Read Western Dani 1 Endagembogut 3 Bible Online

1 Endagembogut 3 - Western Dani bible

1 Endagembogut 3

¹Ti'nuk, at Talomo nogo aap endagembogut Metit mendek Pirawun apuluk kolaga waganeegerak paga, imbirak kunggolage nagagerik, Pirawun apuluk nogo wonok Ndawut Agota nogome pi wagagerak time wonage kagak, at awi o nggwok abe inom, Aliku ALA awi inom, yugum pak o Yerutalem yendok-wandok inom, abu aret wurogo pereegerak.

²Aliku ALA endage tiyappogo logowam Ala awi awo wuka'lek kenok, it aakumi ake warogo wogogo menggam puut-puut time inalitik-inalitak ake warogo wogogo nogogwaarak.

³At Talomo nogo nen Aliku ALA iniki kunik kaawak nduk, ogoba Ndawut nen eeke logorak wone lengganogo yoreegerak nogo, ndak-ndak eeke nagagerak kwe, warogo wogogo menggam puut-puut time warogo wogoge, obari abe kaga nogo mendek inom wogoge, eeke nagagerak.

⁴O Nggibeyon nogo ti, puut paga ake warogo wogogo menggam mondok nggwok lombok wonagagerak me, ne ambi paga at Talomo nogo, warogo wogoriyak nduk time nage nagagerik, ake warogo kani kunggo menggaarak mendek seribu kuli wappunuk, ake warogo wogogo menggam nogo paga kani kuneegerak.

⁵Kumbunuk o Nggibeyon nogome awo wonage logonet, ne ambi paga oonikiya nogo yege me, at Aliku ALA eebe aap Talomo nikka wage nagagerik, abinggaanggo paga yoge logonet, “Talomo wae. Kat nen, An nano mendek wo'niriyak, nombake kenok, wokkirikit nduk, nggino yo'niru o.”

⁶Yoge mbareegi, at Talomo nen Aliku ALA yoge logonet, “Kayeloman an nogoba Ndawut nogo, kat kenggaanom paga li'lak mban eeke, iniki koonak wonage logonet, abe mban eeke, eeke kenok, at abuwa mba'nuk obeelom eeppit wundi wage logonet, aakumi inowe endagembogut logonet, wone lengganogo yorage nagagim obaane'me yorage logowak nduk, aput wogoreegindak nogo yogondak neebe wonage yi aret o.

⁷Togop aret me, Kaliku nogoba Ala wae. Nogoba Ndawut obaane'me kayeloman an aret inowe nendagembogut logokit nduk, mippanggendak kwe, an neebe awo tawe me, nendagembogut logonet, yi eekak ndi eekak eeke logorak an neenggo'lek tit o.

⁸Ndi, it aakumi kat kapuri Iterali miirogo piyareegindak, Ineebe yi kuli o, yinuk, ineenggi lingginiyak meek woneemaluk wonogwe yi, an kayeloman inenggela'me wonage minggirak me,

⁹it kapuri aakumi Iterali ineebe woneemaluk wonogwe yi, ta nen inawone op mbangge logorak mbaken? An meek aret me, inawone mbangge logonet, Yi maluk, yi obeelom, liippunuk, inawone mbangge logokit nduk, an kayeloman niniki warak lombok eerogo panu o,” yoreegerak.

¹⁰Yoge mbareegi, at Aliku ALA nen Talomo nggino yoge nogo, “Abu op lombok aret yo'nege kagi,” mbake nagagerik,

¹¹at yoge logonet, “Kat nen nggino yo'negendak nogo ti, keenik nggorek logorak inom, keenggi warak eekkoloorak inom, kawim anggen kumbunuk inooriyak inom, eeppagarak nduk nggino yo'negembok. Ata, aakumi inawone amburu mbangge logonet, alom liippunuk mbangge logorak, Eeppanu o, yinuk, yo'negendak me,

¹²kat mi'naga'lek keegak wonogogwaarak inom, mi'nagandak keegak logorak inom, ti kat ndak-ndak ambi lek aret o. Kat nggino yo'negendak ndak-ndak kiniki warak inom, yi wone ndi wone liippunuk yelok kage logorak inom, eeppagagin o.

¹³Ti eeppagage logonet, kat kangga'lek awo keenik wonage keegak, eeppagaminggirak paga aap inendagembogut inenggela'me kat kokwak ambi arigin lek kat inirimbaga tiyanak logonok nduk, nggino yo'nirulik mendek keenggi warak ariyak inom, kendage tiyanak logorak inom, oba lunogo eeppagagin o.

¹⁴Ndi, an yokkege minggirak nogo mugurok nage, eeko logorak wone inom, Yogop ee'nu ndogop ee'nu, yugu inom, kogoba Ndawut liirogon eeke nagagerak nogo kat ndak-ndak eeke, eeke keenok, keenik mondok nggorek logonok nduk eeppagagin o,” yinuk, yoreegerak.

¹⁵Yoge mbareegi, at Talomo nogo eenik age nagagerik, “Yi Ala nen aret nabi paga yo'negerak kagi,” mbake nagagerik, iyokan o Yerutalem woraanuk, Aliku ALA aloobut mbanak wone yugu yonggolak wonage me enaame taati mi'ndak logonet, Ala ake warogo wogogwi nogo mendek warogo kani kungge, Ala inom lambunik logorak ake warogo wogoge, eeke nagagerik, at awuri inom yabu eeko menggaarak nogo inake laago nggwok lareegerak.

¹⁶Ne ambi paga kumi ya wuginakak mendek ineebe mbere aap endagembogut Talomo wonage me unggwi wogo nogogwaarik, owagam taati mi'ndak logonet,

¹⁷kwe ore kwak nogo nen, “Nogoba o. Kwe yi, nimbirak ninawi ambit me wonogo logonet, naagaluk ndakirak o.

¹⁸Ndappunuk, wonage neegak, nogo mbere yippunuk, nogo ambi yugwi paga kwe yi kunduk, aagaluk ndakerak o. Ndi, o time aakumi alik ambi ninom wonogolik at kwe yi, nimbirak ninalik mban monggoorak me, ti eyom nimbirak ninalik aret wonogoorak o.

¹⁹Ninalik aret wonogoorak me, oonikiya nogo yugu logonet, at kwe yi aagaluk wimbegerak ami a'nuk nogobubu aan lebenggerak me, aret kanggerak o.

²⁰Kangge mbaki, oonikiya nogo iniki mbere eeke paga, an kayeloman nogo yege neegak, at aa'nduk eenik a'nuk, at aagaluk kanggerak nogo waganogo an nogome nggeloppi wage nagaarik, naagaluk eenik wonage nogo waganogo at ogome lamooppatinuk, puk agaarak o.

²¹Puk agaarak me, an neenik age nagarik, an naagaluk nelak kunikit nduk eekirak mendek, elege yi, muk aret kanggerak kagarak o. Kage nagarik, ko'lu o weege mbaki, elege yi enete malik-malok eeke nagarik, Yi an naagaluk ndakirak etenggen lek aret kagarak o.”

²²Yinuk, awo yoge kagak, at kwe ore nogo nen, “Leko. Eenik wonage ti, an naagaluk. Kanggerak ti, kat kaagaluk.” Ari mbareegi, kwe aa'nduk yoreegerak nogo nen, “Lek! Kanggerak ti, kat kaagaluk aret! Eenik wonage yi, an naagaluk aret,” yinuk, imbirak, “An naagaluk kat kaagaluk,” yogo logonet, at Talomo enggaanom paga taati wone wareegwaarak.

²³Wone wako mbareegwa, at endagembogut Talomo nen yorage logonet, “Kat ambi nen, Elege eenik yi, an naagaluk. Kanggerak ti, kat kaagaluk, ari. Ndi, kat ambi nen, Lek! Kanggerak ti, kat kaagaluk. Eenik ti, an naagaluk, ari, yinuk, yogwe kiigi o.”

²⁴Yorage nagagerik, “Paloowi ambi waganogo an nowagam ya'i pi woraanip o.” Yoragagerak pi wogo mbareegwa,

²⁵“Elege eenik wonage ti, paloowi paga oolo muundak poo'nipo. Pooppunuk, peenok kwe ore wogogwi, peenok kwe ore wogogwi, ee'nip o,” yinuk, awuri yoragagerak.

²⁶Yorage mbareegi, kwe aagaluk eenik wonage nogo nen aagaluk abuwa nggwok lombok mbake nagagerik, aap endagembogut Talomo yoge logonet, “Ai, nogoba. Elege eenik wonage ti, wariyak mondok mage o. Ata, kwe ti aret wogoru o.” Yoreegerak kwe, kwe ore nogo nen, “Op aret yegerak me, poorogo puwak aret. Poorogo pege kenok, kat inom, an inom, nimbirak terak togon ninaagalogwe lek aret logowok o.”

²⁷Yoge mbareegi, at endagembogut Talomo nen, “Elege ti, wariyak mage o. At kwe aa'nduk oone yegerak ti, aagaluk aret me, elege eenik wonage ti, at aret wogo'nip o,” yinuk, yoragagerak.

²⁸At endagembogut Talomo nen kumi ti inawone mbaneegerak paga it aakumi Iterali mendek abok aret konenggo nogogwaarik, “Ala nen aakumi inawone amburu mbangge logowak nduk, iniki warak eeppereegerak ninowe endagembogut yi, Wi!” yinuk, pi wareegwaarak.