Read Western Dani 1 Endagembogut 10 Bible Online

1 Endagembogut 10 - Western Dani bible

1 Endagembogut 10

¹At Talomo nen Aliku ALA endage tiyappege logonet, eerit nage paga endage wiganinuk nage nogo, kwe nggwok o Tiyeba mendek aruk konengge nagagerik, “At Talomo eeke yogwe ti, nonggop ari kaamun? Abut mbani na,” mbake nagagerik,

²aap apit aago inom o Yerutalem wogo logonet, yi mendek ndi mendek ombat abe eeka inom, mbuti emas ambik inom, yugum onggo nggwok mendek inom, apit aret unta amborowak paga nippunuk wonok, aap Talomo wonage me ka wogo nogogwaarik, yi wone ndi wone, “Nonggop togon eeke,” mbake nogo abok aret at Talomo kin wakkagagerak.

³Kin wakkage mbareegi, at Talomo nen kwe wone yoreegerak nogo, ambi yoriyak meek kenok teppuulik abok li'lak aret yoreegerak.

⁴At kwe nggwok Tiyeba mendek nogo nen at Talomo iniki warak lombok nen wone yoge, ndi, at awi o nggwok abe wuppunuk wonage,

⁵nunggwi mendek ageyo ndoonak paga koonogo pege, at inom yabu eeko menggaarak ina koonogo kwippiige, ayeloman mini inayum nggorek abe yirik logonet, ake eeko logowak nduk koonogo piige, niyo toologo iri woraawak nduk yorage, Aliku ALA awi wurik me ake warogo kani kungge, eeke nogo kage nagagerik, oone mondok lek aret agagerak.

⁶Oone abu lek age nagagerik, at endagembogut nogo yoge, “Yi mendek ndi mendek eerit nage menggendak inom, kiniki warak lombok logonet ari menggendak inom, yo'nugwi name logonet naruk konengge nagarak nogo ti, mondok abet aret kagi o.

⁷Name logonet, aakumi nen yo'nugwi nogo ti, Abet aret yaga, mbarulik kwe, an neebe nduk aret wage nagarik perak, kiniki warak inom, keenggi warak inom, nenegen abe nen kage nagarik, Mondok iya alik negen wonage kagak, name wonage me yo'negaarak nogo ti, ando mbuuluk mban yo'negaarak kagi, yinuk, yogondak abet aret mbake agariko.

⁸Togop aret me, it kaaganapuri inom, it kawuri kake yabu inaruk konok eeko menggaarak inom, kat kiniki warak nen yorage konenggwi nogo inale'nggen alik negen wonogwe iigi o.

⁹At Aliku kogoba Ala nen inikilom kombake logonet, aakumi Iterali inowe kendagembogut logonet wone lengganogo yorage logonok nduk, mippagareegerak me, endage tiyappogo logowok o. At Aliku ALA nen it Iterali mondok-mondok iniki kunik eeginake menggerak me, it abe mban koonggwi, li'lak mban eekwi, eekwi iigak, inarum logonok nduk, kendagembogut mippagareegerak o,” yinuk, yoreegerak.

¹⁰Yoge nagagerik, mbuti emas aaninggin empat ribu inom, yi mendek ndi mendek ombat abe eeka apit aret inom, yugum abinak ambik onggo nggwok mendek inom, aap endagembogut nogo wogoreegerak. At kwe nggwok Tiyeba mendek nen yi mendek ndi mendek ombat abe eeka at endagembogut Talomo wogori wagagerak nogo ti, ambik mondok iya lombok wogori wagagerak me, peebi aap ambi nen at togop wogori woroolik aret o.

¹¹Ndi, aap Kiram ayiiro nogo paga o endage Opit nen mbuti emas inom, eyo ndiindi ambik lombok inom, yugum onggo nggwok nogo mendek inom, wonok at Talomo wogori wogo nogogwaarak.

¹²Eyo ndiindi nogo paga aap endagembogut Talomo nen Aliku ALA awi wureegerak nogo inom, at endagembogut awi o nggwok abe wureegerak nogo inom, awe eerit nage, ndi, it ndawi yaga nen eeko logorak nggitat mbuuluk mendek inom, nggwok mendek inom, inake ogobakkigike, eereegerak. Eyo ndiindi wonok Talomo wogori wogo nogogwaarak nogo ti, ambik mondok iya lombok wogori wogo nogogwaarak me, ambik togoti wonok wogwe, inigen kogwe, eeka'lek o yogondak kuli wonage aret.

¹³Ndi, at endagembogut Talomo nogo nen endagembogut logonet amendek ambik agagerak me, oona ngginik kagak, kwe nggwok Tiyeba mendek wogoge logonet, kwe nogo nen uugwe mba'nuk, nggino yoreegerak nogo inom aret wogoge mbareegi, wonok awuri nogo inom aret iname nogogwaarak.

¹⁴Tahun ambi eekak paga mbuti emas Talomo wogori wogo nogogwaarak ti, aaninggin dua puluh tiga ribu aret age nagagerak.

¹⁵Ndi, it aap yi mendek ndi mendek toko kunggo menggaarak nen pugwi inom, inamendek onggo-onggo kunit nugwi nogo nen pugwi inom, aap inendagembogut o Arap mendek abok nen wogori wogwe inom, it aap o unde menggaarak inoweewi nen wogori wogwe inom, ti inom lambunik linggingga'lek aret wonagagerak.

¹⁶At aap endagembogut Talomo nen mbuti emas aan libik-lebek eerogo nggeemu yele-kole dua ratus ogobakkigike logonet, ambiret ti, mbuti emas aaninggin kenagan wakkaanuk, ambi oolo wakkagak ogobakkigike,

¹⁷ndi, mbuti emas aan libik-lebek eerogo nggeemu mbuulogwe tiga ratus ogobakkigike logonet, ambiret ti, mbuti emas aaninggin mbere negen wakkagak ogobakkigirogo pege, eeke nagagerik, wonok o nggwok wurik endage, O Libanon Eyonggaame o, yinuk, tooneegim nogome pi unggwagagerak.

¹⁸Ti eeke nagagerik, at endagembogut Talomo nen kwi'ndak logonet, wone lengganogo yorage logorak kole ambi gajah eyak paga ogobakkigike nagagerik, mbuti emas abe paga nabenogo pit nage,

¹⁹kwi'nari lagangge logonet, iyok pit laganggak 6 kuli pege, amborowak kemberak logowam ena yomonogo ogobakkigike, peenok-peenok eenggi lumbegak eerogo punuk, singa ogut mi'ndak eraanu peenok-peenok eerogo mippege,

²⁰ndi, iyok pit laganggak 6 nappugu nogo, irip aru-ogwe singa ogut 12 eerogo pit lagangge, eereegerak. At Talomo ti eereegerak nogo aap inendagembogut inabu'me piigo menggam togop ambi wonageelik mendek aret eereegerak.

²¹At endagembogut Talomo aniyo nenggak aniyoowak nogo ti, mbuti emas paga ogobakkigike, ndi, o nggwok wurik endage, O Libanon Eyonggaame o, yinuk, tooneegim yi mendek ndi mendek wonagagerak nogo ti, mbuti emas ti mendek paga mban ogobakkigike, eereegerak. At Talomo wonage ti eyom aap nen, “Mbuti perak onggo mbuuluk,” mbako nogogwaarak me, yi mendek ndi mendek mbuti perak paga ambi ogobakkigirulik mbuti emas paga mban ogobakkigike nagagerak aret.

²²At endagembogut Talomo inom, at aap Kiram inom, yi mendek ndi mendek kunik wonok nagak-wagak eekak yuurak inayiiro ambik wonagagerak me, inayiiro nogo wonok wundi nogo nagaatik, mbuti emas inom, perak inom, gajah eyak inom, kera inom, towe yaawi inom, kunogo yiiro paga manabit nugwi iigak, tahun kenagan eeppunuk, wonok wagak eeko nogogwaarak.

²³Ndi, aap endagembogut Talomo nogo ti, iniki warak logonet, eenggi warak mondok iya alik negen aret wonagagerak me, it yi aakumi ndi aakumi inoweewi inendagembogut o nggween paga wonogwe abok aret at kokwak ambi wonogo logolik aret.

²⁴Togop aret me, at Ala nen Talomo iniki warak eeppereegerak paga yi aakumi ndi aakumi o nggween paga abok aret, “Ari kaawok o,” yinuk, owagam wogo nogogwaarak.

²⁵Ndi, pekka wogo logonet, inalitik-inalitak yi mendek ndi mendek mbuti emas paga ogobakkigirik inom, perak paga ogobakkigirik inom, yum nggorek abe inom, yigin inom, yi mendek ndi mendek ombat abe eeka mendek inom, kuda inom, kuda kwak bagal inom, yi tahun ndi tahun onggo lek we aret Talomo wogori wagak eeko nogogwaarak.

²⁶Ti eekwi iigak, at Talomo nen nggweendo wim eeka ineebe seribu empat ratus inom, kuda wim eeka dua belas ribu inom, kuwak eeppiige nagagerik, o kota-kota nggweendo wim eeka logorak wureegim nogome piige, at wonage me o Yerutalem piige, eereegerak.

²⁷Aap endagembogut nogo nen yugum nggininik kwak mbuti perak o Yerutalem ambik aret eerogo pege, ndi, eyo ndoolu puut ogobak-ogobak ambik pit nagagerak kwak, eyo nggabina ambik aret eerogo pege, eereegerak.

²⁸At Talomo ake kuda o Metit nen wonok wogwe, ndi, it at ake yi mendek ndi mendek kunggo menggaarak nogo o Kewe nen kuda kumbunuk wonok wogwe, eeko nogogwaarak.

²⁹Nggweendo wim eeka ogobakkigirik o Metit nen wogori wogogwaarak nogo ambiret onggo ti, mbuti perak aaninggin 7 pugwi, ndi, kuda ambiret onggo ti, mbuti perak aaninggin mbere negen pugwi, eeko nogogwaarak. It Iterali mendek nen nggweendo wim eeka ogobakkigirik inom, kuda inom, aap alik inoona kuninuk wonok wogwe iinok, it aakumi Ket mendek inoweewi inendagembogut inom, aakumi Aram mendek inoweewi inendagembogut inom, nogo nen Iterali inoba kuni wogo nogogwaarak.