Read Western Dani 1 Mbinineegwaarak 27 Bible Online

1 Mbinineegwaarak 27 - Western Dani bible

1 Mbinineegwaarak 27

¹It Iterali mendek ndarak ndegek lombok inom, aap wim eeka ineebe seribu lombok aago inoweewi inom, aap wim eeka ineebe 100 lombok aago inoweewi inom, it inoweewi ti, wone lengganinaka inom, nen aap endagembogut unde menggim ambi eeriyak age kenok, tahun ambi eekak tut ambi penengge paga aap ambi aago eekwi, tut ambi penengge paga aap ambi aago eekwi, eeko nogogwaarak ineegin warak ineebe dua puluh empat ribu aago mban inoweewi inendage mbanak nogo yi aret.

²Tut iyaalok penenak paga ambi aago eeko nogogwaarak inowe ti, aap Tabiriyen aput Yatobam aret me, awuri aago inarum wonagagerak nogo ineebe dua puluh empat ribu aret.

³At Yatobam nogo, aap Peret paga wiganak aret me, tut aa'nduk penenak ti paga at ineegin warak inoweewi wone lengganinake nagagerak.

⁴Tut ambi abu penembunuk, ambokan penenak paga ambi aago eeko nogogwaarak inowe ti, aap Akoki paga wiganak endage Ndorayi aret me, at awuri aago inarum wonagagerak ineebe dua puluh empat ribu aret. At abu'me wone lengganinaka ti, Mikolot aret.

⁵Tut mbere abu penembunuk, ambokan penenak paga ambi ineegin warak aago eeko nogogwaarak inowe ti, aap Ala unde Yoyara aput Mbenaya aret me, at awuri aago inarum wonagagerak ineebe dua puluh empat ribu aret.

⁶Aap wim wakaa'ngget ineebe 30 nogo mendek logonet, ineebe 30 nogo, wone lengganinake nagagerak ti, aap Mbenaya yi nogo aret. At aput Amitabat nen ogoba awuri aago nogo wone lengganinake nagagerak.

⁷Tut kenagan abu penembunuk, ambokan penenak paga ambi aago eeko nogogwaarak inowe ti, aap Yowap awuluk Atayen aret kwe, kangge mbareegi, obaane'me aput Tebaya inowe agagerak me, at awuri aago inarum wonagagerak ineebe dua puluh empat ribu aret.

⁸Tut 4 abu penembunuk, ambokan penenak paga ambi ineegin warak aago eeko nogogwaarak inowe ti, at Yitara paga wiganak aap Tamukut aret me, at awuri aago inarum wonagagerak ineebe dua puluh empat ribu aret.

⁹Tut 5 abu penembunuk, ambokan penenak paga ambi aago eeko nogogwaarak inowe ti, aap o Tekowa mendek Iketi aput Ira aret me, at awuri aago inarum wonagagerak ineebe dua puluh empat ribu aret.

¹⁰Tut 6 abu penembunuk, ambokan penenak paga ambi aago eeko nogogwaarak inowe ti, at Eparayim paga wiganak aap Peloni mendek endage Kelet aret me, at awuri aago inarum wonagagerak ineebe dua puluh empat ribu aret.

¹¹Tut 7 abu penembunuk, ambokan penenak paga ambi aago eeko nogogwaarak inowe ti, aap Tera paga wiganak o Kuta mendek endage Tibakayi aret me, at awuri aago inarum wonagagerak ineebe dua puluh empat ribu aret.

¹²Tut 8 abu penembunuk, ambokan penenak paga ambi aago eeko nogogwaarak inowe ti, at Mbeniyamin paga wiganak aap o Anatot mendek Abiyetet aret me, at awuri aago inarum wonagagerak ineebe dua puluh empat ribu aret.

¹³Tut 9 abu penembunuk, ambokan penenak paga ambi aago eeko nogogwaarak inowe ti, at Tera paga wiganak aap o Netopa mendek Makarayi aret me, at awuri aago inarum wonagagerak ineebe dua puluh empat ribu aret.

¹⁴Tut 10 abu penembunuk, ambokan penenak paga ambi aago eeko nogogwaarak inowe ti, at Eparayim paga wiganak aap o Piraton mendek endage Mbenaya aret me, at awuri aago inarum wonagagerak ineebe dua puluh empat ribu aret.

¹⁵Tut 11 abu penembunuk, ambokan penenak paga ambi aago eeko nogogwaarak inowe ti, aap O'niyen paga wiganak aap o Netopa mendek endage Kelarayi aret me, at awuri aago inarum wonagagerak ineebe dua puluh empat ribu aret.

¹⁶It inanebunu Iterali mendek inarum wonogogwaarak inoweewi inendage nogo yi aret. Anebunu Uruben mendek inowe ti, at Tikiri aput Eliyetet aret. Anebunu Timeyon mendek inowe ti, at Maaka aput Tepata aret.

¹⁷Anebunu Lewi mendek inowe ti, at Kemuyen aput Katabiya aret. Anebunu Karun mendek inowe ti, at Tarok aret.

¹⁸Anebunu Yekura mendek inowe ti, at Ndawut oweeluk Eliku aret. Anebunu Itakat mendek inowe ti, at Mikayen aput Omiri aret.

¹⁹Anebunu Tebulon mendek inowe ti, at Obaya aput Yitamaya aret. Anebunu Natali mendek inowe ti, at Atiriyen aput Yerimot aret.

²⁰Anebunu Eparayim mendek inowe ti, at Atatiya aput Koteya aret. Anebunu Manate mendek ando mogonak inowe ti, at Peraya aput Yowen aret.

²¹Anebunu Manate mendek peenok mogonak o Nggileyat wonogwe inowe ti, at Takariya aput Yiro aret. Anebunu Mbeniyamin mendek inowe ti, at Abenet aput Yaatiyen aret.

²²Ndi, anebunu Ndan mendek inowe ti, at Yerokam aput Ataren aret. It inanebunu Iterali mendek inoweewi a'nuk, inarum wonogogwaarak nogo ti aret.

²³ At Aliku ALA nen, “It Iterali mendek ti, laaluguragan mbogut paga wonage ineenggi lingginiyak meek menggi kwak, arugun o,” yinuk, yereegerak me, at Ndawut nen ineebe eenggi linggininake logonet, ndarak iigak tahun 20 nen ogu nggwe eerak kero, eenggi linggininabulik aret.

²⁴ Kwe Teruya aagaluk Yowap nogo nen aap eenggi linggininaburak nduk, eereegerak mendek, eenggi linggininabit nage paga Ala anini it Iterali inoba kwippege mbareegi, ineebe lambunik lingginik nogo, at Ndawut eeke nagagerak liiru mbanak nogo paga inom mbanogo puulik mbo pereegerak.

²⁵Aap endagembogut amendek kuwak eerak pogo menggam arum wonagagerak nogo ti, aap Ariyen aput Atamawet aret. O kota endekem nggwe yi mendek ndi mendek pit nogo menggam yi o ndi o inom, kota-kota inom, yaga'lelo mbuulogwe-mbaalogwe inom, tum logorak o nggorek wurik inom, arum wonagagerak nogo ti, Utiya aput Yonatan aret.

²⁶Aap endagembogut eyabu eeke menggim eerit nugwi iigak, inarum wonagagerak nogo ti, aap Kelup aput Etiri aret.

²⁷Ageyo anggur awi yarak arum wonagagerak nogo ti, aap awi Arama mendek Timeyi aret. Ndi, anggur amburu aamburunogo toolak pugu menggam arum wonagagerak nogo ti, aap awi Tipimi mendek Tabiri aret.

²⁸Ageyo Tayitun inom, wuli inom, oonegen kilu yi nage menggim pa'nggwe puut-puut elan me yarak arum wonagagerak nogo ti, aap awi Nggereri mendek Mba'an-Kanan aret. Ndi, tayitun amburu toolak arum wonagagerak ti, at Yowat aret.

²⁹Aanggumi lembu-tapi o Taron paga inagari'ngga nenet nugwi iigak, inarum wonagagerak nogo ti, aap Taron mendek Titarayi aret. Ndi, lembu-tapi o kobappaga inagari'ngga nenet nugwi iigak, inarum wonagagerak nogo ti, aap Aralayi aput Tapat aret

³⁰Unta ambik wonogwe inarum wonagagerak nogo ti, aap Itamayen mendek Obin aret. Keledai ambik wonogwe inarum wonagagerak nogo ti, aap o Meronot mendek Yekereya aret.

³¹Kambin-ndomba inarum wonagagerak nogo ti, aap Kagari mendek Yatit aret. It aakumi inoweewi yi abok aret aap endagembogut Ndawut amendek ti, arum wonogogwaarak.

³²At Ndawut ogobaluk iniki abu warak logonet yorage, wone liiru mbangge, eeka ti, Yonatan aret. Aap endagembogut apuri ndegeninaka ti, aap Kakomoni aput Yekiyen aret.

³³Aap endagembogut wone owa'na nigakka ti, aap Akitopen aret. Ndi, aap endagembogut imbirak kunik ti, aap Ariki mendek Kutayi aret.

³⁴At Akitopen nogo, obaane'me at aap Mbenaya aput Yoyara inom, at Abiyatat inom, ogogwaarak. Ndi, at aap endagembogut awuri ineegin warak inowe ti, Yowap aret.