Read Western Dani 1 Mbinineegwaarak 10 Bible Online

1 Mbinineegwaarak 10 - Western Dani bible

1 Mbinineegwaarak 10

¹Ne ambi eyom paga aap Pilitin mendek nen puut Nggilobowa time aap Iterali mendek inom wim nambuko logonet, apit aret inookwi iigak, it Iterali mendek eegu nogo mbaganit wogogwaarak.

²Mbaganit wogwe me, it Pilitin mendek nen Tawun apuri inom muguren-magaren eerit wogo logonet, Tawun apuri Yonatan inom, Abinarap inom, Malikituwa inom, inoorogo piyareegwaarak.

³Inooko mbareegwa, at Tawun awuri inom wim namburiyak abu aaninggin ambik aret aganabeegerak wonogwe iigak, at Tawun nogo mugurok maale paga eenik wim wareegwaarak.

⁴Wako mbareegwa, at Tawun nen aap at eegin wonok nega nogo, yoge logonet, “It aakumi inagabolo mbana'lek Pilitin mendek yi nen wogo logomenggaarik, meek eerogo paninuk nagabolo andi-pandi eerogo nookwi iyo, kat kawooluwak waganogo ndanuk togon noori mok o!” Yoreegerak kwe, at aap at eegin wonok nega nogo agabiti nen wariyak eebi mbake mbareegi, at Tawun alik nen awooluwak yindumbunuk, at paga ndanunggola wangge nagagerik, kambeegerak.

⁵Ndi, aap Tawun eegin wonok nega nogo, Tawun kambeegerak enegen kage nagagerik, at kunduk awooluwak paga togop mban ndanunggola wangge nagagerik, kambeegerak.

⁶At Tawun inom, apuri kenagan inom, ambugwi ne ambit ti eyom paga kambeegwaarak me, at paga wiganak mendek obaane'me mi'nariyak ambi lek aret agagerak.

⁷Ndi, it aakumi Iterali mendek o kobappaga wonogogwaarak nogo nen at Tawun apuri inom kanggwi, ndi, it Iterali ineegin warak abok aret mbaganit nogwe, eekwi iigo nogogwaarik, inawi kota-kota mbo punuk mbaganggwi iigak, it aap Pilitin mendek nogo, o nogome aret tebenggola unggwi woraanuk, time aret wonogogwaarak.

⁸Ndi, ko'lu it Pilitin mendek nen puut Nggilobowa time it Iterali mendek inoorak inamendek kolaawok nduk, wogo nogogwaarik, at Tawun inom, apuri inom, inoorak wonogwe iyareegwaarak.

⁹Iigo nogogwaarik, at Tawun amindik-amendek waganggwi, anobak mbanogo waganggwi, eegin-ombambile waganggwi, eeko nogogwaarik, Tawun apuri inom kambeegwaarak wone it aap Pilitin mendek wonogwe me yorogwe, ndi, inagugi eeko menggam nogome yorogwe, eeko logowak nduk, o lombok yonggo nappiinet nogogwaarak.

¹⁰Ndi, Tawun eegin-ombambile inom wonok it inagugi awi wurik me time pugwi, ndi, at Tawun anobak nogo inagugi Ndagon awi wurik me tugunogo pugwi, eereegwaarak.

¹¹It Pilitin mendek nen Tawun eerogo pereegwaarak nogo, it aap o Yabeti-Nggileyat mendek nogo, konenggo nogogwaarik,

¹²it aap wakaa'ngget pekkagak kero mban ko waka'lek oonikiya ti paga nok-nok, o Mbet-Teyan unggwi wogo nogogwaarik, at Tawun apuri inom ineebe nogo wogonako nogogwaarik, kani kumbiinok, inowak nogo waganogo o Yabeti eyo kole alome time nggween kabunogo taambiinok, mbi nengga'lek inambe mage negen wonogwe iigak, nogo 7 aret yereegwaarak.

¹³ Aap Tawun nogo at Aliku ALA liirogon mugurok nage logolik paga kambeegerak. At Aliku ALA wone yugu nogo liirogon eerit nage, ambi age kenok, Aliku ALA nen yoruwak nduk, yoge, eeke logolik o. Ata, aap kambeegwaarak inogoma nen, “Ndogop eeke logot o,” yoruwak nduk, inowagam nage nagagerak me, Aliku ALA nen warogo punuk, at abu'me piige menggim nogo, at Itayi aput Ndawut unde logowak nduk, mippereegerak.