Read Western Dani 2 Endagembogut 14 Bible Online

2 Endagembogut 14 - Western Dani bible

2 Endagembogut 14

¹Aap Yowakat aput Yokawat Iterali inowe endagembogut a'nuk, wone lengganogo yorage kagak tahun ambi eeppunuk, ambi age paga aap Yowat aput Amatiya nogo, it Yekura mendek inowe endagembogut agagerak.

²At Amatiya nogo ndarak kagak tahun 25 age paga endagembogut a'nuk, o Yerutalem logonet, wone lengganogo yorage kagak, tahun 29 eereegerak. Ndi, at agalo ti, kwe Yerutalem mendek endage Yowaran aret.

³At Amatiya nogo ti, Aliku ALA enegen kagak obeelom eeke nagagerak kwe, ombo Ndawut eeke nagagi kwak eeke logolik. Ogoba Yowat eeke nagagerak ndak-ndak aret eeke nagagerak.

⁴Eeke logonet, puut-puut kugi inake warogo wogorogo menggam minogo mbo puulik me, it aakumi nen puut-puut time inagugi inake warogo wogorogwe, obari abe kaga nogo mendek kani kunggwi, eeko nogogwaarak.

⁵Ndi, Amatiya nogo endagembogut logonet, abu'me piinok wonage menggim omaawi eerogo pege nagagerik, at ogoba inom eeko menggaarak nen at ogoba endagembogut wareegwaarak nogo, inoorogo piyareegerak kwe,

⁶ at Aliku ALA nen, “Yogop ee'nu ndogop ee'nu,” yorage logonet, “Inapuri eeremenggaarak paga inogobamini inoorak kanggwi, ndi, inogobamini eeremenggaarak paga inapuri inoorak kanggwi, eeriyak ti mage o. Ata, it inalitak lombok maluk eeremenggaarak paga inooko logorak o,” yinuk, yoragagerak Muta nen mbuku paga liiru mbaneegerak wonage nogo ndak-ndak, it at ogoba wareegwaarak nogo inapuri inoorulik teppiyareegerak.

⁷Ti'nuk, ne ambi paga at Amatiya nogo, aap ineegin warak Erom mendek inom wim eeke logonet, o Mayu Ogop Menggim kobappaga time aap sepuluh ribu inoorogo piinok, o Tela tebenggolage nagagerik, endage Yoketen toonogo pereegerak o yogondak yogwe wonogwe aret o.

⁸Ti'nuk, at Amatiya nen aap Yeku ombooluk Yowakat aput Iterali inowe endagembogut Yokawat nogo yoruwak nduk, wone eerogo nappiige logonet, “Nimbirak ninengga kunna'nuk, wim eeruwok nduk, omok o,” yinuk, wone eerogo nappiyareegerak.

⁹Nappiyareegerak yori nogo mbareegwa, aap Iterali inowe endagembogut Yokawat nogo nen aap Yekura inowe endagembogut Amatiya wone onggo yoge logonet, “Iri'ngga alokwi mendek o Libanon puut paga wonage nogo nen, eyo nggabina o Libanon puut-puut wonage nogo yoge logonet, Kat kapuluk kolaga nogo, an napuluk kolaawak nduk wogoru o, yinuk, yoreegerak kagak wam nggwiya puut Libanon mendek nen tu ti paga nage logonet, iri'ngga alokwi wonage nogo iyok paga aan lebenogo pit nagagerak o.

¹⁰Togop me, kat nen it Erom mendek abet aret tebenogo piigendak kwe, ti paga kiniki wogoppake agandik ya? Kat inom, it aakumi Yekura inom, kineebe nggelenggolookwak, nano wone agan nege agandik? Keegin tiyak yegerak paga kendage nggwok agaarak ti, abu aret me, kame time koone lek aret logot o!” yinuk, wone eerogo nappiya wagagerak.

¹¹Wone eerogo nappiya wagagerak nogo, aap Amatiya yoreegwaarak kwe, aruk koneniyak eebi mbake mbareegi, Iterali inowe endagembogut aap Yokawat awuri inom aago at Amatiya inom wim eeruwok nduk, wogo nogogwaarik, o Yekura inawi kota Mbet-Temet time inengga kunna'nuk, wim endok kuneegwaarak.

¹²Endok kumbunuk, nambuko logonet, it Iterali nen it Yekura mendek tebenogo piigo mbareegwa, it Yekura mendek iname kole mbaganggugak,

¹³aap Iterali inowe endagembogut Yokawat nogo nen aap Akatiya ombooluk Yowat aput Yekura inowe endagembogut Amatiya nogo, o Mbet-Temet time pigagangge nagagerik, o Yerutalem woraanuk, yugum pak wurik tu endage, Eparayim Unggwogo Menggam, kuli nen nok, tu endage, Unggu'me Unggwogo Menggam, kuli metet seratus delapan puluh aret langgunogo pereegerak.

¹⁴Langgunogo punuk, o Yerutalem unggwi wage nagagerik, mbuti perak-emas inom, yi mendek ndi mendek Aliku ALA awi wurik me wonage nogo inom, aap endagembogut awi o nggwok abe wurik me wu pogo menggam pugu wonage inom, abok aret wagangge, aap inom keele maarinake, ee'nuk ame iyokan o Tamariya aret lagi nagagerak.

¹⁵At Yokawat aap endagembogut a'nuk wone lengganogo yorage logonet, eeke nagagerak inom, eerit nage paga endage nggwok agagerak inom, aap Yekura inowe endagembogut Amatiya imbirak wim eeke nagagerak inom, ando abok ti, it aap Iterali inoweewi inendagembogut logonet, eeko nogogwaarak liiru mbanak paga, inom mbanak wonage nogo lek a?

¹⁶At Yokawat nogo ombomini kambunuk nogogwam inom yonggonggola nage mbareegi, eebe it Iterali inoweewi inendagembogut kambeegwaarak o Tamariya piya unggwogogwam nogome inom tabonogo pi unggwogogwaarak. Pi unggwogo mbareegwa, obaane'me aput Yerobeyam endagembogut agagerak.

¹⁷At Yowakat aput Iterali inowe endagembogut Yokawat nogo kangge mbareegi, at Yowat aput Yekura inowe endagembogut Amatiya wonage kagak, tahun 15 ambinom eereegerak.

¹⁸Ndi, at Amatiya endagembogut a'nuk wone lengganogo yorage logonet, eerit nage nagagerak ando abok ti, it Yekura inoweewi inendagembogut logonet eeko nogogwaarak liiru mbanak paga, inom mbanak wonage nogo lek a?

¹⁹At Amatiya nogo o Yerutalem wonage me, inom eeko menggaarak nen iniki ambit eeppunuk, waruwok nduk, wone mbanggo mbareegwa, at kole mbaganit o Lakit nagagerak kwe, waruwak nduk, inawuri time nappiyareegwaarak mugurok aret nogo nogogwaarik, time aret wareegwaarak.

²⁰Wako mbareegwa, at eebe warak nogo kuda paga nippunuk, wonok iniyokan wogo nogogwaarik, ombomini kambeegwaarak o Yerutalem Ndawut Agota piya unggwogogwam nogome inom tabonogo pi unggwogogwaarak.

²¹Pi unggwogo nogogwaarik, it aakumi Yekura mendek abok nen aput Atariya ndarak kagak tahun 16 eereegerak nogo aret waganogo ogoba Amatiya obaane'me endagembogut logowak nduk, mippereegwaarak.

²²Mippogo mbareegwa, at Amatiya ombomini kambunuk nogogwam inom yonggonggola nagagerak kagak, at Atariya nogo nen o Elat omaawi eerogo pege nagagerik, it aakumi Yekura mendek time logowak nduk, wogoragagerak.

²³At Yowat aput Amatiya nogo Yekura inowe endagembogut wonage kagak, tahun 14 eeppunuk, ambi age paga aap Yokawat aput Yerobeyam Iterali inowe endagembogut a'nuk, o Tamariya logonet, Iterali wone lengganogo yorage kagak, tahun 41 eereegerak.

²⁴At Nebat aput Yerobeyam nogo maluk eeke nagagerak paga Iterali maluk eerit nogo nogogwaarak nogo, at Yokawat aput Yerobeyam nogo mbo puulik Aliku ALA enegen kagak maluk mban eerit nage nagagerak.

²⁵ At Aliku Iterali inogoba Ala nen yoge kagak yoraga ayeloman Amitayi aput Yunut o Nggat-Kepet mendek nogo yoge kagak yoragagerak nogo ndak-ndak, at Yerobeyam nogo nen it Iterali wonogo menggam inanggween o Kamat tu unggwogo menggam nen nok, niyo Mayu Ogup Yenggenak kuli mbanak nogo obaane'me kolagagerak.

²⁶At Aliku ALA nen it Iterali mendek inendage warak inom, inendage lek inom, abok aret andi mondok alik negen yagan wakwi iigak kwe, ambi nen yeenggwaaraga'lek aret iige nagagerik,

²⁷“It Iterali o nggween paga yime inendage mbanak nogo koorogo pigin lek o, yinuk, yereegirak me, yeenggwaaraakit o,” yinuk, aap Yokawat aput Yerobeyam aret mippereegerak.

²⁸At Yerobeyam endagembogut a'nuk wone lengganogo yorage logonet, eerit nage nagagerak inom, inom wim eeke logonet endage nggwok agagerak inom, o Ndamitik Kamat imbirak Yekura unde wonogwe me, ndinogo Iterali wogoragagerak inom, ando abok ti, it aap Iterali inoweewi inendagembogut eeko nogogwaarak liiru mbanak paga, inom mbanak wonage nogo lek a?

²⁹Ndi, at Yerobeyam nogo, ombomini it Iterali inoweewi inendagembogut nogo kambunuk nogogwam inom yonggonggola nage mbareegi, obaane'me at aput Takariya endagembogut agagerak.