Read Western Dani 2 Endagembogut 4 Bible Online

2 Endagembogut 4 - Western Dani bible

2 Endagembogut 4

¹It aap Ala nen yorage kagak yoraga inakuwi kwe ambi nen at Elita owagam nage nagagerik, oone nggwok paga yoge logonet, “An kayeloman nogonggelo muk kambeegerak nogo ti, Aliku ALA agabiti mbake nagagerak keenu aret kwe, at nogonggelo anomat mbanak nogo nen woraanuk, naagalogwe mbere wogoren ayeloman eeppiya noorak ari o.”

²Yoge mbareegi, at Elita nen, “An nano eeppagarak o? Kat kame nano wonage nogo an yo'niru o.” Yoge mbareegi, kwe nogo nen, “An kayeloman yi, namendek ambi wonage abu lek aret kwe, naniyoowa'na wam amburu mbuuluk toolak mban wonage o.”

³Yoge mbareegi, at Elita nen, “Kame nage logomenggendik, kinom koorok taati menggendak inarogolowak toolak lek kero wokkiruwak nduk, nggino yoranet namunggun o. Nage keenok, ambitak wokkiriyak mage o. Ata, apit aret wokkiruwak o.

⁴Wokkugwi iinok, kaagalogwe kinom kiname unggunuk, tu nappogo logomonggotik, amburu o'lu mbuuluk wonage nogo paga yi togolowak ndi togolowak wokkeremenggaarak nogo abok aret toorit nage logonet, amburu eno korok togon too'nage kenok, tayoppegak eeke logomunggun o.”

⁵Yoge mbareegi, kwe nogo ame nage nagagerik, togolowak wogoreegwaarak nogo, wonok aagalogwe inom iname unggunuk, tu nappogo nogogwaarik, aagalogwe nen togolowak nogo inagalo wogogak eekwi iigak, amburu o'lu toolak nogo paga toologo pit nage nogo,

⁶abu aret eno korok yit nage mbareegi, aagaluk ambi yoge, “Togolowak ambi inom wo'niru o.” Yoge mbareegi, aagaluk nogo nen, “Togolowak ambi wonage lek aret o, nagalo.” Ari kagak, amburu nggi agan wangge nogo nggaruk yereegerak.

⁷Nggaruk ari mbareegi, kwe nogo at Ala wone liirogon eeka wonage me wage nagagerik, eereegerak nogo yoge mbareegi, at Elita nen kwe nogo yoge, “Kame nage logomenggendik, amburu toolak ti, aakumi inoba kumbunuk, kogonggelo anomat mbanak nogo wogo'nuk, eegu ti paga kaagalogwe kinom yi mendek ndi mendek kunggologo logomunggup o,” yinuk, yoreegerak.

⁸Ne ambi paga at Elita nogo o Tunem nagagerak me, kwe eenggi warak o time menggerak nen Elita imbirak mbi nawok nduk, oone nabek togon yoge mbareegi, imbirak nunggugwaarak me, ti'nuk, time nagak eeke logonet, kwe nogo ame ka unggunuk, mbi nenggak eeke nagagerak.

⁹Togop eeke kenok, kwe nogo nen ogonggelo yoge, “Aap kulinik niname niniya wage menggerak nogo ti, Ala wone liirogon eeka at ake leenak menggerak kagarak me,

¹⁰ninawi irimbaga ko mbuuluk ogobakkigirogo punuk, nogo yegak inom, eyo kwi'nagak inom, mbi nenggak eyo ndoonak inom, ndi wuninggak inom, mondok pipuk eerogo piyamonggoorak me, ne ambi niniya wage kenok, time nogo yi wagak eeke logowak nduk, yoruwok o,” yoreegerak.

¹¹Ndi, ne ambi paga at Elita nogo iniya wage mbareegi, at ake ko ogobakkigirogo piyareegwam nogome yonggonggolaakit nduk, laganeegerak.

¹²Lagangge nagagerik, ayeloman Nggekati nogo yoge, “Kwe Tunem mendek ti, Omok, yoru o.” Yoge mbareegi, yoreegerak wage nagagerik, at Nggekati owagam tayorogon taati mi'ndak wonage kagak,

¹³at Elita nen Nggekati nogo yoge, “Yogop yoru o. At nit ninake eeke kagak abu ta'liila aret eerogo pakerak ti, nit nano eeppuurak o? Aap endagembogut nen ilik, aap ineegin warak inowe nen a, ambi eeppuurak mbakaarak kenok, at ake yori naakit nduk, yoru o.” Yoreegerak nogo yoge mbareegi, kwe nogo nen onggo aap Nggekati yoge logonet, “An ti, nowe-nawot ninom inenggela'me op aret minggirak o.”

¹⁴Yoge mbareegi, at Elita nen Nggekati nogo yoge, “At ake an nano eeriyak?” Yoge mbareegi, at Nggekati nen, “At aagaluk lek. Ndi, ogonggelo kunduk, anggok aret o.”

¹⁵Yoge mbareegi, at Elita nen Nggekati nogo yoge, “Kwe ti, panggorogon woraawak nduk, yoru o.” Yoge mbareegi, yoreegerak kwe nogo tungga paga taati panggo yi wa'nuk, mi'ndak wonage me,

¹⁶ at Elita nen kwe nogo yoge, “Tahun ambi eeppunuk, ne yogondak yi ndak-ndak, kaagaluk aap aret kogome kolaamunggun o.” Yoge mbareegi, kwe nogo nen, “Nogoba o. Kat Ala wone liirogon eeka aret me, koone pilit kayeloman an yo'niriyak ti mage o,” yoreegerak.

¹⁷Ti'nuk, kwe nogo abila age nagagerik, at Elita nen, “Tahun ambit eeppunuk, ne yogondak yi ndak-ndak kaagaluk aap aret kogome kolaamunggun o,” yoreegerak nogo ndak-ndak ari wage mbareegi, kwe nogo aagaluk aap aret ndareegerak.

¹⁸Ndi, elege nogo eebe abu aret tawe age nagagerik, ne ambi paga it aakumi gandum anggen mbanit nugwi nogo, at ogoba inom mbanit nugwi me, ogoba ka nagagerak.

¹⁹Ka nagagerak me, yinip-panip elege nogo nen, “Nanobak o! Nanobak o!” Yinuk, ogoba yoge mbareegi, ogoba nogo nen ayeloman ambi yoge, “Elege yi, wonok agalo wogori nak o.”

²⁰Yoge mbareegi, ayeloman nen elege nogo piyaninuk, wonok agalo wogori nagagerak ogome porogo wonage kagak, o liingge paga elege nogo aret kambeegerak.

²¹Kangge mbareegi, agalo nen wonok ko irimbaga lagangge nagagerik, aap Ala wone liirogon eeka nogo, nogo yege menggim wimbunuk, alik mban time wonage kagak, agalo nogo tu nappunuk, aret wundi wagagerak.

²²Wundi wage nagagerik, ogonggelo wiireegerak wage mbareegi, yoge logonet, “An aap Ala wone liirogon eeka wonage me nage logominggirik, name mbet-mbet woroorak me, aap kayeloman ambi nen keledai ambi wonok niri woraawak nduk, yoru o.”

²³Yoge mbareegi, ogonggelo nogo nen akwe nogo yoge, “O yogondak yi, tut ngget penengge, nogo 6 yippunuk, ko'lu paga tat yonggonggologwe, eeko menggam lek me, nonggop nduk pekka noorak yagan?” Yoge mbareegi, at kwe nogo nen, “Age kaanok nduk, kiniki ugun logot o.”

²⁴Yoge nagagerik, keledai amborowak paga kwi'nagak nogo ndoonogo punuk, at paga kwi'na'nuk, ayeloman nogo yoge, “An yokkega'lek neegak, puk agak nagun o. Ata, mbet-mbet wo'neren nak o,” yoreegerak.

²⁵Yoge mbareegi, kwe nogo mbet-mbet aret wonok aap Ala wone liirogon eeka puut Karemen paga wonage me pi nage mbareegi, aap Ala wone liirogon eeka nogo enegen nakka wage nagagerik, ayeloman Nggekati yoge, “Kwe awi Tunem mendek wage ti, kenegen ket o.

²⁶At inom, ogonggelo inom, aagaluk inom, ineebe obeelom aret wonogwe ilik, lek a? mbe agan yori nak o.” Yoreegerak mbe agan yori wage mbareegi, kwe nogo nen, “Nineebe abok obeelom aret wonogwe o.”

²⁷Yoge nagagerik, kwe nogo aap Ala wone liirogon eeka puut paga wonage nogo owagam nanuk, iyok eenggi omaawi pigagangge mbareegi, at Nggekati nen eebe pelenogo nappereegerak mendek, aap Ala wone liirogon eeka nen ari logonet, “Kwe yi, iniki abu wakko'net wagaarak o. Ndi, iniki wakko'net wagaarak nogo, Aliku ALA nen kin paga yo'nega'lek awo kumaapporogo wonage me, kwe yi, teppu o.”

²⁸Yoge mbareegi, kwe nogo nen Elita yoge, “Nogoba o. An naagaluk aap aret wo'niriyako, yinuk, nggino yokkereegirak ilik, lek a? Ndi, eebe wo'niriyak mbaka'lek keegak, niniki lunik logokwak, Yo'niriyak mage o, yinuk, yokkereegirak nogo lek a?”

²⁹Yoge mbareegi, at Elita nen Nggekati yoge, “Kat kaa'ndok keele yikkolage logomenggendik, nowaanggun keenggime wonok mbet-mbet nak o. Ndi, nage logonet, aap ambi kimbirak abuk age kenok keyage wappege, aap ambi nen, Nore wa, yokkege kenok, kat nen onggo yoge, eeka'lek nok aret nage logomenggendik, an nowaanggun yi, elege enete paga lumbi nanu o.”

³⁰At Nggekati togop yoreegerak kwe, at elege agalo nen ari logonet, “An kat mbo paganuk nagin lek o, yinuk, ari nogo kat nen abet nomba'nok nduk, at Aliku ALA inom, kat inom, kimbirak kinenggaanom paga yagi o.” Yoge mbareegi, Elita nogo kwe imbirak aret wogogwaarak.

³¹Wogwe iigak, at Nggekati nogo Elita owaanggun wonok aa'nduk wage nagagerik, elege enete paga lumbereegerak kwe, oone ari, iniki abolok ari, eeka'lek aret mbareegi, iyokan Elita wage me, ka nage nagagerik, yoge logonet, “Elege nogo mi'naga'lek aret agaarik o.”

³²Yoge mbareegi, at Elita kwe nogo imbirak wogo nogogwaarik, Elita kwe nogo ame unggwage nagagerik, elege nogo Elita nogo yege menggim abu kambeegerak windak wonage kagagerak.

³³Kage nagagerik, at Elita nogo elege wonage me unggwage nagagerik, tu nappunuk, imbirak inalik logonet, at Aliku ALA endage kumbunuk, tamban eereegerak.

³⁴ Tamban eeke nagagerik, wulaga oba lenggennage logonet, ambe elege nogo ambe paga pege, enegen elege nogo enegen paga pege, eenggi elege nogo eenggi paga lenggembege, eeke mbareegi, elege nogo oba aganggen arit wagagerak.

³⁵Aganggen arit wage mbareegi, at Elita nen elege nogo ponggonogo punuk, ko ogoorak me nage-wage eeke nagagerik, ti'nuk, ambinom oba lenggennari lagangge mbareegi, elege nogo yagatuk ne 7 kuli wake nagagerik, enegen pagak yereegerak.

³⁶Enegen pagak ari mbareegi, Elita nen Nggekati wiireegerak wage mbareegi, yoge logonet, “Kwe Tunem mendek ti, Omok, yoru o.” Yoreegerak wage mbareegi, Elita nen, “Kaagaluk yi, wa mok o.”

³⁷Yoge mbareegi, kwe nogo ko nogome unggwi wage nagagerik, Elita iyok abu'me ngginnari nanuk, ena nggween paga wanduk yinuk, ayuk wuke nagagerik, aagaluk nogo wonok wundi nagagerak.

³⁸O nogome abok mbi noogelo agagerak me, ne ambi paga at Elita nogo iyokan o Nggilagan nage nagagerik, it aap Ala nen yorage kagak yorage ineebe aago ne ambi paga enaame taati wone yorage kwi'ndak iigak, Elita nen ayeloman ambi yoge, “It aap Ala nen yorage kagak yoraga yi, inake yi mendek ndi mendek togolowak nggwok me yonggoppunuk, kani paga laru o.”

³⁹Yoge mbareegi, aap Ala nen yorage kagak yoraga nogo ambit-ambi yi mendek ndi mendek nunggwi mendek woorak nduk, yabume wungge nagagerik, nggiyo-nggiyo nunggulik anggen yugu kwaakkage nagagerik, mbanogo ayum nggorek me yagabit eerogo ndooninuk, wage nagagerik, it abu kogolik mendek nogo aret nggarik-nggarek eerogo togolowak paga lareegerak.

⁴⁰Lake mbareegi, it aap nogo nawak nduk, ndoonogo punuk, wogoranet nagagerak nonggo nogogwaarik, inoone nggwok paga yogo logonet, “Aap Ala wone liirogon eeka yi wae. Togolowa'na larak ti, ninooriyak aret agaarik o.” Yogo nogogwaarik, noorak ineebi eeginabeegerak.

⁴¹Eeginake mbareegi, at Elita nen it yorage logonet, “Tepung ambi wo'niri wa'nip o.” Yoragagerak iri wogo mbareegwa, Elita nen togolowa'na mbo mambege nagagerik, aap lake nogo yoge logonet, “It aap yi, nawak nduk, ndoonogo wogoret o.” Yoge mbareegi, ndoonogo wogoragagerak nonggo nogogwaarik, inooriyak mendek ambi inom larak lek aret kogogwaarak.

⁴²Ti'nuk, ne ambi paga aap ambi o Mba'an-Talita nen Ala wone liirogon eeka nogo ake gandum anggen iyaalok mbanak inom, waabuk negen jelai anggen iyaalok mbanak yigirogo oroti worarak 20 inom, wonok Elita wogori wagagerak. Wogori wage mbareegi, at Elita nen, “It aap yi, nawak nduk, wogoret o.”

⁴³Yoreegerak kwe, at ayeloman nogo nen, “Aap ineebe 100 yogop wonogwe iigak, nonggoti wogoroorak yagan o?” Yoge mbareegi, at Elita nen, “At Aliku ALA nen ari logonet, It aap yi, mbi nonggo logomenggaarik, eegu ndinogo pugun o, yinuk, yegerak me, oroti ti, wogoret o.”

⁴⁴Yoreegerak inowagam taati pege mbareegi, nonggo nogogwaarik, Aliku ALA nen yoreegerak nogo ndak-ndak, oroti nogo eegu ndinogo pereegwaarak.