Read Western Dani 2 Endagembogut 21 Bible Online

2 Endagembogut 21 - Western Dani bible

2 Endagembogut 21

¹At Manate ndarak kagak, tahun 12 age paga aap endagembogut a'nuk, o Yerutalem logonet, wone lengganogo yorage kagak, tahun 55 eereegerak. Ndi, at agalo endage Kepitibak aret.

² At Aliku ALA aa'nduk a'nuk, it yi aakumi ndi aakumi Kanan mendek mugogo wumbiyareegerak maluk ogole warak mendek eeko nogogwaarak nogo, at Manate nen Aliku ALA enegen kagak, maluk ti mendek aret eeke nagagerak.

³Eeke logonet, at ogoba Kitikiya nen puut-puut paga inagugi inake eeko menggam lek eerogo pereegerak nogo, obaane'me ogobakkigirogo pege, kugi Mba'an ake warogo wogogo logorak ogobakkigirogo pit nage, it Iterali inowe endagembogut Akap nen kugigwe Atiyera ageyo arelen mippereegerak kokwak, at togop aret eerogo pege, laaluguragan yigin abigan abok inabu'me tebe yinuk, inalut eeke,

⁴ Aliku ALA nen, “O Yerutalem nendage ki logorak,” yereegim at awi wurik me kagak, kugi ake warogo wogogak ogobakkigirogo pege,

⁵Aliku ALA awi wurik me owa'nagat mbere wurik nogome laaluguragan yigin abigan abok inake warogo wogoragak ogobakkigirogo pege,

⁶aput eenik ngge-ngge kugi ake kani kungge, magagirak iyagalo age, tili pagangge, aakumi inogoma wiiraga inowagam nage, kambeegwaarak kin aruwak nduk eeppiiga inom wone mbani nage, eerit nage logonet, Aliku ALA enegen kagak maluk lombok eerit nage nagagerak paga Aliku ALA anini mbareegerak.

⁷ At Aliku ALA nen Ndawut aput Talomo imbirak yorage logonet, “It aakumi Iterali inanebunu lombok inawi kota-kota iigak, an leenogo pereegim o Yerutalem nawi wurik yime mban nendage mondok-mondok ki logogin me, it aakumi Iterali, Yogop ee'nu ndogop ee'nu, yoragagirak nogo ndak-ndak eekwi, ndi, an wone lengganogo yoragagirak nayeloman Muta nen liiru mbanogo wogoragagerak nogo porogo logonet, liirogon mugurok nogwe, eekwi iinok, it inombomini logowam inanggween wogoragagim nogome nen yagak-ndagak nugu logowak nduk, eeppiyaagin lek o,” yinuk, yoragagerak kagak kwe, at Manate nen kugigwe Atiyera ageyo arelen ogobakkigirogo Aliku ALA awi wurik time pi unggwagagerak.

⁹Pi unggwagagerak ti paga aakumi iniki nomonogo piige mbareegi, at Aliku ALA aa'nduk a'nuk, yi aakumi ndi aakumi Kanan mendek lek eerogo piyareegerak nen maluk eeko nogogwaarak nogo ti, nggwok aret eeko nogogwaarak kwe, it Iterali Ala wone inaruk konengga'lek mbo punuk, maluk eeko nogogwaarak nogo perak, nggwok lombok aret eeko nogogwaarak.

¹⁰Togop eeko mbareegwa, at Aliku ALA nen at oone yorage kagak yoraga ayeloman mini nogo yorage logonet,

¹¹“Aap Manate nogo it Yekura inowe endagembogut aga'lek kagak it aakumi Amori mendek nen maluk eerit wundi wogo nogogwaarak ti, nggwok aret eeko nogogwaarak kwe, at Manate perak, abunuk maluk ogole warak lombok eerit nage logonet, kugiwak ogobakkigirogo punuk, tiyappit nage paga it Yekura mendek kunduk, maluk aret eerit nogo nogogwaarak me,

¹²Naliku Iterali inogoba an Ala nen it aakumi Yerutalem menggaarak inom, o Yekura menggaarak inom, aaninggin mondok nggwok lombok inoba kwippiyaagin nogo, yi aakumi ndi aakumi inaruk konenggo logomenggaarik, Wi, yinuk, pi wako logogun o.

¹³O nggorek ndak-ndak ilik? yinuk, keele wakkagak eeko mengga kwak, an nen o Tamariya wakkagak eeppiige, ndi, O eyak koonak mi'ndak wonage ilik? yinuk, keele paga wakkagak eeko mengga kwak, an nen aap Akap paga wiganak inom wakkagak eeppiige, eereegirak nogo kokwak, it Yerutalem togop aret wakkagak eeginake logonet, togolowak koorogo abut laganogo amburu mbanggo mengga kwak, an togop aret eerogo piyaagin o.

¹⁴It inombomini o Metit wundi wogogwaarak nen nok, o yogondak kuli nenegen neegak maluk mban eerit wundi wogogwaarak paga nanini mbareegirak me, it an niniki kundugu neyate kwak eegu yumbunik wonogwe nogo, waganogo inawim ineenggime piige neenok, iname maluk eerogo piigwi, inamendek inom, ineebe inom, kugun wogoren nogwe, eerugun o,” yinuk, yorage kagak, yorogogwaarak nogo o.

¹⁶At Manate nogo nen at Aliku ALA enegen kagak, aakumi Yekura mendek maluk eeruwak nduk, eereegerak ti maluk aret eereegerak kwe, aakumi maluk eerulik ugun iigak inoorit nagagerak paga inamiya o Yerutalem ilin-unggut abok endak wareegerak ti perak, maluk lombok aret eereegerak.

¹⁷At Manate nogo endagembogut a'nuk wone lengganogo yorage logonet, eeke nagagerak inom, maluk eerit nage nagagerak inom, ando abok ti, it Yekura inoweewi inendagembogut eeko nogogwaarak liiru mbanak nogo paga, inom mbanak wonage nogo lek a?

¹⁸Ndi, at Manate nogo ombomini kambunuk nogogwam inom yonggonggola nage mbareegi, at awi o nggwok abe wurik oore'nggam aap Uta eyabume nogome eebe nggween taambogo mbareegwa, obaane'me aput Amon endagembogut agagerak.

¹⁹At Amon nogo ndarak kagak tahun 22 age paga inowe endagembogut age nagagerik, o Yerutalem logonet, wone lengganogo yorage kagak, tahun mbere eereegerak. At agalo ti, awi Yotaba mendek aap Karut apuluk endage Metulemet aret.

²⁰At ogoba Manate maluk eeke nagagerak ndak-ndak, at Amon nen at Aliku ALA enegen kagak maluk mban eeke nagagerak.

²¹Eerit nage logonet, ombomini inogoba Aliku Ala iniki mbake nogo ndak-ndak eeko logolik. Ata, mbo punuk, at ogoba nen maluk eerit nage logonet, kugiwak ogobakkigirogo punuk tiyappit nage nagagerak nogo aret endobanggun yindumbunuk, ayuk wurit nage nagagerak.

²³Eerit nage me, at inom yabu eeko menggaarak nogo nen at eebe wariyak wone mbanggo nogogwaarik, awi o nggwok abe wurik nogome aret warogo pogo mbareegwa,

²⁴it aakumi o time menggaarak nen pilak yogo logonet, aap endagembogut Amon wariyak wone mbaneegwaarak nogo abok aret inoorogo piinok, obaane'me at aput Yotiya nogo inowe endagembogut logowak nduk, mippereegwaarak.

²⁵At Amon endagembogut a'nuk wone lengganogo yorage logonet, eerit nage nagagerak ando abok ti, it Yekura inoweewi inendagembogut eeko nogogwaarak liiru mbanak nogo paga, inom mbanak wonage nogo lek a?

²⁶Ndi, at Amon nogo, aap Uta eyabume Amon kabunogo pateegim nogome eebe taambogo mbareegwa, obaane'me at aput Yotiya nogo aret endagembogut agagerak.