Read Western Dani 1 Mbinineegwaarak 21 Bible Online

1 Mbinineegwaarak 21 - Western Dani bible

1 Mbinineegwaarak 21

¹At Ibilit nen it aakumi Iterali mendek naalop-kaalop eerogo piyaakit nduk, mi'nage nagagerik, at Ndawut nen it Iterali ineebe eenggi linggininabuwak nduk, inikime manake mbareegi,

²at Ndawut nen Yowap inom, it aap ineegin warak inoweewi inom, yorage logonet, “Kit nen it aakumi Iterali o Mberetiyeba nen nok, o Ndan kuli ineebe mande wonogwe nogo, an neenu arikit nduk, kineenggi linggininabi nogo logomonggotik, an yo'niri woraamunggup o.”

³Yorage mbareegi, at Yowap nen onggo at yoge logonet, “At Aliku ALA nen it Iterali mendek ineegin warak o yogondak wonogwe yi, ambinom ne 100 kuli wokkiruwak o. Ndi, kat nogoba kendagembogut wokkege kenok, it ineebe abok aret ti, kat kapuri kabu'me logogun nogo lek a? Kabu'me aret logogun kwe, kat nogoba nonggop nduk togop eeriyak yo'niragan o? Nonggop nduk it Iterali maluk eeppiyoorak nduk, ari agandik o?”

⁴Yoreegerak kwe, at Yowap nen, “Aap endagembogut nen ari me, an nonggop yuurak o,” mba'nuk, aakumi Iterali wonogwe me abok aret ineebe eenggi linggininabit nege nagagerik, iyokan o Yerutalem wagagerak.

⁵Wage nagagerik, aap ineegin warak eenggi lingginik nogo, aap endagembogut Ndawut yoge logonet, “It Iterali wonogwe me abok aret aap wim namburiyak inobam ti, ineebe lambuk togon satu juta seratus ribu aret me, ndi, it Yekura mendek ineebe empat ratus tujuh puluh ribu ti, it ti inom lambunik ineenggi lingginik aret o,” yinuk, yoreegerak.

⁶Aap endagembogut nen at Yowap eeriyak wone lengganogo yoreegerak nogo, at Yowap nen eebi mbareegerak me, it aap Lewi mendek inom, Mbeniyamin mendek inom, inom linggininabulik mbo piyareegerak.

⁷At Ndawut eeriyak yoragagerak nogo ti, Ala nen kunduk, “Ti maluk aret eekerak o,” mbareegerak me, it Iterali liippuwak nduk, aaninggin inoba kwippiyareegerak.

⁸Aaninggin inoba kwippiige mbareegi, at Ndawut nen Ala yoge logonet, “An eekirak ti, maluk nggwok lombok aret eekirak o. An maluk lombok wi negen eekirak me, an kayeloman maluk eekirak yi, mbo nappu o, nogoba,” yoreegerak.

⁹Yoge mbareegi, Aliku ALA nen yoge kagak yoraga Ndawut eeriyak abi paga kaga aap Nggat nogo, yori wage logonet,

¹⁰“Kat nen Ndawut yogop yori nak o. Naliku ALA nen wone alom kenagan koonogo oba puurak mbakirak me, at nen mban ambi miike kenok, ti aret oba pikit, yegerak, yori nak o.”

¹¹Yoge mbareegi, at Nggat nogo nen Ndawut owagam wage nagagerik, yoge logonet, “At Aliku ALA nen yegerak nogo yokkiri o. Mbi noogelo kagak tahun kenagan age, awim nen wooluwak paga wariyak nduk, mugurok nugwi iigak, tut kenagan penengge, o at unde menggim Naliku ALA nobaloowi paga warak kanggo mengga kwak, andi nggwok lombok inoba nappi wage neenok, Naliku ALA nayonggo malayikat nen it Iterali wonogo menggam abok aret inoorit namenggerak kambit nogwe iigak, ne kenagan age, eerigin, yegerak me, at nappani wagaarak yori naakit nduk, ambi miiru o.”

¹³Yoge mbareegi, Ndawut nen Nggat yoge logonet, “Ai! Togop eeppaniyak ti, niniki aaninggin lombok ee'nake kwe, aakumi ineenggi paga nen eeppaniyak ti, mage o. Ata, at Aliku ALA nen ninabuwa nggwok lombok mbake me, at eenggi paga nen eeppanuwak o,” yoreegerak.

¹⁴Yoge mbareegi, at Aliku ALA nen kugi andi aakumi Iterali inoba nappi wage mbareegi, aap ineebe tujuh puluh ribu aret kambeegwaarak.

¹⁵At Ala ayonggo malayikat nogo nen o Yerutalem pup eerogo puwak nduk, nappi wagagerak nogo, inoorit aap Yebut mendek endage Arawuna gandum agabolo mbelangge menggim taati ari wage mbareegi, aakumi mondok alik negen kambit nogwe nogo, at Aliku ALA iige nagagerik, iniki puru yinuk, at ayonggo malayikat aakumi inoorit nage nogo yoge logonet, “Abu aret me, keenggi awiikkolet o,” yinuk, yoreegerak.

¹⁶Yoge mbareegi, at Ndawut nogo nen enegen pila ari nagagerik, Aliku ALA ayonggo malayikat nogo, mbogut agi kagak, nggween ogu kagak, oolo taati mi'ndak paloowi o Yerutalem irimbaga titik eerogo nappunuk wonage enegen kage nagagerik, at inom, Iterali inoweewi inom, inayum nibinik maluk mendek yirik logonet, inete wanduk, ngginnogogwaarak.

¹⁷Ti'nuk, at Ndawut nen Ala yoge logonet, “Aap ineegin warak ineenggi linggininaburak wone lengganogo yoragaarak nogo ti, an nen aret yoragarak nogo lek a? An nen aret yoragarak me, yoragarak ti, koone taganogo punuk, maluk lombok aret eekirak o. An nen aret maluk eekirak me, an inom, naaganapuri inom, aaninggin ninoba pinaniyak op aret kagak, it aakumi ndomba kwak yi, nano eekaarak paga inooke agandik o? Lek me, Kaliku nogoba Ala wae. Kugi andi kapuri inoba piigendak yi, inoba logorak lek o, nogoba. Ata, lek eerogo piyet o,” yinuk, yoreegerak.

¹⁸Yoge mbareegi, Aliku ALA ayonggo malayikat nen aap Nggat nogo yoge logonet, “At Ndawut nogo aap Yebut mendek endage Arawuna gandum agabolo mbelangge menggim time lagangge logomenggerik, Naliku ALA nake warogo wo'nogo logowam ogobakkigiruwak nduk, yoru o,” yoreegerak nogo, yori nage mbareegi,

¹⁹“Aliku ALA yegerak o,” yinuk, aap Nggat nen yoreegerak nogo, Ndawut eerikit nduk, nage kagak,

²⁰at Arawuna nogo nen gandum agabolo mbelangge logonet, ena logu yinuk, malayikat enegen kage nagagerik, at apuri wologwe 4 inom aret wonogwe nogo kumaa'nari nogogwaarak.

²¹Kumaarak wonogwe me, at Ndawut nogo owagam wage enegen kage nagagerik, gandum agabolo mbelangge menggim wundi nanuk, ena nggween paga wanduk ari logonet, Ndawut abu'me tebe yereegerak.

²²Tebe ari mbareegi, Ndawut nen at yoge logonet, “It aakumi andi inoba agaarak yi, lek aruwak nduk, Aliku ALA ake warogo wogogo logowam ogobakkigirikit nen kat gandum agabolo mbelangge menggenom yi, wo'niru o. Wo'nege keenok, onggo ndak-ndak wokkirikit o.”

²³Yoge mbareegi, at Arawuna nen Ndawut yoge, “We aret waamen o, nogoba. Wagangge logomenggendik, kat nowe kendagembogut eeriyak mbakendak nogo aret eerumunggun o. Ndi, warogo kani kuniyak tapi inom, tapi kani kuniyak anggen mbelangga eyo obate mbanak inom, gandum anggen Ala ake puurak inom, abok aret inom wokkigi ti o.”

²⁴Yoreegerak kwe, aap endagembogut Ndawut nen aap Arawuna nogo yoge logonet, “Togop kwe, lek o. At Aliku nogoba Ala ake puurak kamendek we wagangge, ndi, ake warogo kani kuniyak ti, onggo ndak-ndak pega'lek neegak, warogo wogoge, eeriyak neebi me, onggo ndak-ndak wokkiriyak mbake agarik o.”

²⁵Yoge nagagerik, wu mbuti emas aaninggin 7 wakkagak anggen mbelangge menggim kumbunuk,

²⁶at Aliku ALA ake warogo wogogo logowam ogobakkigippege nagagerik, Ala ake warogo kani kuniyak mendek pege, inom lambunik logowak nduk, ake warogo wogoge, eeke logonet, aakumi inake Aliku ALA yoge mbareegi, Aliku ALA aruk konembunuk, kani mbogut paga nen warogo wogogak ogobakkigirik nogo paga wuppi wagagerak.

²⁷Wuppi wage nagagerik, ayonggo malayikat nogo ti, “Kobaloowi awina yonggoolu o,” yoreegerak.

²⁸Yoreegerak andi nogo lek age mbareegi, at Ndawut nen, “Aap Yebut mendek endage Arawuna gandum agabolo mbelangge menggim yime nen noone konenggerak kagi o,” mba'nuk, ogobakkigirik ti paga ake warogo wogoge nagagerak.

²⁹Ti eeke eyom paga Aliku ALA inom lambungge menggim awooliya at Muta karume logonet wuriyak yoreegerak nogo inom, warogo kani kunggak ogobakkigirik inom, o Nggibeyon puut paga warogo wogorogo menggam time aret wonagagerak.

³⁰Time wonagagerak me, at Ndawut nogo nen, “Ala yo'niruwak nduk, ninom lambungge menggim awooliya wurik me naakit lak, at ayonggo malayikat obaloowi paga nooke kero,” yinuk, agabiti nen time noorak meek agagerak.