Read Western Dani 1 Endagembogut 11 Bible Online

1 Endagembogut 11 - Western Dani bible

1 Endagembogut 11

¹Aap endagembogut Talomo nogo Pirawun apuluk iniki kunik wonage kagak, kumi Iterali lek kumi alik it Mowap mendek inom, Amon mendek inom, Erom mendek inom, Tiron mendek inom, Ket mendek inom, apit aret iniki kunik eeginabeegerak.

²At Aliku ALA nen aakumi Iterali yorage logonet, “Kit nen it mendek wogonakwi, ndi, it nen kit mendek wokkinakwi, eerumonggotak paga it nen kiniki nomongginakwi iinok, an Ala nobaane'me it inagugi nogo kinom eerit noorak eekkinabukwak me, togop eeriyak mage o,” yoragagerak kagak, at Talomo nogo kumi ti mendek iniki kunik eeginake nagagerik, it paga iniki perenggolagagerak.

³Perenggolage nagagerik, akuwi aap inendagembogut inapuri tujuh ratus aret wogonake, ndi, akuwi luulu wogo ti, tiga ratus wogonake, eereegerak paga iniki nomoneegerak.

⁴Togop aret eereegerak me, at Talomo abu anggok ari nage kagak, akuwi nogo nen Ala mbo punuk, at Ala obaane'me kugi eerit nawak nduk, iniki nomoninuk nogo mbareegwa, ogoba Ndawut iniki inom, eebe inom, Aliku ogoba Ala panggombunuk, mugurok nage nagagerak ti kokwak, at eeke logolik.

⁵Ata, it aakumi Tiron mendek inagugigwe Atitoret inom, it Amon mendek inagugi ogole warak Molok inom, mugurok nage nagagerak.

⁶Talomo nogo ogoba Ndawut iniki inom, eebe inom, Aliku ALA oba panggombunuk, mugurok nage nagagerak nogo ndak-ndak eeke logolik. Ata, Aliku ALA enegen kagak maluk lombok eeke nagagerak.

⁷Eeke logonet, it Mowap mendek inagugi ogole warak Kamot inom, it Amon mendek inagugi ogole warak Molok inom, inaanggo warogo wogoragak o Yerutalem oonegen lagi wage menggim pa'nggwe puut paga time ogobakkigirogo pi nage,

⁸ndi, at akuwi kumi Iterali mendek lek aakumi alik mendek wogonabeegerak inagugi inaanggo warogo wogorogwe, obari abe kaga nogo mendek inake kani kunggwi, eeko menggaarak nogo nen eeko logowak nduk, inake togop aret ogobakkigirogo piige, eereegerak.

⁹At Aliku ALA nen, “An mu'neren nage nobaane'me kugi mugurok nage logorak ti mage o,” yinuk, Talomo yoreegerak nogo kagak, at liirogon pippunuk eerulik. At ne mbere paga nikka wagagerak Aliku it Iterali inogoba Ala nogo mbo punuk, nomoninuk inagugi mugurok nage nagagerak ti paga, Aliku ALA nen anini at oba pereegerak.

¹⁰

¹¹Anini oba punuk, yoge logonet, “Wone lengganak inom, wone ninom koonogo pereegurak nogo inom, kat liirogon woppunuk eerulik kobaabut maluk logonet, yokkereegirak taganggendak me, kabu'me piinok wonage menggenom nogo, An unde logokit, mbake keegak, ndik togon eerogo kinom eeke menggendak kawot ambi wogorigin o.

¹²Ti eerigin ti, kat paga nen eerigin lek o. Ata, kogoba Ndawut niniki kunik wonagagirak me, kat kaput unde wonage kagak aret kwe, ndik togon eerogo kawot ambi mendek nogo wogorigin o.

¹³Wogoriyak nogo ti, kaput abu'me piinok wonage menggim ti, abok aret ndinogo wogorigin lek o. Ata, nayeloman Ndawut niniki kunik eeke, ndi, o Yerutalem miirogo pake, eereegirak me, anebunu ambiriluk ambi at porogo wonage kagak, inanebunu Iterali mendek abok aret kawot ambi unde logowak nduk, wogorigin o,” yinuk, yoreegerak.

¹⁴At Aliku ALA nen aakumi Erom inoweewi inendagembogut mendek wiganak ambi endage Karat nogo, Talomo imbirak ogoorak logowak nduk, inikime eeppereegerak.

¹⁵Inikime eeppereegerak nogo ti, maan aa'nduk Ndawut nen aakumi Erom mendek inom wim nambuke wonage me, awuri ineegin warak inowe Yowap nogo nen inoorak nogo nggween taambiyaakit nduk, nage nagagerik, aap Erom mendek ineegin warak abok aret inoorogo piinok, at aakumi Iterali abok aret inom nen eegu yumbuninik nogo, aap kero ambi teppiiga'lek abok aret inoorit nogwe iigak, tut 6 peneneegerak.

¹⁶

¹⁷Inoorogo piinet nogwe iigak, at Karat nogo awo wulaga mbuuluk me, it aap at ogoba inom eeko menggaarak nogo o Metit nen o wunarok kole nogwe me,

¹⁸inom o Miriyan nen o Paran nogo nogogwaarik, it aap time mendek, “Ninom aret nawi o,” yinuk, inom o Metit aap endagembogut Pirawun wonage me nogogwaarak. Nogo mbareegwa, at Pirawun nen aap Karat nogo awi inom, anggween inom, wogoge nagagerik, ambi nengge logorak inom punogo piyareegerak.

¹⁹At Pirawun nen aap Karat nogo inikilom mbake nagagerik, at akwe lombok kwe nggwok endage Tapenet awuluk at ebeniluk nogo, Karat kolaawak nduk, wogoreegerak.

²⁰At Tapenet awuluk nogo nen ogonggelo Karat obaane'me aagaluk wulaga Nggenubat ndareegerak. Ndake mbareegi, kwe Tapenet nogo nen tawe eeke kagak, aap endagembogut awi o nggwok abe wurik nogome Pirawun apuri lombok inom wonagagerak.

²¹Ndi, “At Ndawut ombomini kambunuk nogogwam wonogwe me inom yonggonggola nage, ndi, awuri ineegin warak unde inowe Yowap nogo kunduk kangge, eekaarak o,” yogwe at Karat nogo aruk konengge nagagerik, aap Pirawun nogo yoge, “An nawi alom paga noorak mbakirak me, E, yo'niru o.”

²²Yoge mbareegi, at Pirawun nen, “Kat yime nano mendek lek kenok, kawi alom paga noorak yagan?” Yoge mbareegi, at Karat nen, “Namendek lek kenok ari lek kwe, name naakit nduk, E, yo'niru o,” yinuk, yoge mbareegi, ame o Erom wage nagagerik, wonage me, Aliku ALA nen Talomo imbirak ogoorak logowak nduk, inikime eeppereegerak ti aret.

²³Ndi, ti'nuk, ambi Talomo imbirak ogoorak logorak Aliku ALA nen inikime eeppereegerak nogo ti, aap Eliyara aput Ereton aret. At ogoba it Toba mendek endagembogut Kararetet mbo punuk, kole mbagangge nagagerik,

²⁴aakumi a'nggan wogonaka mendek kuwak eeppiinok, inowe a'nuk, eerit nage me, at Ndawut nen inoorogo piige mbareegi, it kole o Ndamitik ari nanuk, o unde eeppatinuk logonet, aap Ereton nogo inowe endagembogut mippereegwaarak.

²⁵Mippogo mbareegwa, aakumi o Aram mendek wone lengganogo yorage logonet, Iterali eebi lombok mba'nuk, aap Karat piyaganakak mban eeke nagagerak kokwak, aap Ereton nogo nen Talomo wonage kagak, Iterali inom ogoorak logonet, piyak-payak eerogo piige nagagerak.

²⁶Aap Eparayim mendek Nebat aput Yerobeyam Talomo imbirak yabu eeke menggerak awi Terena wonagagerak. At agalo ti, kwe togwe me, endage Teruya aret. Aap ti nogo kunduk, aap endagembogut Talomo eebi mbake nagagerak.

²⁷Aap endagembogut eebi mbake logonet, eereegerak nogo yi aret. At Talomo nogo nen o Yerutalem wurik eraanu endekenggwe nggween pit lagangge, ndi, ogoba Ndawut agota pak wurit nage, eerit nage logonet,

²⁸at Yerobeyam nen yabu omaawi ambik eeke enegen kage nagagerik, Yutup apuri wiganak yabu eekwi nogo abok aret inarum logonet, lengganinake logowak nduk, mippereegerak.

²⁹Mippege mbareegi, o ne ti eyom paga at Yerobeyam nogo o Yerutalem nen wundi nage me, aap Ala nen yoge kagak yoraga awi Tilo mendek endage Akiya nen ayum nggorek ngget mendek yi'nuk tu paga wage imbirak abuk a'nuk, o aakumi lek me inalik wonogo logonet,

³⁰aap Akiya ayum nggorek ngget mendek yi'nuk wagagerak nogo, nggooppege nagagerik, 12 kuli nibinogo pereegerak.

³¹Nibinogo pege nagagerik, Yerobeyam yoge, “At Aliku Iterali inogoba Ala nen ari logonet, Aap Talomo abu'me piinok wonage menggim nogo, An unde logokit, mbake kagak, ndik togon eerogo Iterali inanebunu 10 kat wokkirigin, yegerak me, yum 10 kuli nibinogo pigirak yi, wamen o.

³²At Aliku ALA nen, Ti eerigin kwe, nayeloman Ndawut niniki kunik eeke, ndi, aakumi Iterali inanebunu abok aret inawi kota-kota kagak, o Yerutalem mban miirogo pake, eereegirak me, at Talomo anebunu ambit mban unde logowak nduk, teppigin o.

³³An togop eerigin nogo ti, at Talomo ogoba Ndawut nen niniki mbake nogo eerit nage, nenegen neegak abe mban eerit nage, eeko logorak wone yugu inom, wone lengganak inom, liirogon porogo logonet mugurok nage, eeke nagagerak kokwak, eeka'lek an mbo paninuk, aakumi Tiron mendek inagugigwe Atitoret inom, aap Mowap mendek inagugi Kamot inom, aap Amon mendek inagugi Molok inom, ti mban mugurok nage kenok, togop aret eerigin o.

³⁴Togop aret eerigin kwe, at abu'me piinok wonage menggim abok aret eenggime nen ndinigin lek o. An miireegirak nayeloman Ndawut, Yogop ee'nu ndogop ee'nu, wone yugu inom, eeko logorak wone yugu inom, liirogon eeke nagagerak paga Talomo kangga'lek eenik awo wonage kagak wone lengganogo yorage logorak mippereegirak me, mbet-mbet ndinigin lek o.

³⁵Ata, ndi wuninik menggi kwak nendage time mondok-mondok ki logorak miireegim o Yerutalem nenggaanom paga an nayeloman Ndawut endage ki logowak nduk, at Talomo kangge kagak aput obaane'me mi'naremenggerak nogo, anebunu ambiret unde wonage kagak, eenggime nen inanebunu 10 nogo ndinogo kat wokkirigin o.

³⁶

³⁷Togop me, kat aakumi Iterali inowe kendagembogut logonet, yi o ndi o wone lengganogo yorage logorak mbake kenok, eeke logonok nduk, eeppagagin o.

³⁸Ndi, an nayeloman Ndawut eeke nagagerak kokwak, kat nen an wone lengganogo yokkege nogo eeke, niniki mbake nogo mugurok nage, an nenegen neegak wone lengganak inom, Yogop ee'nu ndogop ee'nu, wone yugu inom, eerit nage logonet, obeelom mban eeke, eeke keenok, at Ndawut apuri wiganak nen mban inendagembogut mi'narit wundi wogo logowak nduk, koonogo yoreegirak nogo kokwak, kat kapuri nen mban aakumi Iterali inendagembogut mi'narit wunggo logowak nduk, eeppagagin o.

³⁹Ndi, at Talomo maluk eerit nage paga Ndawut ombowologwe tebenogo piyaagin kwe, mondok-mondok tebenak logogun lek, yegerak o,” yinuk, yoreegerak.

⁴⁰Yoreegerak nogo konengge nagagerik, at Talomo nen Yerobeyam wariyak nduk, eereegerak mendek, Yerobeyam nogo mbaganit aap Metit mendek inowe endagembogut Titak o Metit wonage me nage nagagerik, time wonage kagak Talomo nogo aret kambeegerak.

⁴¹Ndi, at Talomo nogo endagembogut a'nuk wone lengganogo yorage logonet, yi eekak ndi eekak eerit nage nagagerak inom, iniki warak logonet ari nagagerak inom, ando abok ti, at eeke nagagerak ambuku liiru mbanak nogo paga, inom mbanak wonage nogo lek a?

⁴²Aap Talomo nen o Yerutalem logonet, aakumi Iterali abok aret inowe endagembogut a'nuk, wone lengganogo yorage kagak, tahun 40 eereegerak.

⁴³Eeke nagagerik, ombomini kambunuk nogogwam inom yonggonggola nage mbareegi, ogoba Ndawut agota kanggwi piya unggwogo menggam nogome eebe pi unggwogogwaarak. Pi unggwogo mbareegwa, obaane'me at aput Erekabeyam inowe endagembogut aret agagerak.