Read Western Dani 2 Endagembogut 3 Bible Online

2 Endagembogut 3 - Western Dani bible

2 Endagembogut 3

¹At Yotapat nogo it Yekura inowe endagembogut wonage kagak, tahun 17 eeppunuk, ambi age paga at Akap aput Yoram nogo o Tamariya it Iterali inowe endagembogut a'nuk, wone lengganogo yorage kagak, tahun 12 eereegerak.

²Ndi, at Yoram nogo nen Aliku ALA enegen kagak, maluk mban eeke nagagerak kwe, at agalo-ogoba imbirak maluk eeko nogogwaarak ndak-ndak eeke logolik. At ogoba nen yugum paga kugi Mba'an alut eeko logowak nduk, ogut eerogo mippereegerak nogo, langgunogo pit nagagerak kwe,

³at Nebat aput Yerobeyam nen maluk eerit nage nagagerak paga Iterali maluk eeko nogogwaarak nogo, at mbo puulik inom aret eerit nage nagagerak.

⁴Ndi, it aakumi o Mowap mendek inowe endagembogut Meta nogo aanggumi ndomba unde wonagagerak. Unde wonagagerak me, at nen ndomba aagalogwe seratus ribu inom, ndomba ngguunok seratus ribu ineeruwak mbanak inom, inarum wonage onggo Iterali inowe endagembogut wogoge nagagerak.

⁵Togop eeke nagagerak kwe, at Akap nogo kambeegerak kagak, it Mowap inowe endagembogut Meta nogo nen, “Aap Iterali inowe endagembogut nen wone lengganogo yo'nirage logorak neebi o,” yereegerak.

⁶Togop ari mbareegi, aap endagembogut Yoram nogo o Tamariya nen wundi nage nagagerik, awuri Iterali mendek wim eeka nogo woraawak nduk, inayonggo piyareegerak.

⁷Inayonggo piinok, aap Yekura mendek inowe endagembogut Yotapat wonage me wone eerogo nappege logonet, “Aap Mowap mendek inowe endagembogut nogo nen, Iterali mendek wone lengganogo yo'nirage logorak neebi o, yinuk, yegerak me, Mowap mendek ninom wim eeruwok nduk, kat ninom ari woroorak op ilik?” Yoge mbareegi, at Yotapat nen, “An nawuri inom, kat kawuri inom, an naguda inom, kat kaguda inom, ndak-ndak aret wonogwe me, kat an nimbirak lambumbunuk wim eeri noorak op aret o.”

⁸Yoge nagagerik, ambi yoge logonet, “Tu ngge paga nawok o?” Yoge mbareegi, at Yoram nen at yoge, “Tu karume Erom paga nawok o,” yoreegerak.

⁹Yogo nogogwaarik, aap Iterali inowe endagembogut inom, it Yekura inowe endagembogut inom, it Erom inowe endagembogut inom, tu wangge'nuk, nogwe iigak, nogo 7 yereegwaarak me, inawuri wim eeka inom, inaanggumi inom, inake inaniyo noorak lek aret kogogwaarak.

¹⁰Lek aret mbareegi, Iterali inowe endagembogut nen ari logonet, “Wologo wae! At Aliku ALA nen it aap Mowap mendek ineenggime pinanikit nduk, aap ninendagembogut kenagan ninayonggo pinanggerak wonogwe me, ninabuwa o.”

¹¹ Ari mbareegi, at Yotapat nen kin wogiige logonet, “Nit mbakwi wonok, Aliku ALA yoruwak nduk, Aliku ALA nen yoge kagak yoraga ambi yime wonage ilik, lek a?” Yorage mbareegi, aap Iterali inowe endagembogut ineegin warak awot ambi nen onggo yoge logonet, “Aap aa'nduk Eliya ayeloman logonet, eenggi kookkage nagagerak Tapat aput Elita nogo perak, yime wonage o.”

¹²Yoge mbareegi, at Yotapat nen, “At Aliku ALA nen yoge kagak ari menggerak abet aret yagan o!” Yoge nagagerik, aap Iterali inowe endagembogut inom, aap Yotapat inom, aap endagembogut Erom mendek inom, Elita nogo owagam ka wogogwaarak.

¹³Ka wogo mbareegwa, at Elita nen aap Iterali inowe endagembogut yoge, “Kat an nimbirak yuurak wone ambi wonage kenok wagan a? Kagalo-kogoba wone yoraga nogo nen yokkiruwak nduk, nak o.” Yoge mbareegi, Iterali inowe endagembogut nen onggo ari logonet, “Togop yugun ubi! Nit aap ninendagembogut kenagan yi, waganogo aap Mowap ineenggime pinanikit nduk, Aliku ALA nen ninayonggo pinanegerak kenok, keya wogo o.”

¹⁴Yoge mbareegi, at Elita nen, “At Omaawi Lombok Aliku ALA eenik menggerak ake eeke minggirak endage paga yokkiri o. Aap Yekura inowe endagembogut Yotapat kinom wonage lek nen, kit nenegen pekkiige, yeenggwa kirage, ee'netak mondok lek aret kwe, an ayuk wuke minggirak Yotapat kinom wogotak me,

¹⁵aap nggitat eeke menggerak ambi neya woraawak nduk, yori nanip o.” Yoragagerak wonok wogogwaarak eeke kagak, Aliku ALA omaawi at Elita oba ari wage mbareegi,

¹⁶ari logonet, “At Aliku ALA nen yegerak nogo yi o. O kobappaga yime yomban wonet nawak o.

¹⁷Wonet nogwe iinok, it nen o wiya wake, o mayu wage, eeke inigen kaga'lek iigak kwe, o kobappaga yime niyo mban yenggenogo pit woramenggerak me, it inom, inaanggumi tapi-ndomba inom, inaanggumi alik mendek inom, abok aret nunggo logogun o.

¹⁸Ti eerigin nogo ti, at Aliku ALA enegen kagak, we negen aret eerigin o. Ndi, it Mowap mendek kunduk, Iterali ineenggime piyamenggerak me,

¹⁹it inawi yugum pak wurik inom, kota-kota abu obeelom lombok wonage nogo inom, abok aret langgunogo pugwi, yi eyo ndi eyo abe mendek abok aret muurogo pugwi, niyo eneeri wungge nogo abok aret nggween kagaarogo pugwi, ndi, ineyabu wogome abe mendek yarak nogo abok aret yugum paga aan libik-lebek eerogo pugwi, eerugun, yegerak o,” yinuk, yoragagerak.

²⁰Ndi, ko'lu kuubondendok Ala ake warogo wogogwi ti eyom paga yinip-panip niyo o Erom pa'nggwe nen wage logonet, o nogome niyo mban yenggenogo pit laganeegerak.

²¹Ndi, it aap Mowap mendek abok aret nen it aap inendagembogut kenagan inom wim eeruwok nduk nogwe nogo inaruk konenggo nogogwaarik, aap inanggok inom, tawe inom, aap mban yigin woorak inobam kenok, kuwak eeppiinok, inanggween kuli paga time tu tebembunuk logowak nduk, nappiyareegwaarak.

²²Nappiyareegwaarak nogo nogogwaarik, nogo yinuk, ko'lu kuubondendok ineenik a'nuk, oonegen abinak niyo yenggenak nogo ogombaga pi wage kagak, niyo enaame maa'ngga kunik aakumi inamiya negen eerak nakkogogwaarak.

²³Nakkogo nogogwaarik, “Wologwe! Ti aakumi inamiya aret o. It aap inendagembogut kenagan inawuri inom nogo nen it mban-mban aret wat-wat yikkolagaarak me, kit Mowap mendek yi wae. Inagugun kola nawok nduk, nawi o,” yinuk, keekok piyanggogogwaarak.

²⁴Piyanggogo nogogwaarik, it Iterali inawooliya wurik me nogome unggwi wogo mbareegwa, it Iterali nogo nen pilak yereegwaarak wundi nogo logonet, it aap Mowap mendek nogo inooko mbareegwa, kole mbaganit nogwe me, muguren aret inoorit inanggween tebenggo'net unggwogo logonet,

²⁵inawi kota-kota yigirik-noonom eerogo pugwi, ineyabume abe yarak abok aret yugum paga aan lebenogo pugwi, niyo eneeri abok aret kagaarogo pugwi, yi eyo ndi eyo abe mendek abok aret muurogo pugwi, eerit o kota Kit-Karetet kuli ari nanuk, o ti iluk mban enaani teppereegwaarak kwe, it aap yugum keele paga nggelembunuk nambuka nogo nogogwaarik, wanggeppunuk, keele nombok-kombok nogo paga yugum nggelembunuk, inoorogo mambit nogogwaarak.

²⁶Ti eeko mbareegwa, at aap Mowap mendek inowe endagembogut nogo nen it inom wim eeriyak abu meek aret age kage nagagerik, awuri inawooluwak unde ineebe tujuh ratus wogoren aap Erom inowe endagembogut nogo tebenogo pi ungguurak nduk, eereegwaarak kwe, meek aret agagerak.

²⁷Meek aret age mbareegi, at aput manggu ndarak at obaane'me endagembogut ariyak nogo wagangge nagagerik, o kota yagat wurik irimbaga warogo inagugi ake kani kungge mbareegi, it aakumi Iterali mendek nogo ti eeke ogole nen aap Mowap endagembogut nogo mbo punuk, iname aret wogogwaarak.