Read Western Dani 1 Endagembogut 6 Bible Online

1 Endagembogut 6 - Western Dani bible

1 Endagembogut 6

¹Aakumi Iterali mendek nogo o Metit mbo punuk wundi wogogwaarak iigak, tahun empat ratus delapan puluh eereegerak me, at Talomo nogo aakumi Iterali inowe endagembogut a'nuk, wone lengganogo yorage kagak, tahun kenagan eeppunuk, ambi eeke tut ambi penembunuk, tut ambi endage Tiwi penengge paga at Talomo nen Aliku ALA awi wurikit nduk, eereegerak.

²Ndi, wuke logonet, irip nggorek agi-ogu nogo ti, metet 27 paga wakkagak wuke, ambe aru-ogwe ti, metet 9 paga wakkagak wuke, ndi, oolo kirin nggorek nogo ti, metet 13 eeppunuk, ambi oolo paga wakkagak mippege, eeke nagagerik,

³o ko kole ogoorak akem kagak enaame endekenggwe wone mbanggak wuke logonet, o wurik ambe aru-ogwe ndak-ndak metet 9 paga wakkagak eerogo wuke, irip nggorek agi-ogu nogo ti, metet 4 eeppunuk, ambi oolo paga wakkagak eerogo wuke, eereegerak.

⁴Eeppege nagagerik, pugagi ambe mbangge logonet, kobat endekem pa'nggwe ambe nggeloorak kagak, oome nggwe mban ambe wiganogo mambi wagagerak.

⁵Mambi wage nagagerik, o ko kole ogoorak inom, mage lombok logowam inom, kobat endekem nabenak eraanu peenok-peenok inom, ambokan inom, ta'mban-mban kenagan wurogo punuk, ko ogoorogo pit nagagerak. Ogooke nagagerik, o ogu nggween paga wureegerak nogo ambe aru-ogwe ti, metet mbere eeppunuk, ambi oolo abu'me negen paga wakkagak wuke, o oolo wureegerak nogo ti, metet mbere eeppunuk, ambi oolo irimbaga wakkagak wuke, ndi, o oolo irimbaga wureegerak nogo ti, metet kenagan paga wakkagak wuke, eeke logonet, o wurik kobat nabenak eno pelenogo pit nookwak, eyo abo at paga kwippit nawak nduk, kobat nabenak eraanu yendok-wandok yugum nabenogo pit nagagerak.

⁶

⁷Ala awi ti wuke logonet, yugum yanggunggo menggam time nen abu loonak amuni mbanogo pugu paga wukwi me, matelo inom, mbuti tegewa inom, mbuti mendek ogobakkigirik inom, ti mendek paga ogobakkigirogo wukwi, oone luk eekwi, ambi konengga'lek aret wonogogwaarak.

⁸O nggween paga ogoorogo wureegerak tungga o ame unggwi nage menggim pa'nggwe mbaneegim nogo paga aakumi unggunuk, o oolo wurik me laganggak yuurak nduk, ya'na wurogo pege, ti'nuk, o oolo nen irimbaga laganggak ya'na wurogo pege, eereegerak.

⁹Eeppege nagagerik, Ala awi eebe wurik pelan nippereegerak inom, oo'ngget negen eyo poorak paga yendok-wandok maareegerak inom, ti eyo nggabina paga mban mondok paalo eerogo wureegerak.

¹⁰Eeke nagagerik, o eebe wurik eraanu ta'mban-mban wureegerak ogu nggween paga inom, oolo inom, irimbaga inom, alitak ogu nen agi metet mbere eeppunuk, ambi oolo abu'me negen wakkagak eerogo wureegerak nogo ti, oo'ngget negen eyo nggabina paga mban nabenogo pereegerak.

¹¹Ti abu aret eeke mbareegi, Aliku ALA nen Talomo yoge logonet,

¹²“Kat o wuke yime logonet, eeke logorak wone ambi yokkiri o. Wone lengganak nogo mugurok nage, eeko logorak wone yugu nogo eerit nage, ndi, Yogop ee'nu ndogop ee'nu, yugu nogo abok aret liirogon porogo logonet mugurok nage, eeke keenok, kat kogoba Ndawut eeppuurak koonogo yoreegirak nogo aret eeppagage logogin o.

¹³Eeppagage logonet, an napuri aakumi Iterali mendek nogo mbo piinok mbaganigin lek inenggela'me ninom aret logogin o,” yinuk, yoreegerak.

¹⁴At Talomo nen Ala awi eebe wurogo pege nagagerik, inikime amuni mbaneegerak nogo yi aret.

¹⁵O wurik inikime ti, eyo nggabina poorak paga nggween paga nen nabenit agi pelan warak kuli pege, ndi, eyo kilu-kilu kole poorak nogo paga, nggween paga ndoongge, eereegerak.

¹⁶ Eeke nagagerik, o wurik irip me akem time Ala inom lambunggak o mage lombok logowak nduk, metet 9 paga wakkagak ogoorogo punuk, nggween paga nen nok, pelan warak kuli eyo nggabina poorak paga nabenogo pit laganeegerak.

¹⁷Ko irip me ogooreegerak enaame nggwe ko nggwok nogo ti, metet 18 aret wakkagagerak.

¹⁸Ndi, o inikime nogo abok aret yugum paga wurik kin kookwak, eyo nggabina nogo paga mban nabenogo pit nage logonet, nggiyo ogut wakkagak ayo waganogo pege, iri'ngga anggen laambu kwak ayo waganogo pege, eereegerak.

¹⁹Ndi, o wureegerak irip akem Ala inom lambunggak mage lombok logowam ogooreegim nogome Aliku ALA aloobut mbanak me wone yugu yonggolak nogo, time logowak nduk, pipuk eerogo pege logonet,

²⁰agi-ogu inom, aru-ogwe inom, agi nippereegerak inom, abok ndak-ndak metet 9 mban wakkanet nagagerak. Wakkanet nage nagagerik, kobat akem nogo ti, mbuti emas at mendek paga mban tabak-tabak eerak paga nabenogo pege, obari abe kani kunggak eyo nggabina paga ogobakkigirik nogo paga nabenogo pege,

²¹ko irip me ogooreegim inikime abok aret emas at mendek paga mban nabenogo pege, tungga mbaneegim nogome mbuti emas paga yonggon-yonggon yarogo tugunogo wurabit wage, eerogo pege nagagerik,

²² o wurik nogo inikime abok aret obari abe kunggo logorak Ala inom lambunggak o mage lombok logowam endekenggwe wonagagerak nogo inom, mbuti emas paga mban nabenogo pit nagagerak.

²³ Ala inom lambunggak mage lombok logowam akem lombok ogoorogo pereegim nogome eyo tayitun paga malayikat negen kerub inogut mbere inanggup metet 4 eeppunuk, ambi oolo paga wakkagak ogobakkigirogo piyareegerak.

²⁴Eerogo piinok, kerub ambi a'naabit ambi a'naabit irip imbirak kunogo wakkagagerak ti, metet 4 eeppunuk, ambi oolo paga wakkagagerak me, a'naabit abeenok ti, metet mbere negen age, ndi, a'naabit abeenok ti, metet mbere negen age, eereegerak.

²⁵Ndi, kerub ore nogo ti, kerub aa'nduk wakkagagerak nogo ndak-ndak metet 4 eeppunuk, ambi oolo aret wakkagagerak me,

²⁶imbirak inanggup ndak-ndak metet 4 eeppunuk ambi oolo paga wakkagak ogobakkigirogo piyareegerak.

²⁷Kerub inogut ogobakkigirik mbere nogo, ina'naabit wiganak iigak, Ala awi wurik irip me lombok ogooreegim inikime kwippiyareegerak. Kwippiyareegerak nogo ti, at ambi a'naabit irip kobat nabenak paga kunogo pege, at ambi a'naabit irip kobat abeenok paga kunogo pege, eeppunuk, ina'naabit peenok imbirak irip kumbunuk logowak nen eerogo piyareegerak.

²⁸Eerogo piige nagagerik, malayikat negen kerub inogut mbere nogo ti, mbuti emas paga mban nabik-nabek eerogo piyareegerak.

²⁹Ogobakkigirogo piinok, o wurik ko irip me akem ogoorak inom, ko endekem oolo ogoorak inom, abok aret yendok-wandok kerub inom, eyo nggabu inom, iri'ngga anggen laambu inom, inogut wakkagak ayo waganogo pit nage,

³⁰ndi, o wurik ko irip me akem ogoorak inom, ko endekem oolo ogoorak inom, eyo nggween paga ndoonak nogo paga inom, mbuti emas paga mban nabenogo pit nage, eereegerak.

³¹Ndi, o ko akem Ala inom lambunggak mage lombok logowam unggwogo logorak tungga ti, eyo tayitun paga ogobakkigirogo pege nagagerik, tu ambe mbanak inom, ambe peenok-peenok eyo mippugu inom, nogo ti, metet mbere negen paga wakkagak mbaneegerak.

³²Tungga eyo tayitun paga mbere ogobakkigirik nogo paga malayikat negen kerub inom, eyo nggabu inom, iri'ngga anggen laambu inom, inogut wakkagak ayo waganogo pege nagagerik, kerub inogut inom, eyo nggabu ogut inom, mbuti emas tabak-tabak eerogo punuk, nabenogo pit nagagerak.

³³Ti eereegerak ndak-ndak eyo tayitun paga ko nggwok ogoorogo pereegim tu unggwogo logowam ambe nogo ti, metet mbere eeppunuk ambi oolo abu'me negen wakkagak mbaneegerak.

³⁴Mbangge nagagerik, eyo kilu-kilu paga tungga mbere ogobakkigirogo punuk, nakwi-paakwi eeko logowak nduk, tungga mbere nogo irip agi-ogu pulu kunogo pereegerak.

³⁵Eerogo pege nagagerik, malayikat negen kerub inom, eyo nggabu inom, iri'ngga anggen laambu inom, inogut wakkagak ayo waganogo pege nagagerik, mbuti emas aan libik-lebek eerogo ayo wogo nogo paga nabenogo pit nagagerak.

³⁶Ti eerogo punuk, owa'nagat akem wurogo manabeegerak nogo ti, yugum loonak amuni mbanak paga ogowa kenagan endekenggwe wuke nagagerik, ogowa ambi akem nggwe eyo nggabina abe tabenak paga wureegerak.

³⁷At Talomo nen Aliku ALA awi wureegerak nogo ti, at endagembogut logonet, aakumi Iterali inarum wonage kagak, tahun kenagan eeppunuk, ambi eeke tut endage Tiwi penembunuk, owak kwippege,

³⁸ndi, inowe endagembogut logonet inarum wonage kagak, tahun 10 eeppunuk, ambi eeke tut 7 penembunuk, tut ambi endage, Mbun, penengge paga, “Ala awi ndogop aret wurikit o,” yinuk, iniki kooneegerak nogo abok aret li'luk age yobok togon wurogo pereegerak. Wuke kagak, tahun 7 aret eereegerak.