowap eegin-ombambile wonok nega Nakarayi inom,

³⁸Aap Yetiri mendek Ira inom, Aap Yetiri mendek Nggarep inom,

³⁹Aap Ket mendek Uriya inom, it aap wim wakaa'ngget lombok ineebe lambunik 37 ti aret o.