Read Western Dani 1 Mbinineegwaarak 14 Bible Online

1 Mbinineegwaarak 14 - Western Dani bible

1 Mbinineegwaarak 14

¹At aap o Tirut mendek inowe endagembogut Kiram nen aap at awuri at Ndawut wonage me nappiya wage logonet, eyo nggabina mbanak inom, aap o yugum paga wuka inom, aap eyo paga o wuka inom, at Ndawut awi o nggwok abe wuruwak nduk nappiya wagagerak.

²Nappiya wagagerak wuko mbareegwa, at Ndawut nen, “Aliku ALA nen it Iterali mendek inowe nendagembogut a'nuk, wone lengganogo yorage logokit nduk, an aret mippanege, ndi, at apuri wonogwe iinok, nabu'me piinok, minggim mondok tiyanak kaawak nduk, eerogo pege, eekerak kagi,” yinuk, at Ndawut eenu agagerak.

³At Ndawut nogo o Yerutalem wonage logonet, akuwi ineebe mande negen wogonake nagagerik, apuri aap inom, komologwe inom, ambik aret ndaganabeegerak.

⁴At o Yerutalem logonet, apuri ndaganabeegerak inendage ti, Tiyamuwa, Tobap, Natan, Talomo,

⁵Yibakat, Elituwa, Elipelet,

⁶Noga, Nepek, Yapiya,

⁷Elitama, Mbeeliyara, Elipetet aret.

⁸It aap Pilitin mendek nen, “At Ndawut it Iterali abok aret inowe endagembogut logowak nduk, amburu eerogo mippegaarak o,” yogwe nogo, inaruk konenggo nogogwaarik, Ndawut eebe pigaawok nduk, ineebe apit kombogonak wogogwaarak at Ndawut nogo aruk konengge nagagerik, inom perenggolaawak nduk, wundi nagagerak.

⁹It aap Pilitin mendek nogo o Erepayim Kobappaga time a'nggan waganogo piinok mbaganggo mbareegwa,

¹⁰at Ndawut nogo nen Ala yoge logonet, “An aap Pilitin mendek ninom wim perenggola na ilik? Ndi, perenggola nage neenok, kat nen neenggi paga panumunggun ilik, lek a?” Yoge mbareegi, Aliku ALA nen at yoge logonet, “An nen aret it Pilitin mendek ti, waganogo keenggime pagagin me, kinom perenggola nak o.”

¹¹Yoge mbareegi, at Ndawut nogo awuri inom o endage Mba'an-Peratim nage nagagerik, it aap Pilitin nogo aret tebenogo piinok, ari logonet, “Niyo wu'nuk nage menggi kwak, at Ala pilak ari logonet, eeppanege kagak, nawim tebenogo piinet nagarak o,” yereegerak kenok, o endage, Mba'an-Peratim, aret toonogo pereegwaarak.

¹²Ndi, it aap Pilitin mendek inagugiwak taati mbo punuk, mbaganit nogogwaarak me, at Ndawut nen kabulogo kani kunuwak nduk, awuri yoragagerak.

¹³Ti'nuk, it aap Pilitin mendek nogo, logonuk lek aret o Erepayim Kobappaga time a'nggan waganogo piinok, mbaganggo mbareegwa,

¹⁴at Ndawut nen Ala kin wokkage mbareegi, Ala nen wone onggo yoge logonet, “Kat nen it aakumi wonogwe enaame nggwe nagun o. Ata, inambo'me eyo tin logonak me time ari nanuk, inoba kwi'nari wundi woraanok nduk, enaa'nari nak o.

¹⁵Time namenggendak wonage me, eyo tin era'nggup me, aakumi iniyok oone negen yogwe karuk konengge logomenggendik, Ala aa'nduk a'nuk, ninawim Pilitin mendek ineegin warak muk inoori nage kagi, mba'nuk, kawuri kinom pilak yogo logonet, mbet-mbet aret inoba kwi'nari wundi woraamunggup o.”

¹⁶Yoge mbareegi, at Ala nen Ndawut yoreegerak nogo ndak-ndak aret eeke logonet, it aap wim eeka Pilitin mendek nogo, inoorit o Nggibeyon nen nok, o Nggetet kuli piya nagagerak.

¹⁷Ti eerit nagagerak paga at Ndawut endage yi o ndi o abok aret wiganinuk nage mbareegi, Aliku ALA nen it yi aakumi ndi aakumi abok aret Ndawut eebe paga inagabiti mbako logonet, ayuk wuruwak nduk, eeppiyareegerak.