Read Western Dani 1 Mbinineegwaarak 26 Bible Online

1 Mbinineegwaarak 26 - Western Dani bible

1 Mbinineegwaarak 26

¹Ala awi wurik me tu unggwogo menggam arum logorak aap aago ineebe mogonogo piinet nagagerak inendage nogo yi aret. It Kora paga wiganak aap Atap ombowologwe ambi Kore aput aap Metelemiya aret.

²At Metelemiya nen apuri aap ndaganabeegerak ti, manggu Takariya, at ambo'me Yeriyayen, at ambo'me Yebaya, at ambo'me Yatiniyen,

³at ambo'me Elam, at ambo'me Yokanan, at ambo'me Eliyowenayi, ineebe lambunik 7 aret ndaganabeegerak.

⁴ At Obet-Erom kunduk, apuri aap ndaganabeegerak nogo ti, manggu Temaya, at ambo'me Yotabat, at ambo'me Yowa, at ambo'me Takat, at ambo'me Netanen,

⁵at ambo'me Amiyen, at ambo'me Itakat, at ambo'me Pewuletayi aret ndaganabeegerak. At Ala nen ale'nggen Obet-Erom oba pege logonet, apuri aap ineebe lambunik 8 aret wogoreegerak.

⁶At Obet-Erom aput Temaya nogo kunduk, apuri aap ndaganabeegerak ti, Otini, Erepayen, Obet, Elatabat aret. It ti, wone lengganogo yorogo logorak inobam aret me, it ndarak ndegek lombok inoweewi it aret. At Obet-Erom owe-awot Eliku Temakiya imbirak togop mban aret wonogogwaarak.

⁸It ti abok aret at Obet-Erom paga wiganak aret. It inom, inapuri inom, inowe-inawot inom, inomaawi ambik, eeko logorak wone yugu nogo inobam aret me, at Obet-Erom paga wiganak ineebe lambunik ti, enam puluh dua aret.

⁹At Metelemiya owe-awot inom, apuri inom, it kunduk inomaawi ambik it unde logorak yorogwe nogo, inobam aret me, ineebe lambunik 18 aret.

¹⁰At Merari paga wiganak aap endage Kota nen apuri 4 ndaganabeegerak ti, Timiri, at ambokan Kilikiya, at ambokan Tebaliya, at ambokan Takariya aret. At Timiri ti, manggu lek kwe, ogoba nen inowe logowak nduk, mippereegerak. At aap Kota owe-awot inom, apuri inom, it togon unde logorak yorogwe nogo inobam aret me, ineebe lambunik 13 aret.

¹²It Ala awi wurik tu unggwogo menggam arum logorak mogonogo piinet nagagerak nogo ti, inoweewi nogo inendage aret yogo nogogwaarak. Inoreewi Lewi mendek nen Aliku ALA awi wurik me arum wonogo nogogwa kwak, it kunduk, togop aret eeko logowak nduk, unde eeppiyareegerak.

¹³“Yi aap tawe. Yi aap anggok,” yaga'lek it ndarak ndegek lombok mugurok yugum paga wakkaanuk, Ala awi wurik me tungga unggwogo logowam alitik-alitak arum logowak nduk unde eeppiyareegerak.

¹⁴Oonegen wundi wage menggim pa'nggwe tu unggwogo logowam, “Ta arum logorak kaamun?” yinuk, yugum wakkaanuk, at Telemiya owagam ari nage, ti'nuk, o omarip paga pa'nggwe tu unggwogo logowam, “Ta arum logorak kaamun?” yinuk, yugum wakkaanuk, at Telemiya aput iniki warak lombok logonet wone koongga Takariya nogo owagam ari nage,

¹⁵ti'nuk, o ame pa'nggwe tu unggwogo logowam, “Ta arum logorak kaamun?” yinuk, yugum wakkaanuk, at Obet-Erom owagam ari nage, ti'nuk, yi mendek ndi mendek pogo logowam, “Ta arum logorak kaamun?” yinuk, yugum wakkaanuk, at Obet-Erom apuri inowagam ari nage,

¹⁶ti'nuk, oonegen kilu yi nage menggim pa'nggwe tu unggwogo logowam inom, tu tiyarogon paga unggwogo logowam endage Tiyaleket inom, “Ta arum logorak kaamun?” yinuk, yugum wakkaanuk, aap Tupim Ota imbirak inowagam ari nage, eereegerak. Oonegen punik nogo paga logorak koonogo piinet nagagerak.

¹⁷Ne ambi paga logorak oonegen lagi wage menggim pa'nggwe it Lewi mendek ineebe 4 piige, ne ambi paga logorak o omarip paga pa'nggwe ineebe 4 piige, ne ambi paga logorak o ame pa'nggwe ineebe 4 piige, ne ambi paga logorak yi mendek ndi mendek pogo logowam ineebe mbere piige,

¹⁸ne ambi paga logorak oonegen kilu yi nage menggim pa'nggwe Ala awi wurik oore'nggam unggwogo logowam ineebe 4 piige, ndi, oore'nggam lombok ineebe mbere piige, eereegerak.

¹⁹It Kora Merari imbirak it paga wiganak nen tu unggwogo logowam arum logowak nduk, mogonogo piyareegerak nogo ti aret.

²⁰It Lewi mendek inoreewi eegu nen Ala awi wurik me yi mendek ndi mendek onggo nggwok pogo logowam nogo inom, ndi, yi mendek ndi mendek alik leenak pogo logowam nogo inom, arum logorak koonogo pereegerak yi aret.

²¹At Nggeroton mendek Laran paga wiganak ndarak ndegek inowe Yekiyen inom,

²²at Yekiyen apuri Tetam, at awuluk Yowen, imbirak inom, nen Aliku ALA awi wurik me yi mendek ndi mendek pogo logowam arum logorak koonogo piyareegerak ti,

²³it Amaram paga wiganak inom, Yitaka paga wiganak inom, Keboron paga wiganak inom, Utiyen paga wiganak inom, inoweewi inendage nogo yi aret.

²⁴At Amaram paga wiganak ti, aap Tebuwen aret. At Tebuwen ti, Muta aput Nggeroton paga wiganak aret me, Ala awi wurik me yi mendek ndi mendek onggo nggwok mendek pogo logowam arum logorak inowe aret wonagagerak.

²⁵At oreewi Eliyetet paga wiganak ti, at Eliyetet nen aput aap Erekabiya ndake, Erekabiya nen aput aap Yetaya ndake, Yetaya nen aput aap Yoram ndake, Yoram nen aput aap Tikiri ndake, ndi, Tikiri nen aput aap Telomit ndake, eereegwaarak me,

²⁶aap endagembogut Ndawut inom, it ndarak ndegek inoweewi inom, aap ineegin warak ineebe seribu lombok aago inoweewi inom, ineegin warak ineebe 100 lombok aago inoweewi inom, it aap wim eeka inoweewi ando inom, nen yi mendek ndi mendek pegaatak alik leenak wonage nogo, pit nogo logowam abok aret, at Telomit owe-awot inom unde logonet arum wonogwe,

²⁷it nen wim eeko logonet, yi mendek ndi mendek kugun waganggaatak nogo Aliku ALA awi ogobakkigiruwak nduk, leenogo pereegwaarak kwe,

²⁸inabi kogwe iinok yoraga Tamuwen inom, aap Kiti aput Tawun inom, Net aput Abenet inom, Teruya aagaluk Yowap inom, nen, “Ala amendek o,” yinuk, yi mendek ndi mendek leenogo pereegwaarak eege, yi mendek ndi mendek alik leenak wonage nogo eege, ti, at Telomit owe-awot inom nen unde logonet, arum wonogwe, eeko nogogwaarak.

²⁹At Yitakat paga wiganak ti, Kenaniya aret me, at inom, apuri inom, ti, Ala awi wurik me eeko logowak nduk, unde eeppiyoolik. Ata, yi o ndi o Iterali wonogo menggam time ambi eeriyak age kenok, wone ena koonggwi, wone ambi agaatak kenok, inowak loonggwi, eeko logowak nduk, unde eeppiige,

³⁰at Keboron paga wiganak ti, Katabiya owe-awot inom ineebe lambunik seribu tujuh ratus aret me, it aakumi Iterali oonegen kilu yi nage menggim pa'nggwe niyo Yoraran yi paga wonogwe nogo, Aliku ALA ake eerit nugwi, ndi, aap endagembogut ari kenok, ake eekwi, eeko logowak nduk, unde eeppiige, eereegerak.

³¹Nda'nogwe iinok, inendage liiru mbanogo pugu mugurok it aap Keboron paga wiganak ndarak ndegek inowe ti, Yeriya aret. Ndi, aap endagembogut Ndawut nogo inowe endagembogut a'nuk, wone lengganogo yorage kagak tahun 40 eerak nogo paga, “Nda'nogwe iinok, inendage liiru mbanogo pugu paga it aap Keboron paga wiganak inendage ambi mbanak wonage ilik, lek a?” yinuk, pekkogo logonet, it aap Keboron mendek wone koonggwi inobam lombok o Yayetet-Nggileyat time wonogwe nogo inendage kwaakkogogwaarak.

³²Aap Yeriya owe-awot ineebe lambunik dua ribu tujuh ratus wone koonggwi inobam it ndarak ndegek inoweewi aret kwaariyareegwaarak me, it Uruben mendek inom, Nggat mendek inom, it Manate mendek ando mogonak inom, inarum logonet, Ala ake yabu eekwi, aap endagembogut ake eekwi, eeko logowak nduk, aap endagembogut Ndawut nen it aap ti, unde eeppiyareegerak.