Read Western Dani 2 Endagembogut 22 Bible Online

2 Endagembogut 22 - Western Dani bible

2 Endagembogut 22

¹ At Yotiya nogo ndarak kagak tahun 8 paga endagembogut a'nuk, o Yerutalem logonet, wone lengganogo yorage kagak tahun 31 eereegerak. At agalo ti, awi Mbotikat mendek aap Araya aput kwe Yerira aret.

²At Yotiya nogo ombo Ndawut eerit nage nagagerak ndak-ndak eeke logonet, ena agi age, ogu age, eeka'lek Aliku ALA enegen kagak obeelom mban eeke nagagerak.

³At Yotiya endagembogut a'nuk, wone lengganogo yorage kagak, tahun 17 eeppunuk, ambi age paga aap endagembogut Yotiya nogo nen at ake liiru mbangga aap Metulam ombooluk Ataliya aput Tapan nogo, Aliku ALA awi wurik me nappege logonet,

⁴“Kat nen aap Ala unde inowe Kilikiya ka nage logomenggendik, it aakumi nen Aliku ALA awi wurik me wu pi ungguwok nduk, wonok wogwe iinok, it aap Ala awi wurik me tu unggwogo menggam arum wonogwe nen wu kuwak eekaatak porogo wonage inowe nogo, Mande wonage? yokkiruwak nduk, yori nak o.

⁵Ndi, Wu eebe ndogop wonage o, yinuk, it aap Ala awi wurik ogobakkigikwi inarum wonogwe nogo wogorage kenok, it nen aap Aliku ALA awi ogobakkigikwi

⁶o wuka inom, wurik eyo paga ogobakkigika inom, yugum paga wuka inom, it nogo yabu eekwi onggo wogorogo logonet, wu eegu paga Ala awi wurik maluk agaarak ogobakkigiruwak nduk, eyo inom, yugum ogobakkigirik inom, kunuwak nduk, wogorogwe,

⁷ ndi, it aap Ala awi ogobakkigikwi inarum wonogwe nen it o wuka wu wogorogo logonet, liirogon nggilik-nggelok wogorogwe me, Wu wungge nineenu aruwok nduk, liiru mbanogo wo'niraanip o, yinuk, yoraga'lek teppiige, eeruwak nduk wone wonok nak o,” yinuk, nappereegerak.

⁸Nappereegerak yori nagagerak nogo, at Ala unde inowe Kilikiya eeke nagagerik, aap endagembogut ake liiru mbangga Tapan nogo yoge logonet, “Aliku ALA nen eeko logorak yereegerak mbuku paga liiru mbanak at awi wurik me kwaakkagarak o,” yo'nuk, aap Tapan wogoge mbareegi, pekkagagerak.

⁹Pekkage nagagerik, iyokan aap endagembogut wonage me wage nagagerik, eereegerak wone nogo mbininogo yoge logonet, “Aliku ALA awi wurik me wu wonage nogo, kayeloman mini nen woppunuk, it Ala awi ogobakkigikwi inarum menggaarak nogo wogoragaarak o.”

¹⁰Ari nagagerik, ambinom yoge logonet, “Ndi, aap Ala unde Kilikiya nen mbuku yi, an wo'negerak o,” ari nagagerik, aap endagembogut nogo enggaanom paga mbinineegerak.

¹¹Aap endagembogut ake liiru mbangga Tapan nen wone eeko logorak Ala yereegerak mbuku paga liiru mbanak mbinineegerak nogo, aap endagembogut aruk konengge nagagerik, ayum nibinogo pateegerak.

¹²Ayum nibinogo pake nagagerik, Ala unde Kilikiya inom, at Tapan aput Akikam inom, Mika aput Akobot inom, ake liiru mbangga Tapan inom, ndi, at eebe wonok nega Ataya inom, yorage logonet,

¹³“Nit eeppinaniyak mbuku yi paga mbanak wonage nogo, ninombomini konembunuk, ndak-ndak eerulik muunogo mbo pereegwaarak paga Aliku ALA anini mondok alik negen ninombake me, an inom, aakumi inom, it Yekura abok inom, ninake Ala yereegerak mbuku kwaakkogoorak yi paga, liiru mbanak nonggop yo'nirage nogo, Aliku ALA nen yokkiraawak nduk, yori nanip o.”

¹⁴Yorage mbareegi, at Ala unde Kilikiya inom, Akikam inom, Akobot inom, Tapan inom, Ataya inom, kwe Ala nen yoge kagak yoraga aap it Ala unde inayum pipuk eerogo piiga Karakat ombooluk Tikwa aput Talum akwe endage Kulara nogo, o Yerutalem peebi nambit-mbit wurik me nogome wonage me, yori nogogwaarak.

¹⁵Yori nogo mbareegwa, kwe nogo nen it yorage logonet, “At Aliku Iterali inogoba Ala nen, At nappiya wagaarak ti, yori nawak nduk, yoret, yo'negerak nogo yokkira o.

¹⁶At Aliku ALA nen ari logonet, It aakumi Yekura nen an mbo paninuk, nobaane'me kugi inake warogo kani kunggwi, ineenggi paga inagugiwak ogobakkigirogo tiyappugwi, eereegwaarak paga nanini mbareegirak me, an nanini lek aga'lek kani omoonuk negen itok kunik o Yerutalem oba wonage me, at aap Yekura inowe endagembogut nen mbuku mbanak malenggerak nogo ndak-ndak, o kota yi paga inom, it aakumi yime menggaarak inom, aaninggin mondok alik negen inoba kwippiyaagin, yegerak o.

¹⁸At Aliku ALA nen yokkiraawak nduk, yori nanip o, yinuk, nappiya wagaarak aap Yekura inowe endagembogut yori nawak nduk, yoret o, yinuk, yegerak nogo ambinom yokkira o. At Aliku Iterali inogoba Ala nen ari logonet, An nen o kota yi inom, it aakumi yime menggaarak inom, nanini inombake logonet, O yi abeelik-abeelek eerogo pege, Pulunik o, yuwak nduk eerogo pege, eerigin, yagarak nogo, at aruk konengge nagaarik, nenggaanom paga iniki wakkolage logonet, tebeppake, ndi, ayum nibinogo patinuk, le ari, eeke nogo Naliku an ALA nen kagarak me,

²⁰an o yi maluk eerogo puurak nogo, at kagak eerigin lek o. Ata, o yi abolok lek obeelom wonage kagak, ombomini kambunuk nogogwam nggwogoba wonogwe me, inom logowak nduk, nappigin, yegerak o, yinuk, yori nanip o,” yoragagerak. Yorage mbareegi, it nogogwaarak nogo wone yoragagerak wonok aap endagembogut yori wogogwaarak.