Read Western Dani 1 Endagembogut 7 Bible Online

1 Endagembogut 7 - Western Dani bible

1 Endagembogut 7

¹At Talomo nen awi o nggwok abe age yobok togon wukkolage kagak, tahun 13 aret eereegerak.

²Ndi, o nggwok ambi wureegerak endage, O Libanon Eyonggaame o, yinuk, toonogo pereegerak nogo wuke logonet, irip agi-ogu metet 46 wakkage, ambe aru-ogwe metet 23 wakkage, ndi, kirin mippereegerak nogo ti, metet 13 eeppunuk, ambi oolo wakkage, eerogo punuk, eyo nggabina Libanon mendek paga eyak loonogo owak yerek-nggorek 4 kuli mbiginogo wurabit nagagerak. Eyo owak 4 kuli mbiginogo wurabak nogo paga eyo nggabina abe poorak muundu at paga karo-karo nagabit nagagerak.

³Eyak wurabak paga muundu karo-karo nagabeegerak nogo paga pelan 45 nappit nagagerak ti, oolo we kenagan wonage ti paga, alitak eyo pelan 15 mban aret nappit nagagerak. Nappit nage nagagerik, ogombaga eyo nggabina poorak paga oo'ngget maareegerak.

⁴O wurik peenok-peenok pugagi kenagan-kenagan mban aru-ogwe ndak-ndak mban tiyarogon mbanogo pit nagagerak.

⁵Pugagi kenagan-kenagan aru-ogwe ndak-ndak mbanogo pit nagagerak nogo ti, ambe agi-ogu, aru-ogwe, abo ndak-ndak mbangge, tungga mbaneegerak nogo ti, ambe agi-ogu, aru-ogwe, abo ndak-ndak mbangge, eereegerak.

⁶Ti eeppunuk, o wurik enaame wone mbanggak eyo eyak ambik mippit wundi wagagerak irip agi-ogu ti, metet 23 wakkage, ndi, aru-ogwe ti, metet 13 eeppunuk, ambi oolo paga wakkage, eerogo punuk, enaame eyak paga mban awe kole negen eerogo pege, tu unggwagak iniyok pegak ogobakkigirogo pege, eereegerak.

⁷Eerogo pege nagagerik, at Talomo logonet aakumi inawone amburu mbanogo inowak loongge logowam o nogo eegu kunogo wuppunuk, ogu nggween paga ndooneegerak nen nok agi pelan wareegerak kuli, eyo nggabina poorak paga mban nabenit lagi nagagerak.

⁸ Ti eerogo punuk, o wurik kagak ambokan tayorogon time Talomo awi o nggwok abe logowam wureegerak nogo ti, o aakumi inowak loongge logowam inikime eyo nabeneegerak ti ndak-ndak nabenogo pege nagagerik, ti'nuk, at akwe aap Pirawun apuluk waganeegerak awi nogo ti, inowak loongge logowam inikime eyo nabeneegerak nogo ndak-ndak mban aret nabenogo pereegerak.

⁹Owa'nagat ambokan wurik nen enaame wurik kuli, o oolo wurit nagagerak nogo abok aret ogowa pugu nen nugwa irip kuli ti, yugum mondok omaawi iya mendek abo mbaniyak yugu ndak-ndak nggege paga endekem-akem mbanogo punuk, wureegerak.

¹⁰Ndi, wurit nage logonet, ogowa yugum nggwok omaawi mendek ando metet 4 eeppunuk, ambi oolo paga wakkagak kwippit nage, ando metet 3 eeppunuk, ambi oolo paga wakkagak kwippit nage, eereegerak.

¹¹Ndi, ogowa pugu irimbaga ti, yugum abu omaawi mendek abo mbaniyak yugu ndak-ndak mbanak inom, eyo nggabina poorak inom, nogo paga wureegerak.

¹²Ndi, owa'nagat nggwok yendok-wandok yugum abe loonak ogowa kenagan endekem nggwe wurogo pege, ogowa ambi akem nggwe eyo nggabina abe tabenak paga wurogo pege, eereegerak. Ndi, Aliku ALA awi wurik owa'nagat ti inom, wone mbangga enaame wurik inom, togop ndak-ndak aret wurogo pereegerak.

¹³Aap ambi endage Kuram, o Tirut wonagagerak. At agalo kwe togwe me, anebunu Natali mendek. Ndi, ogoba awi kunduk, Tirut mendek me, at nogo mbuti tembaga paga yi mendek ndi mendek ogobakkigike nagagerak. Ndi, aput Kuram kunduk, mbuti tembaga paga yi mendek ndi mendek ogobakkigike eenu logonet, eenggi amburu abu alik negen wonagagerak me, wa nawak nduk, at endagembogut Talomo nen aap nappiyareegerak wonok wogo mbareegwa, eeke logowak nduk, aap endagembogut Talomo nen unde eeppereegerak nogo abok aret eeke nagagerak.

¹⁴

¹⁵O awe eyak mbere mbuti tembaga paga agi nggorek metet 8 paga wakkagak ogobakkigike, eyak nogo eebe yendok-wandok metet 5 eeppunuk, ambi oolo wakkagak ogobakkigike, eerogo pege nagagerik,

¹⁶eyak mbere nggorek ogobakkigireegerak irip nogo paga kwippuwak nduk, mbuti tembaga paga metet mbere eeppunuk, ambi oolo abu'me negen ogobakkigirogo eyak irip mbere nogo paga kwippege, eeke nagagerik,

¹⁷eyak mbere mippuurak irip mbuti tembaga paga ogobakkigirik kwippugu nogo paga, mbuti omanggen paga yum ogut negen yigogo eyak ambit paga 7 tugunogo pege, ambit paga 7 tugunogo pege, eerogo pit nage nagagerik,

¹⁸eyak kwippugu nogome etenggen abe aruwak nduk, yum ambit tugunik nogo paga eyo delima anggen ogut wakkagak ne mbere yendok-wandok eerogo pit nage, ambit tugunik nogo paga eyo delima anggen ogut wakkagak ne mbere yendok-wandok eerogo pit nage, eerit yum 7 tugunik nogo paga togop mban eerogo pit nagagerak.

¹⁹Ndi, o nggwok wone mbanggo logowam wureegerak enaame eyak mippuurak irip me kwippereegerak eebe nogo ti, waambi anggen negen ogobakkigirik nggorek metet mbere negen aret me,

²⁰eyak mbere mippuurak irip kwippugu me yum yugu tugunogo pereegerak eraanu mangkok ambe paganak negen obogum ku eerogo pereegerak irimbaga eyo delima anggen ogut wakkagak dua ratus kuli yendok-wandok eerogo pege, eeke nagagerik,

²¹eyak mippuurak irip me mbuti tembaga paga waambi anggen negen logowam peenok-peenok mippereegerak. Ambi o ame pa'nggwe eyak mippereegerak nogo endage, Yakin, toonogo pege, ndi, ambi o omarip paga pa'nggwe mippereegerak nogo endage, Mbowat, toonogo pege, eereegerak.

²²

²³Nogo eerogo pege nagagerik, togolowak endage, Niyo Yenggenak, mbuti tembaga paga ogobakkigike logonet, eebe kole yimun-namun aago ambe yibagan-enebagan metet 4 eeppunuk, ambi oolo wakkagak eerogo pege, irip agi tiyanak nogo metet mbere eeppunuk, ambi oolo wakkagak eerogo pege, ndi, keele yendok-wandok metet 13 eeppunuk, ambi oolo wakkagak eerogo pege, eeke nagagerik,

²⁴togolowak ambe abu'me nggiyo yugu negen ne mbere yendok-wandok eerogo pit nage logonet, metet oolo ari nage kenok nggiyo 10 yugu kwak eerogo pege, metet oolo ari nage kenok nggiyo 10 yugu kwak eerogo pege, eerit yendok-wandok eerogo pit nagagerak.

²⁵Pit nage nagagerik, lembu inogut 12 eerogo punuk, inakom ambit me akem mban eerogo piinok, kenagan ti, ina o omarip paga pa'nggwe nappiige, kenagan nogo ti, ina oonegen kilu yi nage menggim pa'nggwe nappiige, kenagan nogo ti, ina o ame pa'nggwe nappiige, ndi, kenagan ti, ina oonegen lagi wage menggim pa'nggwe nappiige, eerogo piige nagagerik, togolowak kole endage, Niyo Yenggenak nogo, waganogo lembu ogut eerak nogo inali'luk paga kwippereegerak.

²⁶Togolowak obogum kumbin pereegerak nogo ti, aakumi ineenggi tabak kokwak aret. Ndi, ambe ti, mangkok ambe waambi anggen awo ambe pagangge menggi kwak aret me, togolowak nogome niyo tooliyak kenok ti, nderom dua ratus dua puluh me, tooliyak pogom aret wonagagerak.

²⁷Ti eeke nagagerik, niyo toolak wonok negak mbuti tembaga paga 10 kuli ogobakkigike logonet, inambe agi-ogu inom, aru-ogwe inom, ti metet mbere paga mban wakkage, inirip nggorek metet ambit eeppunuk, ambi oolo abu'me negen wakkage, eereegerak.

²⁸Ti eereegerak nogo ti yogop aret. Niyo toolak wonok negak nogo ti, owak unggut-unggut mippunuk, eyo tabak paga eeben agi-ogu aru-ogwe nabenogo pege,

²⁹owak unggut-unggut mippugu eyo tabak nabenak nogo paga inom, owak unggut-unggut mippugu nogo paga inom, singa kwak, lembu kwak, malayikat negen kerub kwak, inogut eerogo pit nage nagagerik, singa-lembu inogut irimbaga-abu'me mbuti tembaga paga iri'ngga anggen yugu kwak ayo waganogo pit nage,

³⁰niyo toolak wonok negak nogo abok aret abena mbuti tembaga paga owak ogobakkigirogo karo-karo nappunuk, iniyok 4 mban mbuti tembaga paga ogobakkigirogo punuk, owak karo-karo irip-irip nogo paga limbege, ndi, togolowak yelek togon wangge kero, ko warak logorak 4 mippunuk, togolowak at paga panggonogo kwippit nanuk, mippugu ti paga iri'ngga anggen yugu kwak ogobakkigirogo pit nage,

³¹niyo toolak wonok negak ambe yimun-namun eerak inikime ogu metet oolo wakkagak togolowak akom kwippunuk, mbuti tembaga paga yengget-wangget komaarogo pege, komaarogo pugu paga nen nok, irip agi ti, metet oolo irimbaga negen pereegerak me, ambe yimun-namun eerak paga ayo waganogo pege, ndi, eyo peenok-peenok nabenak nogo ti, yimun-namun eerak lek aanunggut yinggak-unggwagak eerogo pege, eereegerak.

³²Ndi, niyo toolak wonok negak nogo, abena owak tembaga paga karo-karo nappunuk, iyok 4 ti paga linik irip nogo ti, metet oolo irimbaga negen aret eereegerak.

³³Eeke logonet, iyok ogobakkigireegerak nogo inom, iyok nen nombok-kombok eeke logorak karo-karo nappugu inom, iyok irip-irip inom, iyok paga mbuti omanggen nappet-wappet eerak inom, iyok oolo amun wogo inom, abok aret nggweendo wim eeko menggaarak iyok ogobakkigirik kokwak eerogo pereegerak.

³⁴Niyo toolak wonok negak alitik-alitak unggut 4 nogo paga ineenggi pigaganggak irip to eerogo pege,

³⁵ndi, eyo agi-ogu, aru-ogwe nabenak irimbaga yendok-wandok komaarogo nappereegerak nogo ti, metet abu teberogon wakkagak eerogo pege nagagerik, ko warogo mippugu inom, eyo nabenak inom, at paga etenggen ambit kunogo pege,

³⁶ko warak mippugu inom, eyo nabenak inom, nogo paga tenak wonage kenok, malayikat negen kerub kwak, singa kwak, eyo nggabu kwak, ayo waganogo punuk, iri'ngga anggen yugu kwak yendok-wandok ayo waganogo pit nage, eereegerak.

³⁷Niyo toolak wonok negak 10 ogobakkigireegerak nogo ti, eelu-ando lek etenggen inom, irip inom, abok ndak-ndak eerogo ogobakkigireegerak nogo ti aret.

³⁸ Ti abu aret eeppege nagagerik, togolowak tenggap kwak tembaga paga 10 kuli ogobakkigirogo pege logonet, ambe kole metet mbere wakkagak eerogo pege, inikime tooliyak ti, 4 nderom me, tooliyak kwak aret ogobakkigirogo pege, eerogo pit nage nagagerik, niyo toolak wonok negak 10 ogobakkigireegerak nogo paga eengge ndak-ndak aret kwippit nagagerak.

³⁹Kwippit nage nagagerik, 5 waganogo Ala awi wurik me o ame pa'nggwe pege, ndi, 5 nogo waganogo o omarip paga pa'nggwe pege, eeke nagagerik, togolowak kole endage, Niyo Yenggenak, ogobakkigireegerak nogo, waganogo Ala awi wurik irip me oonegen lagi wage, o ame unggwi nage, eeke menggim pa'nggwe puulik oolo taati aret kwippege, eereegerak.

⁴⁰Ti eerogo pege nagagerik, togolowak tenggap kwak inom, nggween tege inom, togolowak niyo kilirogo pit nagak inom, ogobakkigirogo pereegerak. At Kiram nen Aliku ALA awi wurik me logorak yi mendek ndi mendek eeriyak aap endagembogut Talomo nen yoge mbareegi, wobok togon eereegerak nogo yi aret.

⁴¹Eyak yo'nggok mbere mippereegerak inom, eyak mbere irip kwippuurak mangkok ambe paganak kwak ogobakkigireegerak inom, eyak irip kwippugu mangkok ambe paganak kwak nogo paga etenggen abe kaawak nduk, yum yugu tugunik negen ayo waganeegerak inom,

⁴²yum yugu tugunik ayo wogo eyak mbere irip mangkok negen eerogo kwippugu nogo paga etenggen abe kaawak nduk, eyo delima anggen empat ratus paga ne mbere yendok-wandok eerogo pit nagagerak inom,

⁴³niyo toolak wonok negak 10 kuli togolowak tenggap kwak eengge ndak-ndak ogobakkigireegerak inom,

⁴⁴lembu 12 inali'luk paga togolowak kole endage, Niyo Yenggenak, kwippereegerak inom,

⁴⁵togolowak tenggap kwak eege, nggween tege eege, togolowak niyo kilirogo pit nagak eege, ogobakkigireegerak inom, yi mendek ndi mendek Aliku ALA awi wurik me logorak at Kuram nen eeruwak nduk, aap endagembogut Talomo nen yoge mbareegi, mbuti tembaga paga mban ogobakkigirogo pit nagagerak nogo ti aret.

⁴⁶Aap endagembogut Talomo nen yi mendek ndi mendek, “Eeru,” yoreegerak nogo ti, o Tukot inom, Taratan inom, aru-ogwe nakkagak niyo Yoraran kobappaga time nen nggween nggabok paga yi mendek ndi mendek ogobakkigiriyak nogo, wakkagak eerogo punuk, mbuti tembaga amburu eerak nogo, wakkagak eerak me time kilirogo punuk ogobakkigireegerak.

⁴⁷Yi mendek ndi mendek at Talomo nen, “Eeru,” yoge mbareegi, mbuti tembaga paga eereegerak nogo ti, ambik mbuti tembaga aaninggin wakkoorak meek aret me, at Talomo nen aaninggin wakkoolik mbo pereegerak aret o.

⁴⁸ At Talomo nen yi mendek ndi mendek abok aret Aliku ALA awi wurik me logorak ogobakkigireegerak nogo ti, mbuti emas paga Ala ake warogo wogogo logowam inom, mbuti emas paga Ala wonage mbaruwak nduk, oroti worarogo pegak eyo ndoonak inom,

⁴⁹ mbuti emas at mendek paga mban ndi wuninik alom ogobakkigirik o ko ogoorak Ala inom lambunggak akem manggagak endekenggwe eenggi abe'nggan pa'nggwe 5 pege, eenggi kwaare'nggan pa'nggwe 5 pege, eereegerak nogo inom, mbuti emas paga iri'ngga anggen yege menggi kwak eerak eege, ndi wunanggak eege, paando eege, ogobakkigirik inom,

⁵⁰mbuti emas at mendek paga mban niyo tookak eege, ndi abo mbanggak waruk eege, niyo kilirogo pit nagak togolowak eege, niyo kombet waka eege, kaninggen ndoongga eege, ogobakkigirogo pereegerak inom, ndi, mbuti emas paga o ko akem Mage Lombok Menggim tungga nabeneegerak nggele-nggele eege, Ala awi wurik ko kole me unggwagak tungga ambe nggele-nggele eege, eereegerak inom, nogo ti aret.

⁵¹ Yi mendek ndi mendek Aliku ALA awi wurik me logorak nogo at endagembogut Talomo nen abu li'luk eerogo wuppege nagagerik, at ogoba Ndawut nen Ala ake leenogo pereegerak mbuti perak inom, mbuti emas inom, yi mendek ndi mendek Ala awi wurik me eekak inom, abok aret waganogo Aliku ALA awi wurik me pogo logowam nogome pi unggwagagerak.