Read Western Dani 1 Mbinineegwaarak 20 Bible Online

1 Mbinineegwaarak 20 - Western Dani bible

1 Mbinineegwaarak 20

¹ Eyo anggup lake menggim eyom paga yi aap ndi aap inendagembogut wim namburi wunggo menggaarak me, tahun ti eyom ari wage mbareegi, at Ndawut nogo, o Yerutalem puk a'nuk, wonage kagak, at Yowap awuri ineegin warak wogoren wundi nage nagagerik, aakumi Amon mendek wonogo menggam nogome lek eerogo punuk, ti'nuk, kota Araba inom tebenogo pikit nduk, nage nagagerik, wanggeppunuk, wakkagak eeke nagagerik, o nogo obaga kwi'nage logonet, langgunogo pereegerak.

²Langgunogo punuk wonage me, at Ndawut nage nagagerik, it inowe endagembogut enggare-nggare mbuti emas paga ogobakkigirik yugum kere'li-kere'lo aago pugunik onggo abu iya aaninggin 34 wakkagak anobak paga yirik nogo, nggoorogo woppunuk, yirikkolage, yi mendek ndi mendek o kota wonage nogo ambik aret kugun wagangge, eeke nagagerik,

³it aakumi Amon mendek inawi kota-kota tebenggolage kenok, yabu eeko logowak nduk, eeppiige nagagerak me, it aakumi o kota Araba menggaarak nogo wogonake nagagerik, nggege wogorage, mbuti tegewa wogorage, yembuti wogorage, eeppunuk, yabu nggwiirit-nggwaarit eeko logowak nduk, piinok, awuri wim eeka inom abok aret o Yerutalem iniyokan wogogwaarak.

⁴Ti'nuk, peebi ne ambi paga o Nggetet time it Pilitin mendek inom wim ambinom nambuko logonet, aap Kuta mendek endage Tibakayi nen aap inanggup nggorek paga wiganak mendek endage Tipayi nogo wappunuk, it Pilitin mendek nogo, it inabu'me piinok wonogogwaarak.

⁵ Ti'nuk, ne ambi paga it aakumi Pilitin mendek inom wim ambinom nambuko logonet, aap Yayit aput Kelakanan nen aap awi Nggat mendek Nggoliyat awuluk endage Lakimi awooluwak muundu obate kwak porogo wonage kagak, aret warogo pege,

⁶ti'nuk, ne ambi paga o Nggat time wim nambukwi iigak, aap ambi eebe nggwok anggup nggorek ti mendek wiganak ambi eenggabit peenok-peenok 6, iyogobit peenok-peenok 6, mban aret me, lambunik 24 aret wonage nogo nen

⁷it Iterali mendek miyuk-meya eeginake mbareegi, aap Ndawut ogobaluk Timeya aput Yonatan nen aap nogo warogo pege, eereegwaarak.

⁸O Nggat time it aap inanggup yerek-nggorek mendek wiganak ti aret. It nogo ti, at Ndawut awuri inom nen aret inoorogo piyareegwaarak.