Read Western Dani 2 Tamuwen 3 Bible Online

2 Tamuwen 3 - Western Dani bible

2 Tamuwen 3

¹Ndawut owe-awot inom, Tawun owe-awot inom, inom ogoo'na'nuk, wim nggaganggak mban eeko logonet, at Ndawut awuri inom ineegin tiyak ari, ndi, Tawun awuri inom ineegin tebek ari, eeko nogogwaarak.

²At Ndawut o Keboron logonet, apuri aap ndaganabeegerak nogo inendage yi o. Apuluk manggu ndarak ti, kwe Yiteren mendek endage Akinowam aagaluk aap endage Amonon aret.

³Ambokan ndarak ti, aap Naban awi Karemen mendek kwe togwe pereegerak waganeegerak Abigayin aagaluk aap endage Kileyap. Ambokan ndarak ti, aakumi Nggetut inowe endagembogut Talamayi apuluk kwe Maaka aagaluk aap endage Abatalom aret.

⁴Ambokan ndarak ti, kwe Kagit aagaluk aap endage Aroniya aret. Ambokan ndarak ti, kwe Abitan aagaluk aap endage Tepaka aret.

⁵Ndi, ambokan ndarak ti, Ndawut akwe Egala aagaluk aap endage Yitereyam aret. At Ndawut o Keboron logonet, apuri obaane'me piyareegerak nogo ti aret.

⁶At Tawun owe-awot inom, Ndawut owe-awot inom, ogookko'nok wim nambukwi iigak, at Abenet nogo nen Tawun owe-awot inom logonet, at mban iya mbako logowak nduk, ake mban koonggo'net nage nagagerak.

⁷At Tawun akwe ayeloman wogo aap Aya apuluk endage Iritapa wonagagerak me, ne ambi paga at Itibotet nogo Abenet yoge logonet, “Nonggop nduk kat nogoba akwe kimbirak nogo yegendak?”

⁸Yoreegerak ti paga at Abenet nogo anini nen Itibotet mberege logonet, “An nggeewo kwak aap Yekura mendek nomba'nuk, yo'nege agandik? O aa'nduk nen nok, yogondak kuli kat kogoba Tawun inom, at owe-awot inom, oreewi inom, mbo piiga'lek ninom perenak aret wonage logonet, kat keebe at Ndawut wogorulik kagak, kat nen, Nogoba akwe maluk eeppegendak, yo'negendak ti, nonggop nduk yo'nege agandik?

⁹ At Aliku ALA nen, “Nowako,” yinuk, kumbuk mbanggolage logonet, Ndawut yoreegerak nogo, a'me nggelok yuwak nduk, an Abenet nen aret it aakumi Iterali kat kogoba Tawun abu'me menggaarak nogo abok aret waganogo Ndawut abu'me piya nage neenok, it Iterali inom, Yekura inom, inowe endagembogut logonet, wone lengganogo yorage menggim o Ndan nen nok, o Mberetiyeba kuli aret aruwak nduk, piya noorak koonggirak nogo eeka'lek neenok, at Ala nen aaninggin noba panege logonet, noorukwak, an eerigin aret mbake logot o.”

¹⁰

¹¹Yoge mbareegi, at Itibotet nogo agabiti nen wone ambe paga nen ambiriluk ambi wunabulik puk aret agagerak.

¹²At Abenet nogo wone Itibotet yoge nagagerik, at Ndawut nogo o Keboron wonage me, at yori nookwak, obaane'me wone agago nappiige logonet, “Nggween yi ti, aap ta nen unde wonage o? It aakumi Iterali abok aret kat mban kabu'me piyoorak yeenggwa kirikit nduk, nimbirak wone mbanuwok o,” yinuk, wone agago nappiyareegerak.

¹³Nappiyareegerak yori nogo mbareegwa, at Ndawut nen ari logonet, “Nimbirak wone mbaniyak op aret o. Ndi, wone mbaniyak wage logonet kenok, eeriyak ambi yi yokkiri o. Neya wage logonet, an nakwe Tawun apuluk Mikan nogo, wonok wage lek keenok, an nenggaawak paga ya'i woroorak lek o. Wonok wage keenok mban an nowagam wa'nu o.”

¹⁴ Yorage nagagerik, at Ndawut nen wone ambi Tawun aput Itibotet yori woraawak nduk, wone agago nappiya wage logonet, “It Pilitin mendek inayo ambiragap 100 mbanak nogo paga nakwe Mikan onggo mbaneegirak nakwe aret me, nappani mok o,” yinuk, wone agago nappiya wagagerak.

¹⁵Nappiya wagagerak Itibotet yori wogo mbareegwa, kwe Mikan nogo aap Layit aput Palitiyen wapporogo wonage me, ndininuk woraawak nduk, at Itibotet nen aap nappiyareegerak kwe nogo ndininuk wogwe me,

¹⁶at ogonggelo Palitiyen nogo inambo'me le agan o Mbakurim unggwi wage mbareegi, at Abenet nen oone panggok togon yoge logonet, “Kiyokan kame nak o!” Yoge mbareegi, ame iyokan aret nagagerak.

¹⁷Nage kagak, at Abenet nen it aap Iterali mendek inoweewi yorage, “At Aliku ALA nen aap Ndawut wone abuk nggaruk togon yoge logonet, An napuri Iterali nogo, it Pilitin mendek inom, kinawim alik mendek inom, ineenggime nen ndinogo inagap ndake logorak kat nayeloman Ndawut leenogo mippagareegirak o, yinuk, yoreegerak. Ndi, kit kunduk, o maan nen, At Ndawut ninowe endagembogut aruwak, mbako monggotak nogo, yogondak nanonggwan aret agaarak me, at aret ninowe endagembogut logowak o,” yinuk, yoragagerak.

¹⁸

¹⁹Yorage nagagerik, aakumi Mbeniyamin mendek inom wone liirogon mbangge nagagerik, ti'nuk, it Iterali inom, it aakumi Mbeniyamin mendek abok aret inom, eeriyak wone yereegwaarak nogo, at Abenet awuri ineebe 20 inom at Ndawut o Keboron wonage me, yori nogogwaarak. Yori nogo mbareegwa, at Ndawut nen aap Abenet inom, awuri inom, inanooniya laago nggwok lareegerak.

²⁰

²¹Laago nenok, at Abenet nen Ndawut yoge, “It Iterali inowe kendagembogut logonet, eeke logorak kiniki mbake nogo eeke logonok nduk, it aakumi Iterali abok aret kat nowe kendagembogut kinom wone mbaniyak kuwak eeppiya naakit nduk, yo'niru o.” Yoge mbareegi, “E o. Kiniki ugun aret nak o,” yinuk, yoge mbareegi, iniki ugun aret wagagerak.

²²Aap Abenet nogo, Ndawut imbirak o Keboron wonagagerik, at Ndawut nogo nen warulik iniki ugun woraawak nduk, nappi wagagerak wage kagak, Yowap inom, Ndawut awuri wim eeka inom, wim nambuppunuk iniyokan nogo logonet, yi mendek ndi mendek kugun wogo nogo apit aret wonok nogogwaarak.

²³Nogo mbareegwa, “Aap Net aput Abenet nogo, aap endagembogut Ndawut wonage me wage mbaki, Ndawut nen, Kiniki ugun aret nak o, yinuk, nappegerak o,” yinuk,

²⁴at Yowap yogo mbareegwa, Yowap nogo Ndawut wonage me wage nagagerik, yoge logonet, “Nogoba. At Abenet nogo, kat kowagam wage mbaki, nonggop eekendak? Kat nonggop nduk, warulik nappegendak?

²⁵At Net aput Abenet obaabut nogo ti, kat abu keenu areto. At wagaarak nogo ti, kat eerit nage inom, eeriyak koongge inom, abok aret eenu arikit nduk, kambokan lagani wagaarak kagak, nonggop nduk, nappegendak?”

²⁶Yoge nagagerik, Ndawut nogo teppunuk, Abenet woraawak nduk, aap yonggo nappiya wagagerak. Yonggo nappiya wagagerak wogo nogogwaarik, Abenet nogo niyo nggween kabunik me Tira taati inom lambumbunuk, Ndawut eenggo'lek kagak wonok iniyokan nogogwaarak.

²⁷Wonok o Keboron nogo mbareegwa, at Yowap nen imbirak inalik wone mbaniyak negen eeppunuk, wonok tu unggwogo menggam taati ari nanuk, “Nawuluk ane'me wari o,” yinuk, aanogum me ndut kenenak paga linggage mbareegi, taati aret kambeegerak.

²⁸Wareegerak nogo at Ndawut aruk konengge nagagerik, ari logonet, “An inom, it nabu'me wonogo menggaarak inom, nogo nen aap Net aput Abenet amiya wumbuulik at Aliku ALA eenu aret me, amiya nit nineenggi paga logogin mondok lek o.

²⁹At Yowap iniki mba'nuk nen aret wakerak me, Abenet amiya ti, at Yowap inom, owe-awot inom, inoba aret logowak o. At owe-awot inenggela'me nen aap ambi anggore'na wungge kagak nege, ambi awin aaga'ne kunik nege, ambi endop maluk waanggun luk nege, ambi wooluwak paga nen wake, ambi mbi abu nen kangge, mondok-mondok togop aret eerit wundi wogo logogun o,” yinuk, yereegerak.

³⁰O Nggibeyon nogome wim nambuko logonet, aap Abenet nogo nen Yowap Abitayi imbirak inawuluk Atayen wareegerak me, it imbirak nen Abenet wareegwaarak kenok, yereegerak o.

³¹Nogo wako mbareegwa, at Ndawut nen Yowap awuri inom wonage nogo abok aret yorage logonet, “Kinambogoyum nibinogo patinuk, kinayum maluk mendek kero yirippunuk, at Abenet eebe warak wonok nogwe iigak, aleenggu maarit kinaa'nduk nanip o.” Yorage mbareegi, wonok nogwe iigak, at Ndawut nogo inambokan aret nagagerak.

³²Nogo nogogwaarik, Abenet eebe warak nogo, o Keboron nanuk, kanggwi iinok, mambiigo menggam mambugwi iigak, aap endagembogut Ndawut inom, it aakumi apit aago inom, mambugwi me taa'nogo yendok-wandok eeppunuk logonet, aleenggu maako nogogwaarak.

³³Ndi, at Ndawut nogo nen Abenet alendawi tiyangge logonet, “Kat Abenet yi wae. Nonggop nduk wi negen keegak, Kookaarak kanggendak o? Kat keenggi keele maarak wonage, Kiyok keele maarak wonage, Eeka'lek keegak kwe, Aap maluk mendek nen, Aakumi ugun inooko mengga kwak, Kookaarak kanggendak o,” yinuk, alendawi tiyangge kagak, it aakumi abok aret inoone nggwok paga aleenggu maareegwaarak.

³⁴

³⁵Ndi, o awo kiyoma aga'lek liingge kagak, aakumi abok nen mbi nawak nduk, at Ndawut yori wagak mban eereegwaarak kwe, at Ndawut nen yorage logonet, “Oonegen awo kilu yi naga'lek kagak, an mbi ambi nengge neenok, at Ala nen aaninggin noba panege logonet, nooriyak op areto, yinuk, kumbuk mbanggirak me, noorukwak an mbi nagin lek o,” yinuk, yoragagerak.

³⁶Yorage mbareegi, it aakumi apit aret Ndawut yereegerak nogo konenggo nogogwaarik, iniki ale'nggen agagerak. Ndi, Ndawut nen yi eekak ndi eekak eereegerak nogo abok aret it aakumi nen op aret mbareegwaarak.

³⁷Ne ti eyom paga it aakumi Ndawut apuri nogo inom, aakumi Iterali mendek inom, nogo nen aap Net aput Abenet nogo, at endagembogut Ndawut nen warulik ineenu ogogwaarak.

³⁸Ti'nuk, at endagembogut Ndawut nen inom yabu eeko menggaarak nogo yorage logonet, “O yogondak yi paga aap Iterali inowe nggwok ambi kanggerak kineenggo'lek a?

³⁹Kinowe nendagembogut an aret amburu eerogo mippanggerak kwe, nomaawi lek aret wonage neegak, kwe Teruya aagalogwe yi, inomaawi ambik aret agaarak me, at Aliku ALA nen it maluk eeppegaarak nogo, onggo ndak-ndak aret eeppiige logogin o,” yinuk, yoragagerak.