Read Western Dani 1 Mbinineegwaarak 11 Bible Online

1 Mbinineegwaarak 11 - Western Dani bible

1 Mbinineegwaarak 11

¹It Iterali inanebunu lombok abok aret at Ndawut o Keboron wonage me ka wogo nogogwaarik, at yogo logonet, “Nit yi, kat kamiya mogonik aret me, keya wogo o.

²O maan aa'nduk nen at Tawun nogo ninowe endagembogut logonet, wone lengganogo yo'nirage kagak, wim namburiyak nduk, wundi nage kenok, it Iterali ineegin warak nogo kat nen aret wogoren wundi nagak eeke keegak, at Aliku kogoba Ala nen kat yokkege logonet, Kat an napuri Iterali nogo ndomba ndegeninako mengga kwak, ndegeninake, inowe kendagembogut logonet, wone lengganogo yorage, eeke logomunggun o, yinuk, yokkereegerak nogo o,” yoreegwaarak.

³It Iterali inoweewi abok aret aap endagembogut Ndawut o Keboron wonage me wone ti, yogo mbareegwa, at Ndawut nen o Keboron time Aliku ALA enggaanom paga it inom wone amburu nggaruk togon mbambunuk, Aliku ALA nen Tamuwen yoge kagak yoragagerak ndak-ndak, it Iterali abok aret inowe endagembogut logowak nduk, at Ndawut amburu eerogo mippereegwaarak.

⁴ At Ndawut it Iterali mendek abok aret inom o Yerutalem endage ambi, Yebut, nogome wogo mbareegwa, it aakumi Yebut mendek o Yerutalem wonogogwaarak nogo nen

⁵at Ndawut yogwi, “Kat nen nit wonogwe me yime unggwi woroorak meek aret kombako o,” yoreegwaarak kwe, at Ndawut nen yugum pak wureegim o Tiyon at Ndawut agota nogome obaga kwi'nari unggwage nagagerik, tebenggolagagerak.

⁶At Ndawut nen ari logonet, “Aap ta nen it aakumi o Yebut mendek nogo, tebenogo piyaawak nduk, awuri wogoren nanuk, tebenogo piige kenok, at inowe wim wone mbangga aret arigin o,” yinuk, yoragagerak me, kwe Teruya aagaluk Yowap nen aret aa'nduk a'nuk, o tebenogo piige mbareegi, at aret inowe wim wone mbangga aret agagerak.

⁷Tebenogo piinok, at Ndawut nogo o kota yugum pak wurogo pereegim nogome ye mbanggolage nagagerik, wonagagerak me, aakumi nen o ti endage, “Ndawut agota aret o,” yinuk, yogo nogogwaarak.

⁸Ndi, at Ndawut o kota pak wurik endekem nggwe nggween tap mbanogo pit laganeegwam kuli nen nok, yendok-wandok abok aret omaawi eerogo pit lagangge kagak, at aap Yowap nen o kota eegu maluk eerogo pereegwaarak nogo wurogo pit nagagerak.

⁹Ndi, at Ndawut nogo, at Omaawi Lombok Menggerak Aliku ALA imbirak aret wonagagerak me, logonet-logonet omaawi arit wundi wage nagagerak.

¹⁰At Ndawut awuri wim eeka wakaa'ngget inoweewi lombok aakumi Iterali mendek inom nen Aliku ALA kooneegerak ndak-ndak, at Ndawut endagembogut logonet, wone lengganogo yorage menggim o time endak wa'narit nawak nduk, Ndawut yeenggwaago nogogwaarak.

¹¹At Ndawut awuri it aap wim eeka wakaa'ngget lombok nogo yi aret. It aap wim wakaa'ngget ineebe kenagan nogo, ambi endage abu tiyanak ti, at Kakomoni aput Yatobam aret. Wim eeko logonet, awooluwak paga ne ambit aap ineebe tiga ratus aret inoorogo piyareegerak.

¹²Ndi, at abu'me negen Ndawut awuri wakaa'ngget lombok ineebe kenagan nogo ambi ti, aap Akoki mendek Ndoro aput Eleyatat nogo aret o.

¹³Wim o Pat-Ndamim waabuk negen jelai yarak me time it aap Pilitin mendek Ndawut awuri inom wim perenggolaawok nduk, kuwak eeko mbareegwa, wim nambuko logonet, it Pilitin mendek inayuk nen mbaganggwi iigak, at Ndawut Eleyatat imbirak mban waabuk negen jelai lambuk aago laganeegim enggela'me time kowappunuk, it Pilitin inom wim nambukwi iigak, Aliku ALA nen ineegin tiyappiyareegerak.

¹⁴

¹⁵Ne ambi paga aakumi Pilitin mendek aago o Erepayim Kobappaga inawooliya wuppunuk wonogwe iigak, aap inoweewi 30 mendek ineebe kenagan abu wakaa'ngget nogo, at Ndawut ndoome Arulam wonage me ka nogogwaarak.

¹⁶Ka nogo mbareegwa, at Ndawut inom yugum pak wurogo pereegim time wonogwe, ndi, it aap Pilitin mendek wim nambuka ando o Mbe'lekem wonogwe, eekwi iigak,

¹⁷at Ndawut nogo niyo abu nen ari logonet, “O Mbe'lekem tu unggwogo menggam niyo nggween kabunik nogo, aap ambi nen too'nuk, wo'niri wage kenok, naakit lak, ao,” yinuk, ari nogo

¹⁸it aap wakaa'ngget 30 mendek ineebe kenagan nogo, konenggo nogogwaarik, it aap Pilitin mendek inawooliya wuppunuk wonogwe nogo, iigak-iigak o Mbe'lekem tu unggwogo menggam niyo nggween kabunik me nogome niyo toologo waganggo nogogwaarik, wonok Ndawut wogori wogogwaarak kwe, at nen ari logonet, “Nawuri nen, At ake ninamiya wundiyak op aret, mba'nuk, niyo yi, tooli nagaarak me, niyo toolak yi ti, inamiya kwak iya lombok me, an noorak lek o. Ata, Kaliku ALA kake o,” yinuk, at noolik nggween paga kilirogo pereegerak. It aap wim wakaa'ngget 30 mendek inoweewi ineebe kenagan nen eeko nogogwaarak nogo ti, togop aret eeko nogogwaarak o.

¹⁹

²⁰It aap wakaa'ngget ineebe kenagan ti, at Yowap awuluk Abitayi nogo, it mbere ti inowe aret me, ne ambi paga awooluwak nutik unggwage logonet, aap ineebe tiga ratus inooreegerak kambeegwaarak ti paga it aap wakaa'ngget ineebe kenagan aa'nduk nogo inendage nggwok agagerak ti kokwak, at togon togop aret endage nggwok agagerak.

²¹Ndi, it aap wakaa'ngget ineebe kenagan nogo ti, inayuk wuko logonet kwe, at Abitayi perak, abunuk, nggwok togon ayuk wuko nogogwaarak. Aap Abitayi nogo ti, aap wakaa'ngget ineebe kenagan nogo mendek lek kwe, inowe negen a'nuk, wone lengganinake nagagerak.

²²Ti'nuk, at Yoyara aput Mbenaya awi Kabeten ti, aap wim wakaa'ngget lombok mondok iya eerit nage nagagerak. Eerit nage logonet, aap Mowap mendek wim wakaa'ngget lombok ineebe mbere inoorogo piige, ne ambi ndugu-ndugu nggalo-nggalo wangge logonet, o apit eerogo pereegerak kagak, at mbuun ambena wangge nagagerik, singa warogo pege,

²³aap ambi Metit mendek eebe kole anggup nggorek metet mbere eeppunuk, ambi oolo wakkogwe kwak, eerak wonage kagak, at Mbenaya nogo eyo obate mbanak eenggime wonage logonet, aap Metit mendek at awooluwak mondok nggwok muundu kwak eenggi porogo wonage nogo, ndinogo wagangge nagagerik, ti paga eebe warogo pege, eereegerak.

²⁴Ti eerit nagagerak nogo paga aap Yoyara aput Mbenaya nogo, it aap wim wakaa'ngget ineebe kenagan inendage nggwok agagerak nogo ndak-ndak at endage nggwok aret agagerak.

²⁵Ndi, it aap ineebe 30 nogo inayuk wuko logonet, at abunuk nggwok togon ayuk wuko nogogwaarak kwe, it aap ineebe kenagan nogo perak, aap wim wakaa'ngget lombok me, at it inom ndak-ndak lek aret wonagagerak. At Mbenaya nogo Ndawut eebe arum menggaarak inowe logowak nduk, at Ndawut nen mippereegerak.

²⁶It aap wim wakaa'ngget lombok wonogogwaarak nogo inendage ti, Yowap awuluk Atayen inom, Aap Ndoro awi Mbe'lekem mendek aput Elakanan inom,

²⁷Aap Karot mendek Tamot inom, Aap Peloni mendek Kelet inom,

²⁸Aap Tekowa mendek Iketi aput Ira inom, Aap Anatot mendek Abiyetet inom,

²⁹Aap Kuta mendek Tibakayi inom, Aap Akoki mendek Ilayi inom,

³⁰Aap Netopa mendek Makarayi inom, Aap Netopa mendek Mbaana aput Kelet inom,

³¹Aap awi Nggibeya anebunu Mbeniyamin mendek Iribayi aput Itayi inom, Aap Piraton mendek Mbenaya inom,

³²Aap o Nggaat aluk-aluk mendek Kirayi inom, Aap Mbet-Araba mendek Abiyen inom,

³³Aap Mbakurim mendek Atamawet inom, Aap Taalobon mendek Eliyaba inom,

³⁴Aap Nggiton mendek Katiyem apuri inom, Aap Karari mendek Tage aput Yonatan inom,

³⁵Aap Karari mendek Takat aput Akiyam inom, Aap Ut aput Elipan inom,

³⁶Aap Mekerati mendek Kepet inom, Aap Peloni mendek Akiya inom,

³⁷Aap Karemen mendek Keroro inom, Aap Etabayi aput Naarayi inom,

³⁸Aap Natan awuluk Yowen inom, Aap Kagari aput Mibakat inom,

³⁹Aap Amon mendek Telek inom, Aap Mbeerot mendek kwe Teruya aagaluk Yowap eegin-ombambile wonok nega Nakarayi inom,

⁴⁰Aap Yetiri mendek Ira inom, Aap Yetiri mendek Nggarep inom,

⁴¹Aap Ket mendek Uriya inom, Aap Akalayi aput Tabat inom,

⁴²Aap Uruben mendek eege, awuri ineebe 30 inom nega eege, inowe endage warak aap Tita aput Arina inom,

⁴³Aap Maaka aput Kanan inom, Aap Mitini mendek Yotapat inom,

⁴⁴Aap Atitarok mendek Utiya inom, Aap Arowet mendek Kotam apuri Tiyama Yeyiyen imbirak inom,

⁴⁵Aap Timiri aput Yeriyayen inom, Aap Titi mendek Yeriyayen ore Yoka inom,

⁴⁶Aap Makawim mendek Eliyen inom, At Elanaam apuri Yeribayi Yotawiya imbirak inom, Aap Mowap mendek Yitama inom,

⁴⁷Aap Eliyen inom, Obet inom, Metobaya mendek Yaatiyen inom, nogo aret o.