Read Western Dani 1 Mbinineegwaarak 18 Bible Online

1 Mbinineegwaarak 18 - Western Dani bible

1 Mbinineegwaarak 18

¹Ti'nuk peebi, at Ndawut nogo it aakumi Pilitin mendek inom wim nambuke logonet, tebenogo piinok, kota Nggat inom, enaagan-ambokan yaga'lelo mbuulogwe inom, it Pilitin mendek unde wonogwe nogo inom abok aret tebenggolagagerak.

²Tebenggolage nagagerik, ti'nuk, it Mowap mendek tebenogo piige mbareegi, at abu'me mban tebe yinuk, ayuk wuko logonet, inarum wonage onggo wu wogori wogo nogogwaarak.

³Ti'nuk, it o Toba mendek inowe endagembogut Kararetet nogo, at unde menggim niyo Eparat ambet paga wonogwe nogo, mi'nogwe iinok, ambinom tebenogo piyaakit nduk, nage me, at Ndawut imbirak abuk a'nuk, imbirak wim eerit o Kamat kuli tebenogo piinet nagagerak.

⁴Tebenogo piinok, anggweendo wim eeka nogo seribu wagangge, awuri ineegin warak kuda paga yarugu nega ineebe tujuh ribu piginake, ndi, it aap wim eeka iniyok paga nega ineebe dua puluh ribu piginake, eeke nagagerik, kuda piginabeegerak nogo, abok aret iniyok andelen inomanggen mbanogo piige logonet, eegu we 100 mban nggweendo wim eeka nigiren nugu logowak nduk, teppiyareegerak.

⁵Ndi, it aap o Aram yaga'lelo Ndamitik nogome nen it o Toba mendek inowe endagembogut Kararetet yeenggwaaruwok nduk, wogo mbareegwa, at Ndawut nen ineebe dua puluh dua ribu aret inoorogo piyareegerak.

⁶Inoorogo piinok, at Ndawut awuri ineegin warak nogo, it aakumi Aram mendek tebembiinok logowak nduk, it inawi kota Ndamitik nogome piya nagagerak. Piya nage mbareegi, it Aram mendek nogo, Ndawut abu'me tebenak logonet, inarum wonage onggo wogori wogo nogogwaarak. Ndi, at Ndawut nogo, yi o ndi o wim eerit nege kagak, Aliku ALA nen Ndawut eegin tiyappege nagagerak.

⁷ At Ndawut nen aap Kararetet awuri wim eeka inoweewi inanggeemu mbuti emas mendek paga eerak nogo wagangge, ti'nuk, aap Kararetet unde wonagagim o kota mbere Tibakat inom, Kun inom, nogome nen mbuti tembaga mendek apit aret wagangge, ee'nuk, o Yerutalem wonok wagagerak. Mbuti tembaga wonok wagagerak ti paga, at Talomo nen togolowak endage, Niyo Yenggenak, inom, o eyak mippuurak inom, mbuti tembaga paga yi mendek ndi mendek eekak inom, ogobakkigirogo pereegerak nogo o.

⁹“At Ndawut nen it Toba mendek inowe endagembogut aap Kararetet awuri wim eeka abok aret inookerak o,” yogwe nogo, aap o Kamat mendek inowe endagembogut Towu nogo, aruk konengge nagagerik,

¹⁰at Kararetet awuri inom wim mbanak wonagagerak me, Ndawut nen inooreegerak paga, “Ninili eekendak me, wa!” yinuk, keyage warogo mbuti emas inom, perak inom, tembaga inom, nogo paga yi mendek ndi mendek ogobakkigirik abok aret aap endagembogut Ndawut wogoruwak nduk, aput Karoram wonok nappi wagagerak.

¹¹At Karoram nen wonok Ndawut iri wage mbareegi, aap endagembogut Ndawut nen it aakumi Erom mendek inom, Mowap mendek inom, Amon mendek inom, Pilitin mendek inom, Amalek mendek inom, yi aakumi ndi aakumi tebenogo piyareegerak abok aret inagugun wogo mbuti emas inom, perak inom, Aliku ALA ake leenogo pege nagagerak ti kokwak, aap Karoram yi mendek ndi mendek wonok iri wagagerak nogo, Aliku ALA ake leenogo pereegerak.

¹² At kwe Teruya aagaluk Abitayi nen aap Erom mendek ineebe apit delapan belas ribu aret o Mayu Ogup Yenggenak Me, kobappaga time inoorogo piyareegerak.

¹³Inoorogo piige nagagerik, it Erom mendek tebembiinok logowak nduk, at awuri ineegin warak nogo, o Erom nogome nappiinet nage mbareegi, it aakumi Erom mendek abok aret Ndawut abu'me tebenak aret wonogogwaarak. Ndi, at Ndawut nogo, yi o ndi o wim eerit nege kagak, at Aliku ALA nen Ndawut eegin tiyappege nagagerak.

¹⁴At Ndawut nogo it Iterali mendek abok aret inowe endagembogut a'nuk wone lengganogo yorage logonet, apuri Iterali inake abe mban koongge, li'lak mban eeppiige, eeke nagagerak.

¹⁵Eeke kagak, kwe Teruya aagaluk Yowap nogo, wim eeka inowe wonage, Akilut aput Yotapat nogo, Ndawut ame nogome wone ambi agaatak kenok liiru mbangge,

¹⁶Akitup aput Tarok inom, Abiyatat aput Akimelek inom, imbirak Ala unde wonogwe, aap Tawuta ti, o apit lambunik ake liiru mbangge,

¹⁷aap Yoyara aput Mbenaya nogo, it aakumi Kereti mendek inom, Peleti mendek inom, inowe logonet inarum wonage, ndi, Ndawut apuri nogo ti, inogoba endagembogut Ndawut abu'me logonet, inom eeka inoweewi aret wonogwe, eeko nogogwaarak.