Read Western Dani 1 Endagembogut 17 Bible Online

1 Endagembogut 17 - Western Dani bible

1 Endagembogut 17

¹Aap awi o Nggileyat yaga'lelo Titebe mendek Eliya nogo nen aap Akap yoge logonet, “An yaga'lek neegak yi tahun ndi tahun paga mayu wage, miinanggen luurogo pege, eeka'lek aret kaamunggun o, yinuk, at ake eeke minggirak Aliku Iterali inogoba Ala eenik menggerak endage kumbunuk, yokkigi o,” yoreegerak

²Yoge mbareegi, at Aliku ALA nen Eliya nogo yoge,

³“O ya'i mbo punuk, oonegen lagi wage menggim pa'nggwe nage logomenggendik, niyo Yoraran oonegen lagi wage menggim pa'nggwe niyo mbuuluk endage Kerit aa'nggi paga time kumaa'nari nak o.

⁴Time wonage logonet, niyo mbuuluk Kerit nogo nengge me, towe ya'ngge-ya'ngge nen kambi wokkiri wogo logowak nduk, yoragarak o.”

⁵Yoge mbareegi, Eliya nogo Aliku ALA nen yoreegerak ndak-ndak, niyo Yoraran oonegen lagi wage menggim pa'nggwe niyo Kerit aa'nggi paga nogome puk ari nagagerak.

⁶Puk ari nagagerak time logonet, niyo mbuuluk nage nogo paga nengge, ndi, kuubondendok kenok, kiyoma kenok, towe nen oroti inom, enggaanggum inom, wogori wogwe nogo nengge, eeke nagagerak.

⁷Ti eeppunuk, ne mande negen wonage kagak, mayu ambi woroolik me, niyo mbuuluk Kerit nage nogo porok yereegerak.

⁸Porok ari mbareegi, Aliku ALA nen Eliya yoge,

⁹“Kwe togwe ambi o Tiron yaga'lelo Tarabat mendek nen kambi wokkege logowak nduk, an nen yogirak me, time logonok nduk, o yogondak time nak o.”

¹⁰Yoge mbareegi, at Eliya nogo o Tarabat nogome nage nagagerik, kota tu unggwogo menggam panggo yi nanuk, kwe togwe ambi kani aretop anebenggolage enegen kagagerak. Kage nagagerik, kwe togwe nogo yoge, “Ai, nagalo! An niyo naakit nduk, mbuuluk ambi toolak wonage kero, wo'niri mok o.”

¹¹Yoge mbareegi, kwe nogo niyo wa nage me, at Eliya nen yoge logonet, “Kwe yi wae! Mbi oroti ambi inom wo'niri mok o.”

¹²Yoge mbareegi, at kwe togwe nogo nen onggo yoge, “At Aliku kogoba Ala eenik menggerak endage paga abet aret yokkiri o. An nambi oroti abu lek me, tepung we ne ambit woorak iluk togolowa'na yonggolak inom, wam amburu togolowa'na o'lu iluk inom, ti mban wonage me, kani aretop anebenggo'nok name nage logominggirik, kani yi paga oroti worarogo naagaluk nimbirak nenok kambuwok nduk, eeke agarik o.”

¹³Yoge mbareegi, Eliya nogo nen kwe nogo yoge, “Kagabiti mbarugun o. At Aliku Iterali inogoba Ala nen ari logonet, Tepung togolowa'na yonggolak nogo ti lek age, wam amburu toolak ti kunduk lek age, eeka'lek kagak, Naliku ALA nen o nggween paga yime mayu wuppi woraagin, yegerak me, kame nage logomenggendik, eerit noorak yagandak ti, op aret kwe, kagak, mbuuluk iluk wonage yagandak nogo, waganogo an aa'nduk nake oroti mbuuluk ambi worarogo niri wa'nuk, ti'nuk, kaagaluk kimbirak kinake worappatinuk namunggup o,” yoreegerak.

¹⁵Yoge mbareegi, kwe togwe nogo ame nage nagagerik, aap Eliya nen yoreegerak nogo ndak-ndak eereegerak me, Eliya inom, kwe nogo aagaluk imbirak inom, netik-netak worarogo nunggwi iigak,

¹⁶at Aliku ALA nen Eliya yoge kagak, Eliya nen yoreegerak nogo ndak-ndak, tepung yonggolak nogo lek age, ndi, wam amburu toolak nogo lek age, eeka'lek aret wonagagerak.

¹⁷Ndi, ti'nuk, peebi kwe awi unde aagaluk wulaga nogo andi eereegerak. Andi nggwok lombok eerit unggwage logonet, iniki apit a'nuk, kambeegerak.

¹⁸Kangge mbareegi, kwe togwe nogo nen Eliya yoge, “Ala wone liirogon eeka yi wae. An ngge eekirak paga, Keebi, nomba'nuk yi eeppanggendak? An nomaluk nogo Ala nen abeppunuk naagaluk wulaga nogo waruwak nduk, neya wagandak ya?”

¹⁹Yoge mbareegi, Eliya nen kwe nogo yoge, “Kaagaluk ti, wonok niri omok o.” Yoreegerak iri wage mbareegi, Eliya nen wulaga nogo agalo eenggime nen wagangge nagagerik, wonok tilaabaga at nogo yege menggim lagangge nagagerik, at nogo yege menggim eyo ndoonak paga wimbunuk,

²⁰oone nggwok paga Aliku ALA yoge logonet, “Kaliku nogoba Ala wae. Kwe togwe nen waganogo ame mambani wagaarak kagak aaninggin oba pege logonet, aagaluk kambuwak nduk, eekendak?”

²¹Yoge nagagerik, wulaga windak wonage me ne kenagan paga obaga lenggennagak eeke logonet, “Kaliku nogoba Ala wae! Wulaga yi, iniki obaane'me mambi mok o,” yinuk, Aliku ALA yoreegerak.

²²Eliya nen tamban eereegerak nogo Aliku ALA aruk konengge nagagerik, wulaga nogo iniki obaane'me mambi wage mbareegi, eenik aret agagerak.

²³Eenik age mbareegi, aap Eliya nogo nen wulaga nogo tilaabaga nen wonok agalo owagam wambi wage nagagerik, yoge logonet, “Kwe yi wae! Kaagaluk nogo muk eenik agaarak yi o,” yoreegerak.

²⁴Yoge mbareegi, kwe nen Eliya yoge logonet, “Kat Ala wone liirogon eeka logonet, Aliku ALA nen yokkege kagak ari menggendak nogo ti, o yogondak yi paga abet aret neenu aga o,” yinuk, yoreegerak.