Read Western Dani 1 Mbinineegwaarak 13 Bible Online

1 Mbinineegwaarak 13 - Western Dani bible

1 Mbinineegwaarak 13

¹At Ndawut nen at inom eeka ineegin warak ineebe seribu lombok eerak inoweewi inom, ineebe seratus lombok eerak inoweewi inom, wone koonogo pogo nogogwaarik,

²it aakumi Iterali mendek abok aret yorage logonet, “At Aliku ninogoba Ala nen, Op aret eeriyak, mbake, ndi, kit kunduk, Op aret eeriyak, mbakwi, eekwi kiinok, nit ninoreewi o Iterali yi awi ndi awi paga eegu wonogwe nogo inom, ndi, it aap Ala unde eege, it Lewi mendek eege, it inom inawi kota-kota wonogwe, inaanggumi inagari'ngga mbanogo nenet nogo menggam wonogwe, eekwi nogo inom, niya woraawak nduk, yonggo nappiyamonggoorak kuwak ari wogwe iinok,

³at Tawun ninowe endagembogut logonet wone lengganogo yo'nirage kagak, Ala aloobut mbanak nit mbo pereegurak nogo, it ninom wa nawok o,” yinuk, yoragagerak.

⁴Yorage mbareegi, it aakumi kuwak aago nogo abok aret nen yogo logonet, “Wone ti, op aret yo'niragandak me, ndak-ndak aret eeruwok o,” yinuk, yereegwaarak.

⁵ Yogo mbareegwa, Ala aloobut mbanak o Kiriyat-Yeyarim wonage nogo, wonok woraawak nduk, aakumi Iterali mendek o Metit niyo Tikot kuli nen nok, aakumi o Kamat nogo menggam kuli wonogwe nogo abok aret kuwak eeginabeegerak.

⁶ Kuwak eeppiinok, at malayikat kwak kerub irip aru-ogwe kagak oolo irimbaga Aliku ALA wonage kagak, aloobut mbanak it aakumi nen, “Ala aloobut mbanak o,” yinuk, endage kunogo yogo nogogwaarak nogo, wonok woraawak nduk, at Ndawut nogo aakumi abok aret inom o Yekura time kota Mbaala endage ambi Kiriyat-Yeyarim nogome nogogwaarak.

⁷Nogo nogogwaarik, Ala aloobut mbanak nogo, aap Abinarap ame wonage me waganggo nogogwaarik, nggweendo awo ngget ogobakkigirik ti paga punuk, tapi nen nikkenok wonok wage kagak, aap Uta, Akoyo, imbirak ena koonit wogwe iigak,

⁸at Ndawut aakumi Iterali mendek abok aret inom inale'nggen alik negen inikime nggelok ari logonet, at Aliku ALA enggaanom paga nggitat mbuuluk mendek inom, nggitat nggwok mendek inom, togolowak oone lobale inom, togolowak tabak pu ndale eeka inom, oone nggwok eeka trompet inom, abok aret oone eerit kwirabik-kwirabok agan ndawi warit wogogwaarak.

⁹Togop eerit aap Kiron gandum agabolo mbelangge menggim nogome ari wogo nogogwaarik, tapi Ala aloobut mbanak wonok wogwe nogo, iniyogobit lik togon a'nggan nggininogo wuppuwak nduk eeko mbareegwa, at Uta nogo nen Ala aloobut mbanak nogo eenggi pigaganeegerak.

¹⁰Pigagangge mbareegi, Aliku ALA anini mi'nage logonet, Uta nen pigaganeegerak paga Ala nen wareegerak me, enggaanom taati aret kambeegerak.

¹¹Kangge mbareegi, Ala nen aap Uta wareegerak ti paga, Ndawut anini agagerak kenok, o ti endage, “Anini Uta Oba Pereegim o,” yinuk, yogo nogogwaarak me, o yogondak yogwe wonogwe aret o.

¹²Ndi, wareegerak kambeegerak ti paga at Ndawut nogo Aliku ALA agabiti nen ari logonet, “At Aliku ALA aloobut mbanak yi, nonggop togon wonok name pi na o?”

¹³Ari nagagerik, Ala aloobut mbanak ti, o at agota time wonok pi woroolik. Ata, aap Nggat mendek endage Obet-Erom ame time pereegerak.

¹⁴ Pereegerak at Obet-Erom ame time wonage kagak, tut kenagan peneneegerak paga at eebe inom, akwe-apuri inom, abok aret Aliku ALA ale'nggen inoba piige nagagerak.