Read Western Dani 2 Tamuwen 24 Bible Online

2 Tamuwen 24 - Western Dani bible

2 Tamuwen 24

¹At Aliku ALA anini nggwok togon ne ambinom aakumi Iterali mendek inoba piyaakit mbake nagagerik, aakumi Iterali ineebi mbaruwak nduk, Ndawut inikime manake logonet, “It aakumi Iterali mendek inom, Yekura mendek inom, keenggi linggininabi nak o.”

²Yoge mbareegi, aap endagembogut nen Yowap inom, it aap ineegin warak inoweewi at inom wonage nogo inom, yorage logonet, “Kit nen it aakumi Iterali inanebunu lombok o Ndan nen nok, o Mberetiyeba kuli, it Iterali inenggela'me aap wim eeka ineebe mande wonogwe nogo, an neenu arikit nduk, kineenggi linggininabi nanip o.”

³Yorage mbareegi, at Yowap nen aap endagembogut nogo yoge, “At Aliku kogoba Ala nen aakumi Iterali o yogondak wonogwe yi kagak kwe, ambinom ne 100 kuli wokkege kenok, kat nogoba kalik nen kenegen iyoorak op aret kwe, ineebe linggininaburak ti, kat nowe kendagembogut nen nonggop nduk togop eeriyak mbakendak o?”

⁴Yoreegerak kwe, aap endagembogut nen Yowap inom, aap ineegin warak inoweewi inom, oone nabenak mban yorage mbareegi, it nogo nen wim eeka Iterali inenggela'me wonogwe nogo, ineenggi linggininabi nawak nduk, aap endagembogut wonage me nen wundi nogogwaarak.

⁵Wundi nogo nogogwaarik, niyo Yoraran wunda nanuk, o Nggat kota Arowet koorok o ame pa'nggwe kobappaga time inawooliya wuppunuk, o Nggat mendek ineegin warak linggininakwi, o Yayetet mendek linggininakwi, eerit

⁶o Nggileyat inom, aap Ket mendek wonogwe me o Kareti inom, linggininabit nok, o Ndan ari nanuk, ti'nuk, Ndan nen melaninuk o Tiron aret ari nogogwaarak.

⁷Time nen yugum pak tiyarogon wurik me o Tirut inom, yi kota ndi kota aakumi Kewi menggam inom, aakumi Kanan wonogwe me inom, linggininabit irip paga o ame pa'nggwe karume nggwok it aakumi Yekura wonogwe me, o Mberetiyeba ari wogogwaarak.

⁸Yi o ndi o abok aret linggininabit nugwi iigak, tut 9 penembunuk, ambi penenak, nogo 20 yippunuk, iniyokan o Yerutalem aret unggwi wogogwaarak.

⁹Wogo nogogwaarik, at Yowap nen aap endagembogut yoge logonet, “It Iterali mendek aap wim namburiyak inobam ti, ineebe delapan ratus ribu aret linggininakwi, ndi, it Yekura mendek ti, ineebe lima ratus ribu aret linggininakwi, eekoorak o,” yinuk, at Ndawut yoreegerak.

¹⁰It aap wim wakaa'ngget linggininabeegwaarak yoreegerak nogo, at Ndawut konengge nagagerik, iniki aaninggin ndugu agan nage logonet, at Aliku ALA yoge, “Kaliku nogoba ALA wae. An nen, Linggininabi nanip o, yoragarak nogo ti, maluk nggwok lombok aret eekirak o. An maluk lombok wi negen eekirak me, an kayeloman maluk eekirak yi, mbo nappu o, nogoba,” yoreegerak.

¹¹Yoge nagagerik, Ndawut eenik aga'lek awo nogo yege kagak, Aliku ALA nen yoge kagak yoraga Ndawut eeriyak abi paga kaga Nggat nogo, yori wage logonet,

¹²“Kat nen Ndawut yogop yori nak o. Naliku ALA nen wone alom kenagan koonogo oba puurak mbakirak me, at nen mban ambi miike kenok, ti aret oba pikit, yegerak, yori nak o.”

¹³Yoge mbareegi, ko'lu kuubondendok at Nggat nogo nen Ndawut owagam wage nagagerik, yoge logonet, “At Aliku ALA nen, O at Ndawut unde menggim mbi noogelo kagak tahun kenagan age, awim nen mugurok nugwi iinok mbaganit nege kagak, tut kenagan penengge, at unde menggim andi nggwok nappi wage, eerigin, yegerak me, kiniki pipak koombunuk, ambit mban miike keenok, wonok at nappani wagaarak yori naakit nduk, miiru o.”

¹⁴Yoge mbareegi, Ndawut nen Nggat yoge logonet, “Ai. Togop eeppaniyak ti, niniki aaninggin lombok ee'nake kwe, aakumi ineenggi paga nen eeppaniyak ti mage o. Ata, at Aliku ALA nen ninabuwa nggwok lombok mbake me, at eenggi paga nen eeppinanuwak o,” yoreegerak.

¹⁵Yoge mbareegi, kugi andi kuubondendok nen nok, “Ndi kuli ari nawak,” kooneegerak nogo aret aakumi Iterali inoba nappi wage mbareegi, aakumi o Ndan nen o Mberetiyeba kuli ineebe tujuh puluh ribu aret kambeegwaarak.

¹⁶At Ala ayonggo malayikat nogo nen o Yerutalem pup eerogo pikit nduk, nappi wagagerak nogo inoorit aap Yebut mendek endage Arawuna gandum agabolo mbelangge menggim taati ari wage mbareegi, aakumi mondok alik negen kambit nogwe nogo, at Aliku ALA iige nagagerik, iniki puru yinuk, at ayonggo malayikat aaninggin inoba piinet nage nogo, yoge logonet, “Abu aret me, keenggi awiikkolet o,” yinuk, yoreegerak.

¹⁷At Ala ayonggo malayikat nen aakumi lek eerogo piinet nage nogo, at Ndawut enegen kage nagagerik, Aliku ALA yoge logonet, “An nen aret wone yugu taganogo maluk lombok eekirak o. An nen aret maluk eekirak me, an inom, naaganapuri inom, aaninggin ninoba pinaniyak op aret kagak, it aakumi ndomba kwak yi, nano eekaarak paga inooke agandik o?” yinuk, yoreegerak.

¹⁸Ne ti eyom paga aap Nggat nogo Ndawut owagam wage nagagerik, yoge logonet, “Kat aap Yebut mendek endage Arawuna nen agabolo mbelangge menggim time lagangge logomenggendik, Aliku ALA ake warogo wogogo logowam ogobakkigiru o.”

¹⁹Yoge mbareegi, Aliku ALA nen aap Nggat yoreegerak nogo eerikit nduk, Ndawut nogo nage mbareegi,

²⁰at Arawuna nogo nen aap endagembogut awuri inom owagam wogwe enegen iige nagagerik, wundi nanuk, aap endagembogut abu'me endobanggun yindumbunuk, nggween paga ena wu'na'nuk yoge logonet,

²¹“Kat nowe kendagembogut nonggop nduk an kayeloman neya wagan?” Yoge mbareegi, at Ndawut nen at yoge logonet, “It aakumi andi inoba agaarak yi, lek aruwak nduk, kat agabolo mbelangge menggenom koba onggo kumbunuk, Aliku ALA ake warogo wogoriyak ogobakkigirikit nduk, keya wagi o.”

²²Yoge mbareegi, at Arawuna nen Ndawut yoge, “Kat nowe kendagembogut nen nggween ti aret wagangge logomenggendik, eeriyak mbakendak nogo aret eerenok nduk, warogo kani kuniyak tapi inom, anggen mbelangga eyo obate mbanak inom, tapi enggaanok pugumbunuk yabu eerit nugwi eyo nogo inom, abok aret

²³kat nowe kendagembogut aret me, an Arawuna nen kat nowe kendagembogut wokkigi o.” Yoge nagagerik, “Warogo wogoge keenok, at Aliku ALA nen wagangge logonet, obeelom eeppagawak o.”

²⁴Yoreegerak kwe, aap endagembogut nen aap Arawuna nogo yoge, “Togop yagandak kwe, lek o. At Aliku nogoba Ala ake warogo kani kuniyak ti, onggo pega'lek neegak, warogo wogoriyak neebi me, onggo kat koona kuniyak uugwe mbake agarik o.” Yoge nagagerik, wu syikal 50 paga anggen mbelangge menggim nggween inom, tapi inom, kuneegerak.

²⁵Kungge nagagerik, at Aliku ALA ake warogo wogogo logowam ogobakkigippege nagagerik, Ala ake warogo kani kungge, inom lambunik logowak nduk, ake warogo wogoge, eeke nagagerik, aakumi nogome inake Aliku ALA yoge mbareegi, andi aakumi Iterali inoba piige nogo lek aret agagerak. 1