Read Western Dani 1 Mbinineegwaarak 28 Bible Online

1 Mbinineegwaarak 28 - Western Dani bible

1 Mbinineegwaarak 28

¹At Ndawut nen it aakumi inanebunu lombok inarum menggaarak inoweewi inom, aap endagembogut ake eeka ineegin warak aago nogo inoweewi inom, ineegin warak ineebe seribu lombok inoweewi inom, ineegin warak ineebe 100 lombok inoweewi inom, aap endagembogut amendek unde menggaarak inom, at apuri inom inaanggumi inarum menggaarak inom, aap endagembogut inom eeko menggaarak inom, wim wone mbangga inom, aap wakaa'ngget ineegin warak inom, it aap Iterali inoweewi ti abok aret, o Yerutalem kuwak eeri woraawak nduk, inayonggo pereegerak kuwak ari wogogwaarak.

² Wogo mbareegwa, at endagembogut Ndawut nogo mi'na'nuk wone yorage logonet, “Kit an mendek nowe-nawot aret me, wone an yokkirage yi, kinaruk liirogon konenggo logonip o. Aliku ALA wone koonogo yo'niragagerak aloobut mbanak me yonggolak nogo akom kwi'ndak logorak inom, ninogoba Ala iyok punuk logowam inom, wuriyak nduk, maan aret ninikime nen, Wurikit togon, koonogo pereegirak o. Koonogo pereegirak nogo, wurikit nduk, yi mendek ndi mendek pipuk eerogo pege me,

³at Ala nen an yo'nege, Kat wim eeka logonet, aakumi inooke nagagindak inamiya keenggi paga wonage me, an nendage ki logowam kat nen an nawi wuriyak lek o, yo'nereegerak.

⁴Ti yo'nereegerak kwe, Aliku Iterali inogoba Ala nen nowe-nawot iigak, it Iterali inowe nendagembogut mondok-mondok logokit nduk, miirogo paneegerak o. Miirogo panege nagagerik, mippanikit nduk, eeke logonet, aap anebunu Yekura mendek Iterali inarum logowak nduk miike, ndi, miike nagagerik, it Yekura ndarak ndegek inoweewi inenggela'me nen an nogoba aret miirogo pege, ndi, miirogo pege nagagerik, at apuri wiganak paga nen it Iterali mendek abok aret inowe nendagembogut logorak inikilom nomba'nuk miirogo panege, eeke nagagerik, mippaneegerak o.

⁵Aliku Ala nen an mippanege nagagerik, an napuri ambik aret wo'nereegerak nogo inenggela'me nen Aliku ALA abu'me piinok wonage menggim endagembogut logonet, it Iterali mendek wone lengganogo yorage logorak naput Talomo aret leenogo mippuurak koonogo pereegerak.

⁶Koonogo pege nagagerik, an yo'nege logonet, At Talomo ti, an naput age, ndi, an nen at ogoba age, eeriyak miirogo pereegirak me, kat kaput Talomo nen aret an nawi wuke, ndi, nawi wurik owa'nagat wuke, eerigin me,

⁷an nen, Yogop ee'nu ndogop ee'nu, wone yereegirak inom, wone lengganak inom, kat yogondak eeke yi ndak-ndak, at alik ambi eeka'lek ti mban liirogon porogo logonet, eerit nage kenok, at abu'me piinok logowam lek arigin lek mondok-mondok nu'lek aret logogin o, yinuk, yo'nereegerak.

⁸Togop aret me, at Aliku ALA apuri kuwak eerak it Iterali abok aret inigen wonogwe, ndi, ninogoba Ala aruk konengge, eekwi iigak, eeko logorak wone yokkirage yi, kinaruk logonip o. Nggween obeelom yi, unde eeppatinuk, logomonggotik, peebi kineyate kinapuri-kinombowologwe wogoramonggotak mondok-mondok unde logowak nduk, Aliku kinogoba Ala nen, Yogop ee'nu ndogop ee'nu, yokkirage nogo liirogon mugurok nogo logomunggup o.”

⁹Yorage nagagerik, aput Talomo yoge logonet, “Ndi, kat naput Talomo wae. At Aliku ALA nen yi aakumi ndi aakumi inikime maloppiige, Ndogop eerikit, koonggwi nogo, Nonggop nduk koonggwi, yinuk, eenu age, eeke menggerak me, kat nen Aliku ALA kwaake keenok, kimbirak lambunumunggun kwe, at mbo pege keenok perak, at nen kat mondok-mondok mbo pagagin o. Togop me, kogoba an nogoba Ala ti, An nogoba aret o, mbake logomenggendik, kiniki nen, Ala ake eeke logokit o, yinuk, kiniki-keebe nggaruk togon Ala wogo'nuk, ake eeke logomunggun o.

¹⁰At mban alut eeko logowam awi wuriyak Aliku ALA nen an aret leenogo panegerak kagi, mba'nuk, liippunuk, kogogumbuk logonet, eeke logot o,” yinuk, yoreegerak.

¹¹Yoge nagagerik, Ala awi wuke logonet, irip me wone mbanggak ko kole ogoorogo puurak inom, yendok-wandok ko ogoorit noorak inom, yi mendek ndi mendek pogo logorak inom, ko irimbaga ogoorogo puurak inom, ko aken ogoorogo puurak inom, Ala inom lambungge menggim aloobut mbanak abiringga narak logowam ko ogooriyak inom,

¹²Aliku ALA awi wuriyak oore'nggam ogobakkigirogo pit noorak inom, oore'nggam yendok-wandok o wurogo pit noorak inom, Ala awi wuppunuk, ake pugu pogo logorak ogooriyak inom, ake eeko logonet, yi mendek ndi mendek alik leenak pogo logorak ogooriyak inom, at Ndawut eeriyak Aberiniki nen iniki koonogo pereegerak liiru mbanak abok aret aput Talomo wogoge,

¹³ti'nuk, Aliku ALA awi wuppunuk, it aap Ala unde inom, Lewi mendek inom, ineebe aago lombok ineyabu eeko logorak unde eeppiyoorak yoge, yi mendek ndi mendek Ala awi wuppunuk, eekak yuurak yoge,

¹⁴Ala awi wuppunuk, alut eerit nogo logonet, “Eekak yuurak ti, mbuti emas paga ogobakkigiriyak me, mbuti emas aaninggin ndogop paga ogobakkigiriyak,” yoge, “Ando eeriyak ti, mbuti perak paga ogobakkigiriyak me, mbuti perak aaninggin ndogop paga ogobakkigiriyak,” yoge, eeke logonet,

¹⁵ndi wunanggak anobak inom, owak inom, mbuti emas paga ogobakkigiriyak me, “Ambiret kenok mbuti emas aaninggin ndogop paga ogobakkigiriyak,” yoge, ndi, ando mbuti perak paga ogobakkigiriyak me, “Ambiret kenok mbuti perak aaninggin ndogop paga ogobakkigiriyak,” yoge,

¹⁶oroti Ala ake leenak pegak eyo ndooniyak nogo ti, mbuti emas paga nabeniyak me, “Ambiret kenok, mbuti emas aaninggin ndogop paga nabeniyak,” yoge, ndi, ando mbuti perak paga nabeniyak me, “Mbuti perak aaninggin ndogop paga nabeniyak,” yoge,

¹⁷pelaakak paando negen inom, niyo toologo werenggak inom, togolowak amburu tookak inom, mbuti emas at mendek paga mban ogobakkigiriyak me, “Ambiret kenok, mbuti emas aaninggin ndogop paga ogobakkigiriyak,” yoge, ndi, ando mbuti perak paga ogobakkigiriyak me, “Mbuti perak aaninggin ndogop paga ogobakkigiriyak,” yoge,

¹⁸obari abe kaga mendek kani kunggak ogobakkigiriyak me, “Mbuti emas at mendek paga mban aaninggin ndogop paga ogobakkigiriyak,” yoge, malayikat negen kerub-kerub a'naabit wiganogo punuk, Aliku ALA wone yugu aloobut mbanak nobappunuk logorak mbuti emas paga ogobakkigiriyak nogo yoge, eereegerak.

¹⁹Wone abok ti, at Ndawut ari logonet, “Eeriyak yi abok aret at Aliku ALA nen, Yogop ee'nu ndogop ee'nu, li'luk eerogo yo'nege kagak, liiru mbaneegirak,” yereegerak o.

²⁰Ti'nuk, at Ndawut nen at aput Talomo nogo ambinom yoge logonet, “Kat kogogumbuk kiniki mondok nu'lek eeppatinuk logonet, eerit nage logomunggun o. Aliku Ala ti, an nogoba Ala aret me, at nen teppagage, eraangge mbo paganuk mbagangge, eerigin lek kimbirak keegak, Aliku ALA awi wuremenggenom eeko logorak ti age worok togon aret eerumunggun me, kagabiti mbake, anggon eekkake, eeriyak mage o.

²¹Ala awi wuremenggenom eeko logorak ti, it aap Ala unde inom, Lewi mendek inom, inawuri lombok aago pipuk eerak wonogwe, ndi, it aap ando yi eeriyak ndi eeriyak kani warak nogo, iniki nen kat yeenggwa kogo logorak togon wonogwe, ndi, it aakumi inoweewi inom, aakumi ugun mendek inom, abok aret wone lengganogo yorage keenok, eeko logorak kunduk, wonogwe mban aret o,” yinuk, yoreegerak.