Read Western Dani 2 Endagembogut 17 Bible Online

2 Endagembogut 17 - Western Dani bible

2 Endagembogut 17

¹At Akat nogo Yekura inowe endagembogut wonage kagak, tahun 11 eeppunuk, ambi age paga at Ela aput Koteya nogo, o Tamariya Iterali inowe endagembogut age nagagerik, wone lengganogo yorage kagak, tahun 9 eereegerak.

²At Koteya nogo Aliku ALA enegen kagak maluk eeke nagagerak kwe, at awo endagembogut aga'lek kagak, it Iterali inoweewi inendagembogut logonet, maluk eeko nogogwaarak kokwak at eeke logolik.

³At Koteya nogo aap Atiyut inowe endagembogut Talamanetet abu'me piinok logonet, tahun ambi eekak paga inarum wonage onggo wu wogoge nagagerak nogo, ambinom wogoga'lek teppunuk, aap endagembogut Metit mendek endage To imbirak arikit nduk, awuri nappiige nagagerak ti paga aap Atiyut inowe endagembogut Talamanetet nogo nen, “Nambokan lagangge me, tebenogo pi na o,” yinuk, wage nagagerik, eebe pippunuk, keele maarogo mambiigo menggam mambereegerak.

⁴

⁵Mambege nagagerik, Iterali iname nogome abok aret tebenogo punuk, o kota Tamariya tebenogo pikit nduk, eeke kagak, tahun kenagan eereegerak.

⁶Aap Koteya endagembogut wonage kagak, tahun 8 eeppunuk, ambi age paga aap endagembogut Atiyut mendek nen o kota Tamariya tebenogo piinok, aakumi Iterali mendek ando wogoren, o Atiyut piya nage nagagerik, o Kala inom, niyo Kabot aa'nggi paga o kota Nggotan inom, it aap Marayi menggam o kota-kota inom, oone omaawi paga, “O yime aret logonip o,” yinuk, yoragagerak.

⁷Ti inoba agagerak nogo ti, it Iterali o Metit aap Pirawun abu'me tebembiirogo wonage me, at wogoren wundi wagagerak Aliku inogoba Ala maluk eeppogo logonet, obaane'me kugi eerit nugwi,

⁸at Aliku ALA aa'nduk a'nuk, yi aakumi ndi aakumi wumbiyareegerak nen eerit nogo nogogwaarak nogo, mugurok nogwe, Iterali inoweewi inendagembogut nen eeko logorak koonogo pereegwaarak nogo, eerit nogwe, eeko nogogwaarak kenok, inoba agagerak.

⁹It aakumi Iterali nogo nen Aliku ALA ale'nggen mbariyak lek mendek kote eerit nogo logonet, tum nggayo menggam inom, inawi kota pak wurik me inom, it wonogo menggam puut-puut abok aret inagugi inake warogo wogogo logorak wurogo pit nogwe,

¹⁰ puut-puut tiyarogon paga inom, yi eyo ndi eyo wiganak alome inom, yugum paga inagugiwak ogobakkigirogo tiyappugwi, kugigwe Atiyera ageyo arelen yinogo pit nogwe,

¹¹at Aliku ALA nen aa'nduk a'nuk yi aakumi ndi aakumi wumbiyareegerak nen eeko nogogwaarak nogo kokwak, puut-puut abok aret obari abe kaga nogo mendek kani kunggwi, eeko nogogwaarak. At Aliku ALA nen, “Togop eeriyak mage o,” yinuk, yoragagerak kagak, maluk lombok eerit nogo logonet, inagugiwak tiyappit nogo nogogwaarak paga Aliku ALA anini mbareegerak.

¹²

¹³Anini mbake nagagerik, Ala wone yoraga inom, inabinggaanggo kaga inom, Aliku ALA nen yorage kagak, it nen aakumi Iterali inom, Yekura inom, yorogo logonet, “Kinombomini, E o, yinuk, eeko logowak nduk, wone lengganak liiru mbanak abok aret yorage, ndi, at Aliku ALA nen yorage kagak yoraga ayeloman mini nogo nen yokkiraawak nduk yorage, eereegerak nogo ndak-ndak eerit nogo logonet, aaninggin kinoba arukwak, kit maluk eeko monggotak nogo mbo punuk, Yogop ee'nu, ndogop ee'nu, yokkirage inom, wone lengganogo yokkirage inom, liippunuk, eerit nogo logonip o,” yinuk, yorogo nogogwaarak kwe,

¹⁴Yorogo nogogwaarak kwe, “Ninaruk koneniyak nineebi o,” yinuk, inombomini inanobak yugum pogom me, iniki Aliku ALA oba panggombunuk, abet mbarulik ti kokwak, inombowologwe kunduk, inanobak yugum pogom kumbunuk,

¹⁵wone lengganogo yoragagerak nogo, “Eeko logorak nineebi o,” yinuk, inombomini inom wone abuk nggaruk togon koonogo pereegerak inom, aaninggin inoba arukwak yorage nagagerak inom, taganogo mbo punuk, obeelom eeginaburak lek aanom warogo kagak inagugiwak tiyappit nogo logonet, it kunduk, ineebe abe lek maluk aret wonogogwaarak. At Aliku ALA nen, “Yi aakumi ndi aakumi eerit nogo menggaarak nogo kit togoti eerit nogo logorak mage o,” yoragagerak kagak, it eekwi nogo wakkagak aret eerit nogo nogogwaarak.

¹⁶ At Aliku inogoba Ala nen, “Yogop ee'nu ndogop ee'nu,” yoragagerak nogo, abok aret taganogo mbo punuk, inagugiwak kwak mbuti paga tapi inogut mbere ogobakkigikwi, kugigwe Atiyera ageyo arelen yinogo pugwi, inendobanggun yindumbunuk laaluguragan abok aret inayuk wukwi, kugi Mba'an alut eekwi, eeko nogogwaarak.

¹⁷ Ti eeko logonet, it inapuri wologwe-komologwe inagugi inake kani kumbiigwi, tili pagangga ogwe, magagirak iyagalo ogwe, ndi, Aliku ALA enegen kagak, “Maluk ayeloman arikit,” mba'nuk, maluk mban eekwi, eerit nogo nogogwaarak paga at Aliku ALA anini mbareegerak.

¹⁸Mbake nagagerik, anini mondok nggwik togon Iterali inoba piige logonet, “Iterali ambinom pegiige logorak neebi o,” yinuk, mbo piige logonet, it Yekura mendek inalik mban teppiyareegerak kwe,

¹⁹it Yekura kunduk, Aliku inogoba Ala nen, Yogop ee'nu ndogop ee'nu, wone yugu nogo taganogo mbo punuk, it Iterali maluk eeko nogogwaarak nogo eerit nogo nogogwaarak.

²⁰Ti eekwi iinok, Aliku ALA nen it inanebunu Iterali mendek wiganak abok aret aaninggin inoba piige logonet, aap inanini ambik aap inooka ineenggime piigak mban eereegi-eereegi peebi inoba abera'lek mbo tek eerogo piyareegerak.

²¹At Aliku ALA nen Ndawut paga wiganak ambi, “An inowe endagembogut logonet, inarum logokit,” mbake kagak, eenggime nen ndingge mbareegi, Iterali nen aap Nebat aput Yerobeyam nogo inowe endagembogut mippereegwaarak kwe, at Yerobeyam nogo nen Aliku ALA mbo punuk, maluk iya negen eerit nogo logowak nduk, it Iterali inikime manake nagagerak.

²²Manake mbareegi, it Iterali mendek nen at Yerobeyam maluk eerit nage nagagerak nogo, mbo puulik maluk mondok kunik aret eeko nogogwaarak me,

²³Aliku ALA nen yorage kagak yoraga ayeloman mini nogo yorage kagak, Iterali yorogo nogogwaarak nogo ndak-ndak, “Iterali ambinom pegiyoorak neebio,” yinuk, mbo piige mbareegi, at aap Atiyut inowe endagembogut nen it Iterali wonogogwam nogome nen kugun wogoren, o Atiyut piya nagagerak o yogondak wonogwe aret o.

²⁴It aakumi Iterali mendek wogoren piya nogogwaarak nogo inobaane'me at aap Atiyut inowe endagembogut nen it aakumi Mbaben mendek inom, Kuta mendek inom, Awa mendek inom, Kamat mendek inom, Teparawayim mendek inom, wogoren, o Tamariya kota-kota logowak nduk piya wagagerak me, o Tamariya kota-kota time ye mbambatinuk wonogogwaarak.

²⁵Piya wogogwaarak ti eyom paga wonogo logonet, Aliku ALA inagabiti mba'nuk alut eeka'lek iinok, at Aliku ALA nen nggeewo inanini warak singa inenggela'me nappiya wage mbareegi, aakumi apit ineyak nibininabit nogogwaarak kambeegwaarak.

²⁶Kambeegwaarak nogo aap Atiyut inowe endagembogut yogo logonet, “It aakumi kat wogoren o Tamariya kota-kota piya nagandak nogo, at kugi o ti unde menggerak nogo nen, Nalut ndogop eeko logonipo, ari nogo ineenggo'lek me, alut eeka'lek iinok, singa nen ineyak nibininabit nawak nduk, inenggela'me nappiya wagaarak ineyak nibininabit nogwe iinok, kambit nogo agaarik o.”

²⁷Yogo mbareegwa, at aap Atiyut mendek inowe endagembogut nogo nen wone lengganogo it yorage logonet, “Aap Ala unde wogoren o Atiyut piya wogogurak wonogwe nogo, ambi nen o Tamariya iyokan nage logomenggerik, inom time logonet, at kugi o Tamariya unde menggerak nogo nen, Nalut ndogop eeko logorak, wone yugu nogo, it aakumi mamuninake logowak nduk, nappinip o.”

²⁸Wone lengganogo yorage mbareegi, aap Ala unde ambi o Tamariya nen wonok mbo pi nogogwaarak nogo, iyokan wage nagagerik, o Mbeten logonet, “Aliku ALA ndogop aret alut eeko logonip o,” yinuk, mamuninake nagagerak.

²⁹Mamuninake nagagerak kwe, it aakumi wogogwaarak o kota-kota ye mbambatinuk wonogwe nogo inanebunu lombok nen Ala obaane'me inagugiwak ogobakkigikkologo nogogwaarik, it Iterali mendek o Tamariya logonet puut-puut paga inagugi inake warogo wogorogo nogogwam inawi wurik me nogome mambunuk, inalut eeko nogogwaarak.

³⁰Inanebunu lombok nen Ala obaane'me inagugi ogut ogobakkigikkologogwaarak nogo ti, it aap Mbaben mendek nen kugi Tukot-Mbenot ogut ogobakkigikwi, it aap Kuta mendek nen kugi Neregan ogut ogobakkigikwi, it aap Kamat mendek nen kugi Atima ogut ogobakkigikwi,

³¹it aap Awa mendek nen kugi Nibikat Taratak imbirak inogut ogobakkigikwi, ndi, it aap Teparawayim mendek nen Ala obaane'me o Teparawayim unde menggaarak kugi Aramelek Anamelek imbirak inake it inapurilogwe inoorogo kani kumbiigwi, eeko nogogwaarak.

³²At Aliku ALA alut eeko logonet kwe, puut-puut paga inagugi inake warogo wogorogo menggam nogome inake warogo wogorogo logorak unde inawuri lombok ugun-ugun mippiinet nogwe,

³³ndi, Aliku ALA alut eeko logonet kwe, wogoren waga'lek kagak, it aakumi inanebunu lombok inalitik-inalitak Ala obaane'me inagugi mugurok nogo nogogwaarak nogo ndak-ndak mugurok nogwe, eeko nogogwaarak.

³⁴ It aa'nduk eeko nogogwaarak nogo o yogondak kuli kunik eekwi aret wonogwe o. It nen wone lengganak inom, wone yugu eeka'lek iinok aaninggin inoba piigo logorak wone inom, eeko logorak wone inom, “Yogop ee'nu ndogop ee'nu,” yugu inom, Aliku ALA nen aap Yakup endage ambi Iterali tooneegerak apuri yoragagerak nogo, liippunuk eekwi, Aliku ALA inagabiti mba'nuk alut eekwi, eeka'lek aret wonogo menggaarak.

³⁵At Aliku ALA nen Iterali inom wone koonogo pereegerak nogo, eeriyak yorage logonet, “An nobaane'me kugi eeko logonet, inayuk wukwi, ti mban mugurok nogwe, inake warogo wogogwi, eeriyak ti, mondok mage o.

³⁶ Naliku ALA nen neenggi titik eerogo nomaawi paga o Metit nen wokkiren wundi wagagirak an mban nalut eeko logonet, nabu'me tebe yi unggwage, nayuk wukwi, nake warogo wo'nugwi, eeko logonip o.

³⁷Wone lengganak inom, wone yugu eeka'lek iinok aaninggin inoba piigo logorak wone inom, eeko logorak wone inom, Yogop ee'nu ndogop ee'nu, yugu inom, liiru mbanogo wokkiragagirak nogo liirogon porogo logonet, eerit nogo logonip o. Ndi, an nobaane'me kugi alut eeriyak perak, mondok mage o.

³⁸Kit an ninom wone koonogo pereegirak nogo, kobak eerogo pugwi, nobaane'me kugi alut eekwi, eeriyak mage o.

³⁹Ata, kinom wim mbanak ineenggime nen ndingginaburak nogo ti, Naliku kinogoba Ala an aret me, nalik mban nalut eeko logonip o,” yinuk, yoragagerak.

⁴⁰Togop yoragagerak kwe, it wogogwaarak o Tamariya wonogwe nogo wone yoragagerak konengga'lek mbo punuk, it maan maluk eeko nogogwaarak nogo, kunik aret eeko nogogwaarak.

⁴¹It aakumi yi nen at Aliku ALA alut eeko logonet kwe, inagugiwak inom aret tiyappit nogo nogogwaarak me, yogondak inapuri-ino-mbowologwe kunduk, inombomini eeko nogogwaarak nogo ndak-ndak aret eekwi wonogwe o.