Read Western Dani 1 Mbinineegwaarak 17 Bible Online

1 Mbinineegwaarak 17 - Western Dani bible

1 Mbinineegwaarak 17

¹At aap endagembogut Ndawut nogo, at awi o nggwok abe wuppunuk, ale'nggen paga wonage logonet, aap Ala yoge kagak yoraga Natan nogo yoge, “An nawi o nggwok abe wurik yi, eyo abe nggabina paga abu obeelom wuppanegaarak wonage neegak kwe, Aliku ALA aloobut mbanak kenok we ooliya wurik me wonage ti ket o.”

²Yoge mbareegi, at Natan nen aap Ndawut nogo yoge logonet, “At Ala kimbirak wonage me, kat kiniki nen eeriyak koonogo pegendak nogo aret eeke logot o,” yoreegerak.

³Yoge mbareegi, oonikiya ti eyom paga at Ala nen Natan owagam wage nagagerik, yoge logonet,

⁴“At Aliku ALA nen wone, Ndogop yegerak o, yinuk, nayeloman Ndawut yori nanok nduk, yokkiri o. O maan it aakumi Iterali o Metit nen wogoret wundi wagagirak kuli nok, yogondak yi kuli paga, an o abe wurik me wonageelik inawooliya wuppunuk wonogwe iinok, an time wonage, mininuk, nanuk wukwi iinok, an time ari nage, eerit nage minggirak nogo o. Iterali abok aret ninom yagak-ndagak nugu logonet, it ndomba ndegeninako mengga kwak an napuri Iterali ndegeninako logowak nduk, yoragagirak inoweewi inarum wonogwe nogo, ambiriluk ambi yoge logonet, Nonggop nduk an nawi eyo abe nggabina paga wuppanega'lek agandik, yoreegirak ya? Lek aret me, at nen aret wurogo paniyak ari agaarik? Lek aret mbaki o.

⁷Togop aret me, At Omaawi Lombok Menggerak Aliku ALA nen, Ndogop yegerak o, yinuk, nayeloman Ndawut yorenok nduk, yokkiri o. At o karume kambin-ndomba ndegeninabit nege me, an nen wagangge nagagirik, napuri aakumi Iterali inowe endagembogut logonet, inarum logowak nduk, eerogo pereegirak o.

⁸Pege nagagirik, at nggeeme noorak iniki koombunuk nage kenok, an nimbirak aret nage, an naa'nduk a'nuk awim mendek inoorogo piige, eeke nagagirik, yogondak it aakumi nggween paga inendage warak lombok mengga kwak, at endage warak lombok togop aret eerogo pigin o.

⁹It an napuri Iterali aa'nduk tebembiinok wonogwe, ti'nuk, Iterali inowak loonggo logowak nduk, inoweewi mippiige nagagirak kuli nen nok, yogondak kuli, it aap maluk mendek nen tebenogo piigwi, eeko nogogwa kwak ambinom eeppiigo logokwak, inawim abok aret tebenogo piinok, o abolok lek obeelom aret wonage kagak, iname lombok logonet, inagabolo nirik-kirik yaga'lek iniki ugun tayenak logowak nduk, an napuri Iterali inanggween wogorage logominggirik, time kwippiyaminggirak wonogwe iigak, Naliku an ALA nen aret inapuri-inombowologwe ambik wiganogo piyaagin o.

¹¹Ndi, at perak, nda'nagagerak eyom abu aret panggoni wage kenok, ombomini kambunuk nogogwam nggwogoba wonogwe me, inom ari nage kagak, an nen at lombok apuluk ndaremenggerak nogo, obaane'me mippege logominggirik, apuluk abu'me piige logowam mondok-mondok logowak nduk, eeppigin o.

¹²At nen aret an nawi wurogo panigin o. Ndi, at paga wigannarigin nogo nen mban mondok-mondok wone lengganogo yorage logowak nduk, eeppege logogin o.

¹³ An ti, at ogoba aret age, ndi, at ti, an naput aret age, eerugun o. At endagembogut awo aga'lek kagak, aa'nduk endagembogut wonagagerak Tawun nogo, abuwa nen obeelom eeppege nagagirik, ti'nuk, mbo pereegirak nogo kwak, at abuwa nen obeelom eeppege nogo ti, lek arigin lek mondok-mondok eeppege logogin o.

¹⁴An napuri wigannarit nogwe, it an nabu'me piinok wonogwe, eekwi nogo ti, mondok-mondok unde logowak nduk, eeppigin me, at wone lengganogo yorage menggim nogo lek arigin lek mondok-mondok aret logogin o, yinuk, at Aliku ALA nen aret yegerak, yori nanu o,” yinuk, yoreegerak.

¹⁵Yoge mbareegi, at Natan nogo Aliku ALA nen kin paga yoreegerak nogo ndak-ndak aret Ndawut mbininogo yori nagagerak.

¹⁶Mbininogo yori nage mbareegi, aap endagembogut Ndawut nogo Ala awooliya wurik me unggwage nagagerik, Aliku ALA enggaanom paga kwi'na'nuk tamban eeke logonet, “Kaliku nogoba Ala wae. An inom, nowe-nawot inom, nit nen eeriyak abu meek lombok niigak, an mii'nake nagagindik, kapuri inarum logokit nduk, mippaneegindak o.

¹⁷Ti eeppanege nagagindik, Abu aret eekirak, kagi, yinuk, puk ariyak kwe, an kayeloman napuri-nombowologwe eeppiyoorak inom yo'negendak kenok, nogoba Ala kat yi, ia! An aap aret kwe, Kaliku Ala nen,yi aap ndi aap iigak, At yi, iya o, yinuk, eeppanege keegi o.

¹⁸Kaliku ALA wae. An kayeloman yi, neebe inom, eeke minggirak inom, abu neege menggendak kwe kagak, mondok obeelom eerogo tiyappanege menggendak me, an nonggop yokkiri o?

¹⁹Kat mondok iya negen eeppanege logonet, Ndogop eeppagarak o, yinuk, wone mondok iya lombok yo'niruwak nduk yogendak yo'niri wagaarak yi, An kayeloman wone yo'negendak nogo a'me nggelok ari, ndi, kat eeriyak kiniki mbake nogo ndak-ndak age, eeruwak nduk, wone eerogo nappani wagandak o.

²⁰Kaliku nogoba ALA o. Nit lombok nen ninaruk konenggo monggoorak ndak-ndak, kat pogom ambi wonage lek Ala kalik aret menggendak o.

²¹Kat Ala nen it aakumi Iterali inagap ndarogo kat kapuri lombok aruwak nduk, o Metit tebenak wonogwe me, wondet eerogo piige, kendage tiyak yuwak nduk eeke, ndi, kat kaa'nduk a'nuk, mondok iya lombok tam warak negen eeke logonet inawim mugogo wumbiige, eereegindak me, o nggween paga yime abok aret it kapuri Iterali pogom ambi wonogwe lek aret o.

²²It aakumi Iterali mendek ti, kat kapuri mondok-mondok logowak nduk, koonogo piyareegindak me, Kaliku inogoba Ala kat aret agagindak o.

²³Togop aret me, Kaliku nogoba ALA wae. An kayeloman inom, napuri-nombowologwe wigannarugun inom, eerogo pinaniyak wone koonogo yo'negendak nogo, a'me lik togon aret eeppinanege logomunggun o. Kat kendage mondok-mondok tiyanak logowak nduk, wone yagandak nogo ti, a'me nggelok togon eeke keenok, it aakumi nen, At Omaawi Lombok Menggerak Iterali inogoba Ala nogo ti, aakumi Iterali inogoba Ala aret kogo o, yinuk, yogo logogun o. Ndi, kat kenegen wo'ninake keegak, an kayeloman Ndawut napuri-nombowologwe wiganak nen mban it kapuri Iterali mondok-mondok inarum logogun o.

²⁵Ndi, nogoba Ala wae. Kat nen an kayeloman yo'nege logonet, Kapuri-kombowologwe wiganak paga mban Iterali inarum logogun o, yinuk, yo'negendak ti paga an kayeloman nagabiti lek nogogumbuk logonet, wone yi, yokkege agarik o.

²⁶Kat Kaliku ti, Ala aret o. Ndi, kat wone abe mban koonogo an kayeloman yo'negendak me,

²⁷an kayeloman napuri-nombowologwe wigannarugun nogo, kenegen wogonake keegak, it nen kat kapuri Iterali mondok-mondok inarum logonet, eerit nogo logowak nduk, kale'nggen ninoba pinanege nagandak o. Kaliku ALA wae. An kayeloman napuri-nombowologwe wigannarugun nogo, ninom muk kale'nggen ninoba pinanege nagandak me, lek arigin lek mondok-mondok ninoba aret logogin o, yinuk, yokkigi o,” yoreegerak.