Read Western Dani 1 Endagembogut 19 Bible Online

1 Endagembogut 19 - Western Dani bible

1 Endagembogut 19

¹Aap Akap nogo ame wage nagagerik, at Eliya nen eerit nagagerak inom, it at kugi Mba'an wone unde nogo paloowi paga inoorogo piyareegerak nogo inom, abok aret kwe Iteben mbininogo yoge mbareegi,

²kwe Iteben nogo nen Eliya yori nawak nduk, aap ambi wone eerogo nappege logonet, “At Eliya waka'lek neenok, kit nen aaninggin noba paniyak kenok, noba panugwi, ndi, nooriyak kenok, nookwi, eeriyak op aret o, yinuk, nagugi yoragarak me, at Eliya nen it aap kugi Mba'an wone unde eerogo piigerak kokwak, an ko'lu oonegen yogobi paga ari naga'lek kagak, at ndak-ndak eerogo pigin, yegerak, yori nak o,” yinuk, eerogo nappereegerak.

³Wone nogo eerogo nappereegerak yoge mbareegi, at Eliya nogo agabiti nen agap ndakko'nok ayeloman wulaga nogo imbirak kole mbaganit aakumi Yekura iname o Mberetiyeba time nogo nogogwaarik, wulaga nogo time kagak,

⁴at Eliya nogo, o ne ambit weege paga nogo mengga kwak, o karume unggwi nage nagagerik, eyo lo alome kwi'na'nuk, kambikit mba'nuk, tamban eeke logonet, “Kaliku nogoba ALA wae. Nombomini abu eeppunuk, kambit nogogwaarak nogo kwe, an iya negen eeka'lek neegak teppanege agandik? Mage o. An togon abu eekirak me, kambikit nduk, niniki wamen o.”

⁵Yoge nagagerik, eyo alome nogome winna'nuk, nogo yereegerak. Nogo yege me, malayikat ambi abera'lek me Eliya owagam wage nagagerik, eebe mbaanggage logonet yoge, “Keenik a'nuk, mbi yi namen o.”

⁶Yoge mbareegi, eenik a'nuk, enegen ambo'me-enaame ari logonet, anobak me taati oroti worarak kani anggen paga wonage, niyo toolak wonage, enegen kage nagagerik, oroti inom, niyo inom, nengge nagagerik, ti'nuk, ambinom winnagagerak.

⁷Winna'nuk, nogo yege me, Aliku ALA ayonggo malayikat nogo ambinom wage nagagerik, Eliya eebe mbaanggage logonet yoge, “Tu nda noorak me, mbi nengga'lek keenok, kowak lek arukwak, mi'na'nuk, mbi yi namen o.”

⁸Yoge mbareegi, Eliya nogo mi'nanuk, oroti inom, niyo inom, nenok, omaawi eekkolage nagagerik, nage tit kagak, nogo 40 yit Ala abuut, Puut Korep nogo paga ari nagagerak.

⁹Ari nage nagagerik, ndo ambime nogo yikit nduk, unggwi nagagerak. Unggwi nanuk, nogo yege me, Aliku ALA nen at yoge logonet, “Eliya wae. Kat yime nano eeke agandik?”

¹⁰Yoge mbareegi, at Eliya nogo nen wone onggo yoge logonet, “Nogoba o. Kaliku Komaawi Lombok Menggendak Ala kake nanggena luk togon eerit nage minggirak kwe, it kapuri Iterali nogo nen wone kinom koonogo pereegindak nogo mbo punuk, kake warogo wokkegak ogobakkigirik nogo minogo pugwi, inobaloowi paga it kat yorage keegak yoraga nogo inookwi, eeko logonet, nalik aret mbo panggaarak me, yogondak an inom aret nooriyak nduk eeko mbaka, yime agarik o.”

¹¹Yoge mbareegi, Aliku ALA nen Eliya nogo yoge, “Naliku ALA kat keegak keraanu nagin me, mi'na'nuk, wundi wage logomenggendik, Naliku ALA nenggaanom puurom yi paga mi'nari mok o.” Yoge nagagerik, Aliku ALA nen o wiya mondok omaawi oone pu eerogo nappi wagagerak wage logonet, puut-puut nggaganogo nappit nage, yugum lunik yanggunogo wuppit wage, eereegerak kwe, at Aliku ALA eebe perak, o wiya enggela'me time logolik. O wiya abu aret wake mbareegi, o mi nuk-nuk eereegerak kwe, Aliku ALA eebe o mi enggela'me logolik.

¹²O mi abu eeke mbareegi, kani wunuk agan wagagerak kwe, at Aliku ALA nogo kani omoonuk enggela'me time logolik mban. Ndi, kani wunuk agan wage mbareegi, oone mbuuluk yanggik-yanggok agan wagagerak.

¹³Oone yanggik-yanggok agan wage Eliya aruk konembunuk, ayum enete paga nobakkolage nagagerik, ndo ambe paga taa'nogo puk ari wundeegerak wonage me, oone ambi at yoge logonet, “Eliya wae. Kat yime nano eeke agandik?” yoreegerak.

¹⁴Yoge mbareegi, at Eliya nogo nen wone onggo yoge logonet, “Nogoba o. Kaliku Komaawi Lombok Menggendak Ala kake nanggena luk togon eerit nage minggirak kwe, it kapuri Iterali nogo nen wone kinom koonogo pereegindak nogo mbo punuk, kake warogo wokkegak ogobakkigirik nogo minogo pugwi, inobaloowi paga it kat nen yorage keegak yoraga nogo inookwi, eeko logonet, nalik aret mbo panggaarak kwe, yogondak an inom aret nooriyak nduk, eeko mbaka, yime agarik o,” yinuk, yoreegerak.

¹⁵Yoge mbareegi, Aliku ALA nen Eliya yoge, “Kat tu waganom kiyokan nanuk, karume Ndamitit aakumi Aram mendek wonogwe me, time nage logomenggendik, aap Katayen ti, inowe endagembogut logowak nduk, amburu eerogo mippege,

¹⁶ndi, aap Nimiti aput Yeku it aakumi Iterali inowe endagembogut logowak nduk mippege, ndi, aap awi Aben-Mekola mendek Tapat aput Elita ti, kat kobaane'me an nen yoge neegak yoraga logowak nduk mippege, ee'nu o.

¹⁷Ti eeke keenok, aap Katayen nen awooluwak paga inooriyak eeke kenok mbaganggwi nogo, aap Yeku nen aret inooke, ndi, Yeku nen awooluwak paga inooriyak eeke kenok mbaganggwi nogo, Elita nen aret inooke, eerugun kwe,

¹⁸it aakumi Iterali kugi Mba'an inendobanggun yindumbunuk, ayuk wukwi, at ogut nogo ineyak mbanggwi, eerulik kenok ineebe tujuh ribu inili eerogo piigirak wonogwe o,” yoreegerak.

¹⁹Yoge mbareegi, aap Eliya time nen wage nagagerik, aap Tapat aput Elita nogo tapi mbere'mbo lambunik ineenggi lingginik 12 me, it ando 11 paga yabu eekwi iigak, at Elita nogo ambi 12 paga eeke me, Eliya owagam wage nagagerik, ayum nggorek nogo nggoorogo Elita oba lenggembereegerak.

²⁰Oba lenggembege mbareegi, at Elita nen aanggumi tapi nogo mbo piinok, nggare agan Eliya ka wage nagagerik, yoge logonet, “Aa'nduk nagalo-nogoba keyage warogo inagandin neyak mbambiinok, nimbirak nawok o.” Yoge mbareegi, at Eliya nen, “An nano eeppagagirak paga mu'neren wagan. Kiyokan nak o.”

²¹Yoge mbareegi, at Elita nogo Eliya mbo punuk, iyokan nage nagagerik, aanggumi tapi mbere'mbo paga yabu eeke nogo, inooppiinok, eyo yabu eeruwak nduk, panggoniren nege nagagerak nogo paga lappege nagagerik, owe-awot inom nunggugwaarak. Abu aret nonggo nogogwaarik, Elita nogo imbirak nege logonet, ake eeke logokit nduk, Eliya ka wagagerak.