Read Western Dani 1 Mbinineegwaarak 22 Bible Online

1 Mbinineegwaarak 22 - Western Dani bible

1 Mbinineegwaarak 22

¹Ti'nuk, at Ndawut nen ari logonet, “Aliku ninogoba Ala awi yime aret wurogo pugwi, it Iterali mendek nen Ala ake warogo kani kunggak yime aret ogobakkigirogo pugwi, eerugun o,” yinuk, yereegerak.

²Ari nagagerik, it aakumi inambik Iterali inom wonogwe nogo, kuwak eeri woroorak yoraawak nduk, yorage mbareegi, yorogogwaarak kuwak eeko mbareegwa, inenggela'me nen Ala awi wuriyak yugum nggaganggo logowak nduk, aap yugum nggagangga mippiige,

³tu unggwogo logowam tungga inom, tu nggele'mbuk eeka inom, ogobakkigiriyak paku eeruwak nduk, mbuti owak ambik inom, mbuti tembaga aaninggin wakkoorak meek lombok inom, nogo wogorage,

⁴ndi, it aap Tiron mendek inom, Tirut mendek inom, nen eyo nggabina mbanak ambik aret at Ndawut ake wonok iri wogogwaarak me, eyo nggabina mbanak ineenggi lingginiyak meek aret wogorage, eereegerak.

⁵At Ndawut iniki mbake logonet, “An naput Talomo nogo awo tawe o wuke eenggo'lek me, ndi, yi aakumi ndi aakumi nen, Aliku ALA awi wurik yi, abu nggwok eyo abe omaawi paga lombok wurik yi, iya! yinuk, pi wakwi, abok agan yi o ndi o wiganinuk nogwe, eeko logowak nduk, wuriyak me, an nen yi mendek ndi mendek abe mban pipuk eerogo pege logi o,” mba'nuk, at Ndawut nogo awo kangga'lek logonet, Ala awi wuriyak yi mendek ndi mendek abok aret mondok li'luk eerogo pereegerak.

⁶Li'luk eerogo pege nagagerik, at aput Talomo nogo wiireegerak wage mbareegi, Aliku Iterali inogoba Ala awi wuriyak nogo wone lengganogo yoreegerak.

⁷ At Ndawut nen at aput Talomo nogo yoge logonet, “Naput o. At Aliku nogoba Ala endage ki logowak nduk, an nen at awi wuriyak mbakirak kwe,

⁸Aliku ALA nen an yo'nege logonet, Kat aakumi ambik inamiya wunabit nage, ndi, wim ambik lombok eerit nage, eekendak o. An nenegen neegak, aakumi ambik inamiya kilirogo nggween paga wurabit nagandak me, an nendage ki logowam nawi kat nen wurumunggun lek o.

⁹Peebi kat kaput aap ndaremenggendak nogo ti, aakumi iniki ugun nu'lek logowak nduk eerogo piiga aret logogin o. At inom wim mbanak enaagan-ambokan wonogwe nogo, at ineebi mbarugun lek inom lambunik logowak nduk, eerogo piyaagin o. At endage ti, Talomo aret. Ndi, at inowe endagembogut logonet, wone lengganogo yorage kagak aakumi Iterali mendek abok aret wone ambi inoba aga'lek iniki ugun tayenak aret logogun o.

¹⁰At nen aret an nendage ki logowam wurogo pigin o. At nen an naput age, ndi, an at ogoba aret age, eeko logomonggoorik, it aakumi Iterali abu'me piinok wone lengganogo yorage logowam mondok-mondok omaawi eerogo pigin, yo'negerak o.

¹¹Togop me, naput wae. Yogondak at Aliku ALA kimbirak wonage me, At nen aret an nendage ki logowam wurigin o, yinuk, yereegerak nogo ndak-ndak, at yeenggwa kege kagak, Aliku kogoba Ala awi ndak aret wurumunggun o.

¹²It Iterali wone lengganogo yorage logonok nduk, mippagage logomenggerik, Aliku kogoba Ala wone yugu liiru mbanak nogo, liirogon unde logonet eeke logonok nduk, Aliku ALA nen kiniki warak eeppagage, eeriyak liippunuk eeke logonok nduk, eeppagage, eeke logowak o.

¹³ Wone lengganak inom, eeko logorak wone yugu inom, it Iterali eeko logowak nduk, Aliku ALA nen Muta yoreegerak nogo, liippunuk, eerit nage keenok, eeriyak mbake nogo a'me nggelok mban arit nage kaamunggun o. Togop me, kagabiti mbake, kiniki yungguppegak eeke, eekelobok o. Ata, kiniki mondok nu'lek eeppunuk, kogogumbuk logomunggun o.

¹⁴Anggon-panggon ee'nake tit kagak Aliku ALA awi wuriyak mbuti emas aaninggin tiga juta empat ratus lima puluh ribu wakkagak pipuk eerogo pege, mbuti perak aaninggin tiga puluh empat juta lima ratus ribu wakkagak eerogo pege, ndi, mbuti owak inom, mbuti tembaga inom, ambik aaninggin wakkoorak abu meek nogo mendek eerogo pege, eyo inom, yugum inom, ambik lombok pipuk eerogo pege, eekirak kwe, eegu lek age kenok ti, kat kobaalombok kwaarumunggun o.

¹⁵Kat kinom yabu eeriyak ineebe ambik aret wonogwe o. It ando yugum nggagangga inom, ando yugum paga o wuka inom, ando eyo paga wuka inom,

¹⁶it ando mbuti emas paga, perak paga, tembaga paga, mbuti owak paga, yi mendek ndi mendek abok aret ineenggi amburu paga eeko menggaarak abu ineenu ineenggi lingginiyak meek kinom eeko logorak ambik wonogwe me, o ti, wuru aret o. Ndi, wuke keegak, Aliku ALA kimbirak aret logogin o,” yinuk, yoreegerak.

¹⁷Yoge nagagerik, at Ndawut nen aakumi Iterali mendek inoweewi abok aret at aput Talomo yeenggwaaruwak nduk, yorage logonet,

¹⁸“At Aliku kinogoba Ala kinom wonage nogo lek a? Aakumi yi o ndi o kinaagan-kinambokan wonogwe nogo, wone ambi kinoba pinagaga'lek kinom op wonogwe nogo lek a? It aakumi o yime wonogwe abok aret Aliku ALA nen an neenggime paneegerak me, aakumi o yime menggaarak abok aret Aliku ALA oone inom, kit at apuri kinoone inom, aret konenggwi me,

¹⁹yogondak aret kit kiniki inom, kineebe inom, waganogo Aliku kinogoba Ala wogo'nuk, At mban mugurok nogo logowok o, yinuk, abuk nggaruk togon koombunuk, mugurok nogo logonip o. At Aliku ALA aloobut mbanak me wone abuk nggaruk togon kooneegerak yonggolak nogo inom, yi mendek ndi mendek eekak Ala ake leenak nogo inom, Aliku ALA endage ki logorak awi wuruwam nogome mambi woraamunggup nduk, Aliku Ala alut eeko logowam aret wu'nip o,” yinuk, yoragagerak.