Read Western Dani 2 Endagembogut 6 Bible Online

2 Endagembogut 6 - Western Dani bible

2 Endagembogut 6

¹Ne ambi eyom paga it Ala nen yorage kagak yoraga aago nen Elita yogwi, “Kat ninom wonogwe me yime tenak lek abu yagabit agaarak yi ket o.

²Togop me, nit niyo Yoraran aa'nggi paga ninawi wukkolaawok nduk, ninalitak lombok eyo time nggubunogo pati nawi o.” Yogo mbareegwa, at Elita nen, “Op aret me, nanip o.”

³Yorage mbareegi, it ambi nen Elita yoge, “Kayeloman mini kat ninom aret nawok o.” Yoge mbareegi, Elita nen, “Op aret me ninom nawok o,” yoragagerak.

⁴Yorage nagagerik, inom aret niyo Yoraran aa'nggi paga ari nanuk, eyo nogo muurit nogo logonet,

⁵aap ambi eyo muurikit nduk eeke me, aye longgok togon niyo inikime wambeegerak. Wangge mbareegi, at aap nogo nen oone nggwok paga Elita yoge logonet, “Ai, nogoba. Ye ti, aap inaye me, longgok togon niyo inikime wanggi o.”

⁶Yoge mbareegi, aap Ala wone liirogon eeka nen aap nogo yoge, “Ye ti, ngga wangge kagandak o?” Yoge mbareegi, at nen, “Ya'i wangge kagarak o,” yinuk, eenggi titik eeke mbareegi, at Elita nen eyo mbuuluk ambi mbanogo ye wambeegim taati mbo wuppege mbareegi, ye nogo niyo ogombaga wonok lagi wage mbareegi,

⁷at Elita nen, “Mbet aret wamen o.” Yoge mbareegi, aap nogo eenggi nderogon ye nogo aret waganeegerak.

⁸Ne ambi eyom paga aap Aram mendek inowe endagembogut inom, Iterali mendek inom, wim eeko logonet, at inom yabu eeka inom wone mbambunuk aap endagembogut Aram mendek nogo nen, “Nit ninawooliya ndime aret wuri nawok o,” yinuk, yoragagerak.

⁹Yorage mbareegi, at aap Ala wone liirogon eeka nogo nen aap Iterali inowe endagembogut nogo, wone agago nagake logonet, “It aap Aram mendek tu paga time wambi woraagun me, kit tu time nggwe noorak mage o,” yinuk, eerogo nappereegerak.

¹⁰Nappereegerak yori nage mbareegi, aap Ala wone liirogon eeka nen, “It Aram mendek time wambi woraagun o,” yoragagim nogome tum liirogon logowak nduk, Iterali inowe endagembogut nogo nen ineenu eeppiyareegerak. Ti yoreegerak nogo ti, ne ambit yorulik tum wake logowak nduk, kulinik-kalinik yogak mban eeke mbareegi,

¹¹wone ti yoge paga aap endagembogut Aram mendek anini age nagagerik, at inom eeko menggaarak awuri nogo, woraawak nduk, inayonggo pereegerak wogo mbareegwa, it yorage logonet, “Aap Iterali inowe endagembogut imbirak a'nuk, yogop-ndogop yori nagak mban eeke ambi wonage kogotak kenok, an yo'nega'lek nonggop nduk ogotik?”

¹²Yorage mbareegi, at inom eeko menggaarak awot ambi nen at yoge logonet, “Lek o, nogoba kendagembogut! Nit yime togop ambi lek aret kwe, at Ala nen yoge kagak yoraga Elita Iterali inenggela'me wonage nogo nen kat nogo yege menggenom logonet, kote negen ari menggendak nogo aret aap Iterali endagembogut yoge menggerak.”

¹³Yoge mbareegi, at aap endagembogut nogo nen, “Aap ti, pigoorak aap nappiyaakit nduk, eebe nggeeme wonage nogo kinigen yombooni nanip o.” Yorage mbareegi, inigen yombooni nanuk, wogo nogogwaarik, at yogo logonet, “At eebe o Ndotan wonage o.”

¹⁴Yogo mbareegwa, aap endagembogut nogo nen at awuri wim eeka ineebe nggwok aago inom, kuda inom, nggweendo wim eeka inom, nappiige mbareegi, oonikiya nogo nogogwaarik, o kota nogome wanggeppunuk wonogwe iigak,

¹⁵aap Ala wone liirogon eeka ayeloman nogo nen o kuubondendok eenik a'nuk, wundi nage nagagerik, aap wim eeka inom, kuda inom, nggweendo wim eeka inom, abok aret o kota wanggeppunuk wonogwe enegen iige nagagerik, Elita yoge logonet, “Nogoba o. Nit abu maluk eeppinaniyak nduk eekwi me nonggop eeruwi o?”

¹⁶Yoge mbareegi, at Elita nen at yoge, “Kagabiti mbarugun o. It inom ariyak ti, mbuuluk wonogwe kwe, nit ninom ariyak perak, ineebe ambik aago wonogwe o.”

¹⁷Yoge nagagerik, Elita tamban eeke logonet, “Kaliku nogoba ALA o. At enegen kaawak nduk, enegen tobo eerogo pu o.” Yoge mbareegi, at Aliku ALA nen ayeloman nogo enegen tobo eeppereegerak paga puut paga time kuda inom, nggweendo kani kunik negen inom, at Elita wonage me, enaagan-ambokan wanggeppunuk wonogwe iyareegerak.

¹⁸Ndi, ne ti eyom paga it aap Aram mendek nogo Elita pigaawok nduk, wambi wogwe iigak, at Elita nen Aliku ALA yoge logonet, “Nogoba o. It aap Aram mendek wogwe yi, inigen ogut eerogo piyet o!” yinuk, Elita tamban eereegerak nogo ndak-ndak aret it aap nogo inigen ogut eerogo piyareegerak.

¹⁹Inigen ogut eerogo piyareegerak wonogwe iigak, at Elita nen it yorage, “Kit aap kwaakwi nogo pekka noorak tu inom, awi kota inom, yime lek kagak wogotak me, aap ti, wonage me pinagi naakit nduk, woraanip o.” Yorage nagagerik, wogoren o Tamariya aret piya wagagerak.

²⁰Piya wagagerak o kota time unggwi wogo mbareegwa, at Elita nen tamban eeke logonet, “Kaliku nogoba ALA wae. It aap yi, o yime inigen kaawak nduk, inigen paganogo piyet o.” Yoge mbareegi, at Aliku ALA nen inigen paganogo piyareegerak paga o Tamariya aret piya unggwagagerak mbareegi, iniki mondok lek ogogwaarak.

²¹Ndi, aap Iterali inowe endagembogut nogo nen it aap nogo enegen iige nagagerik, Elita yoge, “Nogoba o. It aap yi, an nen inooriyak op aret mbaken?”

²²Yoge mbareegi, at Elita nen, “Inooriyak mage o. Kat wim nambuke logonet, it aap wim eeka piginake kenok, keegin paga ilik, kawooluwak paga a, inooriyak op mbaken? Lek aret me, it nen mbi inom, niyo inom, nenok, inogoba ka nawak nduk, mbi inom, niyo inom, waganogo inowagam piyet o.”

²³Yoge mbareegi, aap Iterali inowe endagembogut nogo nen inabugo laago nggwok lappunuk, inagi-inambi abu aret nonggo mbareegwa, iname nappiige mbareegi, inogoba wonage me iniyokan nogogwaarak. Ti eereegerak paga it aap o a'nggan wagangga Aram mendek nen Iterali wonogwe me, ambinom unggwi wogo logolik o.

²⁴Ti'nuk peebi aap Aram inowe endagembogut Mben-Karat nogo nen at awuri wim eeka abok aret kuwak eeppiinok, wogoren o kota Tamariya tebenggolaawok nduk, eereegwaarak.

²⁵Eekwi tit iigak, mbi noogelo nggwok agagerak me, mbi abu nen keledai ambit anobak onggo nggwok mbuti perak 80 paga kunggwi, ndi, towe puume inaan wurik togolowak mbuuluk yonggolak ti, onggo nggwok mbuti perak 5 paga kunggwi, eeko nogogwaarak.

²⁶Ne ambi paga aap Iterali inowe endagembogut nogo, o kota yugum pak wurik irimbaga lagangge nagagerik, nege me, kwe ambi nen keek kunik ari logonet, “Nogoba kendagembogut wae. Yeenggwa niru o.”

²⁷Yoge mbareegi, aap endagembogut nogo nen onggo yoge, “At Aliku ALA nen yeenggwa kege lek kenok, an kunduk, mbi ngga nen yeenggwa kiriyak nduk yagan o? An gandum yigiko menggam wonage nen wokkege, anggur aambiranggo menggam nen toolak kenok wokkege, eeriyak op kwe, lek aret me meek o.”

²⁸Yoge nagagerik, “Wone nonggop kenok yagan o?” Yoge mbareegi, kwe nogo nen aap endagembogut nogo yoge, “Kwe yi nen an yo'nege logonet, Ko'lu an naagaluk wulaga warogo nawok nduk, yogondak kat kaagaluk wulaga warogo nawok nen wo'niru o.

²⁹ Yo'nege mbaki, an naagaluk wulaga nogo warogo lappunuk nonggo nogoorik, ti'nuk, ko'lu nen, Kat kaagaluk wulaga warogo lappunuk, nawok nduk, wo'niru o, yogirak kwe, at kwe yi, aagaluk kiraarogo pakerak kenok yokkigi o,” yinuk, yoreegerak.

³⁰Ti yoge nogo at aap endagembogut aruk konengge nagagerik, ayum nibinogo pateegerak. Ayum nibinogo patinuk, yum maluk nibinik mendek akem yippunuk yugum pak wurik paga nege nogo, it aakumi inigen kogogwaarak.

³¹Inigen kogwe iigak, at aap endagembogut nogo nen ari logonet, “Aap Tapat aput Elita anobak mbangga'lek teppege neenok, Ala nen aaninggin noba panege, nooke, eeriyak op, yogirak me, togop eeppanukwak, o yogondak enggaanok mbanogo pigin aret o.”

³²Ari nagagerik, aap ambi Elita wonage me aa'nduk nage logowak nduk nappereegerak awo nage kagak, at Elita nogo aap inoweewi inom at ame kwi'ndak wonage logonet, it yorage, “Aap inooka nogo nen an nenggaanok mbanikit nduk nappi wagaarak kineenu ilik, lek a? Aap nappi wagaarak yime wage kenok, name unggwi worookwak, kit tu nappunuk, kineenggi panggombunuk logonu o. At ogoba iyok oone agan ambokan wage ninaruk konenugun nogo lek a?”

³³At Elita nogo wone ti awo yorage me, aap nappi wagagerak nogo aa'nduk wage, ndi, aap endagembogut nogo ambokan wage, eeko nogogwaarik, aap endagembogut nen yoge logonet, “Aaninggin-paaninggin ninoba agaarak yi, at Aliku ALA nen aret eeppinanege me, at Aliku ALA nen ambi yeenggwa nirigin me nduk, tokkage logorak mbaken? Lek o,” yinuk, yoreegerak.