Read Western Dani 2 Tamuwen 6 Bible Online

2 Tamuwen 6 - Western Dani bible

2 Tamuwen 6

¹Ti'nuk, at Ndawut nen it aap ineebe tiga puluh ribu aret aakumi Iterali inenggela'me nen leenak wonogwe nogo abok aret ne ambinom kuwak eerogo piige nagagerik,

² Ala aloobut mbanak abit irip-irip paga it malayikat negen kerub wonogwe iigak, Ala oolo menggerak kenok, at endage, Omaawi Lombok Menggerak Aliku ALA Aloobut Mbanako, yinuk, yogo nogogwaarak nogo, o Yekura yaga'lelo Mbaale wonage me, at Ndawut awuri inom wonok woraawok nduk, nogogwaarak.

³ Nogo nogogwaarik, Ala aloobut mbanak nogo, o puut paga aap Abinarap ame wonage me waganggo nogogwaarik, nggweendo awo ogobakkigirik ti paga punuk, tapi nen nikkenok wonok wage kagak, aap Abinarap apuri Uta Akoyo imbirak ena koonit wogo logonet, aap Uta nogo Ala aloobut mbanak eraanu wage, ndi, Akoyo nogo aa'nduk age, ee'nuk, wogwe iigak,

⁵at Ndawut aakumi Iterali mendek abok aret inom inale'nggen alik negen inikime nggelok ari logonet, at Aliku ALA enggaanom paga nggitat mbuuluk mendek inom, nggitat nggwok mendek inom, togolowak oone lobale inom, nggawiwak mbanak inom, togolowak tabak pu ndale eeka inom, oone eekak ti mendek abok aret oone eerit kwirabik-kwirabok agan ndawi warit wogogwaarak.

⁶Togop eerit aap Nakon gandum agabolo mbelangge menggim nogome ari wogo nogogwaarik, tapi Ala aloobut mbanak wonok wogwe nogo iniyogobit lik togon a'nggan nggininogo wuppuwak nduk, eeko mbareegwa, at Uta nogo nen Ala aloobut mbanak nogo eenggi pigaganeegerak.

⁷Pigagangge mbareegi, Aliku ALA anini mi'nage logonet, Uta nen, “Pigoorak iya lek o,” yinuk, pigaganeegerak paga Ala aloobut mbanak me taati aret wareegerak kambeegerak.

⁸Kangge mbareegi, Ala nen aap Uta wareegerak ti paga, Ndawut anini agagerak kenok, o ti endage, “Anini Uta Oba Pereegim o,” yinuk, yogo nogogwaarak me, o yogondak yogwe wonogwe aret o.

⁹Ndi, wareegerak kambeegerak ti paga at Ndawut nogo, Aliku ALA agabiti nen ari logonet, “At Aliku ALA aloobut mbanak yi, nonggop togon wonok name pi na o?”

¹⁰Ari nagagerik, “Ala aloobut mbanak yi, o an nagota time wonok pi noorak neebi o,” ari nagagerik, aap Nggat mendek endage Obet-Erom ame time pereegerak.

¹¹ Pereegerak time wonage kagak, tut kenagan peneneegerak paga aap Nggat mendek endage Obet-Erom inom, at inom menggaarak abok inom, at Aliku ALA ale'nggen inoba piige nagagerak.

¹²Ala aloobut mbanak nogo aap Obet-Erom ame wonage kenok, at inom menggaarak ineebe paga inom, at amendek paga inom, Aliku ALA ale'nggen inoba piige nogo aap endagembogut Ndawut yori wogo mbareegwa, at Ndawut nen Ala aloobut mbanak aap Obet-Erom ame wonage nogo, wa nage nagagerik, at Ndawut agota nogome wonok wogo logonet, inale'nggen mbarit wogogwaarak.

¹³Aliku ALA aloobut mbanak nogo wonok iniyok 6 kuli pi wogo mbareegwa, at Ndawut nen, “Ya'i puk a'nip o,” yorage nagagerik, tapi ngguunok inom, tapi aagaluk amok tigiluk inom, Ala ake warogo wogoreegerak.

¹⁴Wogoge nagagerik, iniki ale'nggen nen kani kunik negen inikime wunuk ari logonet, Aliku ALA enggaanom paga kayin yawenak amuni mbanak yum agale warak epod nogo mban yirik logonet, kwirabik-kwirabok agan

¹⁵it aakumi Iterali abok aret inom iniki ale'nggen paga Aliku ALA aloobut mbanak nogo wonok, oone nggwok eekak trompet nogo oone pu eekwi, keekok yogwe, eerit wogogwaarak.

¹⁶Aliku ALA aloobut mbanak nogo, wonok Ndawut agota unggwi wogo logonet, at Ndawut iniki ale'nggen nen at Aliku ALA enggaanom paga ku'mbo nagak ogut-togut warit wage at akwe Tawun apuluk Mikan nogo, pugagi ambe mbanak me nen enegen wunggage nagagerik, inikime nen, “Aap yi agan wage abu neebi a!” mbareegerak.

¹⁷Ndi, at Aliku ALA aloobut mbanak nogo, wonok wogo nogogwaarik, logowam awooliya wurogo punuk at Ndawut koonogo pereegim nogome pogo nogogwaarik, at Ndawut nen Aliku ALA enggaanom paga taati ake warogo kani kungge, Ala inom lambunik logowak nduk, ake warogo wogoge, eereegerak.

¹⁸Nogo eeke nagagerik, at Omaawi Lombok Menggerak Aliku ALA endage kumbunuk it aakumi Iterali mendek abok aret ale'nggen inoba piyareegerak.

¹⁹ Ale'nggen inoba piige nagagerik, it aakumi Iterali time wonogwe nogo aap a, kumi a, abok aret tapi enggaanggum inom, oroti longgo warak ambi inom, anggur anggen woloonak oroti worarak mendek ambi inom, inalitik-inalitak tumburiragagerak. Tumburirage mbareegi, it aakumi abok aret iname lombok nogogwaarak.

²⁰Nogwe iigak, at Ndawut nogo at inom menggaarak ale'nggen inoba piyaakit nduk, ame nage mbareegi, Tawun apuluk kwe Mikan nogo wundi woraanuk, at Ndawut imbirak lambungge nagagerik, yoge logonet, “It aakumi Iterali inowe endagembogut yi, aap iniki mbanak inayum yirik lek nugu mengga kwak, o yogondak yi paga it komologwe kayeloman mini inigen iigak kenggali lek, kayum yirik lek nege keegirak nogo ti, Wi, kombaki o.”

²¹Yoge mbareegi, at Ndawut nen kwe Mikan nogo yoge logonet, “An nale'nggen nen ogut-togut wake neegendak nogo ti, aakumi inayuk wuke logonet warulik o. Ata, kogoba Tawun inom, owe-awot inom, wonogwe iigak, Aliku ALA nen at apuri Iterali mendek inowe nendagembogut logonet, inarum logokit nduk, inenggela'me nen leenogo mippaneegerak nogo enggaanom paga eekirak me, op aret eekirak o.

²²An aap iya mendek lek o, yinuk, nenggali eerogo pake neegendak nogo ti, abunuk eeke logogin o. Ndi, Kayeloman mini nen togop kombarugun, yagandak kwe, it nen togop nombarugun lek tiyappanugo logogun aret o,” yinuk, yoreegerak.

²³Ndi, at Tawun apuluk kwe Mikan nogo aagaluk ndaka'lek wubili aret logonet, kambeegerak.