Read Western Dani 1 Mbinineegwaarak 4 Bible Online

1 Mbinineegwaarak 4 - Western Dani bible

1 Mbinineegwaarak 4

¹At Yekura paga wigannarit wundi wogogwaarak nogo ti, Yekura aput aap Peret nen Ketoron ndake, Ketoron nen Karimi ndake, Karimi nen Kut ndake, Kut nen Tiyoban ndake, eereegwaarak ti aret.

²At Tiyoban aput Ereyaya nen aput Yakat ndake, Yakat nen Akumayi inom, Lakat inom, ndaganake, eereegwaarak. It aap inanebunu Tora mendek nogo ti aret.

³At Etam nen apuri aap ndaganabeegerak nogo ti, Yiteren, Itama, Irabat aret. It iniriluk kolaga endage ti, Kateleloponi aret.

⁴At Punuwen nen aput Nggerot ndake, ndi, at Etet nen aput Kuta ndake, eereegwaarak. Aap Eparata aput manggu ndarak aap Mbe'lekem ogoba Kut nogo paga wiganak ti aret.

⁵Tekowa ogoba Atikut nogo ti, akuwi mbere wogonabeegerak inendage Kela Naara imbirak aret.

⁶Kwe Naara nen at Atiyut obaane'me aagalogwe aap Akutam, Kepet, Temeni, Akatari aret ndaganabeegerak. At kwe Naara aagalogwe ndaganabeegerak nogo ti aret.

⁷Kwe Kela nen aagalogwe aap ndaganabeegerak ti, Teret, Yetokat, E'nan, Kot aret.

⁸At Kot nogo nen Anup ndake, Katobeba ndake, eereegerak. Ndi, aap Karun aput Akaraken paga wiganak inogoba at aret.

⁹Aap Yabet ti, agalo nen, “Enegen paganak andi yagan wake logonet, ndakirak me, endage ti, Yabet aret o,” yinuk, toonogo pereegerak me, orewologwe inendage lek negen iigak, at mban endage tiyanak aret wonagagerak.

¹⁰At Yabet nogo nen Iterali inogoba Ala yoge, “Kale'nggen noba panege logonet, nanggween ambe wigarogon wo'nege, aaninggin noba kwi'nage logonet, andi-pandi ee'nake kero, keenggi nggorek paga noba'nake, narum wonage, eeke logot o,” yinuk, tamban eeke mbareegi, nggino yoreegerak nogo at Ala nen ndak-ndak aret eeppereegerak.

¹¹At Tuka oreeluk Kelup nen aput Mekit ndake, Mekit nen aput Eton ndake, eereegwaarak.

¹²At Eton nen aput Mbet-Arapa inom, Pateya inom, aap It-Nakat ogoba Tekina inom, ndaganabeegerak. Aakumi Ereka mendek wigannogogwaarak it aap ti aret o.

¹³At Kenat nen apuri aap ndaganabeegerak ti, O'niyen Teraya imbirak aret. At O'niyen nen apuri aap ndaganabeegerak ti, Katat Mewonotayi imbirak aret.

¹⁴At Mewonotayi nen aput Opara ndareegerak. Ndi, at Teraya nen aput Yowap ndake, Yowap nen aput endage O Wuka Kobappaga ndake, eereegwaarak. Aap O Wuka Kobappaga apuri wiganak apit ti, o wuka mendek aret me, it inogoba endage ti, O Wuka Kobappaga aret yogo nogogwaarak.

¹⁵At Yepune aput Kalep nen apuri aap ndaganabeegerak ti, Iru, Ela, Naam aret. Ndi, at Ela nen aput aap ndareegerak ti, Kenat aret.

¹⁶At Yekalelen nen apuri aap ndaganabeegerak ti, Tip, Tipa, Tireya, Ataren aret.

¹⁷At Etara nen apuri aap ndaganabeegerak ti, Yetet, Meret, Epet, Yalon aret. Ndi, at Pirawun apuluk Mbika nogo, at Meret nen wagangge nagagerik, Miriyam ndake, Tamayi ndake, ndi, aap Etemowa ogoba Yitaba ndake, eereegerak. Ndi, at Meret akwe Yekura mendek ti nen aap Nggerot ogoba Yeret ndake, at Toko ogoba Kebet ndake, at Tanowa ogoba Yekutiyen ndake, eereegerak.

¹⁹At aap Nakam iriluk aap Koriya akwe nogo nen aagalogwe aap ndaganabeegerak ti, aap Nggarimi mendek Kekila ogoba inom, aap Maaka mendek Etemowa ogoba inom, nogo aret o.

²⁰At Timon nen apuri aap ndaganabeegerak nogo ti, Amonon, Irina, Mben-Kanan, Tilon aret. Ndi, at Yiteyi paga wiganak ti, Toket Mben-Toket imbirak aret o.

²¹At Yekura aput Tela paga nen aap ndaganabeegerak nogo ti, Leka ogoba Et inom, Mareta ogoba Lara inom, ti aret. At paga wiganak ti, it aakumi ligi yawenak paga yum yogo menggaarak o Mbet-Atibeya wonogwe inom,

²²aap Yokim inom, it Koteba mendek inom, it o Mowap unde wonogogwaarik, ti'nuk, iniyokan iname o Mbe'lekem wogogwaarak aap Yowat Tarap imbirak inom, aret o. It aap inendage inom, inawi kota endage inom, liiru mbanak ti, aa'nduk lombok mbanak aret o.

²³It aakumi ti nogo, o Netayim inom, o Nggerera inom, wonogo logonet, aap inowe endagembogut ake nggween nggabok paga yi mendek ndi mendek ogobakkigiko nogogwaarak.

²⁴At Timeyon apuri aap ndaganabeegerak nogo ti, Nemuwen, Yamin, Yarip, Tera, Tawun aret.

²⁵At Tawun nen aput Talum ndake, at Talum nen aput Mibatam ndake, at Mibatam nen aput Mitama ndake, eereegwaarak.

²⁶At Mitama nen wiganogo piyareegerak nogo ti, at Mitama nen aput Kamuwen ndake, at Kamuwen nen aput Takut ndake, at Takut nen aput Timeyi ndake, eereegwaarak.

²⁷At Timeyi apuri aap 16 ndaganake, ndi, komologwe 6 ndaganake, eereegerak kwe, at oreewi perak, inapuri ambik ndaganabulik me, it aakumi Yekura ineebe ambik wigannogogwa kwak wigannarulik.

²⁸ It nen o Mberetiyeba inom, Molara inom, Katat-Tuwan inom,

²⁹Mbilaka inom, Etem inom, Tolat inom,

³⁰Mbetuwen inom, Korama inom, Tikalak inom,

³¹Mbet-Marakabot inom, Katat-Tutim inom, Mbet-Mbiri inom, o Taarayim inom, wonogogwaarak. It kota-kota time wonogwe iigak, at Ndawut endagembogut aret agagerak.

³²It inapuri wiganak nogo ti, kota Etam inom, Ayin inom, Irimon inom, Token inom, Atan inom, kota 5 kuli ti paga aret wonogogwaarak.

³³Ndi, o kota 5 kuli enaagan-ambokan o yaga'lelo mbuulogwe-mbaalogwe ambik aret o Mba'an kuli inom aret wonogogwaarak me, inawi kota-kota time aret wonogogwaarak. Wonogo logonet, inapuri-inombowologwe nda'narit wundi wogwe iinok, inendage liiru mbanogo pogo nogogwaarak o.

³⁴Aap Metobap inom, Yamalek inom, Amatiya aput Yota inom,

³⁵Yowen inom, ndi, Atiyen nen Teraya ndake, Teraya nen Yotibaya ndake, Yotibaya nen Yeku ndake, eereegwaarak me, aap Yeku nogo inom,

³⁶Eliyowenayi inom, Yaakoba inom, Yetokaya inom, Ataya inom, Ariyen inom, Yetimiyen inom, Mbenaya inom,

³⁷at Temaya nen Timiri ndake, Timiri nen Yeraya ndake, Yeraya nen Alon ndake, Alon nen Tipeyi ndake, Tipeyi nen Tita ndake, eereegwaarak me, aap Tita nogo inom, inendage liiru mbaneegwaarak.

³⁸It aap inendage liiru mbanak ti abok aret nen inanebunu ndarak ndegek inoweewi inarum aret wonagagerak. Inarum wonogwe iigak, inanebunu nggwok aret wigannogogwaarak me,

³⁹inaanggumi inagari'ngga mbanogo noorak meek aret age mbareegi, kwaarit oonegen lagi wage menggim pa'nggwe o Nggerot endekenggwe kobappaga time ari nogogwaarak.

⁴⁰Time ari nanuk, iri'ngga mili lombok abu abe wonage, ndi, o nogo ti, ambe mondok wiganogo pereegerak wonage, o ti paga wone ambi aga'lek abolok lek abu obeelom wonage, eerak kogogwaarak. O ti paga aa'nduk lombok it aakumi Kam mendek wonogogwaarak kwe,

⁴¹it aap inendage liiru mbanak ti nen aap Kitikiya it Yekura inowe endagembogut a'nuk, wone lengganogo yorage kagak, it aakumi Kam mendek ti inom, Mewunim mendek inom, o time inawooliya wuppunuk wonogwe me, inoba kwi'nari unggwogo logonet, inawi kani mbelanogo pugwi, ineebe inoorogo piigwi, eereegwaarak me, o yogondak togop eerak wonage aret o. Togop aret eerogo piinok, o time inaanggumi inake iri'ngga nenet nugu logorak wonage kenok, o time ye mbambatinuk, wonogogwaarak.

⁴²Ndi, aap Yiteyi apuri Pelaka inom, Neyariya inom, Erepaya inom, Utiyen inom, nen it aakumi Timeyon mendek ineebe lima ratus o time oba kwi'nari unggwogogwaarak nogo inoweewi a'nuk, wogoren o Teyit nggelok-nggobok me, it Amalek kole mbaganit ari nogogwam nogome unggwit nanuk,

⁴³ineebe lek eerogo piinok, o time ye mbambatinuk, o yogondak kuli wonogwe aret o.