Read Western Dani 1 Mbinineegwaarak 15 Bible Online

1 Mbinineegwaarak 15 - Western Dani bible

1 Mbinineegwaarak 15

¹At Ndawut nen at agota time o ambik wurogo patit nage nagagerik, Ala aloobut mbanak puurak ake pipuk eerogo punuk, ti logorak ake nen ooliya wurogo pereegerak.

² Wurogo punuk, at Ndawut nen ari logonet, “Ala aloobut mbanak ti, at Aliku ALA nen it Lewi mendek nen mban piyanggo logowak nduk leenogo piige, ndi, it nen mban mondok-mondok ake eeko logowak nduk, leenogo piige, eereegerak me, aap alik ambi nen Ala aloobut mbanak nogo piyaninuk nagak yuurak mage o. Ata, it Lewi mendek nen mban piyaninuk nagak eeko logowak o,” yinuk, yoragagerak.

³Aliku ALA aloobut mbanak wonok o puurak ake pipuk eerogo pereegim nogome pi woraawak nduk, at Ndawut nen it aakumi Iterali mendek abok aret o Yerutalem kuwak eerogo piyareegerak.

⁴Kuwak eeppiige nagagerik, it aap Karun paga wiganak mendek inom, aap Lewi mendek inom, nogo kunduk kuwak eerogo piyareegerak. Kuwak eerogo piyareegerak ti,

⁵Aap Kekat paga wiganak ineebe seratus dua puluh inowe Uriyen inom kuwak eerogo piige,

⁶Aap Merari paga wiganak ineebe dua ratus dua puluh inowe Ataya inom kuwak eerogo piige,

⁷Aap Nggeroton paga wiganak ineebe seratus tiga puluh inowe Yowen inom kuwak eerogo piige,

⁸Aap Elatapan paga wiganak ineebe dua ratus inowe Temaya inom kuwak eerogo piige,

⁹Aap Keboron paga wiganak ineebe 80 inowe Eliyen inom kuwak eerogo piige,

¹⁰Aap Utiyen paga wiganak ineebe seratus dua belas inowe Aminarap inom kuwak eerogo piige, eereegerak.

¹¹Eeke nagagerik, at Ndawut nen it aap Ala unde Tarok Abiyatat imbirak inom, it Lewi mendek aap Uriyen, Ataya, Yowen, Temaya, Eliyen, Aminarap, nogo inom, wiiragagerak wogo mbareegwa,

¹²it yorage logonet, “It Lewi mendek ndarak ndegek inoweewi kit aret me, kit inom, kinoreewi Lewi mendek ando inom, nen Aliku Iterali inogoba Ala aloobut mbanak puurak wurogo pereegim nogome pi woraamunggup nduk, kinabin koorogo pako logonip o.

¹³Aa'nduk lombok Ala aloobut mbanak wonok woraawok nduk, eekwi niigak, kit aap Lewi mendek nen piyaninuk woroolik me, Aliku ninogoba Ala nen anini ninoba kwippinaneegerak nogo o. Nonggop eerogo wonok woroorak koonak nogo, nggino yorulik me, anini ninoba kwippinaneegerak o,” yinuk, yoragagerak.

¹⁴Yorage mbareegi, it Iterali inogoba Aliku Ala aloobut mbanak wonok woraawak nduk, it aap Ala unde inom, it Lewi mendek inom, inabin koorogo pateegwaarak.

¹⁵ Inabin koorogo patinuk, at Aliku ALA nen Muta yoge mbareegi, yoragagerak ndak-ndak, it Lewi mendek nen Ala aloobut mbanak ti, eyo eewu'nuk nega nonggonogo nappunuk, inuum paga piyaninuk, woraawak nduk, eereegwaarak.

¹⁶Eeko logonet, it aap Lewi mendek inoweewi nen it inoreewi ndawi piyangga nen ndawi inale'nggen ariyak mendek tiyanggo logonet, nggitat inom, nggitat nggwok inom, togolowak tabak oone pu ndale eeka inom, eeko logorak mippiyaawak nduk, Ndawut nen yoragagerak.

¹⁷Yorage mbareegi, it Lewi mendek nen at Yowen aput Keman inom, at oreeluk ambi Mberekiya aput Atap inom, it inore at Merari paga wiganak aap Kutaya aput Etan inom, mippiigwi,

¹⁸ndi, it inabu'me logonet, inom eeko logorak inoreewi inendage Takariya inom, Yaatiyen inom, Temiramot inom, Yekiyen inom, Uni inom, Eliyap inom, Mbenaya inom, Maateya inom, Matika inom, Elipele inom, Mikeneya inom, ndi, tu unggwogo menggam arum waka Obet-Erom Yeyiyen imbirak inom, mippiigwi, eereegwaarak.

¹⁹It ndawi piyangga Keman kunduk, Atap kunduk, Etan kunduk, it nen togolowak tabak oone pu ndale eekak mbuti tembaga paga eerak nogo oone eekwi,

²⁰ndi, it Takariya togon, Atiyen togon, Temiramot togon, Yekiyen togon, Uni togon, Eliyap togon, Maateya togon, Mbenaya togon, ti nggitat oone nggwok eeka nogo oone mondok tiyak togon eekwi,

²¹it Matika inom, Elipele inom, Mikeneya inom, Obet-Erom inom, Yeyiyen inom, Atatiya inom, nggitat oone mbuuluk teberogon eekwi,

²²It Lewi mendek inowe Kenaniya nogo, ndawi tiyangga at obam aret me, ndawi tiyanggwi unde wonage, eeko logowak nduk, mippiyareegwaarak.

²³It Mberekiya inom, Elakana inom, Ala aloobut mbanak tu pekka unggwogo menggam arum wakwi,

²⁴it aap Ala unde Tebaniya inom, Yotapat inom, Netanen inom, Amatayi inom, Takariya inom, Mbenaya inom, Eliyetet inom, nen Ala aloobut mbanak enaame time oone nggwok eeka trompet nogo oone pu eekwi, it Obet-Erom Yekiya imbirak kunduk, Ala aloobut mbanak tu pekka unggwogo menggam arum wakwi, eeko logowak nduk, leenogo piyareegwaarak.

²⁵Leenogo piinok, at Ndawut inom, it Iterali inoweewi inom, it aap ineegin warak ineebe seribu lombok aago inoweewi inom, Aliku ALA aloobut mbanak me wone yugu yonggolak nogo, aap Obet-Erom ame nen inale'nggen paga wonok woraawok nduk, nogogwaarak.

²⁶Nanuk, it aap Lewi mendek ti nen Aliku ALA aloobut mbanak me wone yugu yonggolak nogo, wonok wogwe iigak, at Ala nen yeenggwaaragagerak me, lembu ngguunok ineebe 7 inom, ndomba ngguunok ineebe 7 inom, Ala ake warogo wogoreegwaarak.

²⁷At Ndawut nogo, yum nok nggorek yawenak abe mendek yike, ndi, it aap Lewi mendek Ala aloobut mbanak wonok wogwe inom, it ndawi piyangga inom, it ndawi tiyangga inowe Kenaniya inom, abok aret togop mban yikkologwe, eereegwaarak. At Ndawut nen ayum yawenak agale warak epod nogo inom yikkolagagerak.

²⁸It aap Iterali mendek Aliku ALA aloobut mbanak me wone yugu yonggolak nogo, piyaninuk wogo logonet, inale'nggen nen keekok piyanggogwe, oone nggwok eeka trompet nogo oone pu eekwi, ndomba eyak paga oone eekwi, nggitat nggwok inom, mbuuluk inom, eekwi, togolowak tabak paga oone pu ndale eekwi, eerit wonok o Yerutalem wogogwaarak.

²⁹Aliku ALA aloobut mbanak me wone yugu yonggolak nogo wonok, at Ndawut agota paga pi wogwe iigak, at Tawun apuluk kolaga Mikan nogo, pugagi mbanak me nen ena wunggage nagagerik, at aap endagembogut Ndawut nogo, ndawi lubuk ari, ale'nggen nen ku'mbonggak wage, eeke nogo, kage nagagerik, “Aap yi, agan wage abu neebi a,” yinuk, mbareegerak.