Read Western Dani 1 Mbinineegwaarak 29 Bible Online

1 Mbinineegwaarak 29 - Western Dani bible

1 Mbinineegwaarak 29

¹ Yoge nagagerik, at Ndawut nen it aakumi kuwak ogogwaarak nogo abok aret yorage logonet, “O nggwok abe wuriyak nogo ti, aakumi inawi wuriyak lek Aliku Ala awi lombok wuriyak me, aaninggin ambik wonage. Ndi, at Ala nen an naput Talomo miirogo pereegerak nogo, yi eeriyak ndi eeriyak liippega'lek eebe awo tawe me,

²nogoba Ala awi wuriyak nduk, yi mendek ndi mendek an unde minggirak kuwak eerogo pigirak ti, mbuti emas paga eeriyak kenok mbuti emas pipuk eerogo pege, mbuti perak paga eeriyak kenok mbuti perak pipuk eerogo pege, mbuti tembaga paga eeriyak kenok mbuti tembaga pipuk eerogo pege, mbuti abe mbuti paga eeriyak kenok, mbuti abe mbuti pipuk eerogo pege, eyo paga eeriyak kenok eyo pipuk eerogo pege, yugum paga nabeniyak kenok yugum onggo nggwok mendek inom, kere'li-kere'lo aago mendek inom, etenggen alitik-alitak inom, yugum abu abe meenggen mendek inom, ti mendek ambik aret kuwak eerogo pege, eekirak o.

³Ndi, Nogoba Ala awi wuriyak, uugwe lombok mbake minggirak me, yi mendek ndi mendek pipuk eerogo pigirak nogo, oba lunogo an nogoba Ala awi wuriyak ake an namendek lombok mbuti emas inom, perak inom, pereegirak nogo ti,

⁴Ala awi wuko logonet, kobat nabenggwi, yi mendek ndi mendek mbuti perak-emas paga ogobakkigikwi, ndi, it aap mbuti perak-emas paga yi mendek ndi mendek ineenggi amburu paga ogobakkigikwi, eeko logowak nduk, mbuti emas abu obeelom Opit mendek aaninggin seratus ribu inom, mbuti perak abu kigirikwe aaninggin seratus tujuh puluh ribu inom, ti muk pipuk eerogo pigirak me, o yogondak aap ambi ta nen Aliku ALA ake iniki ale'nggen nen wogoriyak mbake kenok, wogoriyak aret o.”

⁵

⁶Yorage mbareegi, it aakumi ndarak ndegek inoweewi inom, aap Iterali inanebunu lombok inarum menggaarak inom, it aap ineegin warak ineebe seribu lombok inoweewi inom, 100 lombok inoweewi inom, it aap endagembogut ake yabu eeko menggaarak inom, abok aret iniki ale'nggen nen

⁷Ala awi wuriyak ake pogo logonet, mbuti emas aaninggin dua ratus lima puluh ribu pugwi, mbuti perak aaninggin tiga ratus empat puluh lima ribu pugwi, mbuti tembaga aaninggin enam ratus sepuluh ribu pugwi, mbuti abe mbuti aaninggin tiga juta empat ratus lima puluh ribu pugwi,

⁸ndi, it aap yugum onggo nggwok nogo mendek wonage kenok, waganogo at Aliku ALA awi wuriyak me, ake pugu pogo menggam unde aap Nggeroton mendek endage Yekiyen nogo wogogwi, eereegwaarak.

⁹It aakumi nogo inoweewi inamendek ili yuulik iniki ale'nggen nen, “Aliku ALA ake wogori o,” mba'nuk, nggaruk togon wogogwi iinok, it iniki ale'nggen mbakwi, ndi, at endagembogut Ndawut kunduk, togop aret iniki ale'nggen ambik age, eereegwaarak.

¹⁰At Ndawut nen aakumi kuwak eerak nogo abok inenggaanom paga Aliku ALA alut eeke logonet, “Kaliku nogoba ALA wa! Ninombo Iterali ogoba kat aret o. Aa'nduk nen nok, peebi kuli, Kendage mondok-mondok tiyappogo logowak o.

¹¹ Kaliku nogoba ALA o. Mbogut-nggween unde wonage kat aret me, Yi aap ndi aap iigak, Kat mondok iya, komaawi ambik, Kendage tiyanak, kayuk warak, Aakumi nen wiigugo agaarik o. Kaliku nogoba ALA o. Yi aap ndi aap inabu'me piinok, Wonogo menggam tebenak iigak, Kat kabu'me piinok, Wonage menggenom abu tiyanak aret o. Yi mendek ndi mendek abok tebenak iigak, Kalik mban tiyanak inarum wonage o.

¹²Yi mendek ndi mendek kat mban unde wonage me, Aakumi ineenggi warak eeppiige, Aap inayuk warak logorak eeppiige, Eeke menggendak o. Kat mban keenggi omaawi wonage, Yi mendek ndi mendek porogo wonage, Eeke menggendak me, Aakumi inendage tiyappiige, Yi aap ndi aap inomaawi eeppiige, Eeke menggendak o.

¹³Togop aret me, nogoba Ala o. Yogondak, Wa, lombok yokkugwi, Kat kendage tiyanak mondok iya me, Kalut eekwi, Eeko ogoorik o.

¹⁴An inom, aakumi an napuri yi inom, niniki nen yi mendek ndi mendek ninili yuulik iya negen wokkogoorak yi, nit meek aret niigak kwe, kat wokkiruwok nduk, eerogo pinanggendak o. Yi mendek ndi mendek abok aret kat nen wo'nirage menggendak me, kat kamendek aret wokkogo o.

¹⁵Nit ninombomini maan wonogogwaarak pogom, nit yi, kenegen keegak, aap alik mendek nggiru negen aret wonogo ogoorik o. Ndi, nit nda'nogogurak eyom ari nage ti, inagalu'mak pogom aret wonage me, nit nen ambi eya mbanugun lek aret o.

¹⁶Kaliku ninogoba Ala wae. Kendage mondok alik leenak nogo, tiyappagago logowam kawi wuriyak yi mendek ndi mendek mondok iya lombok kuwak eerogo pi wogoorak yi, abok aret kat nen wo'niragandak kamendek nogo aret pi wogo o.

¹⁷Nogoba Ala o. Aakumi inabut mbangge, it iniki abe paga kiri wogwe iinok, kinikilom inombake, eeke menggendak neenu me, yi mendek ndi mendek kuwak eerogo pi wagarak yi, niniki abe paga ale'nggen logonet, kake pege, ndi, it aakumi kat kapuri yi kunduk, iniki ale'nggen paga inamendek kuwak eerogo pi wogwe iige nagarik, an togon niniki ale'nggen mbake, eeke agarik o.

¹⁸Ninombomini Abarakam, Itak, Iterali, inogoba Kaliku ALA wae. It kapuri iniki nen kake pi woroorak uugwe mbakaarak nogo, mondok-mondok uugwe mbakwi, ndi, Ninogoba Ala kat mban mondok-mondok mukkeren noorak koonggwi, eeko logowak nduk, eeppiige,

¹⁹ndi, an naput Talomo nogo nen, Eerikit aret, mba'nuk iniki aganggen kerek togon, Yogop ee'nu ndogop ee'nu, wone yugu inom, eeko logorak wone inom, wone lengganak inom, nggirik-nggerok porogo logonet eerit nage, o nggwok abe wuriyak an nen yi mendek ndi mendek kuwak eerogo pigirak nogo paga wuke, eeke logowak nduk, eeppege, eeru o,” yinuk, tamban eereegerak.

²⁰Tamban eeke nagagerik, at Ndawut nen aakumi apit kuwak aago nogo yorage logonet, “Aliku kinogoba Ala endage tiyappogo logonip o,” yorage mbareegi, it aakumi abok nen inombomini inogoba Aliku Ala endage tiyappogo logonet, abu'me tebe yinuk, alut eekwi, inowe endagembogut abu'me tebe yinuk, ayuk wukwi, eereegwaarak.

²¹Ti eeko nogogwaarik, ko'lu tapi ngguunok seribu inom, ndomba ngguunok seribu inom, ndomba ngguunok ineebe awo mendek seribu inom, abok aret warogo Aliku ALA ake kani kunggo logonet, Ala ake anggur amburu kilirogo pugwi, ndi, Iterali inake ambik aret warogo Ala wogogwi, eereegwaarak.

²²Ne ti eyom Aliku ALA enggaanom iniki ale'nggen lombok paga inagi inom, inambi inom, nunggugwaarak. Nunggo nogogwaarik, “At Ndawut aput Talomo ti, ninowe endagembogut logowak o,” yinuk, Aliku ALA enggaanom paga inowe endagembogut logonet, wone lengganogo yorage logowak nduk ne ambinom amburu eerogo mippugwi, at Tarok Ala unde logowak nduk mippugwi, eereegwaarak.

²³ Ti eeko mbareegwa, at Aliku ALA abu'me piinok wonage menggim endagembogut logonet wone lengganogo yorage logorak Ndawut obaane'me Talomo aret ari unggwagagerak. Ari unggwage nagagerik, at op mban eerit nage kenok, it Iterali mendek abok aret oone konembunuk, eeko nogogwaarak.

²⁴Ndi, it aap endagembogut inom eeko menggaarak inom, it aap wim nambuka inoweewi inom, at endagembogut Ndawut apuri apit aret inom, it abok nen yogo logonet, “At Talomo ti, ninowe endagembogut aret me, oone konenggo logowok o,” yinuk, yereegwaarak.

²⁵Ndi, it aakumi Iterali abok aret inigen iigak, at Aliku ALA nen Talomo endage mondok iya tiyappege nagagerik, at endagembogut aga'lek kagak it Iterali inoweewi inendagembogut inendage tiyanak wonogogwa kwak lek at endage mondok alik negen tiyappege mbareegi, endage wiganinuk nage nagagerak.

²⁶At Itayi aput Ndawut nogo, it aakumi Iterali abok aret inowe endagembogut a'nuk,

²⁷ o Keboron logonet wone lengganogo yorage kagak, tahun 7 eeke, ndi, o Yerutalem logonet wone lengganogo yorage kagak, tahun 33 eeke, eereegerak. Ndi, it aakumi Iterali abok aret wone lengganogo yorage kagak, lambuk togon tahun ti, 40 aret eereegerak.

²⁸At Ndawut nogo ti, eenggi warak lombok endage mondok tiyanak logonet, eenik nggorek wonagagerik, anggok a'nuk, iniki tayenak logonet, kangge mbareegi, obaane'me aput Talomo aret endagembogut agagerak.

²⁹At Ndawut endagembogut logonet, wone lengganogo yorage, aap wakaa'ngget logonet, awim tebenogo piinet nage, yi wone ndi wone at oba age, Iterali inoba age, Iterali enaagan-ambokan yi aap ndi aap inendagembogut inabu'me piinok wonogo menggam wone agan nugwi, aa'nduk nen nok, age yobok kuli eerit nage nagagerak nogo abok aret, at abinggaanggo kaga Tamuwen eeke nagagerak liiru mbanak paga inom, Ala nen yoge kagak yoraga Natan eeke nagagerak liiru mbanak paga inom, abinggaanggo kaga Nggat eeke nagagerak liiru mbanak paga inom, mbinik-mbenak eerak liiru mbanak wonage o.